Ɨlivʉngʉ lya vʉtegʉlanie
7
1 Lɨno,
pa kulongwi itsʉ mwambɨgye ʉkʉta,
“Lʉnonu ʉnʼgoosi ataamage kɨtsila kʉtegʉla,”
2 nditsova ndiita,
kʉ nongwa jya kʉpaga ingelo tsa vʉligu,
ʉnʼgoosi aveetsage nʉ nʼdala va mwene mwene,
najyʉ nʼdala aveetsage nʉ nʼgoosi va mwene mwene.
3 Ʉnʼgoosi ambombelage ʉnʼdala va mwene ndʉwʉ jɨnogye,
namwene ʉnʼdala ambombelage ʉnʼgoosi va mwene ndʉwʉ jɨnogye.
4 Ʉnʼdala alɨ vʉvʉle ʉvʉtavʉlɨlwa pa mmana gwa mwene,
apeene ʉnʼgoosi va mwene.
Namwene ʉnʼgoosi alɨ vʉvʉle ʉvʉtavʉlɨlwa pa mmana gwa mwene,
apeene ʉnʼdala va mwene.
5 Muleke ʉkwimana,
peene ɨngave mwɨdɨngʼiine ʉkwɨlekelwa kʉ nsɨkɨ nʼdebe vʉvʉle pakʉta mwɨhʉmye ʉkwɨsaja kwa Ngʉlʉve.
Kʉmbele mukilivukilanile ikange,
pakʉta ʉSetano aleke ʉkʉvagela mugwe mu vʉligu wʉ mulemilwe ʉkʉsipa.
6 Ʉpwʉ ndɨvavʉʉlile amamenyu agitavʉla ʉkwɨlekelwa kʉ nsɨkɨ nʼdebe kʉ vʉsumbe wa kwɨsaja,
nakwʉ kʉta ndinogwa ʉkʉvʉʉmɨɨlɨtsa ʉnyie.
7 Ʉne ndinogwa avaanu vooni vave ndʉʉne.
a Lɨno,
baako,
nawʉ jɨlɨwo ʉlwakʉva ʉNgʉlʉve aampye ʉmuunu nʉ muunu ɨkɨkʉngɨlwa kya mwene,
mpamato ɨkɨkʉngɨlwa ɨkɨ,
ʉjyʉnge kɨlya.
8 Lɨno,
ndikʉvavʉʉla avaswɨle na vatava vatoolile avadala,
ʉkʉta lʉnonu vataamage vʉle vʉle ndʉwʉ ndɨlɨwo ʉne.
9 Napeene,
vangave vilemwa ʉkʉsipa,
apo lwiva lʉnonu vategʉle evo vategʉlwe,
ʉlwakʉva hʉba ʉkʉvomba ndavʉle ʉkʉlɨngʼaania nʉ kʉtaama vigatatsiwa nʉ vʉnogwe wa mmana.
10 Naveene avatooliine,
ndikʉvapa ʉlʉlagɨlo.
Ʉlʉlagɨlo ʉlwa nalwane,
apeene lwihʉma kʉ Ntwa ʉYɨɨsʉ:
Ʉnʼdala aleke ʉkʉndeka ʉnʼgoosi va mwene.b
11 Lɨno,
ɨngave ikʉndeka,
aleke ʉkʉtoolwa ʉkʉnge,
angavone ndeeti,
asajane nʉ nʼgoosi va mwene nʉ kʉnkilivukila.
Namwene ʉnʼgoosi,
aleke ʉkʉndeka ʉnʼdala va mwene.
12 Lɨno,
nditsova na vɨɨdɨki avange.
Ʉgwʉ nditsova aga masaago gango,
nandagɨlo tsa Ntwa.
Ɨngave ʉnʼgoosi ʉmwɨdɨki,
atoolile ʉnʼdala ʉvɨ atava mwɨdɨki,
nʉ nʼdala ʉjwa ɨdiike ʉkʉtaama nʉ mwene,
aleke ʉkʉndeka.
13 Namwene ʉnʼdala ʉmwɨdɨki,
ɨngave atoolilwe nʉ nʼgoosi ʉvɨ atava mwɨdɨki,
nʉ nʼgoosi ʉjwa ɨdiike ʉkʉtaama nʉ mwene,
aleke ʉkʉndeka.
14 Lola,
ʉnʼgoosi ʉvɨ atava mwɨdɨki,
namwene kyʉma kya Ngʉlʉve,
ʉkʉgendela mu nʼdala va mwene ʉmwɨdɨki.
Namwene ʉnʼdala ʉvɨ atava mwɨdɨki namwene kyʉma kya Ngʉlʉve ʉkʉgendela mu nʼgoosi va mwene ʉmwɨdɨki.
Ɨkaale ɨleke ʉkʉva ndavʉle,
avaana viinyo vaale viiva vakolelanie,
apeene lɨno vaana va Ngʉlʉve.
15 Lɨno,
ɨngave ʉvɨ atava mwɨdɨki inogwa ʉkʉlekana nʉ nʼgoosi evo nʉ nʼdala ʉmwɨdɨki,
mundeke avombe ɨlyo.
Apo ʉmwɨdɨki ʉjwa nikʉngwa mu vʉtegʉlanie ʉwa,
paninie nɨɨlyo,
ʉNgʉlʉve avɨɨlangile ʉkʉta mutaamage nʉ lʉnotsehetso.
16 Navuweesi ʉkʉlʉmanya!
Ipange ʉve vɨ nʼdala vɨ mwɨdɨki,
ʉnʼgoosi vaako iweesa ave mwɨdɨki ʉkʉgendela mu lwɨdɨko lwako.
Najyʉve vɨ nʼgoosi vɨ mwɨdɨki,
navuweesi ʉkʉlʉmanya ʉkʉta ʉnʼdala vaako iweesa ʉkʉva mwɨdɨki ʉkʉgendela mu lwɨdɨko lwako.
Ʉkʉva nʉ lʉgendo ndʉwʉ aalagye ʉNgʉlʉve
17 Ʉmuunu ʉvaveetsaga ataamage ndʉwʉ ʉNtwa aambɨɨkile,
ikange atsige ndʉwʉ aale ʉnsɨkɨ ʉNgʉlʉve ikʉmwɨlanga.
Ʉlʉ lwʉ lʉlagɨlo lwango kʉ mipelela gyoni.
18 Ɨngave ʉmuunu ʉʉpɨlye ɨnyɨlango jya Ngʉlʉve wʉ atahiliiwe,
ʉjwa aleke ʉkwɨvɨɨka ʉta navombiilwi ɨlyo.
Ikange,
ʉmuunu ʉvɨ ʉʉpɨlye ɨnyɨlango jya Ngʉlʉve ʉnsɨkɨ natahiliiwi,
ʉjwa namwene aleke ʉkʉvombelwa ʉlwiho ʉlwa.
19 Ʉkʉtahili evo ʉkʉleka ʉkʉvomba ɨlyo,
kʉtsila lʉvʉmbʉlɨlo,
apeene ʉkwibata indagɨlo tsa Ngʉlʉve.
20 Pwʉ lɨno,
ʉmuunu ʉvaveetsaga atsige ndʉwʉ aale ʉnsɨkɨ ʉpwʉ ʉNgʉlʉve aamwɨlangile.
21 Ɨngave ʉNgʉlʉve aakwɨlangile wʉ ʉlɨ mbanda,
ɨlyo lɨleke ʉkʉkʉgatatsa.
Napeene,
ʉngave ʉlɨ nɨ nzɨla jya kʉkʉvɨɨka mu vʉvopolwa,
hʉba ʉvombe ɨlyo.
22 Lola,
ʉmuunu ʉvɨ aale mbanda ʉnsɨkɨ ikwɨlangwa nʉ Ntwa ʉYɨɨsʉ,
ʉjwa imbopolwa kʉ Ntwa.
Namwene ʉvɨ aale mbopolwa ʉnsɨkɨ ikwɨlangwa,
ʉjwa imbanda va Kɨlɨsiti.
23 Mwagombwilwe kʉ kyʉma ɨkɨlʉti.
Pwʉ lɨno,
kwʉ baako ʉkʉva vavanda va vaanu.
24 Vɨɨdɨkivajyango,
ʉmuunu ʉvaveetsaga atsige ndʉwʉ aale ʉnsɨkɨ ikwɨlangwa nʉ Ngʉlʉve.
Ɨlivʉngʉ kʉ vɨɨdɨki avatava valɨ mu vʉtegʉlanie, na vaswɨle
25 Lɨno,
kʉ vahɨnza ʉwʉ navatoolilwi,
ndɨlɨ vʉvʉle ʉlʉlagɨlo ʉkʉhʉma kʉ Ntwa.
Napeene,
ndikʉvalʉngɨkɨla mu masaago gaane ʉne ndɨ ndɨlɨ mmʉʉvɨlwa ʉkʉkongana nʉ lʉhʉngʉ lwa Ngʉlʉve.
26 Pwʉ lɨno ʉlwakʉva kʉlɨ vʉpala isigono isi,
ndisaaga ʉkʉta lʉnonu ʉmuunu atsige ndʉwʉ alɨwo.
27 Ndeeti,
ʉtoolile?
Lɨno,
ʉleke ʉkʉnogwa ʉkʉgotola.
Ʉve nʉtoolili?
Lɨno,
ʉleke ʉkʉnogwa ʉkʉtoola.
28 Nʉpwʉ jɨngave vutoola,
nʉvombili ʉvʉnangi.
Najyʉ mmɨnza namwene angave jiitoolwa,
nakaave avombile ʉvʉnangi.
Peene,
ʉwʉ vatooliine viiva nʉ vʉpala wa mu kɨlʉnga.
Nʉʉne ndinogwa ʉkʉvapavɨla pakʉta tsileke ʉkʉvavona itso.
29 Vɨɨdɨkivajyango,
nditsova ndiita,
ʉnsɨkɨ ʉgʉsigye insupi.
Pwʉ lɨno,
ʉkʉhʉma ʉnsɨkɨ ʉgʉ,
valya avatoolile vɨlekelwe ʉkʉsaagɨlɨla avadala va veene kwene.
30-31 Naveene ʉwʉ vilɨla,
ʉwʉ vihekela,
ʉwʉ vigʉla isiinu,
nʉ wʉ vikɨgatatsa ni siinu sya mu kɨlʉnga ɨkɨ,
valeke ʉkʉsaagɨlɨla siitso itso.
Nditsova ewo ʉlwakʉva ɨkɨlʉnga ɨkɨ,
ndʉwʉ tukʉkɨvona,
kilʉtɨngʼania.
32 Pwʉ ndinogwa ʉkʉta mwɨlekelwe ʉkʉva nʉ lʉtʉngʉtsiimo pa kulongwi jya kɨlʉnga.
Ʉmuunu ʉvɨ natoolili,
ikɨhʉmya ʉkʉvomba itsa Ntwa,
isaaga ʉmwʉ jiikʉmmovosa ʉNtwa.
33 Lɨno,
ʉmuunu ʉvɨ atoolile,
ikɨhʉmya ʉkʉvomba itsa kɨlʉnga,
isaaga ʉmwʉ jiikʉmmovosa ʉnʼdala va mwene.
34 Amasaago ga mwene giiva imbasu ivɨlɨ.
Namwene ʉnʼdala ʉvɨ nalɨ mu vʉtegʉlanie,
evo ʉvɨ nagelili ʉkʉtegʉlwa,
ikɨhʉmya ʉkʉvomba ɨmbombo jya Ntwa pakʉta ave va mwene ʉmmana nɨ numbula.
Lɨno,
ʉnʼdala ʉvɨ alɨ nʉ nʼgoosi,
ikɨhʉmya ʉkʉvomba itsa kɨlʉnga,
isaaga ʉmwʉ jiikʉmmovosa ʉnʼgoosi va mwene.
35 Amamenyu aga ʉgwʉ ndikʉvavʉʉla,
nakwʉ kʉta ndinogwa ʉkʉvasiga,
peene ndinogwa ʉkʉvatanga.
Ndinogwa ʉkʉta mutaamage mu nzɨla ɨjɨnogelanie,
kʉnʉ mukʉmbombela ʉNtwa kʉ numbula jyoni.
36 Ʉmuunu ʉvaveetsaga ʉvɨ ivona nakaave ivomba vʉnonu ʉkʉleka ʉkʉntoola ʉmmɨnza ʉvɨ aampye indagani,
ikange nagɨ myaka gya mwene gya kʉvʉʉka gɨlʉtile,
nʉ muunu ʉjwa ivona panogye vatoolane,
avombe ndʉwʉ inogwa,
vatoolane.
Apo nakaave avombile ʉvʉviivi.
37 Lɨno,
angave ʉnʼdɨɨmi alamwe mu numbula jya mwene ʉkʉta nitooli,
alɨ nʉ vʉtavʉlɨlwa wa kʉndeka ʉmmɨnza ndʉwʉ alɨwo.
Napeene iiva avombile vʉnonu.
38 Pwʉ,
ʉvikʉntoola ʉmmɨnza va mwene ʉvɨ aampye indagani ivomba vʉnonu.
Lɨno,
namwene ʉvɨ nikʉntoola,
ivomba vʉnonu ʉkʉlʉtɨɨlɨla.c
39 Ikange,
ʉnʼdala ʉvɨ atoolilwe,
atsige mu vʉtegʉlanie,
ʉnsɨkɨ gwoni ʉgwʉ ʉnʼgoosi va mwene mwʉmi.
Lɨno,
ɨngave ʉnʼgoosi va mwene iiswa,
apo iiva mbopolwa ʉkʉtoolwa kʉ muunu ʉvaveetsaga ʉvɨ ikʉnogwa,
napeene ʉnʼgoosi ʉjwa ave nkongi va Ntwa.
40 Lɨno,
hʉba ʉnswɨle ʉjwa atsige kɨtsila kʉtoolwa.
Ago masaago gango,
ndisaaga ʉkʉta najyʉne ʉMepo va Ngʉlʉve ikʉndongolela ʉkʉtsova amamenyu ago.