Ɨkalata ɨnatsi jya Paulo
kʉ Vakolinto
Ikulongwi itsilongola
Ɨkalata ɨjɨ jyavɨgilwe nʉ mpositili ʉPaulo (1:1). Aavɨgile kʉ mpelela gwa kʉ Kolinto. ɄPaulo ʉjwa vɨ aatengʉliitse ʉmpelela ʉgwa. Jivoneka ʉkʉta ɨkalata ɨjɨ jyavɨgilwe mu mwaka gwa sitsigo sihaano na gɨnni (54) Waholilwe ʉYɨɨsʉ Kɨlɨsiti, aavɨgile ɨkalata ɨjɨ wʉ alɨ kʉ vʉtsenge wa Efeso.
Ʉvʉtsenge wa kʉ Kolinto waamanyikiike siitso mu kɨlʉnga kya Vayunaani na mu lʉdeeva lwoni lwa Kɨlooma. Ʉvʉtsenge ʉwa waale kʉ lʉkanzi lwa nyanza jya Meditelaniani. Avaanu vongosu, ʉkʉhʉma imbasu tsyoni, viitsaga kugʉtsa nʉ kʉgʉla isiinu mu vʉtsenge ʉwa. Avaanu avo vaale ni nyiiho itsilɨ pongosu, ndʉ kwɨsaja nʉ kʉteekela kʉ sihwani sya mingʉlʉve gya veene. Inyiiho itso tsikavapelela aVakɨlɨsiti va kʉ Kolinto ʉkwɨhanzɨlɨngʼania mu lwɨdɨko lwa veene.
Ʉvʉsumbe wa kʉvɨga ɨkalata ɨjɨ waale wa kʉtotela ikulongwi itsʉ aapʉliike tsyavombekaga na vɨɨdɨki va kʉ Kolinto na galya aganogye ʉkʉvombwa mu Vʉkɨlɨsiti wa veene. Ikulongwi itso tsyale tsʉ itsi: ʉvʉtegʉlanie, ʉkʉlekengʼana mu mpelela, ʉvʉligu, ʉlʉvaatɨko lwa nyɨsajo, isikʉngɨlwa sya Mepo ʉMbalatse nʉ kʉtsʉʉka avaswe.
Aavɨgile ago pakʉta avatange avɨɨdɨki vataamage vʉnonu, na vaanu vave kɨɨnu kɨpamato.