Isyakʉlya isyʉ viteekela kʉ mingʉlʉve
8
1 Lɨno,
nditsova ikulongwi tsa syakʉlya isyʉ viteekela kʉ mingʉlʉve:
a Ndɨlʉmanyile mwitsova mwita,
“Ʉwe twɨ vooni tʉlɨ nʉ vʉmanyi.”
Lɨno,
ʉvʉmanyi ʉwa vukʉvavɨɨka muve nʉ lwɨtotso.
Apeene ʉlʉgano lwʉ lwene lukʉvadʉlʉsa avaanu mu lwɨdɨko.
2 Ɨngave ʉmuunu ikɨvona ʉkʉta alɨ nʉ vʉmanyi vʉtʉnga,
ʉjwa nalɨ nʉ vʉmanyi ndʉwʉ anogye ʉkʉlʉmanya.
3 Lɨno,
ʉmuunu ʉvɨ anʼganile ʉNgʉlʉve,
ʉjwa vɨ imanyikika nʉ Ngʉlʉve jyʉmwene.
4 Lɨno,
pa kulongwi ɨjyo ɨjya kʉlya isyakʉlya isyʉ vateekye kʉ mingʉlʉve,
tʉlʉmanyile ʉkʉta ɨmingʉlʉve nakɨɨnu mu kɨlʉnga ɨkɨ.
Ikange tʉlʉmanyile ʉkʉta pwale ʉNgʉlʉve mpamato mwene.
5 Nʉpwʉ jɨngave pwʉsile isiinu isyʉ viita gyʉ mingʉlʉve,
jɨve kʉkyanya evo mu kɨlʉnga,
ikange nʉpwʉ jɨngave pwʉgɨle ɨmingʉlʉve myongosu na vatwa vongosu,
6 lɨno kwawe,
ʉNgʉlʉve alɨ mpamato vʉvʉle,
vɨ Daada,
vɨ mwene apelile isiinu syoni.
Nʉʉwe pwʉtʉle pakʉta tʉmbombelage ʉmwene.
Ikange kwawe,
pwale ʉNtwa mpamato mwene,
vɨ Yɨɨsʉ Kɨlɨsiti,
ʉvɨ ʉkʉgendela mu mwene isiinu syoni sipelilwe,
ikange ʉkʉgendela mu mwene najyʉwe tʉlɨ vʉʉmi.
7 Lɨno,
ʉvʉmanyi ʉwa navalɨ nawo avaanu vooni,
ʉlwakʉva pwʉvale avange ʉwʉ vaale nʉ lwiho lwa kwɨsaja kʉ mingʉlʉve.
Ʉnsɨkɨ viilya isyakʉlya isyʉ siteekiilwe kʉ mingʉlʉve ɨgyo,
sikʉvakilivula ʉkʉsaaga ʉkʉta vikɨsaja kʉ mingʉlʉve gya lweli.
Ikange ʉlwakʉva navadʉlwiki mu lwɨdɨko,
vikɨvona mu numbula tsa veene ʉkʉta vivomba imbiivi.
8 Lɨno,
ɨkyakʉlya,
nakikʉtʉvɨɨka ʉkʉva piipi nʉ Ngʉlʉve.
Tʉngaleke ʉkʉlya,
ʉwe natujatsa kɨɨnu,
ikange ndavɨ tʉlye,
ʉwe natukwongeletsiwa kɨɨnu.
9 Lɨno,
mwɨlole vʉnonu,
ʉvʉtavʉlɨlwa wiinyo vʉleke ʉkʉvajatsɨlɨngʼania ʉwʉ navadʉlwiki mu lwɨdɨko.
10 Lola,
ʉmuunu ʉvɨ nadʉlwiki mu lwɨdɨko,
ɨngave ikʉkʉvona ʉve vɨ ʉlɨ nʉ vʉmanyi ʉlɨ mu nyumba jya kwɨsajɨla kʉ mingʉlʉve,
wiilya ɨkyakʉlya,
ndeeti,
mu numbula jya mwene nakasaage ʉkʉta namwene anogye ʉkʉlya isyakʉlya isiteekiilwe kʉ mingʉlʉve?
11 Pwʉ lɨno,
ʉnnino ʉvɨ nadʉlwiki mu lwɨdɨko,
ʉvɨ ʉKɨlɨsiti aanswɨlye,
ijaga ʉkʉkongana nʉ vʉmanyi waako.
12 Wʉ jɨlɨwo nakʉ kwanyie.
Mungavajatsɨlɨngʼaniage avajiinyo ʉwʉ navadʉlwiki mu lwɨdɨko vavombe imbiivi,
nʉ kʉvalematsa mu numbula tsa veene,
apo mwiva munangile kwa Kɨlɨsiti jyʉmwene.
13 Pwʉ lɨno ɨngave ɨkyakʉlya ɨkyʉ ndiilya kikʉmpelela ʉmwɨdɨkinʼjyango avombe imbiivi,
apo nandɨlaalye lʉsiku ɨkyakʉlya ɨkyo,
pakʉta ʉnʼjyango aleke ʉkwingila mu vʉtulanongwa.