Isikʉngɨlwa sya Mepo ʉMbalatse
12
1 Lɨno,
vɨɨdɨkivajyango,
nandinogwa muleke ʉkʉlʉmanya vʉnonu ikulongwi tsa sikʉngɨlwa isihʉma kwa Mepo ʉMbalatse.
2 Mulʉmanyile ʉkʉta wʉ mulɨ vanyapanzi,
mwasyowaagwa nʉ kʉlongotsiwa mwɨsajage kʉ mingʉlʉve ɨgyʉ nagitsova.a
3 Pwʉ lɨno ndikʉvavʉʉla ʉkʉta,
ʉmuunu ʉvaveetsaga ʉvɨ ilongotsiwa nʉ Mepo va Ngʉlʉve nakaweese ʉkʉtsova ʉkʉta,
“ɄYɨɨsʉ akootwilwe.”
Ikange ʉmuunu ʉvaveetsaga angave nilongotsiwa nʉ Mepo va Ngʉlʉve nakaweese ʉkʉtsova ʉkʉta,
“ɄYɨɨsʉ vɨ Ntwa.”
4 Lola,
pwʉsile isikʉngɨlwa isilɨ pongosu,
lɨno ʉvigava isikʉngɨlwa isyo vɨ jyʉ Mepo jyʉjwa.
5 Ikange ʉvʉvombeli kʉ Ntwa vʉlɨ pongosu,
lɨno ʉNtwa ʉvivombelwa alɨ jyʉjwa mpamato.
6 Ikange imbombo tsivombwa kʉ nzɨla itsilɨ pongosu,
lɨno ʉNgʉlʉve vɨ mwene ikʉvapa avaanu vooni amaka ga kʉvomba imbombo itso tsyoni.
7 Nʉ jyʉnge itangɨlwa nʉ Mepo ʉkʉvomba ɨmbombo,
pakʉta avaanu vooni vatanganage,
8 manya ʉjyʉnge apeevilwe nʉ Mepo amamenyu ga lʉhala,
ʉjyʉnge apeevilwe amamenyu ga vʉmanyi nʉ Mepo jyʉjwa mpamato.
9 ɄMepo jyʉjwa mpamato,
ikʉmpelela ʉmuunu ʉjyʉnge ave nʉ lwɨdɨko,
ʉjyʉnge ikʉmpa ɨkɨkʉngɨlwa kya kʉponia avatamu,
10 ʉjyʉnge ʉkʉvomba isidego,
ʉjyʉnge ʉkʉpʉlɨsa ɨlimenyu lya Ngʉlʉve,
ʉjyʉnge ʉkʉtsimanyingʼania imepo imbiivi nʉ Mepo ʉMbalatse,
ʉjyʉnge ʉkʉtsova inzovele iimya,
nʉ jyʉnge ʉkwandʉla inzovele itso.
11 ɄMepo vɨ mwene ikʉvapa avaanu vooni amaka ga kʉvomba imbombo itso tsyoni,
ikʉmpa nʉ jyʉnge ɨkɨkʉngɨlwa kya mwene ndʉwʉ inogwa jyʉmwene.
Ʉmmana mpamato gʉlɨ ni sipagɨka syongosu
12 Lɨno,
ʉmmana gʉlɨ ni sipagɨka syongosu,
syoni isyo silɨ mmana mpamato.
Ndʉmwʉ gʉveelye ʉmmana,
wʉ jɨlɨwo na kwa Kɨlɨsiti.
13 Ʉwe twɨ vooni,
jɨve wʉ Vayahudi evo jɨve wʉ vatava Vayahudi,
jɨve vavanda evo jɨve vavopolwa,
twɨ vooni twootsiiwe nʉ kʉpeewa ʉMepo mpamato,
ʉMepo ʉMbalatse,
pakʉta tʉve mmana mpamato,
14 manya ʉmmana nagwiva kɨpagɨka kɨpamato,
apeene gʉlɨ ni sipagɨka syongosu.
15 Ɨngave ɨkɨlʉnde kiita,
“Ʉlwakʉva ʉne nandɨlɨ kɨvoko,
pwʉ nandɨlɨ va mmana,”
ndeeti,
ɨkɨlʉnde ɨkyo nakiiva kya mmana pa kulongwi ɨjyo?
16 Najyene ɨmbʉlʉkʉtʉ jɨngate,
“Ʉlwakʉva ʉne nandɨlɨ liiho,
pwʉ nandɨlɨ va mmana,”
ndeeti,
najiiva jya mmana pa kulongwi ɨjyo?
17 Gʉkaale ʉmmana gwoni gʉve liiho,
kʉkaale kwiva ndeeti ʉkʉpʉlɨka?
Evo ʉmmana gwoni gʉkaale gʉve mbʉlʉkʉtʉ,
kʉkaale kwiva ndeeti ʉkʉnuusa?
18 Pa kulongwi ɨjyo,
ʉNgʉlʉve asivɨɨkile isipagɨka mu mmana ndʉwʉ aanogilwe jyʉmwene.
19 Ʉmmana nagʉkaale gwiva mmana,
gʉkaale gʉve kɨpagɨka kɨpamato.
20 Lola,
isipagɨka syongosu,
ʉgwene ʉmmana gʉlɨ mpamato.
21 Ɨliiho nalɨkaweese ʉkʉta kʉ kɨvoko,
“Ʉve ʉtsila mbombo kwane.”
Nagwene ʉntwe nagʉkaweese ʉkʉsivʉʉla isilʉnde ʉkʉta,
“Ʉnyie mutsila mbombo kwane.”
22 Apeene,
isipagɨka isivoneka sidekedeke mu mmana,
syʉ syene silɨ nɨ mbombo ɨndʉti siitso.
23 Ikange isipagɨka isivoneka sya kʉbedwa,
syʉ syene tukʉsyɨmɨka siitso.
Nasyene isipagɨka isyʉ twivona natʉnogiili ʉkʉvavonia avaanu,
syʉ syene tukʉsiloleela vʉnonu.
24 Lɨno,
isipagɨka siitu isivoneka silɨ nʉ vʉnonu,
natulonda ʉkʉsisiha.
Apeene,
ʉNgʉlʉve agʉvɨɨkile ʉmmana vʉnonu,
isipagɨka isyʉ nasisaagɨlɨlwa,
ʉmwene ikʉsyɨmɨka.
25 Ivomba ewo pakʉta,
kʉleke ʉkʉvepwo ʉkʉsitingʼana mu mmana.
Apeene,
isipagɨka syoni sitanganage.
26 Ikange ɨkɨpagɨka kɨpamato kɨngakʉvɨlwagwe,
syoni sikʉvɨlwagwa paninie nɨ kyene.
Ikange ɨkɨpagɨka kɨpamato kɨngaginiwe,
syoni siiva nʉ lʉhekelo paninie nɨ kyene.
27 Wʉ jɨlɨwo ʉnyie,
mulɨ mmana gwa Kɨlɨsiti.
Mpamato mpamato alɨ kɨpagɨka mu mmana ʉgwa.
28 Vʉvʉle vʉle mu mpelela,
ʉNgʉlʉve avɨɨkile,
taasi avapositili,
vakongile avanyamalago.
Ikange avɨɨkile avamanyisi,
avivomba isidego,
avanya sikʉngɨlwa sya kʉponia avatamu,
avanya sikʉngɨlwa sya kʉvatanga avange,
avanya sikʉngɨlwa sya vʉlongotsi,
na vanya sikʉngɨlwa sya kʉtsova inzovele iimya.
29 Oogo,
avaanu vooni vapositili?
Avaanu vooni vanyamalago?
Avaanu vooni vamanyisi?
Avaanu vooni vivomba isidego?
30 Avaanu vooni valɨ ni sikʉngɨlwa sya kʉponia avatamu?
Avaanu vooni vitsova inzovele iimya?
Ikange,
avaanu vooni vapeevilwe ʉkwandʉla inzovele?
Baako,
nawʉ jɨlɨwo!
31 Lɨno,
mwɨtangage ʉkʉlonda isikʉngɨlwa isilʉti.
Ʉlʉgano kyʉ kɨɨnu ɨkɨlʉti
Ʉkʉlʉtɨɨlɨla kʉ gooni,
ndinogwa ʉkʉvavʉʉla ɨkɨɨnu ɨkɨlʉti ɨkyʉ ʉmuunu anogelanie ʉkʉva nakyo.