Ʉkʉlʉmbɨlɨla ɨkulongwi jya Yɨɨsʉ Kɨlɨsiti
2
1 Vɨɨdɨkivajyango,
ʉnsɨkɨ ʉpwʉ ndiitsile kwanyie kulʉmbɨlɨla ɨkulongwi jya Ngʉlʉve,
nandyalʉmbɨlɨlage pakʉta ndɨvoneke ʉkʉta ʉne ndɨkɨmanyile ʉkʉtsova vʉnonu,
nʉ kwɨvonia ʉkʉta ndɨlɨ nʉ lʉhala.
2 Ndyavombile ewo ʉlwakʉva ndyalamwe ʉkʉleka ʉkʉtsova ɨkɨɨnu ɨkɨnge ɨkɨveetsaga,
peene ʉkʉtsova ikulongwi tsa Yɨɨsʉ Kɨlɨsiti,
nʉ vʉswe wa mwene pa kɨdamingʼanie.
3 Palya ʉpwʉ ndyavamanyiisaaga nʉ kʉlʉmbɨlɨla,
ndyale nʼdekedeke,
ndyale nʉ lʉdwado,
ikange ndyatetemaga siitso.
4 Ʉnsɨkɨ ʉgwa,
nandyatsovage amamenyu ga kʉvakwega mwɨdɨke mu lʉhala lwango,
apeene amaka ga Mepo ʉMbalatse gaavoniaga ɨlweli.
5 ɄMepo aavombaga ɨlyo pakʉta ʉlwɨdɨko lwinyo lʉleke ʉkʉkonga amasaago ga lʉhala lwa vaanu,
apeene lʉve mu maka ga Ngʉlʉve.
Ʉlʉhala ʉlwihʉma kʉ Mepo ʉMbalatse
6 Lɨno,
ʉwe tukʉvavʉʉla avaanu ʉwʉ vadʉlwike mu lwɨdɨko ikulongwi tsa lʉhala.
Napeene,
ʉlʉhala ʉlwa nalwa kɨlʉnga ɨkɨ,
pange nalwa valongotsi va kɨlʉnga ɨkɨ avalɨ nʉ vʉdugo wa kʉlongotsa.
7 Ʉwe twitsova itsisihamiike itsa Ngʉlʉve itsʉ atsivɨɨkile mu lʉvaatɨko lwa lʉhala lwa mwene.
Ʉlʉvaatɨko ʉlwa aalʉsihile kʉmiiho kʉ vaanu.
Ʉlʉhala lwa mwene lwʉ lʉvaatɨko lwa kʉtʉpa ʉwɨɨmɨkiwa wa sikutsooni ʉwʉ ʉNgʉlʉve aalamwe ʉkʉtʉpa wʉ kɨkaanale ʉkʉpelwa ɨkɨlʉnga.
8 Nakʉli nʉ mpamato mu valongotsi va kɨlʉnga ɨkɨ ʉvɨ alɨmanyile ɨlyo,
manya vakaale vave valɨmanyile,
navakaale vantovelele pa kɨdamingʼanie ʉNtwa ʉnya wɨɨmɨkiwa.
9 Paninie nɨɨlyo,
ndʉwʉ jɨvɨgilwe mu Vʉvɨge ʉVʉvalatse,
“Ʉgwʉ ʉNgʉlʉve aavanotsehiitse ʉwʉ vikʉnʼgana,
nakʉli ʉmuunu ʉvɨ agelile ʉkʉgavona pange ʉkʉpʉlɨka,
ikange nakʉli ʉmuunu ʉvɨ agelile ʉkʉgavɨɨka mu numbula jya mwene.”a
10 Lɨno,
kwawe ʉwe,
ʉNgʉlʉve atʉvoniitse ago ʉkʉgendela mwa Mepo va Ngʉlʉve.
Lola,
ʉMepo va Ngʉlʉve ilolengʼania gooni,
naga galɨ kʉvʉtiitu aga Ngʉlʉve.
11 Nakʉli ʉmuunu ʉvɨ iweesa ʉkʉlʉmanya ʉgwʉ ʉmuunu ʉjyʉnge isaaga,
apeene gimanyikika nʉ muunu jyʉjwa mu numbula jya mwene.
Wʉ jɨlɨwo,
nageene ʉgwʉ ʉNgʉlʉve isaaga nakʉli ʉvɨ agamanyile,
apeene gimanyikika kʉ Mepo va Ngʉlʉve.
12 Lɨno,
ʉwe natwʉpɨliili imepo tsa kɨlʉnga ɨkɨ,
apeene twʉpɨlye ʉMepo va Ngʉlʉve,
pakʉta tʉgamanye ʉgwʉ tʉpeevilwe nʉ Ngʉlʉve mu lʉhʉngʉ.
13 Ago gwʉ geene ʉgwʉ twitsova.
Napeene,
natukʉgatsova mu mamenyu ʉgwʉ tʉmanyiisiiwe kʉ lʉhala lwa vaanu,
apeene tukʉgatsova amamenyu ʉgwʉ tʉmanyiisiiwe nʉ Mepo va Ngʉlʉve,
kʉnʉ tuganula ikulongwi tsa Mepo kʉ vaanu ʉwʉ valɨ nʉ Mepo ʉjwa.
14 Pwʉ ʉmuunu ʉvɨ nalɨ nave ʉMepo va Ngʉlʉve,
nikwʉpɨlɨla ʉgwʉ gihʉma kwa Mepo va Ngʉlʉve,
ʉlwakʉva kʉ mwene ago ga vʉtsimu,
ikange nakaweese ʉkʉgamanya,
ʉlwakʉva ʉmuunu ikʉgamanya ago kʉ lʉtangɨlo lwa Mepo mwene.
15 Ʉmuunu ʉvɨ ilongotsiwa nʉ Mepo,
ʉjwa ikʉgamanya gooni.
Lɨno,
avaanu avange naviweesi ʉkʉmmanya ʉmuunu ʉjwa.
16 “Nakʉli ʉvagamanyile amasaago ga Ntwa ʉNgʉlʉve,
pange ʉmuunu va kʉntanga amasaago.”
b
Lɨno,
ʉwe twɨ vɨɨdɨki, tʉpeevilwe ʉkʉgamanya amasaago ʉgwʉ gihʉma kwa Kɨlɨsiti.