11
1 Pwʉ mwɨgɨlɨle kwane,
ndʉwʉ najyʉne ndyɨɨgɨɨlye kwa Kɨlɨsiti.
Inyiiho tsa lʉlʉndamano lwa lwɨsajo
2 Ndikʉvaginia ʉlwakʉva mukʉngʼʉmbʉka mu gooni nʉ kwibata imanyiiso itsʉ ndyʉʉpɨlye nʉ kʉvamanyiisa.
3 Lɨno,
ndinogwa mulʉmanye ʉkʉta,
ʉntwea gwa nʼgoosi vɨ Kɨlɨsiti,
ʉntwe gwa nʼdala vɨ nʼgoosi,
nʉ ntwe gwa Kɨlɨsiti vɨ Ngʉlʉve.
4 Pwʉ ʉnʼgoosi ʉvaveetsaga ʉvɨ iswala ɨkɨveetsaga kʉ ntwe wʉ ilongotsa ʉlwɨsajo,
evo wʉ ipʉlɨsa ɨlimenyu lya Ngʉlʉve,
ʉjwa ikʉnkotsa isoni ʉKɨlɨsiti ʉvɨ vɨ ntwe gwa mwene.
5 Namwene ʉnʼdala ʉvɨ niswala ɨkɨtambala kʉ ntwe,
wʉ ilongotsa ʉlwɨsajo,
evo wʉ ipʉlɨsa ɨlimenyu lya Ngʉlʉve,
ʉjwa iiva ikʉnkotsa isoni ʉnʼgoosi va mwene,
ʉvɨ vɨ ntwe gwa mwene,
manya iiva ʉngata nʼdala ʉvakeetile kɨpʉjʉ.b
6 Ɨngave ʉnʼdala niswala ɨkɨtambala kʉ ntwe,
pannogye akeete inzwɨlɨ tsa mwene.
Lɨno,
ʉlwakʉva tsa soni kʉ nʼdala ʉkʉkeetwa inzwɨlɨ,
hʉba aswale ɨkɨtambala kʉ ntwe.
7 Najinogelanila kʉ nʼgoosi ʉkʉswala ɨkɨveetsaga kʉ ntwe,
manya ʉmwene kyʉ kɨhwani kya Ngʉlʉve,
ikange ivonia ʉwɨɨmɨkiwa wa Ngʉlʉve.
Lɨno,
ʉnʼdala alɨ nʉ wɨɨmɨkiwa wa nʼgoosi,
8 manya ʉNgʉlʉve naambʉmbe ʉnʼgoosi ʉkʉhʉma kʉ nʼdala,
apeene aambʉmbile ʉnʼdala ʉkʉhʉma kʉ nʼgoosi.
9 Ikange ʉNgʉlʉve naambʉmbe ʉnʼgoosi kʉ nongwa jya nʼdala,
apeene aambʉmbile ʉnʼdala kʉ nongwa jya nʼgoosi.
10 Pa kulongwi ɨjyo,
na pa kulongwi jya vasuungʼwa avikʉtʉlola,
ʉnʼdala pannogye ʉkʉswala ɨkɨtambala kʉ ntwe pa kʉvonia ʉvʉtavʉlɨlwa ʉvʉlɨ pakyanya pa mwene.
11 Lɨno,
mwa Ntwa ʉKɨlɨsiti,
ʉnʼdala ikʉmmʉʉvɨla ʉnʼgoosi,
namwene ʉnʼgoosi ikʉmmʉʉvɨla ʉnʼdala,
12 manya ʉnʼdala aapelilwe ʉkʉhʉma kʉ nʼgoosi,
napeene namwene ʉnʼgoosi iholwa nʉ nʼdala,
apo isiinu syoni sihʉma kwa Ngʉlʉve.
13 Lɨno,
mulamule jyʉnyie.
Ndeeti,
panogye ʉnʼdala ʉkwɨsaja kwa Ngʉlʉve kɨtsila kʉswala ɨkɨtambala kʉ ntwe?
14 Lola,
nagɨ mihana gɨgyene givonia ʉkʉta ʉnʼgoosi angave ni nzwɨlɨ nale tsa soni kʉ mwene,
15 nʉ nʼdala angave ni nzwɨlɨ nale kwʉ kwɨnotsa,
c ʉlwakʉva apeevilwe inzwɨlɨ inale ʉkʉta tsiveetsage ʉngata nsabwa gwa kʉdɨnda ʉntwe.
16 Lɨno,
ɨngave ʉmuunu ʉvaveetsaga inogwa ʉkʉkaanika,
ʉwe nagɨ mipelela gya Ngʉlʉve natʉlɨ nalwo ʉlwiho ʉlwa ʉlwʉ mukwʉmɨɨlɨtsa lʉvepwo.
Inyiiho tsa pa Siinu iSivalatse
17 Lɨno,
pa kulongwi itsʉ ndinogwa ʉkʉvalagɨla,
nandikʉvaginia,
manya wʉ mulʉndamiine namuvomba itsinya lʉvʉmbʉlɨlo,
apeene muvomba itsivʉla lʉvʉmbʉlɨlo.
18 Ndɨpʉliike ʉkʉta wʉ mulʉndamana mu mpelela,
namupʉlɨngʼana.
Mwago ʉgwʉ ndɨpʉliike,
agange ga lweli.
19 Pagati paanyie,
ndajɨve ndeeti ʉkwɨgava kuhʉmɨla,
pakʉta valya ʉwʉ vanogye pamiiho ga Ngʉlʉve vamanyikike.
20 Lola,
wʉ mulʉndamiine namwilya iSiinu iSivalatsed ʉmwʉ jinogelanila,
21 manya avange pagati paanyie viilya ngʼaningʼaani ɨkyakʉlya kya veene kɨtsila kʉhanga na vajyavo.
Ɨlyo likʉvavɨɨka avange vave nɨ nzala,
avange vave vagaalile.
22 Itsi tsa soni!
Mulɨ vʉvʉle inyumba ʉkwʉ muweesa ʉkʉtaama pakʉta mulye nʉ kʉnywa?
Kɨki mwibeda ʉmpelela gwa Ngʉlʉve nʉ kʉvajʉlʉʉlɨsa avavʉla kɨɨnu?
Ndɨvavʉʉle lɨlɨku?
Ndɨvaginiage?
Baako!
Pa kulongwi ɨjɨ nandɨkavaginie.
23 Nditsova ewo,
manya imanyiiso itsʉ ndyʉʉpɨlye kʉ Ntwa tsʉ tsyene ndyavapye ʉnyie.
Ndyavavʉʉlile ʉkʉta,
ɨkɨlo jɨlya ɨjyʉ ʉNtwa ʉYɨɨsʉ aasupuliilwe kʉ valʉgʉ,
aatoolile ʉnkate,
24 akansaana ʉNgʉlʉve,
akamenyula,
akata,
“Tooli,
litsagi,
ʉgʉ gwʉ mmana gwango,
ʉgʉhʉmiitswe kʉ nongwa tsiinyo.
Wʉ muvombage vʉle vʉle,
pa kʉngʼʉmbʉhɨtsa ʉne.”
25 Wʉ vamalile ʉkʉlya,
ʉYɨɨsʉ akatoola ɨkɨkombe kya divai,
akansaana ʉNgʉlʉve,
akavavʉʉla akata,
“Ɨkɨkombe ɨkɨ kya lwɨdɨngʼano ʉlʉpya,
ʉlwʉ ʉNgʉlʉve jiivomba nʉʉnyie kʉ nzɨla jya kʉduudika ʉnkisa gwango kʉ nongwa jyanyie.
Wʉ muvombage vʉle vʉle,
ʉnsɨkɨ gwoni wʉ mwinywa,
pa kʉngʼʉmbʉhɨtsa ʉne.”
26 Lola,
wʉ mwilya ʉnkate ʉgwa nʉ kʉnywa ɨkɨkombe ɨkyo,
mwiva mupʉlɨsa ʉkʉswa kwa Ntwa ʉkʉsikila ʉpwʉ alaava ikwitsa.
27 Ʉmuunu ʉvaveetsaga ʉvɨ iilya ʉnkate ʉgwa nʉ kʉnywa ɨkɨkombe kya Ntwa ɨkyo ʉmwʉ najinogelanila,
iiva atulile ɨnongwa,
ʉlwakʉva ibeda ʉmmana nʉ nkisa gwa Ntwa.
28 Pwʉ lɨno nʉ jyʉnge ɨvʉʉtsaage taasi jyʉmwene,
pwʉ alitsage ʉnkate nʉ kʉnywa ɨkɨkombe,
29 manya ɨngave ʉmuunu iilya ʉnkate nʉ kʉnywa ɨkɨkombe kɨtsila kʉlʉmanya itsinogelanie mu vʉhange wa mwene nʉ mmana gwa Ntwa,
e ʉjwa iiva ikɨvɨɨka jyʉmwene mu vʉhɨgi wa Ngʉlʉve.
30 Ɨkɨ kyʉ mene pwʉvale vongosu pagati paanyie ʉwʉ vadekedeke na vatamu,
ikange avange vasue.
31 Lɨno,
tʉkaale tʉve twɨhɨgile jyʉwe taasi,
ndalɨno ʉNgʉlʉve natʉvʉngili ndavʉle.
32 Napeene,
tʉngave tuvʉngwa lɨno nʉ Ntwa,
apo twiva tumanyiisiwa pakʉta kʉmbele wiitse vʉleke ʉkʉtʉvona ʉvʉpala paninie na vaanu ʉwʉ navikʉmwɨdɨka ʉNgʉlʉve.
33 Pwʉ lɨno vɨɨdɨkivajyango,
wʉ mulʉndamana pa kʉlya,
mupʉlɨkɨlanilage.
34 Ɨngave ʉmuunu alɨ nɨ nzala,
alitsage kʉ nyumba jya mwene,
pakʉta ʉkʉlʉndamana kwinyo kʉleke ʉkʉvapelela ʉkʉhɨgwa.
Pa kulongwi itsinge itsisigye,
ndɨte ndɨpya ndikwitsa,
jʉndikʉtsilɨngʼaania tsyoni.