Ʉvʉligu vʉleke ʉkʉvombeka mu mpelela
5
1 Ikulongwi tsipʉlɨkiike ʉkʉta,
kwanyie kʉlɨ vʉligu.
Ikange ʉvʉligu ʉvuvombeka kwanyie navʉgelili ʉkʉvoneka nakʉ kʉ vanyapanzi.
Ndɨpʉliike ʉkʉta kwanyie ʉmuunu iligupa nʉ nʼdala va dadaaje.
2 Kɨki ʉnyie mukɨtotsa!
Mulekile ʉkʉsʉsʉvala nʉ kʉmmetsa ʉmuunu ʉvɨ ivomba ɨlyo pagati paanyie!
3 Ʉne nʉpwʉ jɨngave ndɨlɨ kʉtale nʉʉnyie,
ɨnumbula jyango jɨlɨ paninie nʉʉnyie,
ikange ndɨmalile ʉkʉmmɨga ʉmuunu ʉvɨ ivomba ɨlyo.
4 Ʉnsɨkɨ wʉ mulʉndamana mu litaawa lya Ntwa viitu ʉYɨɨsʉ,
najɨ numbula jyango jiiva paninie nʉʉnyie,
naga maka ga Ntwa viitu ʉYɨɨsʉ giiva paninie nʉʉnyie.
5 Apo munsupulile kwa Setano ʉmuunu ʉjwa pakʉta ʉvʉmuunu wa vʉtulanongwa vʉkʉvɨlwe,
pwʉ ɨnumbula jya mwene jiitse jɨpokwe pa kɨgono kya kʉkilivuka ʉNtwa ʉYɨɨsʉ.
6 Ʉlwɨtotso lwinyo lʉviivi.
Oogo,
namulʉmanyili ʉkʉta ɨkɨlʉve ɨkɨdebe vʉvʉle,
kilʉtsa ɨkɨkando kyoni kya nkate?
7 Pwʉ lɨno mwɨvalatse,
kʉ nzɨla jya kʉmmetsa ʉmuunu ʉntulanongwa pagati paanyie.
Ʉkwa kwiva ndʉ kʉhetsa ɨkɨlʉve,
pakʉta muve ndɨ kɨkando kya nkate ʉmpya ʉgʉtsila kɨlʉve.
Jɨlweli ʉnyie wʉ mulɨwo,
manya ʉNgʉlʉve aammʉmiitse ʉKɨlɨsiti ave neekelo ndɨ ngʼolo ɨjipikʉla jya Pasaka,
a kʉ nzɨla ɨjyo akatʉpoka.
8 Pwʉ lɨno,
tʉleke ʉkʉhekela ɨPasakab nɨ mikate ɨgɨnya kɨlʉve.
Ɨkɨlʉve ɨkyo kwʉ kʉta ʉvʉviivi nʉ vʉnangi.
Apeene tʉhekelage ɨPasaka nɨ mikate ɨgɨtsila kɨlʉve,
ɨjyo jyʉ numbula ɨmbalasu nʉ wajɨlweli.
9 Mu kalata ɨjyʉ ndyavavɨgye,
c ndyavavʉʉlile ʉkʉta,
mwɨlekelwe ʉkʉva nʉ vʉhange na valigu.
10 Nakwʉ kʉta ndyateetsaga mwɨlekelwe ʉkʉva nʉ vʉhange na vooni ʉwʉ valigu,
evo avanya mwojo,
evo avanyambuda,
evo avikɨsaja kʉ mingʉlʉve.
Lola,
ʉkʉvomba ndavʉle kʉvanogye ʉnyie ʉkʉhega mu kɨlʉnga ɨkɨ.
11 Peene ndyavavɨgye ʉkʉta,
mwɨlekelwe ʉkʉva nʉ vʉhange nʉ muunu ʉvɨ ikɨvɨɨka mwɨdɨki ndʉʉnyie,
hʉmbe indigu,
evo alɨ nʉ mwojo,
evo ikɨsaja kʉ mingʉlʉve,
evo nsongelengʼanie,
evo nʼgaatsi,
evo nyambuda.
Ʉmuunu ʉvalɨ ndʉʉjwa,
mwɨlekelwe nakʉ kʉlya nʉ mwene.
12-13 Nditsova ewo,
ʉlwakʉva nambombo jyango ʉkʉhɨga ʉwʉ vatava vɨɨdɨki,
apeene ʉNgʉlʉve jyʉmwene vɨ alavahɨga.
Najyʉnyie munogye ʉkʉvahɨga valya veene avalɨ mu mpelela gwinyo,
ndʉwʉ jɨvɨgilwe,
“Muswɨmage ʉmuunu ʉntulanongwa ʉvalɨ pagati paanyie.”d