Nakʉli ʉnya kwɨginia mu mbombo jya Ngʉlʉve
3
1 Mwe vɨɨdɨkivajyango,
wʉ ndɨlɨ kwanyie nandɨlɨkʉtsova nʉʉnyie nda vaanu ʉwʉ vilongotsiwa nʉ Mepo ʉMbalatse,
apeene ndɨlɨkʉtsova nʉʉnyie nda vaanu ʉwʉ vilongotsiwa nʉ vʉmuunu wa vʉtulanongwa,
ikange nda vaana avanyehe pa kʉmwɨdɨka ʉKɨlɨsiti.
2 Avaana avanyehe viinywa ʉlʉkama,
navipeewa ɨkyakʉlya kya vaanu avavaha.
Pwʉ najyʉne ndyavapye ʉnyie imanyiiso inyebeepe ʉlwakʉva mwale mukaanale ʉkʉdʉlʉka.
Nalɨ lɨno namudʉlwiki,
3 ʉlwakʉva mukaanale mulongotsiwa nʉ vʉmuunu wa vʉtulanongwa.
Oogo,
ɨkɨvini nʉ lʉkaani isilɨ pagati paanyie,
nasivonia ʉkʉta mupitsiige mulɨ nɨ miveele gya kɨlʉnga nʉ kʉvomba ʉngata vanyapanzi?
4 Nditsova ɨlyo ʉlwakʉva ʉmuunu nʉ muunu mwanyie itsova ɨlya mwene,
ʉjyʉnge iita,
“Ʉne ndɨlɨ va Paulo,”
ʉjyʉnge iita,
“Ʉne ndɨlɨ va Apoolo.”
Lɨno,
ago givonia ʉkʉta,
mupitsiige muvomba nda vaanu ʉwʉ navikʉmwɨdɨka ʉNgʉlʉve.
5 Lɨno,
ʉApoolo vɨ veeni?
Na ndɨ Paulo neene veeni?
Ʉwe tʉlɨ vavombi ʉwʉ ʉNgʉlʉve aatʉsuungʼile kukʉvatanga ʉnyie ʉkʉmwɨdɨka.
Nʉ jyʉnge aavombile ndʉwʉ aapeevilwe nʉ Ntwa.
6 Ʉne ndyavyalile imbeju,
ʉApoolo ʉʉhɨlye amagasi,
ʉNgʉlʉve vɨ aametsiitse nʉ kʉkʉtsa.
7 Pwʉ lɨno,
ʉNgʉlʉve ʉvɨ ikʉtsa vɨ mwene va kʉhʉʉvɨlwa,
aleke ʉkʉhʉʉvɨlwa ʉnya kʉvyala evo ʉnya kwʉhɨlɨla amagasi.
8 Ʉvɨ ivyala nʉ vɨ ikwʉhɨlɨla amagasi,
vooni valɨ lʉkɨndɨ lʉpamato.
Nʉ jyʉnge,
ʉNgʉlʉve alampa ʉlʉhombo lwa mwene,
ʉkʉkongana nɨ mbombo jya mwene ɨjyʉ avombile.
9 Lola,
ɨmbombo ɨjyʉ twɨ vooni tuvomba,
tuvomba paninie nʉ Ngʉlʉve.
Ʉnyie mulɨ ndɨ kɨlɨmɨla kya mwene ʉNgʉlʉve,
ikange mulɨ ndɨ litsengo lya mwene ɨlyʉ ikɨtsengela.
10 Kʉ lʉhʉngʉ lwa mwene,
ʉNgʉlʉve aannyʉngʉkye ʉne,
ndʉ ntsenganyumba ʉnya lwʉtsi nʉ lʉhala.
Ʉne ndyatsengile ʉwaalo,
avaanu avange vitsenga pakyanya pa waalo ʉwa.
Lɨno,
avaanu valolage vʉnonu,
ʉmwʉ vitsengela pakyanya pa waalo ʉwa.
11 Lola,
ʉwaalo ʉvʉtsengilwe vɨ Yɨɨsʉ Kɨlɨsiti jyʉmwene.
Navʉkʉli ʉwaalo ʉvʉnge ʉwʉ ʉmuunu iweesa ʉkʉtsenga.
12 Lɨno,
pakyanya pa waalo ʉwa,
ʉmuunu ʉjyʉnge iweesa ʉkʉtsenga nɨ sahabu,
evo nɨ kyʉma,
evo na maganga ga ndalama nyongosu;
ʉjyʉnge iweesa ʉkʉtsenga na mabɨkɨ,
evo nɨ linyasi,
evo nʉ lʉbelege.
13 Napeene,
ɨmbombo jya ntsenganyumba ʉvaveetsaga jɨlavoneka ʉkʉta jɨlɨ ndeeti.
Ɨkɨgono kɨlya ɨkya vʉhɨgi imbombo tsyoni tsilaava pavʉvalasu,
ʉlwakʉva ɨmbombo jya ntsenganyumba ʉvaveetsaga ɨlagelwa nʉ mwoto gwa vʉhɨgi.
14 Ɨngave ɨmbombo jya muunu jitsiga jyɨmile,
ʉmuunu ʉjwa alʉʉpɨlɨla ʉlʉhombo.
15 Lɨno,
ɨngave ɨmbombo jya muunu jiipya,
apo nakapeewe ʉlʉhombo,
napeene ʉmwene jyʉmwene alapokwa,
alaava ndʉ muunu ʉvɨ anyagilwe kʉ mwoto.
16 Oogo,
namulʉmanyili ʉkʉta ʉnyie mulɨ Vʉtaamo ʉVʉvalatse wa Ngʉlʉve,
a ikange ʉMepo va Ngʉlʉve itaama mu nʼgati mwanyie?
17 Lɨno,
ʉmuunu angave inanga ʉvʉtaamo wa Ngʉlʉve,
ʉNgʉlʉve alannanga ʉmuunu ʉjwa.
Lola,
ʉvʉtaamo wa Ngʉlʉve vʉvalatse,
nʉ vʉtaamo ʉwa nyienye ʉnyie.
18 Ʉmuunu ʉvaveetsaga pagati paanyie alɨsyovaga ʉkʉta alɨ nʉ lʉhala.
Ʉmuunu angave ikɨvona ʉkʉta alɨ nʉ lʉhala mu kɨlʉnga ɨkɨ,
ɨvɨɨke mpelwa pakʉta apate ʉlʉhala lwa lweli.
19 Lola,
ʉlʉhala lwa kɨlʉnga ɨkɨ,
vʉtsimu pamiiho ga Ngʉlʉve.
Pwʉ lɨno,
ndʉwʉ jɨvɨgilwe mu Vʉvɨge ʉVʉvalatse,
“ɄNgʉlʉve ikwonza avanya lʉhala mu vʉgelʉngʼania wa veene.”b
20 Ikange jɨvɨgilwe mu Vʉvɨge ʉVʉvalatse,
“ɄNtwa agamanyile amasaago ga vanya lʉhala ʉkʉta gatsila lʉvʉmbʉlɨlo.”c
21 Lɨno,
ʉmuunu ʉvaveetsaga aleke kwene ʉkwɨginihitsa avaanu.
Lola,
ʉwe weewe ʉNgʉlʉve atʉvɨɨkile tʉve va kʉvatanga ʉnyie,
22 ndɨve neene ndɨ Paulo,
evo ave vɨ Apoolo,
evo ave vɨ Kefa.
Ikange ʉNgʉlʉve avapye isiinu syoni sivatangage,
sive sya mu kɨlʉnga,
vʉve wʉʉmi,
evo vʉswe;
evo siinu isyʉ pwʉsile lɨno,
evo isyʉ silaavepwo;
syoni siinyo;
23 najyʉnyie,
mulɨ va Kɨlɨsiti,
namwene ʉKɨlɨsiti va Ngʉlʉve.