Avavombi va Ngʉlʉve vapeewaagwe isiinu sya kʉvatanga
9
1 Ʉne ndɨlɨ mbopolwa ikange ndɨlɨ mpositili.
Ʉne ndyambwene ʉNtwa viitu ʉYɨɨsʉ.
Ikange ɨmbombo ɨjyʉ ndyavombile kwanyie jyʉ jyene ɨjɨvapelye ʉnyie ʉkʉmwɨdɨka ʉNtwa ʉYɨɨsʉ.
2 Nʉpwʉ jɨngave avaanu avange vikʉmbona ʉne ʉta nandɨlɨ mpositili,
lɨno kwanyie ʉne ndɨlɨ mpositili,
ʉlwakʉva ʉlwɨdɨko lwinyo kwa Kɨlɨsiti kyʉ kɨmanyilo ɨkivonia ʉkʉta ʉne ndɨsuungʼilwe nʉ Ntwa.
3 Pwʉ lɨno avaanu avibeetsa ʉkʉta ʉne ndɨlɨ mpositili,
ndikʉvavʉʉla ndiita,
4 ʉwe tʉlɨ nʉ vʉtavʉlɨlwa wa kʉpeewa isyakʉlya ni syakʉnywa pa kulongwi jya mbombo ɨjɨ.
5 Ikange muleke ʉkʉsaaga ʉkʉta ʉwe,
mpamato mpamato atsila vʉtavʉlɨlwa wa kʉgendania paninie nʉ nʼdala va mwene ʉmwɨdɨki,
ndʉwʉ igaha ʉKefa na vapositili avange na vanuuna va Ntwa ʉYɨɨsʉ.
6 Ndeeti,
ʉne nʉ Balinaba twɨ veene,
weewe tʉtsila vʉtavʉlɨlwa wa kʉpeewa isiinu sya kʉtʉtanga kʉ nongwa jya vʉpositili wiitu?
7 Vɨ nsikali muki ʉviweesa ʉkʉvomba ɨmbombo jya vʉsikali kʉ nzɨla jya kwɨhomba jyʉmwene?
Veeni ʉvivyala isiinu sya mwene,
pwʉ wʉ sidʉlwike aleke ʉkʉlya isiinu isyo?
Ikange veeni ʉvidɨɨma isidɨɨmo,
pwʉ aleke ʉkʉnywa ʉlʉkama lwa sidɨɨmo isyo?
8 Amamenyu aga ʉgwʉ nditsova,
namasaago ga vaanu vʉvʉle,
indagɨlo tsa Moose natsyene wʉ tsiita.
9 Mu ndagɨlo tsa Moose jɨvɨgilwe ʉkʉta,
“Kwʉ baako ʉkʉjɨkʉnga ɨsenga ʉndomo wʉ jisegeja ɨngano pa kɨkʉvatɨlo.”
a Ndeeti,
mu mamenyu aga kwʉ kʉta ʉNgʉlʉve aasaagaga tsi kulongwi tsa senga tsyene?
10 Naatsovage ago pa kulongwi jyawe?
Wʉ jɨlɨwo!
Ʉvʉvɨge ʉwa waavɨgilwe pa kulongwi jyawe,
manya ʉvilɨma ɨkɨlɨmɨla,
nʉ vɨ ibena mu kɨlɨmɨla ɨkyo,
vooni vihʉʉvɨla ʉkʉta jʉvikava amagavo ga veene.
11 Lɨno,
ʉwe tʉlʉmbɨlye ɨLivangɨli kwanyie,
ndʉ muunu ʉvivyala ɨmbeju.
Ndeeti kwiva kʉpala ʉkʉpeewa isiinu ʉkʉhʉma kwanyie isya kʉtʉtanga kɨmmana,
ndʉ muunu ʉvibena?
12 Ɨngave avange valɨ nʉ vʉtavʉlɨlwa wa kʉpeewa isiinu ʉkʉhʉma kwanyie,
lɨno ʉwe,
napatʉnogiili ʉkʉvalʉtɨɨlɨla avo?
Lɨno,
ʉwe natutsigila aganogelanie ʉkʉvombelwa nʉʉnyie,
peene twisipa mu gooni pakʉta tʉleke ʉkʉvasiga avaanu ʉkwɨdɨka ɨLivangɨli lya Kɨlɨsiti.
13 Mulʉmanyile ʉkʉta avivomba ɨmbombo mu tembile,
vipeewa ɨkyakʉlya kya veene ʉkʉhʉma mu syavʉpe sya mu tembile ɨjyo,
kwʉ kʉta avivomba ɨmbombo jya pa kɨteekelelo,
vikwʉpɨlɨla amagavo ʉkʉhʉma mu neekelo.b
14 Ikange ʉNtwa ʉYɨɨsʉ alagye vʉvʉle vʉle ʉkʉta,
avilʉmbɨlɨla ɨLivangɨli,
valitsage ʉkʉhʉma mu mbombo ɨjyo.c
15 Lɨno,
ʉne nandɨgelili ʉkʉtsigila pange kɨɨnu kɨpamato mwago ʉgwʉ ndɨnogye ʉkʉvombelwa.
Ikange nandivɨga itsi pakʉta ndɨvombelwe ago.
Kwane hʉba ʉkʉswa,
ʉkʉlɨngʼaania nʉ kʉsigwa nʉ muunu ʉvaveetsaga pa kwɨginia kwane pa kulongwi jya kʉlʉmbɨlɨla ɨLivangɨli kɨtsila lʉhombo!
16 Napeene,
wʉ ndilʉmbɨlɨla ɨLivangɨli,
napannogiili ʉkwɨginia,
manya ndɨpeevilwe ʉlʉlagɨlo lwa kʉvomba ɨmbombo ɨjyo.
Ikange ndɨswe vʉvʉle ɨngave nandilʉmbɨlɨla ɨLivangɨli ɨlyo!
17 Ndɨkaale ndɨve ndivomba ɨmbombo ɨjɨ kʉ vʉnogwe wango,
ndɨkaale ndihʉʉvɨlaga ʉlʉhombo.
Lɨno,
nditsigilwa ʉkʉjɨvomba,
ʉlwakʉva ʉNgʉlʉve vɨ amye ɨmbombo ɨjɨ pa vʉnogwe wa mwene.
18 Lɨno,
ʉlʉhombo lwango lwʉ lʉlɨku?
Ʉlʉhombo lwango kwʉ kʉlʉmbɨlɨla ɨLivangɨli kɨtsila kʉhombwa,
kɨtsila kʉtsigila ʉgwʉ pannogye ʉkʉpeewa pa kulongwi jya kʉlʉmbɨlɨla ɨkulongwi ɨjɨ.
Galya ʉgwʉ avapositili pavanogye ʉkʉvomba
19 Ʉne nandɨlɨ mbanda va muunu ʉvaveetsaga,
ndɨlɨ mbopolwa.
Lɨno,
kʉ nongwa jya kʉvatanga avaanu vongosu pakʉta vamwɨdɨke ʉKɨlɨsiti,
ndyɨvɨɨkile ʉkʉva mbanda va vaanu vooni.
20 Kʉ Vayahudi,
ndyale ʉngata Nʼyahudi,
pakʉta naveene ndɨvakwege aVayahudi vamwɨdɨke ʉKɨlɨsiti.
Kʉ valya avikonga indagɨlo tsa Moose,
ndyale ʉngata nkongi va ndagɨlo (nʉpwʉ jɨngave nandyale mbanda va ndagɨlo),
pakʉta ndɨvakwege avakongi va ndagɨlo vamwɨdɨke ʉKɨlɨsiti.
21 Kʉ valya avatava Vayahudi,
ʉwʉ navikonga indagɨlo itso,
ndyale ʉngata nandɨlɨ Nʼyahudi,
pakʉta ndɨvakwege vamwɨdɨke ʉKɨlɨsiti.
Nakwʉ kʉta nditaama kɨtsila kʉkonga indagɨlo tsa Ngʉlʉve.
Baako,
ndikonga,
manya ndilongotsiwa ni ndagɨlo tsa Kɨlɨsiti.
22 Kʉ valya ʉwʉ navadʉlwiki mu lwɨdɨko,
ndyale ʉngata muunu ʉvɨ nadʉlwiki mu lwɨdɨko,
pakʉta ndɨvakwege vamwɨdɨke ʉKɨlɨsiti.
Ndyavombile gooni kʉ vaanu vooni,
pakʉta kʉ nzɨla ɨjɨveetsaga jɨlya ndɨvapoke vaninie mu veene.
23 Ndivomba aga gooni kʉ nongwa jya Livangɨli,
pakʉta ndɨhange paninie na vange ʉlʉsajo lwa lyene.
24 Namulʉmanyili ʉkʉta avaanu ʉwʉ vigelanila ʉlʉvɨlo,
vooni vikɨkupila ʉkʉnyila,
napeene ʉvɨ ikwʉpɨlɨla ʉlwokelo alɨ mpamato?
Pwʉ munyilage siitso,
pakʉta najyʉnyie mukʉʉpɨlɨle ʉlwokelo.
25 Avaanu avigelanila pa nkino,
vitala taasi vivomba itsa kʉgɨtsooveletsa ɨmihana gya veene,
wʉ nagʉsiiki ʉnsɨkɨ gwa kʉgelana.
Vivomba ago nʉpwʉ jɨngave vikwʉpɨlɨla ʉlʉdingʼulilo ʉlwʉ nalwinana.
Apeene ʉwe tuvomba ndavʉled pakʉta twʉpɨlɨle ʉlʉdingʼulilo ʉlwʉ nalʉlanangɨke lʉsiku.
26 Vʉvʉle vʉle najyʉne nandinyila ndʉ muunu ʉvɨ inyila kɨtsila vʉsumbe,
ikange nandiilwa ndʉ muunu ʉvɨ ikuda kʉ maka imbuli tsa mwene pavʉvʉle.
27 Apeene ndikʉgʉpelela ʉvʉkʉvɨlwa nʉ kʉgʉtsooveletsa ʉmmana gwango ʉkʉkangala,
pakʉta wʉ ndɨvalʉmbɨlye avaanu avange ɨLivangɨli,
ʉne jyʉne ndiitse ndɨleke ʉkʉbeelwa pamiiho ga Ngʉlʉve.