Ʉlʉpavɨlo lwa vʉmalɨlo
13
1 Ʉlʉ jʉlwiva lwa daatu kwane ʉkwitsa kwanyie.
ɄVʉvɨge ʉVʉvalatse wiita,
“Ʉvʉnangi ʉvʉveetsaga vʉhɨgwagwe wʉ voolye avooleletsi vavɨlɨ evo vadatu.”a
2 Ʉnsɨkɨ ʉpwʉ ndiitsile kwanyie ʉlwa vɨɨlɨ ndyavavʉʉlile ʉkʉta,
ndɨlaava ndikwitsa nandɨlaave nɨ kɨsa na vaanu ʉwʉ vivomba imbiivi.
Lɨno wʉ ndɨlɨ kʉtale nʉʉnyie,
ndikilivukila ʉkʉvavʉʉla ɨlyo ʉkʉta,
nandɨlaave nɨ kɨsa kʉ veene na vange vooni avivomba nda veene.
3 Jʉndivomba ɨlyo ʉlwakʉva mulonda mukɨvone ɨkɨmanyilo ɨkivonia ʉkʉta nda lweli ʉKɨlɨsiti itsova ʉkʉgendela mwane.
ɄKɨlɨsiti ʉjwa nanʼdekedeke,
apeene alɨ na maka,
vɨ mwene ivomba ɨmbombo pagati paanyie.
4 Nʉpwʉ jɨngave ʉKɨlɨsiti aale nʼdekedeke palya ʉpwʉ aatoveliilwe pa kɨdamingʼanie nʉ kʉswa,
lɨno mwʉmi kʉ maka ga Ngʉlʉve.
Vʉvʉle vʉle najyʉwe,
lɨno tʉlɨ vadekedeke ndʉwʉ aale ʉKɨlɨsiti,
napeene mulatʉvona tʉlɨ vʉʉmi kʉ maka ga Ngʉlʉve,
ndʉwʉ alɨwo ʉKɨlɨsiti.
5 Lɨno mwɨlole jyʉnyie,
pakʉta mulʉmanye ɨngave mulɨ mu lwɨdɨko.
Ndeeti,
namulʉmanyili ʉkʉta,
ʉYɨɨsʉ Kɨlɨsiti alɨ mu nʼgati mwanyie?
Ɨngave namulʉmanyili,
apo mwiva mulemilwe.
6 Lɨno tuhʉʉvɨla ʉkʉta ʉnyie jʉmukʉlʉmanya ʉkʉta ʉwe natʉlemilwi.
7 Tukʉnʼdoova ʉNgʉlʉve ʉkʉta muleke ʉkʉvomba imbiivi.
Nakwʉ kʉta tunogwa tʉvoneke tʉnogelanie,
baako!
Peene tunogwa ʉnyie muvombage inonu,
nʉpwʉ jɨngave ʉwe tuvoneka ʉta tʉlemilwe.
8 Manya natʉlɨ nago amaka ga kʉsiga ʉwajɨlweli wa Livangɨli,
apeene ʉkʉgendelela ʉkʉlʉmbɨlɨla ʉwajɨlweli ʉwa ʉnsɨkɨ gwoni.
9 Tuhovoka ʉlwakʉva ʉwe tʉlɨ vadekedeke,
wʉ ʉnyie mulɨ na maka.
Tukʉnʼdoova ʉNgʉlʉve avatange muve vagolosu.
10 Ndikʉvavɨgɨla amamenyu aga wʉ ndɨkaanale ʉkwitsa kwanyie,
pakʉta wʉ ndɨlɨ kwanyie,
ndiitse ndɨleke ʉkʉgavona ʉgwʉ galaweesa ʉkʉmbɨɨka ndɨve nkali.
Manya ndinogwa ʉkʉvombela ʉvʉtavʉlɨlwa ʉwʉ amye ʉNtwa ʉkʉvatanga ʉnyie,
vʉleke ʉkʉva vʉtavʉlɨlwa wa kʉvanyongʼonyola amaka mu lwɨdɨko lwinyo.
Amamenyu ga kʉ vʉmalɨlo paninie nʉ lʉsajo
11 Lɨno vɨɨdɨkivajyango,
ndikʉvalaga ndiita,
mutaamage mu vʉgolosu,
mutseesaniage jyʉnyie kwa jyʉnyie,
muve vʉhange,
muve nʉ lʉnotsehetso.
Nʉ mwene ʉNgʉlʉve ʉnya lʉgano nʉ lʉnotsehetso aveetsage paninie nʉʉnyie.
12-13 Wʉ mukwaganila,
mwɨsaamusaniage pa kɨpambaga.
b Avɨɨdɨki vooni ʉwʉ tʉlɨ paninie apa,
vikʉvasaamusa.
14 Ʉlʉhʉngʉ lwa Ntwa ʉYɨɨsʉ Kɨlɨsiti,
nʉ lʉgano lwa Ngʉlʉve,
nʉ lʉlʉndamano lwa Mepo ʉMbalatse,
siveetsage paninie nʉʉnyie nyɨ vooni.