1 Vakolinto 10

Avɨɨdɨki valeke ʉkʉmbipitsa ʉNgʉlʉve

1 Vɨɨdɨkivajyango, ndinogwa mukʉmbʉkage ʉkʉta avanyienya viitu wʉ vilʉtɨngʼania mu lʉkɨnga, vooni vaalongotsiwaagwa nɨ livɨngo, ikange vooni vaalʉtɨngʼiinie pagati pa nyanza. 2 Wʉ vilongotsiwa nɨ livɨngo ɨlyo nʉ kʉgenda pagati pa nyanza, vooni vakava vootsiiwe vave vakongi va Moose. 3 Vooni vakalya ɨkyakʉlya kɨkɨninie ɨkyʉ ʉNgʉlʉve aavapye. 4 Ikange vooni vakanywa amagasi gamaninie ʉgwʉ ʉNgʉlʉve aavapye kʉ nzɨla jya kɨdego, ʉkʉhʉma mu lʉnalaawe. Ʉlʉnalaawe ʉlwa aale vɨ Kɨlɨsiti ʉvɨ aagendaga paninie navo. 5 Lɨno, vongosu mu veene, vaavombaga ʉgwʉ ninogwa ʉNgʉlʉve. Ago gakavapelela avoongometse, nɨ misimba gya veene gɨkajelevala mu lʉkɨnga.

6 Lɨno, ikulongwi itsi tsivye sihwananitso kwawe pa vʉsumbe wa kʉtʉpavɨla, pakʉta tʉleke ʉkʉtsigana imbiivi ndʉwʉ aveene avo vaatsiganile. 7 Mulekage ʉkwɨsaja kʉ mingʉlʉve ndʉwʉ vaavombaga avange mu veene avo, ndʉwʉ jɨvɨgilwe mu Vʉvɨge ʉVʉvalatse ʉkʉta, “Avaanu vaataamile vakalya nʉ kʉnywa, kʉmbele vakɨɨma pa kʉnema ʉlʉnemo ʉlʉhangile nʉ vʉligu.” 8 Ikange tʉleke ʉkʉva valigu ndʉwʉ avange mu veene avo vaale valigu, vakoongometswa avaanu ʉkʉsikila avaelufu isitsigo sivɨlɨ na vadatu (23,000) mu kɨgono kɨpamato. 9 Ikange tʉleke ʉkʉnʼgela ʉKɨlɨsiti kʉ nzɨla jya kʉvomba imbiivi nda vange mu veene ʉwʉ vaanʼgelile, vakalʉmwa ni nzoka, vakaswa. 10 Ikange mulekage ʉkwɨlwenga nda vange mu veene ʉwʉ vɨɨlwengile, vakabudwa nʉʉlya ʉnsuungʼwa ʉmbejangi.

11 Lɨno, ago gooni ʉgwʉ gaavombiike kʉ veene, gaavɨgilwe pakʉta gave sihwananitso pa kʉtʉpavɨla ʉwe twɨ tutaama mu sigono isi isya kʉ vʉmalɨlo. 12 Pwʉ lɨno ʉvɨ ikɨvona ʉkʉta ɨmile vʉnonu mu lwɨdɨko, ɨlolelage pakʉta aleke ʉkʉgwa. 13 Ingelo itsikʉviitsila ʉnyie, tsilɨ nda tsilya itsʉ nava vaanu avange vigelwa isigono syoni. Lola, ʉNgʉlʉve immʉʉgʉ, ʉmwene nakavaleke mugelwagwe ʉkʉlʉtɨɨlɨla amaka giinyo. Ʉnyie wʉ mugelwa, ʉmwene ikʉvapa amaka ga kʉkangala, ikange ikʉvapa nɨ nzɨla jya kʉhʉmɨla.

Ɨlivʉngʉ pa kulongwi jya Siinu iSivalatse

14 Pwʉ lɨno vagane vango, mulagelaga napadebe ʉkwɨsaja kʉ mingʉlʉve. 15 Nditsova nʉʉnyie, ʉnyie nyɨ mulɨ nʉ lʉhala, mulamule vʉnonu ʉgwʉ nditsova. 16 Ndeeti, wʉ tukʉnsaana ʉNgʉlʉve pa kulongwi jya kɨkombe kɨlya ɨkyʉ tunywela pa Siinu iSivalatse, natwiva vʉhange jyʉwe ikange vʉhange nʉ Kɨlɨsiti mu nkisa gwa mwene? Ikange wʉ tumenyula ʉnkate nʉ kʉlya, apo natwiva vʉhange mu mmana gwa mwene? 17 Lola, ʉnkate gʉlɨ mpamato, nʉpwʉ jɨngave ʉwe tʉlɨ vongosu, tʉlɨ mmana mpamato, ʉlwakʉva ʉwe twɨ vooni twilya ʉnkate gʉʉgʉlya mpamato.

18 Mulolage kʉ Vaisilahɨli. Wʉ viilya isyʉ vateekye pa kɨteekelelo, viiva vikɨhanza paninie pa kwɨsaja kwa Ngʉlʉve. 19 Lɨno, ndinogwa ʉkʉtsova lɨlɨku? Ndeeti, isiinu isyʉ avaanu va kwanyie viteekela kʉ mingʉlʉve silɨ nʉ lʉvʉmbʉlɨlo ʉlʉveetsaga? Ikange nagyene ɨmingʉlʉve, ndeeti gɨvye gya lweli? 20 Baako! Ɨkyʉ nditsova kyʉ ɨkɨ, ineekelo itsʉ vihʉmya avanyapanzi, navikʉmpa ʉNgʉlʉve, apeene vikʉgɨpa ɨmingʉlʉve. Ʉne nandinogwa ʉkʉta ʉnyie muve nʉ vʉhange wa kwɨsaja kʉ mingʉlʉve. 21 Napanogiili ʉkʉta munywitsage mu kɨkombe kya Siinu iSivalatse sya Ntwa, ikange munywitsage mu kɨkombe kya mingʉlʉve. Vʉvʉle vʉle, napavanogiili ʉkʉlya iSiinu iSivalatse sya Ntwa, pwʉ ikange mulye isiinu sya mingʉlʉve. 22 Ndeeti, tunogwa ʉkʉmbipitsa ʉNtwa? Ndeeti, tʉlɨ na maka ʉkʉlʉtɨɨlɨla amaka ga mwene?

Itsʉ avaanu vivomba tsimwɨmɨkage ʉNgʉlʉve

23 Avange viita, “Ʉwe tʉtavʉliilwe nʉ Ngʉlʉve ʉkʉvomba isiinu syoni.” Lɨno, ʉne ndiita, nakwʉ kʉta isiinu syoni silɨ nʉ lʉvʉmbʉlɨlo. Ikange viita, “Ʉwe tʉtavʉliilwe nʉ Ngʉlʉve ʉkʉvomba isiinu syoni.” Lɨno, ʉne ndiita, nakwʉ kʉta isiinu syoni sitangɨla avaanu ʉkʉdʉlʉka mu lwɨdɨko. 24 Ʉmuunu aleke ʉkʉvɨɨkɨla ʉntɨma tsilya tsyene itsikʉntanga ʉmwene, apeene avɨɨkɨlage ʉntɨma siitso itsikʉvatanga avanine.

25 Inyama itsʉ vigʉtsa mu soko mulitsage kɨtsila kʉvʉʉtsa tsihʉmile ndaku, pakʉta muleke ʉkʉlemala mu numbula tsiinyo, 26 manya mu Vʉvɨge ʉVʉvalatse jɨvɨgilwe ndee, “Ɨkɨlʉnga paninie ni siinu syoni isyʉ silɨmwo sya Ntwa.”

27 Ʉmuunu ʉvɨ namwɨdɨki angave avɨɨlangile kwilya, nʉʉnyie mwɨdɨkye ʉkʉbɨha, mulitsage kɨtsila kʉvʉʉtsa isiinu syoni isyʉ ikʉvasugila, pakʉta muleke ʉkʉlemala mu numbula tsiinyo. 28 Lɨno, ʉmuunu angavavʉʉle ate, “Ɨnyama ɨjɨ jya kɨdɨɨmo ɨkyʉ vakateekye kʉ mingʉlʉve,” apo muleke ʉkʉlya kʉ nongwa jya muunu ʉvɨ avavʉʉlile, ikange kʉ nongwa jya kʉhɨgwa mu numbula. 29 Ʉpwʉ ndiita, “Kʉ nongwa jya kʉhɨgwa mu numbula,” nandikʉvatsova ʉnyie, apeene nditsova ʉmuunu ʉvɨ avavʉʉlile. Lola, ʉkʉhɨgwa kwa numbula jya muunu ʉjyʉnge, kʉleke ʉkʉdɨnda ʉvʉvopolwa wiitu. 30 Ɨngave ʉwe twilya ɨkyakʉlya ɨkyo pa kʉnsaana ʉNgʉlʉve, tʉleke ʉkʉhɨgwa kʉ nongwa jya siinu isyʉ tʉnsaanile ʉNgʉlʉve.

31 Lɨno, ɨkɨveetsaga ɨkyʉ jʉmwilya evo mwinywa, evo ɨkɨnge ɨkɨveetsaga ɨkyʉ mupya muvomba, muvombage pa kʉnʼginia ʉNgʉlʉve. 32 Mulekage ʉkʉvapɨnza aVayahudi, pange avatava Vayahudi, pange ʉmpelela gwa Ngʉlʉve. 33 Muveetsage ndʉʉne, ndikɨtanga ʉkʉta pa kulongwi jya gooni ʉgwʉ ndivomba, avaanu vooni vagahovokelage. Nakwʉ kʉta ndivomba ewo pakʉta ndɨvʉmbʉlɨle jyʉne, apeene vavʉmbʉlɨle avaanu vongosu, pakʉta vakave ʉvʉpoki.