Ʉkʉhɨgana kwa vɨɨdɨki
6
1 Ɨngave ʉmwɨdɨki mpamato pagati paanyie alɨ nɨ kɨɨnu kya kʉhɨgana nʉ mwɨdɨkinnine,
kɨki ihɨlɨka ɨnongwa jya mwene kʉ vaanu avanyapanzi wʉ vahɨge?
Ndeeti,
nanogiili ʉkʉhɨlɨka kʉ vɨɨdɨkivanine pakʉta wʉ vahɨge?
2 Namulʉmanyili ʉkʉta avɨɨdɨki wʉ valavahɨga avaanu avatava vɨɨdɨki?
a Lɨno,
ɨngave nyɨ vɨɨdɨki va Ngʉlʉve mulavahɨga avatava vɨɨdɨki,
kɨki mulemwa ʉkʉhɨga inongwa inyebeepe itsihʉmɨla pagati paanyie?
3 Namulʉmanyili ʉkʉta tʉlavahɨga avasuungʼwa?
Ɨngave tʉlavahɨga avasuungʼwa,
kwʉ kʉta muweesa ʉkʉmala inongwa tsiinyo mu vʉtaamo ʉmwʉ mutaama.
4 Lɨno,
kɨki wʉ mugagɨlanie mu vʉtaamo wiinyo,
muhɨlɨka inongwa tsiinyo kʉ vaanu ʉwʉ navikwɨdɨkiwa nʉ mpelela?
5 Nditsova ewo pakʉta muvone soni.
Oogo,
pagati paanyie napali nʉ mpamato ʉnya lʉhala,
ʉvɨ iweesa ʉkʉmala inongwa tsiinyo nyɨ vɨɨdɨki?
6 Lɨno,
ʉnyie mulɨ nʉ lwiho lwa muunu ʉkʉmmɨlɨka ʉmwɨdɨkinnine akahɨgwe na vaanu avanyapanzi!
7 Ʉkʉhɨgana ʉkwa kuvonia ʉkʉta mulemilwe lwoni.
Oogo,
najiiva hʉba ʉkʉndeka ʉmuunu akʉvombele sivi evo akʉpoke ɨkyʉma kyako?
8 Lɨno,
ʉnyie namuvomba ewo,
apeene muvonela nʉ kʉpoka ɨkyʉma nakʉ kʉ vɨɨdɨkivajiinyo!
9 Namulʉmanyili ʉkʉta avatulanongwa navaliingile mu Lʉdeeva lwa Ngʉlʉve?
Muleke ʉkwɨsyova!
Avamalaja,
avaanu ʉwʉ vikɨsaja kʉ mingʉlʉve,
avaligu,
nʉ wʉ viligupa na vagoosivajyavo,
10 avahɨɨtsi,
avanya mwojo,
avagaatsi,
avaheesi,
avanyambuda,
avo vooni navaliingile mu Lʉdeeva lwa Ngʉlʉve.
11 Avange pagati paanyie wʉ valɨwo.
Lɨno,
muvalatsiiwe ʉvʉviivi wiinyo,
muhalilwe pakʉta mumbombelage ʉNgʉlʉve,
nʉ kʉvalɨlwa ʉkʉta munogye pamiiho ga mwene.
Aga gooni ʉmwene avavombye kʉ nzɨla jya Ntwa viitu ʉYɨɨsʉ Kɨlɨsiti,
na kʉ nzɨla jya Mepo va Ngʉlʉve viitu.
Avɨɨdɨki valeke ʉkʉva valigu
12 Avange pagati paanyie viita,
“Isiinu syoni tʉtavʉliilwe ʉkʉvomba.”
Napeene,
nakwʉ kʉta syoni silɨ nʉ lʉvʉmbʉlɨlo.
Nʉpwʉ jɨngave mwita,
“Isiinu syoni tʉtavʉliilwe ʉkʉvomba ndʉwʉ tunogwa,”
lɨno ʉne nandɨkaave mbanda va kɨveetsaga.
13 Ikange avange pagati paanyie viita,
“Ʉpwʉ tʉlɨ nɨ nzala tutavʉlɨlwa ʉkʉlya,
ʉlwakʉva ɨmihana gilonda ɨkyakʉlya.”
Napeene,
gukwitsa ʉnsɨkɨ ʉpwʉ ʉNgʉlʉve alahambʉla ɨmihana giitu nagɨlalondage ɨkyakʉlya.
Lɨno,
muleke ʉkʉtsova ʉkʉta patʉnogye ʉkʉvomba ʉvʉligu,
ndʉwʉ patʉnogye ʉkʉlya wʉ tʉlɨ nɨ nzala.
ɄNgʉlʉve naapele ɨmihana giitu gɨve gya vʉligu,
apeene aapelile gɨve gya kʉmbombela ʉNtwa,
namwene ʉNtwa vɨ ikʉgɨloleela ɨmihana.
14 Pwʉ lɨno ʉNgʉlʉve alatʉtsʉʉsa ʉwe kʉ maka ga mwene,
ndʉwʉ aantsʉʉsiitse ʉNtwa ʉYɨɨsʉ ʉkʉhʉma kʉ vaswe.
15 Ndeeti,
namulʉmanyili ʉkʉta ɨmihana giinyo sipagɨka sya mmana gwa Kɨlɨsiti?
Lɨno,
nda lʉnonu ʉkʉhanza isipagɨka sya mmana gwa Kɨlɨsiti nʉ gwa mmalaja?
Baako!
16 Ʉmuunu ʉvaveetsaga ʉvɨ iligupa iiva mmana mpamato nʉ mmalaja.
Lola,
lɨvɨgilwe mu Vʉvɨge ʉVʉvalatse ʉkʉta,
“Avaanu avo vavɨlɨ viveetsaga immana mpamato.”b
17 Apeene ʉmuunu ʉvaveetsaga ʉvɨ ɨkɨhanza nʉ Ntwa,
ʉjwa iiva numbula mamato nʉ mwene.
18 Mupagage ʉvʉligu.
Ʉvʉtulanongwa ʉvʉnge wooni,
ʉmuunu ivomba kʉnzi kʉ mmana gwa mwene.
c Lɨno,
ʉmuunu ʉvɨ iligupa,
ʉjwa ivomba ʉvʉtulanongwa mu mmana gwa mwene.
19 Ndeeti,
namulʉmanyili ʉkʉta,
ɨmihana giinyo Vʉtaamo ʉVʉvalatse wa Mepo ʉMbalatse ʉvɨ ʉNgʉlʉve aavapye,
ikange itaama mu nʼgati mwanyie?
Lɨno,
ɨmihana ɨgyo nagiinyo,
apeene kyʉma kya Ngʉlʉve,
20 manya mwagombwilwe kʉ lʉhombo ʉlʉlʉti.
Pwʉ lɨno mumwɨmɨkage ʉNgʉlʉve mu mihana giinyo.