ɄPaulo na vapositili va vʉnuasi
11
1 Nʉpwʉ jɨngave nditsova ʉngata ndɨlɨ mpelwa,
ndidoova mummʉlɨhɨtse.
2 Ʉne ndikʉvasaagɨlɨla siitso ʉnyie.
Ʉlʉsaagɨlɨlo ʉlwa lwihʉma kwa Ngʉlʉve,
manya ʉnyie muvyʉta mmɨnza ʉvɨ nammanyili ʉnʼgoosi,
ʉvɨ ndɨkampye indagani tsa kʉtoolwa nʉ nʼgoosi mpamato,
ʉKɨlɨsiti.
3 Lɨno ndidwada ɨlya kʉta,
ndʉwʉ ʉEva aasyovilwe nɨ nyandalwe jɨlya ɨsyovi,
najyʉnyie mugela musyowa nʉ kʉvʉleka ʉvʉgolosu nʉ lwɨmɨko lwinyo kwa Kɨlɨsiti.
4 Nditsova ndavʉle ʉlwakʉva ʉnyie namuhaava ʉkʉmwʉpɨlɨla ʉmuunu ʉvaveetsaga ʉvɨ ikwitsa kwanyie kulʉmbɨlɨla ikulongwi itsʉ natsikwɨdɨngʼana ni kulongwi tsa lweli tsa Yɨɨsʉ itsʉ twavalʉmbɨlye ʉnyie.
Ikange,
namuhaava ʉkʉmwʉpɨlɨla ʉmepo ʉjyʉnge evo ɨkulongwi ɨjyɨnge ɨjyʉ najihwaniini nɨ Livangɨli ɨlyʉ mwʉʉpɨlye ʉkʉhʉma kwawe.
5 Ʉne nakwʉ kʉta ndɨlɨ nʼdebe ʉkʉlʉtɨɨlɨla pa vaanu avo ʉwʉ vikɨvona wʉ “vapositili avalʉti.”
6 Nʉpwʉ jɨngave ndivoneka ʉta nandidavʉla kɨvʉmanyi,
ʉvʉmanyi wango vʉvaha.
Ndɨvoniitse ɨlyo kwanyie ʉnsɨkɨ gwoni ikange imbasu tsyoni.
7 Ndeeti,
ndɨkatulile ɨnongwa ʉpwʉ ʉne ndɨkɨjisiitse pakʉta ndɨvɨɨmɨke ʉnyie kʉ nzɨla jya kʉlʉmbɨlɨla ɨLivangɨli ʉkʉhʉma kwa Ngʉlʉve kɨtsila kʉhombwa?
8 Palya ʉpwʉ ndɨkavombaga ɨmbombo kwanyie,
ndɨkapeewaagwa ʉlʉtangɨlo ʉkʉhʉma mu mipelela ɨgɨnge ɨgya vɨɨdɨki.
Ʉkʉhʉmana nɨɨlyo ndɨkaale ʉta ndipoka isiinu sya veene,
sinnange ʉne wʉ ndikʉvavombela ʉnyie.
9 Wʉ ndɨlɨ paninie nʉʉnyie,
nʉpwʉ jɨngave ndɨkaagɨlwagwa isiinu,
nandɨkahambʉke ndɨve ntsigo kʉ muunu ʉvaveetsaga.
Lola,
avɨɨdɨki avakahʉmile kʉ Makedoniya vakamye isiinu isyʉ ndɨkalondaga ʉkʉva nasyo.
Mwɨlyo,
ndɨkɨsigaga pakʉta ndɨleke ʉkʉva ntsigo kwanyie napadebe,
ikange ndipigendelelaga ʉkwɨsiga.
10 Nditsova ndiita,
ʉkʉkongana nʉ wajɨlweli wa Kɨlɨsiti ʉvʉlɨ mu nʼgati mwane,
nakʉli ʉmuunu ʉvaveetsaga mu mipandʉlʉ gya Akaya ʉvɨ jiikʉnsiga ʉne ʉkwɨginia pa kʉleka ʉkwʉpɨlɨla ʉlʉtangɨlo lwinyo wʉ ndilʉmbɨlɨla kwanyie.
11 Wʉ nditsova ndavʉle nakwʉ kʉta nandɨvaganili ʉnyie,
ʉNgʉlʉve alʉmanyile ʉkʉta ndɨvaganile.
12 Ndipigendelelaga ʉkʉvomba ndʉwʉ ndivomba lɨno,
pakʉta avapositili avo ʉwʉ viita wʉ valʉti,
valemwagwe ʉkwɨginia ʉkʉta vivomba imbombo ndʉʉwe.
13 Avaanu ndaavo vapositili va vʉnuasi,
vavombi vasyovi,
vikɨvɨɨka ʉta vapositili va Kɨlɨsiti.
14 Mwɨlyo natwidega,
manya namwene ʉSetano ikɨvɨɨka ʉngata nsuungʼwa va lʉmuli.
15 Ikange natwidega ʉpwʉ naveene avavombi va mwene vikɨvɨɨka ʉta vavombi vagolosu.
Kʉ vʉmalɨlo valʉʉpɨlɨla ʉgwʉ galɨngʼiine ni mbombo tsa veene imbiivi.
ɄPaulo ikɨginia pa kulongwi tsa vʉkʉvɨlwa wa mwene
16 Ndikʉvavʉʉla ikange ndiita,
ʉmuunu aleke ʉkʉsaaga ʉkʉta ʉne ndɨlɨ mpelwa!
Lɨno nʉpwʉ jɨngave mwita ndɨlɨ mpelwa,
ndikʉvadoova mummʉlɨhɨtse ndʉ muunu ʉvikʉmpʉlɨhɨtsa ʉmpelwa,
pakʉta najyʉne ndyɨginie padebe.
17 Amamenyu ʉgwʉ nditsova lɨno pa kwɨginia,
nandɨlagɨliilwi nʉ Ntwa ʉkʉta ndɨgatsove,
apeene nditsova ndʉ muunu ʉmpelwa.
18 Lola,
ndʉwʉ avaanu vongosu vikɨginia pa kulongwi tsa mbombo tsa mu kɨlʉnga,
pwʉ najyʉne ndyɨginie.
19 Ʉnyie mukɨvona mulɨ nʉ lʉhala,
kyʉ mene mukʉvatoolela ʉmwʉ vaveelye nʉ kʉvɨɨdɨka kʉ lʉhekelo avaanu avapelwa.
20 Mukʉntoolela ʉmuunu ʉmwʉ aveelye,
nʉ kʉmwɨdɨka najyʉmwene ʉvɨ ikʉvavombela ʉta mulɨ vavanda va mwene,
ʉvɨ kɨlʉhala ikʉvahɨɨtsɨla isiinu siinyo,
ikange ikɨjɨmɨka kwanyie nʉ kʉvadʉkɨla ʉnyie.
21 Ndivona soni ʉkʉtsova ʉkʉta,
apo ʉwe twale vadekedeke pa kʉleka ʉkʉvomba ago.
Lɨno nditsova ʉngata ndɨlɨ mpelwa,
ɨngave kwale ʉmuunu ʉvɨ anogye ʉkwɨginia pa kulongwi jya kɨɨnu ɨkɨveetsaga,
najyʉne pannogye ʉkwɨginia.
22 Ɨngave aveene Vaebulaniya,
najyʉne ndɨlɨ Mwebulaniya.
Ɨngave aveene Vaisilahɨli,
najyʉne ndɨlɨ Mwisilahɨli.
Ɨngave aveene va lʉjungu lwa Abulahamu,
najyʉne ndɨlɨ va lʉjungu ʉlwa.
23 Lɨno ndɨtsove ʉngata ndɨlɨ nʉ lʉkwale.
Ɨngave aveene vavombi va Kɨlɨsiti,
ʉne ndɨlɨ mbombi va Kɨlɨsiti ʉkʉlʉtɨɨlɨla pa veene.
Ʉne nditiiga ʉkʉvomba ɨmbombo,
ndɨvalʉtɨɨlye,
manya kakongosu ndyakʉngilwe mu kɨkʉngwa,
kakongosu ndyatovilwe siitso,
kakongosu ndyaponile ʉkwambʉtsa ʉwʉʉmi wango.
24 Ndyatovilwe na Vayahudi isikoti isitsigo sidatu na budikakʉpamato (39).
Vaambombye ndavʉle kahaano.
25 Ndyatovilwe na Valooma kadatu,
ndyatovilwe na maganga kapamato,
ɨmeeli jyannangɨkye kadatu,
ikange ndyataamile ndiseleela mu nyanza pakɨlo na pamuunyi.a
26 Ndyaveetsaga mu lʉgendo ʉlʉtale kakongosu.
Ndyaponile ʉkwambʉtsa ʉwʉʉmi wango mu kʉlovoka ingasi,
nʉ kwʉvʉkɨlwa na vanyambuda.
Wambwene ʉvʉpala wa kʉtowa na Vayahudivajyango nʉ kʉtowa na vaanu avatava Vayahudi.
Ndyaponile ʉkwambʉtsa ʉwʉʉmi wango wʉ ndɨlɨ mu vʉtsenge nʉ wʉ ndɨlɨ mu lʉtengele.
Ndyaponile ʉkwambʉtsa ʉwʉʉmi wango mu mbelo gwa mu nyanza na mu vʉkʉvɨlwa ʉwihʉma kʉ valya avikɨvɨɨka vɨɨdɨkivajiitu.
27 Ndɨvombile imbombo inalamu ikange kʉ vʉpala.
Kakongosu ndɨlɨkʉgona miiho,
ndɨlɨkʉkʉvɨlwa mu lʉkoje,
ndɨlɨkʉtaama nɨ nzala nɨ kyʉmɨlwa.
Ndɨlɨkʉtaama ndihɨpɨlwa nɨ mepo mu ngʼaala wʉ ndɨlɨ vʉvʉle ɨmisabwa gya kwɨswɨka.
28 Paninie naago gooni,
isigono syoni ndigendelela ʉkʉgɨsaagɨla ɨmipelelab gyoni gya vɨɨdɨki.
29 Ɨngave kwale mpamato ʉnʼdekedeke,
najyʉne ndikɨpʉlɨka ndɨlɨ nʼdekedeke.
Ɨngave kwale mpamato ʉvɨ vampɨnziitse pakʉta vampelele avombe ʉvʉtulanongwa,
najyʉne viiva vammɨnziitse.
30 Ɨngave pannogye ʉkwɨginia,
ndikɨginia pa kulongwi tsa vʉdekedeke wango.
31 ɄNgʉlʉve,
ʉDaada va Ntwa ʉYɨɨsʉ,
ʉvɨ anogye ʉkwɨmɨkiwa sikutsooni,
alʉmanyile ʉkʉta nanditsova ʉvʉnuasi.
32 Wʉ ndɨlɨ mu vʉtsenge wa Damesiki,
ʉndongotsi va mpandʉlʉ ʉgwale paasi pa lʉdeeva lwa nkʉlʉdeeva ʉAleta,
aavɨɨkile avaloleeli pa milyango gya vʉtsenge ʉwa pakʉta vannyibate.
33 Lɨno avaanu vaninie vakambɨɨka mu kɨtʉndʉ ɨkɨvaha,
vakannyʉmya kʉnzi ʉkʉgendela pa ndwelo ɨjyale mu lʉvɨgo lwa maganga lwa vʉtsenge ʉwa,
ndɨkakuluka ʉkwibatwa.c