Imbonekelo tsa Paulo nʉ vʉdekedeke wa mwene
12
1 Pannogye ʉne ʉkwɨginia nʉpwʉ jɨngave nakuvʉmbʉlɨla kɨɨnu.
Lɨno ndinogwa ʉkwɨginia pa kulongwi tsa mbonekelo ni kulongwi itsinge itsʉ amboniitse ʉNtwa ʉYɨɨsʉ.
2 Ndɨmmanyile ʉmuunu mpamato,
a ʉnkongi va Kɨlɨsiti,
ʉvɨ ɨmyaka kɨtsigo na gɨnni (14) ɨgɨlʉtɨngʼiinie,
aatoolilwe akalʉta kʉkyanya,
akatsisika apoonu apalɨ kʉkyanya siitso.
b Wʉ itoolwa,
nandɨlʉmanyili ipange aale mu mmana ʉgʉ,
ipange naale mu mmana ʉgʉ,
apeene ʉNgʉlʉve vɨ mwene alʉmanyile.
3-4 Ndɨlʉmanyile ʉkʉta ʉmuunu ʉjwa aatoolilwe akalʉta kʉkyanya,
akatsisika ʉkʉ kʉ Paladɨsi.
c Lɨno nandɨlʉmanyili ʉkʉta,
ipange aatoolilwe mu mmana ʉgʉ,
ipange naale mu mmana ʉgʉ,
apeene ʉNgʉlʉve vɨ mwene alʉmanyile.
Ʉkʉ akapʉlɨka amamenyu amapala ʉkʉganulwa,
ikange ʉmuunu nitavʉlɨlwa ʉkʉgatsova.
5 Lɨno,
ʉne ndikɨginiaga pa kulongwi tsa muunu ʉjwa.
Nandikɨginihitsa ʉmwʉ ndɨveelye,
ɨkɨɨnu ɨkyʉ ndikɨginihitsa jyʉ kulongwi jya vʉdekedeke wango.
6 Napeene ndɨkaale ndɨve ndinogwa ʉkwɨginia,
nandɨkaale ndɨve mpelwa,
manya ndɨkaale ndiiva nditsova itsa jɨlweli.
Lɨno ndikɨsiga ʉkwɨginia,
pakʉta ʉmuunu ʉvaveetsaga aleke ʉkʉmbona ʉne ʉkʉta ndɨnogye siitso ʉkʉlʉtɨɨlɨla pa tsilya itsʉ vikʉtsivona nʉ kʉtsipʉlɨka ʉkʉhʉma kwane.
7 Lɨno pakʉta ndɨleke ʉkwɨginia eeno pa kulongwi itso itsa kʉdega itsʉ ʉNtwa ʉYɨɨsʉ aamboniitse,
ndɨkapeewa ʉlʉvavo mu mmana gwango ʉlʉvyʉta intwinyo.
d Ʉnsuungʼwa va Setano aasuungʼilwe ammelele ʉlʉvavo ʉlwa,
pakʉta ndɨleke ʉkwɨginia siitso.
8 Pwʉ ʉne ndɨkanʼdoova ʉNtwa kadatu ʉkʉta,
ahetse ʉlʉvavo ʉlwa.
9 Lɨno ʉmwene akambʉʉla akata,
“Ʉlʉhʉngʉ lwango lʉkwɨlanie kwave,
manya mu vʉdekedeke mwʉ mwene amaka gango givonekela.”
Pwʉ lɨno ndikɨginiaga kʉ lʉhekelo ʉlʉvaha pa kulongwi tsa vʉdekedeke wango,
pakʉta amaka ga Kɨlɨsiti gaveetsage paninie nʉʉne.
10 Lɨno ndɨlɨ nʉ lʉhekelo pa kulongwi tsa vʉdekedeke,
ʉkʉdʉkwa,
ʉkʉva mu vʉpala,
ʉkʉva mu vʉkʉvɨlwa nʉ kʉgatatsiwa pa kulongwi tsa Kɨlɨsiti,
manya ʉpwʉ ndiiva nʼdekedeke,
pwʉ ʉKɨlɨsiti ikʉndʉlʉsa.
Ʉlʉtʉngʉtsiimo lwa Paulo pa kulongwi tsa Vakolinto
11 Nditsova ʉngata ndɨlɨ mpelwa.
Ʉnyie nyienye mumbɨɨkile ndɨtsovage ewo.
Ʉnyie pakavanogye ʉkʉnginia,
ʉlwakʉva nʉpwʉ jɨngave ndivoneka ʉkʉta nandɨnogiili,
ʉne ndiita,
nandɨlɨ mpositili ʉvalɨ paasi kʉ valya avivalɨlwa oogo wʉ “vapositili avalʉti.”
12 Wʉ ndɨlɨ kwanyie ndyale nʉ lwɨjʉmɨɨlɨtso nʉ kʉvomba isidego ni simanyilo isivonia ʉkʉta ʉne ndɨlɨ mpositili.
13 Nakɨkʉli ɨkɨveetsaga ɨkyʉ ndɨvombile kʉ mipelela ɨgɨnge ɨkyʉ nandɨvombili kwanyie.
Ipange ɨkɨɨnu ɨkyʉ ndyavombile sivi kwanyie kwʉ kwɨlekelwa kwane ʉkʉva ntsigo kwanyie.
Ɨngave ʉwa wʉ vʉnangi wango,
munsyɨkɨle!
14 Lɨno ndyɨsaawe ʉkwitsa kwanyie ʉlwa daatu,
napeene nandɨkaave ntsigo kwanyie.
Nandinogwa ɨkyʉma kiinyo,
apeene ndikʉvakɨnza ʉnyie.
Nditsova ɨlyo ʉlwakʉva napanogiili ʉkʉvona avaana avadebe vivɨɨka isiinu mu sibaana pakʉta siveetsage sya vahotsi,
apeene avahotsi wʉ vivɨɨka isiinu mu sibaana pakʉta siveetsage sya vaana avo.
15 Ʉne ndɨlɨ nʉ lʉhekelo ʉkʉhʉmya isiinu syango nʉ kwɨhʉmya jyʉne ʉkʉvatanga ʉnyie.
Lɨno jivoneka ʉkʉta ʉpwʉ ʉne ndikwongeletsa ʉkʉvagana siitso,
pwʉ ʉnyie mukwongeletsa ʉkʉleka ʉkʉngana.
16 Nʉpwʉ jɨngave mukwɨdɨka ʉkʉta nandyale ntsigo kwanyie,
napeene avange pagati paanyie viita,
“ɄPaulo insyovi,
ikʉviibata amasaago kʉ nzɨla jya vʉsyovi.”
17 Ndeeti,
ndyavombile ʉvʉsyovi pa vʉsumbe wa kʉtoola ɨkɨveetsaga kwanyie kʉ nzɨla jya vaanu ʉwʉ ndyavasuungʼile?
18 Ndyanʼdoovile ʉTito paninie nʉ mwɨdɨkinʼjiitu ʉjyʉnge pakʉta viitse kwanyie.
Ndeeti,
ʉTito aapokile kwanyie kɨlʉhala ɨkɨɨnu ɨkɨveetsaga?
Mbona ʉne nʉ mwene tʉlɨ numbula mamato mu mbombo,
ikange nalwene ʉlʉgendo lwitu lʉlɨ lʉpamato!
19 Ipange musaaga ʉkʉta ʉnsɨkɨ gwoni ʉgʉ,
tukɨtetela pakʉta muleke ʉkʉtʉvona ʉkʉta tʉlɨ vaviivi pavʉlongolo paanyie.
Ʉwe twitsova aga ʉlwakʉva tʉlɨ vavombi va Kɨlɨsiti,
nʉ Ngʉlʉve alʉmanyile.
Vagane vango,
aga gooni tuvomba pa kʉvatanga ʉnyie mu lwɨdɨko.
20 Lɨno ndidwada ʉkʉta,
ndɨva ndikwitsa kwanyie jʉndivona mulɨ nʉ lʉgendo ʉlwʉ nandikʉlʉhovokela ʉne.
Ɨlyo,
jʉlikʉmmelela ʉkʉvomba ʉgwʉ namukʉgahovokela ʉnyie.
Ndidwada ʉkʉta ndiweesa ʉkʉvona mulɨ ni mbatsa,
nɨ kɨvini,
nʉ lʉviipo,
nʉ mwojo,
nʉ kʉnwangʼilanila,
nʉ kʉheehana,
nʉ kwɨginia nʉ kʉleka ʉkʉva nʉ lʉpʉlɨngʼano.
21 Ikange ndidwada ʉkʉta ndɨva ndikwitsa kwanyie,
ʉNgʉlʉve vango jiikʉmmelela ndɨvone soni pamiiho giinyo.
Jʉndisʉsʉvala wʉ ndivona avaanu vongosu pagati paanyie vatsiige navalaatili imbiivi itsʉ vaavombile.
Vapitsiige valɨ nʉ lʉgendo ʉlʉviivi lwa vʉligu nʉ vʉpʉmu ʉwʉ vaale nawo katale.