ɄPaulo ikʉvaanda avaanu avikʉmʼbeda
10
1 Lɨno,
ʉne ndɨ Paulo ndɨ ʉnyie mwita ndɨlɨ nʼdeke wʉ ndɨlɨ paninie nʉʉnyie,
ikange mwita ndɨlɨ nkali wʉ ndɨlɨ kʉvʉtale nʉʉnyie,
ndikʉvadoova mu lwɨjiso na mu vʉdeke wa Kɨlɨsiti,
2 ndɨpya ndikwitsa kwanyie muleke ʉkʉmmelela ndɨve nkali.
Lola,
ndiweesa ʉkʉva nkali kʉ vaanu vooni ʉwʉ visaaga ʉkʉta ʉwe tukonga itsa vʉnogwe ʉvʉviivi wa mmana.
3 Nʉpwʉ jɨngave tutaama mu kɨlʉnga,
natwilwa ɨligoha ʉngata vaanu va mu kɨlʉnga ɨkɨ.
4 Isilwɨlo sya ligoha liitu isyʉ tulwɨla nasya mu kɨlʉnga,
apeene silwɨlo isinya maka ʉkʉhʉma kwa Ngʉlʉve.
Sivejanga amabooma gooni ga valʉgʉ.
Tunangania amamenyu gooni ga vʉnuasi.
5 Tunangania ʉlwɨjɨmɨko ʉlʉveetsaga ʉlukʉvasiga avaanu valeke ʉkʉmmanya ʉNgʉlʉve.
Ikange tukʉvakwega avaanu vaandʉke amasaago,
pakʉta vasaagage gooni ndʉwʉ inogwa ʉKɨlɨsiti.
6 Tʉpya twivona ʉnyie muvye vɨɨdɨhɨtsi lwoni,
ʉwe pwʉ jʉtukʉvapa ʉlʉvʉngʉ avaanu ʉwʉ navɨɨdɨhɨtsi kʉ manyiiso itsʉ ʉYɨɨsʉ aamanyiisiitse.
7 Ʉnyie mwilola silya isivoneka pamiiho gaanyie.
Ʉmuunu ʉvaveetsaga angave ikɨvona ʉkʉta ʉmwene muunu va Kɨlɨsiti,
alʉmanye ʉkʉta najyʉwe tʉlɨ vaanu va Kɨlɨsiti,
ndʉ mwene.
8 Nandivona soni ʉkwɨginia pa kulongwi tsa vʉtavʉlɨlwa ʉwʉ ʉNtwa atʉpye,
manya ʉvʉtavʉlɨlwa ʉwa navukʉvananga ʉnyie,
apeene vukʉvatanga mu lwɨdɨko.
9 Lola,
nakwʉ kʉta ndinogwa ʉkʉvadwatsa ʉnyie,
kʉ nzɨla jya kalata itsʉ ndikʉvavɨgɨla.
10 Manya avange viita,
“Mulekage ʉkʉnʼdwada ʉPaulo,
ikalata tsa Paulo tsilɨ na mamenyu makali,
ikange tsilɨ na mamenyu mapala.
Napeene wʉ alɨ paninie nʉʉwe iiva nʼdekedeke,
ikange amamenyu ga mwene nagivonia ʉvʉmanyi wa kʉtsova.”
11 Ʉmuunu ʉvɨ itsova ndavʉle alʉmanye ʉkʉta,
galya ʉgwʉ tukʉvavɨgɨla wʉ tʉlɨ kʉvʉtale,
gwʉ geene ʉgwʉ jʉtukʉgavomba wʉ tʉlɨ paninie nʉʉnyie.
12 Natukɨvɨɨka napadebe mu kɨpʉga kɨpamato,
pange kwɨlɨngʼaania,
na vaanu ʉwʉ vikɨginia vaveene.
Avaanu avo vikɨginia nʉ kwɨlɨngʼaania vaveene kwa veene.
Navakɨmanyili ɨkɨveetsaga.
13 Lɨno ʉwe natukɨginia ʉkʉlʉtɨɨlɨla ɨkɨgelelo kya mbombo ɨjyʉ atʉpye ʉNgʉlʉve.
Ɨmbombo ɨjyo jyʉ jɨlya ɨjyʉ tuvomba na kwanyie.
14 Natulʉtɨɨlɨla ɨkɨgelelo kya mbombo tsiitu wʉ twitsova nʉʉnyie kʉ vʉtavʉlɨlwa,
manya ʉwe weewe twale vatatsi ʉkʉvaleetela ɨLivangɨli lya Kɨlɨsiti.
15 Ikange natukɨginia pa kulongwi jya mbombo jya vaanu avange.
Apeene tuhʉʉvɨla ʉkʉta wʉ ʉlwɨdɨko lwinyo lugendelela ʉkʉkʉla,
pwʉ najyene ɨmbombo jiitu ɨjyʉ twavombile pagati paanyie,
jigendelelaga ʉkʉvaala pagati paanyie na kʉ nzɨla jyanyie.
16 Apo pwʉ jʉtuweesa ʉkʉlʉta kupʉlɨsa ɨLivangɨli mu silʉnga isinge ʉkwʉ ɨLivangɨli ɨlyo nalɨlʉmbɨliilwi.
Manya natunogwa ʉkwɨginia pa kulongwi jya mbombo ɨjɨvombilwe mu kɨlʉnga nʉ muunu ʉjyʉnge.
17 ɄVʉvɨge ʉVʉvalatse wiita,
“Ʉmuunu ʉvaveetsaga ʉvɨ inogwa ʉkwɨginia,
aleke ʉkwɨginia ʉmwene,
apeene kwene anʼginiage ʉNtwa kʉ tsilya itsʉ ʉNtwa ambombye.”a
18 Manya ʉmuunu ʉvaveetsaga ʉvɨ ikɨginia jyʉmwene nikwɨdɨkiwa,
apeene ʉlya ʉvɨ iginiwa nʉ Ntwa.