Ɨmbombo jya vapositili
4
1 Avaanu vatʉvone ʉkʉta ʉwe tʉlɨ vavombi va Kɨlɨsiti,
twɨ tʉpeevilwe ɨmbombo jya kʉvavonia avaanu ikulongwi tsa Ngʉlʉve itsisihamiike kʉ veene.
2 Lɨno,
ʉmuunu ʉvɨ apeevilwe ɨmbombo,
pwʉ anogye ave mbombi immʉʉgʉ.
3 Kʉ lʉvasu lwango ʉne,
nandivɨɨkɨla ʉntɨma ɨngave ʉnyie nava vaanu avange vikʉnzova ʉne ʉvʉviivi.
Ikange ʉne jyʉne nandikɨsaatsa.
4 Ɨnumbula jyango mbalasu.
Ɨlyo nalikʉmbɨɨka ndɨteetsage ndɨlɨ nʼgolosu,
ʉNtwa vɨ mwene ikʉnnyɨga.
5 Lɨno,
muleke ʉkʉvatsova avaanu ʉvʉviivi wʉ gʉkaanale ʉkʉsika ʉnsɨkɨ ʉgwʉ ʉNtwa aliitsa kwihɨga,
apeene mupʉlɨkɨle ʉkʉsikila ʉnsɨkɨ ʉgwa.
Ʉmwene vɨ alamulika isiinu syoni isyʉ sisihilwe mu ngʼiisi,
nʉ kʉvonia ʉgwʉ galɨ mu numbula tsa vaanu.
Pwʉ ʉNgʉlʉve alavɨɨmɨka vooni ʉwʉ vanogye ʉkwɨmɨkwa.
6 Vɨɨdɨkivajyango,
ndɨtsovile ikulongwi tsyane nʉ Apoolo,
pakʉta tʉve kɨhwani kwanyie.
Kʉ nzɨla ɨjyo,
ʉnyie mugamanye ʉgwʉ gitsowa mu kɨtsovo ɨkɨ,
“Mukongage ʉgwʉ gaavɨgilwe mu Vʉvɨge ʉVʉvalatse.”
Ɨngave mukonga ɨlyo,
namukaave vaanu va kwɨginihitsa ʉmmanyisi ʉjʉ nʉ kʉmʼbeda ʉjyʉnge.
7 Oogo!
Veeni,
ʉvɨ akʉvɨɨkile ʉnogele ʉkʉlʉtɨɨlɨla ʉjyʉnge?
Kɨɨnu kɨki ɨkyʉ ʉlɨ nakyo ɨkyʉ nʉpeevilwi nʉ Ngʉlʉve?
Ʉngave ʉpeevilwe,
kɨki vukɨginia ʉta nʉpeevilwi?
8 Lɨno,
mukɨvona mumalile ʉkwiguta!
Mumalile ʉkʉva vamosu!
Mukɨvona mulɨ vakʉlʉdeeva,
nʉpwʉ jɨngave ʉwe wʉ natʉlɨwo!
Hʉba mukaale muve vakʉlʉdeeva jɨlweli,
pakʉta ʉwe tʉlongotsaage paninie nʉʉnyie!
9 Lɨno,
kwawe ʉwe twɨ vapositili,
ndivona ʉNgʉlʉve atʉvɨɨkile tʉve vaanu va kʉbedwa.
Tʉlɨ nda vaanu ʉwʉ vahɨgilwe ʉkʉbɨha kubudwa pavʉlongolo pa vaanu vongosu.
Tʉvɨɨkilwe ndɨ kɨɨnu kya kʉdega kʉ vasuungʼwa na kʉ vaanu,
mu kɨlʉnga kyoni.
10 Ʉnyie mukʉtʉvona ʉwe tʉlɨ vatsimu,
wʉ tuvomba ɨmbombo jya Kɨlɨsiti,
nʉʉnyie mukɨvona mulɨ vanya lʉhala mwa Kɨlɨsiti.
Ʉwe tuvoneka tʉlɨ vadekedeke,
lɨno ʉnyie mukɨvona mulɨ na maka.
Ʉwe tubedwa,
lɨno ʉnyie mukɨvona mulɨ vɨɨmɨkiwa.
11 Naka kavalɨlo aka,
tʉlɨ nɨ nzala nɨ kyʉmɨlwa,
ikange tʉsuuliike.
Tugendelela ʉkʉtowa ikange tʉlɨ vʉvʉle navʉ vʉtaamo.
12 Tukɨtanga ʉkʉvomba imbombo tsiitu kʉ sivoko siitu jyʉwe.
Wʉ avaanu vikʉtʉdʉka,
ʉwe tukʉvasaja;
wʉ vikʉtʉpelela ʉvʉkʉvɨlwa,
ʉwe twisipa;
13 wʉ vikʉtʉtekela,
ʉwe tukʉvaanda vʉnonu.
Nalɨ lɨno,
tuvoneka ʉta tʉlɨ makakala,
ikange natunogela mu kɨɨnu ɨkɨveetsaga.
14 Nandikʉvavɨgɨla amamenyu aga pakʉta ndɨvajejevʉle,
apeene ndinogwa ʉkʉvavʉnga ʉnyie nyɨ vaana vango nyɨ vagane.
15 Lola,
nʉpwʉ jɨngave mulɨ na vaanu vongosu ʉwʉ vikʉvalela mwa Kɨlɨsiti,
napeene ʉdadajiinyo alɨ mpamato.
Ʉne neene dadajiinyo mwa Mesiya ʉYɨɨsʉ,
ʉlwakʉva ʉne neene ndyale ntatsi ʉkʉlʉmbɨlɨla ɨLivangɨli kwanyie.
16 Lɨno,
ndikʉvadoova muvombage ndʉwʉ ndivomba ʉne.
17 Ɨlyo lyʉ lyene ɨlyʉ lɨmmelye ndɨnsuungʼe ʉTimoti,
ʉmwana vango ʉnʼgane,
ʉvɨ ndikʉmmʉʉvɨla mu mbombo jya Ntwa.
Ndɨnsuungʼile pakʉta avakʉmbʉhɨtsaage ʉlʉgendo lwango lwa Vʉkɨlɨsiti,
nʉ gwʉ ndimanyiisa avaanu va mipelela gyoni.
18 Lola,
avange pagati paanyie valɨ nʉ lwɨtotso,
mu masaago ga veene vivona ʉta nandɨliitse ikange kwanyie.
19 Lɨno,
ɨngave ʉNtwa jiinogwa,
ndihʉʉvɨla ʉkwitsa ʉkwa ngʼaningʼaani.
Apo pwʉ ndɨpikʉlʉmanya amamenyu ʉgwʉ vitsova avo ʉwʉ vikɨtotsa.
Najɨkaave kwene ʉkʉlʉmanya amamenyu ago,
apeene ʉkʉlʉmanya naga maka ga veene ga lwɨdɨko.
20 Lola,
ʉLʉdeeva lwa Ngʉlʉve,
naluvoneka mu mamenyu geene,
apeene na mu maka.
21 Lɨno,
munogwa ndɨvombe kɨki?
Mungave namukʉlʉleki ʉlʉgendo lwinyo ʉlʉviivi ʉlwa,
jʉndɨngiitse jʉndikʉvatanila siitso.
Lɨno,
mungave mukʉlʉleka ʉlʉgendo ʉlwa ʉlʉviivi,
jʉndiiva nʼdeke kwanyie nʉ kʉvagana ʉnyie.