1 Vakolinto 1

Ɨkalata ɨnatsi jya Paulo

kʉ Vakolinto

Ʉlʉpembetso

1 Ɨkalata ɨjɨ jɨhʉmile kwa mwɨdɨkinʼjiitu ʉSositeni na kwane ndɨ Paulo, ʉne ndɨ ʉNgʉlʉve aannyɨlangile pa vʉnogwe wa mwene ndɨve mpositili va Mesiya ʉYɨɨsʉ. 2 Tukʉvasaamusa nyɨ vampelela gwa Ngʉlʉve, nyɨ mulɨ mu vʉtsenge wa kʉ Kolinto, ʉnyie nyɨ ʉNgʉlʉve avoomwe muve nʉ vʉhange nʉ Mesiya ʉYɨɨsʉ nʉ kʉvɨɨlanga muve vaanu va mwene. Tukʉvasaamusa ʉnyie paninie na vaanu vooni va mbasu tsyoni avihʉʉvɨla ɨlitaawa lya Yɨɨsʉ Kɨlɨsiti, ʉvɨ vɨ Ntwa va veene ikange vɨ Ntwa viitu najyʉwe.

3 Ʉlʉhʉngʉ nʉ lʉnotsehetso ʉkʉhʉma kwa Ngʉlʉve ʉDadajiitu, na kʉ Ntwa viitu ʉYɨɨsʉ Kɨlɨsiti, siveetsage nʉʉnyie.

Ʉlʉsaano lwa Paulo kwa Ngʉlʉve

4 Ndikʉnsaana ʉNgʉlʉve vango isigono syoni pa kulongwi tsyanyie kʉ lʉhʉngʉ ʉlwʉ avapye mwa Mesiya ʉYɨɨsʉ. 5 Mwa Kɨlɨsiti mwʉ mwene ʉNgʉlʉve avapye ʉvʉmosu wa sikʉngɨlwa syoni, mu kʉtsova kwinyo na mu vʉmanyi wiinyo. 6 Ago givonia ʉkʉta, ikulongwi tsa Yɨɨsʉ Kɨlɨsiti itsʉ tulʉmbɨlɨla kwanyie tsa jɨlweli. 7 Lɨno, nakɨkakeepe kwanyie pange kɨkʉngɨlwa kɨpamato kya Mepo ʉMbalatse, wʉ mupʉlɨkɨla ʉkʉkilivuka kwa Ntwa viitu ʉYɨɨsʉ Kɨlɨsiti. 8 Ʉmwene ʉjwa ikʉvakangatsaaga ʉkʉsikila kʉ vʉmalɨlo, pakʉta mukave vagolosu pa kɨgono kɨlya ʉpwʉ ʉNtwa viitu ʉYɨɨsʉ Kɨlɨsiti aliitsa kwihɨga avaanu. 9 ɄNgʉlʉve alavomba aga ʉlwakʉva ʉmwene immʉʉgʉ, ivomba gooni ʉgwʉ aatsovile ʉkʉta alavomba. Ʉjwa vɨ mwene aavɨɨlangile ʉnyie, muve nʉ vʉhange nʉ Mwana va mwene ʉYɨɨsʉ Kɨlɨsiti ʉNtwa viitu.

Ʉvʉnyange mu mpelela

10 Vɨɨdɨkivajyango, lɨno ndikʉvadoova mu litaawa lya Ntwa viitu ʉYɨɨsʉ Kɨlɨsiti, muve vaanu avipʉlɨngʼana, muleke ʉkʉsʉpɨngʼana. Muveetsage kɨɨnu kɨpamato mu tsilya itsʉ musumbilwe ʉkʉvomba ni tsʉ musaaga. 11 Vɨɨdɨkivajyango, avaanu vaninie va mu nyumba jya Kiloe vambʉʉlile ʉne vatye kwanyie kʉlɨ lʉkaani. 12 Lola, nʉ jyʉnge pagati paanyie itsova itsa mwene. Ʉjyʉnge iita ʉne ndɨlɨ va Paulo. Ʉjyʉnge iita ʉne ndɨlɨ va Apoolo. Ʉjyʉnge iita ʉne ndɨlɨ va Kefa. Ʉjyʉnge iita ʉne ndɨlɨ va Kɨlɨsiti. 13 Oogo! Mwivona muvomba vʉnonu ʉkʉlekengʼania ʉmpelela gwa Kɨlɨsiti kʉ nzɨla ɨjɨ? Ndeeti, ʉPaulo vɨ aavaswɨlye pa kɨdamingʼanie pa kulongwi tsiinyo? Ndeeti, mwootsiiwe mu litaawa lya Paulo?

14 Ndikʉnsaana ʉNgʉlʉve, ʉlwakʉva nandyamwotse muunu kwanyie, apeene veene ʉKilisipo nʉ Gayo. 15 Lɨno, nakʉli ʉvɨ iweesa ʉkʉtsova ate ootsiiwe mu litaawa lyango. 16 (Ikange ndyootsiitse avaanu va mu nyumba jya Sitefana. Avo veene wʉ ndyootsiitse. Nandikʉmbuka ɨngave ndyootsiitse ʉmuunu ʉjyʉnge.) 17 Lola, ʉKɨlɨsiti naansuungʼe ʉne kukwotsa avaanu. Ansuungʼile kukwolosa ɨLivangɨli, kɨtsila kʉhʉʉvɨla ʉlʉhala lwango lwa kʉtsova vʉnonu. Ɨngave ndivomba mu lʉhala lwango, pwʉ jiiva ʉvʉswe wa Kɨlɨsiti pa kɨdamingʼanie vʉtsila maka.

Ʉkʉmmanya ʉNgʉlʉve

18 Ɨkulongwi jya kʉswa ʉKɨlɨsiti pa kɨdamingʼanie, kʉ vaanu avijaga vivona vʉtsimu, lɨno kwawe twɨ tupokwa, ɨkulongwi ɨjyo gwʉ maka ga Ngʉlʉve. 19 Ndʉwʉ jɨvɨgilwe mu Vʉvɨge ʉVʉvalatse ʉkʉta,

“Avaanu avanya lʉhala ndivejanga ʉlʉhala lwa veene;

avanya vʉmanyi ndinyalʉla ʉvʉmanyi wa veene.”

20 Lɨno, valɨ ndaku avitsowa ʉkʉta valɨ nʉ lʉhala? Valɨ ndaku avitsowa ʉkʉta wʉ vamanyisi va ndagɨlo? Valɨ ndaku avaanu ʉwʉ valʉmanyile ʉkʉtsova vʉnonu mu sigono isi? ɄNgʉlʉve avoniitse pavʉvalasu ʉkʉta ʉlʉhala lwa kɨlʉnga ɨkɨ wʉ vʉtsimu, 21 manya ʉmwʉ lʉveelye ʉlʉhala lwa Ngʉlʉve, avaanu va mu kɨlʉnga naviweesi ʉkʉmmanya ʉNgʉlʉve mu lʉhala lwa veene. Peene ʉNgʉlʉve aanogilwe ʉkʉvapoka ʉwʉ vikʉmwɨdɨka ʉYɨɨsʉ ʉvɨ ʉwe tulʉmbɨlɨla ikulongwi tsa mwene. Avaanu ʉwʉ navikʉmwɨdɨka ʉNgʉlʉve viita ikulongwi itso tsa vʉtsimu. 22 Lola, aVayahudi vidaja vasivone isimanyilo, aVayunaani vidaja valʉvone ʉlʉhala. 23 Lɨno, ʉwe tulʉmbɨlɨla ɨkulongwi ɨjya kʉta ʉKɨlɨsiti aasue pa kɨdamingʼanie kʉ nongwa tsiitu. Ɨkulongwi ɨjyo, kʉ Vayahudi lʉpɨnza lwa lwɨdɨko, na kʉ vaanu avatava Vayahudi ɨjyo kulongwi jya vʉtsimu. 24 Lɨno, kʉ vaanu ʉwʉ ʉNgʉlʉve aavɨɨlangile vave va mwene, vave Vayahudi evo vave Vayunaani, ʉKɨlɨsiti vɨ maka ga Ngʉlʉve, ikange lwʉ lʉhala lwa Ngʉlʉve. 25 Lola, ʉgwʉ avaanu vikʉgavona ʉkʉta vʉtsimu wa Ngʉlʉve, galʉtɨɨlye ʉlʉhala lwa vaanu. Nʉ gwʉ avaanu vivona vʉdekedeke wa Ngʉlʉve, galɨ na maka ʉkʉlʉtɨɨlɨla amaka ga vaanu.

26 Lɨno, vɨɨdɨkivajyango, kʉmbʉkagi ʉmwʉ mwaveelye pa nsɨkɨ gʉlya ʉpwʉ mwɨɨlangilwe nʉ Ngʉlʉve. Vongosu pagati paanyie vaavonekaga ʉta vavʉla lʉhala pamiiho ga vaanu. Ikange nyɨ vongosu namwale vanzagɨla, pange kʉva muholilwe mu nyumba tsa vɨɨmɨkiwa. 27 Kwʉ kʉta ʉNgʉlʉve aavahalile ʉwʉ avaanu va mu kɨlʉnga vikʉvavona vapelwa, pakʉta avajʉlʉʉlɨse avanya lʉhala avo. Ikange ʉNgʉlʉve aavahalile ʉwʉ avaanu va mu kɨlʉnga vikʉvavona vadekedeke, pakʉta avajʉlʉʉlɨse avanya maka avo. 28 Ʉwʉ ʉNgʉlʉve aavahalile, avaanu va mu kɨlʉnga vikʉvavona avo vaanu va vʉvʉle, va kʉbedwa, navivoneka kʉ veene ʉta vaanu, pakʉta avonie ʉkʉta, avaanu ʉwʉ vivoneka vahʉʉvɨlwa siitso, vavʉla lʉvʉmbʉlɨlo kʉ mwene. 29 Aavombile ɨlyo pakʉta ʉmuunu ʉvaveetsaga aleke ʉkwɨginia pamiiho ga Ngʉlʉve, 30 manya ʉNgʉlʉve vɨ mwene avavɨɨkile ʉnyie muve vaanu va Mesiya ʉYɨɨsʉ. Ʉmwene ʉKɨlɨsiti vɨ atʉpye ʉlʉhala lwa Ngʉlʉve, kwʉ kʉta kʉ nzɨla jya Yɨɨsʉ, ʉwe tʉlɨ vagolosu pamiiho ga Ngʉlʉve, tʉlɨ vavalatse, ikange tʉgombwilwe. 31 Pwʉ lɨno, ndʉwʉ jɨvɨgilwe mu Vʉvɨge ʉVʉvalatse, “Ʉmuunu ʉvaveetsaga ʉvɨ inogwa ʉkwɨginia, aleke ʉkwɨginia ʉmwene, apeene kwene anʼginiage ʉNtwa kʉ tsilya itsʉ ʉNtwa ambombye.”