Maliko 14

Amasaago ga kʉmʼbuda ʉYɨɨsʉ

(Mataayo 26:1-5; Luuka 22:1-2; Yohana 11:45-53)

1 Isigono sivɨlɨ wʉ nakɨsiiki ɨkyaka kya Pasaka nɨ kya Mikate Ɨgɨtsila Kɨlʉve, avavaha va vateeketsi na vamanyisi va ndagɨlo vakava vipilonda ɨnzɨla ɨjya kʉmwibata kʉ giila ʉYɨɨsʉ vamʼbude. 2 Vakɨɨdɨngʼana ʉkʉta valeke ʉkʉmwibata ɨkɨgono ɨkya Pasaka, pakʉva avaanu vagela vipela ɨmbatsa.

Ʉnʼdala ikʉmʼbaka ʉYɨɨsʉ amafuta aga kwɨbaka aginuungʼilila

(Mataayo 26:6-13; Yohana 12:1-8)

3 Ʉnsɨkɨ ʉgwa, ʉYɨɨsʉ aale mu vʉtsenge wa kʉ Betaniya, aataamile mu nyumba jya Simoni, ʉvɨ pa vʉtengʉlɨlo aale nʉ vʉtamu wa bʉʉba. Wʉ iilya ɨkyakʉlya, akiitsa ʉnʼdala nɨ kɨtsupa kya mafuta ga kwɨbaka aginuungʼilila ikange gaale ga ndalama nyongosu. Ɨkɨtsupa ʉmwʉ gaale amafuta ago kyanotsiiwe ʉkʉhʉma ɨliganga lya alabasita. Akakɨgubukula ɨkɨtsupa, akaduudila kʉ ntwe gwa Yɨɨsʉ pa kʉmbonia ʉlwɨmɨko. 4 Avaanu vaninie avaalepwo vakaviipa siitso mu numbula tsa veene, vakata, “Kɨki ʉnʼdala ʉjʉ inanga ewo amafuta ga ndalama nyongosu? 5 Amafuta aga gakaale gigʉtswa idinali ɨmileevʉlʉ gɨdatu (300), nʉ kʉvapa avagatsu indalama itso.” Vakankelemukila ʉnʼdala ʉlya.

6 ɄYɨɨsʉ akavavʉʉla akata, “Mundeke! Kɨki mukʉnnyanyamika ʉnʼdala ʉjʉ? Ʉmwene ambombye ʉne ɨlɨnogelanie siitso. 7 Lola, avagatsu mulɨ navo isigono syoni, mugana kʉvavombela inonu ʉnsɨkɨ ʉgwʉ munogwa. Apeene ʉnyie namukaave nʉʉne isigono syoni. 8 Ʉnʼdala ʉjʉ avombile lɨlya ɨlyʉ alɨ na maka nalyo. Ʉmwene agʉduudilye ʉmmana gwango amafuta aga pakʉta agʉtetengʼanie ʉmmana gwango kʉ kɨgono kya kʉnsɨɨla ʉne. 9 Jɨlweli ndikʉvavʉʉla ʉkʉta, apaveetsaga ʉpwʉ ɨLivangɨli lɨlalʉmbɨlɨlwagwa, mu kɨlʉnga kyoni, baaho apo nalyene ɨlyʉ ambombye ʉnʼdala ʉjʉ lɨlatsowaagwa, pakʉta avaanu vankʉmbʉkage.”

ɄYuuda Isikalioti isaaga ʉkʉmmendama ʉYɨɨsʉ

(Mataayo 26:14-16; Luuka 22:3-6)

10 Pwʉ ʉYuuda Isikalioti, ʉvɨ aale mpamato va vakongi kɨtsigo na vavɨlɨ (12), akalʉta kʉ vavaha va vateeketsi ammendame ʉYɨɨsʉ kʉ veene. 11 Aveene wʉ vapʉliike ɨkulongwi ɨjyo, vakahovoka, vakɨɨdɨngʼana ʉkʉta jʉvikʉmmomba indalama. Ʉkʉhʉma baaho, ʉYuuda akatengʉla ʉkʉlonda ʉnsɨkɨ ʉgʉnogelanie gwa kʉmmendama ʉYɨɨsʉ kʉ veene.

ƗPasaka jya mwiso jya Yɨɨsʉ na vakongi va mwene

(Mataayo 26:17-25; Luuka 22:7-14, 21-23; Yohana 13:21-30)

12 Mu kɨgono ɨkɨtatsi ɨkya kyaka kya Mikate Ɨgɨtsila Kɨlʉve, ʉnsɨkɨ ʉgwʉ vaatsoovye ʉkʉhɨnza ingʼolo tsa Pasaka, avakongi va Yɨɨsʉ vakambʉʉtsa vakata, “Vunogwa tʉkakʉnotsehetse ndaku kwa kʉlɨɨla ɨPasaka?”

13 ɄYɨɨsʉ akavasuungʼa avakongi va mwene vavɨlɨ akata, “Mubɨhe kʉ vʉtsenge ʉwa Yelusalemu. Mutsikwagana nʉ nʼgoosi ɨtwɨkile ɨnzɨɨlo jya magasi, vɨ ʉjwa munkongage 14 ʉkʉtsisika kʉ nyumba ɨjikwingila. Mumbʉʉle ʉmwenenyumba muteetsage, ‘ɄMmanyisi iita, “Kɨlɨ ndaku ɨkɨjumba kyango ɨkya vahenza ndɨlɨɨle ɨPasaka na vakongi vango?” ’ 15 Ʉmwene jiikʉvalaga ɨkɨjumba ɨkɨvaha ɨkya kʉkyanya ɨkɨmalile ʉkʉnotsiwa. Pwʉ mutʉnotsehetse ʉmwa ɨkyakʉlya ɨkya Pasaka.”

16 Avakongi valya vakahega palya, vakatsisika mu vʉtsenge vʉlya, vakavona ndʉwʉ akavavʉʉlile. Vakanotsa ɨkyakʉlya kya Pasaka.

17 Wʉ vʉhue, ʉYɨɨsʉ akiitsa paninie na vakongi va mwene kɨtsigo na vavɨlɨ (12). 18 Wʉ vataamile viilya ɨkyakʉlya, ʉYɨɨsʉ akavavʉʉla akata, “Tsa jɨlweli ndikʉvavʉʉla ʉkʉta, mpamato pagati paanyie jiikʉnsupulila kʉ valʉgʉ. Ʉmwene ʉjwa alɨ baaha iilya paninie nʉʉne.” 19 Avakongi va mwene wʉ vapʉliike ago, vakasʉsʉvala, vakatengʉla ʉkʉmbʉʉtsa ʉYɨɨsʉ mpamato mpamato nʉ jyʉnge akata, “Ndeeti nda neene?”

20 ɄYɨɨsʉ akaanda akata, “Ʉlya ʉvapya ikʉnsupulila ʉne kʉ valʉgʉ alɨ mwanyie kɨtsigo na vavɨlɨ, vɨ ʉlya ʉvɨ tusaasa paninie nʉʉne mu kɨkongʼolo. 21 ɄMwana va Muunu jiibudwa ndʉwʉ jɨvɨgilwe mu Vʉvɨge ʉVʉvalatse. Napeene, ɨlolelage ʉmuunu ʉvapya ikʉnsupulila kʉ valʉgʉ ʉMwana va Muunu! Lwale lwiva lʉnonu ʉmuunu ʉjʉ aale aleke ʉkʉholwa.”

ɄYɨɨsʉ ikʉvapa avakongi iSiinu iSivalatse

(Mataayo 26:26-30; Luuka 22:14-20; 1 Vakolinto 11:23-25)

22 ɄYɨɨsʉ na vakongi va mwene wʉ valɨ pa kʉlya ɨkyakʉlya, akatoola ʉnkate, akasaana kwa Ngʉlʉve, akamenyula, akavapa avakongi akata, “Tooli, litsagi, ʉgʉ gwʉ mmana gwango.” 23 Ikange akatoola ɨkɨkombe kya divai, akasaana kwa Ngʉlʉve, akavapa, vooni vakakɨnywela. 24 Akavavʉʉla akata, “Ʉgʉ gwʉ nkisa gwango gwa lwɨdɨngʼano, ʉguduudika kʉ nongwa jya vaanu vongosu. 25 Tsa jɨlweli ndikʉvavʉʉla ʉkʉta, nandɨlaanywe ikange ɨdivai ʉkʉtsisika pa kɨgono ʉpwʉ ndɨlaanywa ɨdivai ɨɨmya mu Lʉdeeva lwa Ngʉlʉve ʉlʉliitsa.” 26 Pwʉ vakɨɨmba ʉlwɨmbo lwa kʉnʼginia ʉNgʉlʉve. Vakahega palya, vakalʉta kʉ kɨdugala kya Mizeituni.

ɄYɨɨsʉ itsova amalago ʉkʉta ʉPetulo jiikʉmʼbeela

(Mataayo 26:31-35; Luuka 22:31-34; Yohana 13:36-38)

27 Pwʉ ʉYɨɨsʉ akavavʉʉla avakongi va mwene akata, “Ʉnyie nyɨ vooni jʉmwinyila mukʉndeka, manya ʉNgʉlʉve mu limenyu lya mwene iita, ‘Ndɨlantova ʉnʼdɨɨmi va ngʼolo, natsyene ingʼolo tsilahamba.’ ” 28 ɄYɨɨsʉ akoongeletsa akata, “Lɨno, ʉnsɨkɨ wʉ ndɨtsʉʉkile, jʉndikʉvatalɨla ʉkʉbɨha kʉ Galilaya.”

29 ɄPetulo akambʉʉla ʉYɨɨsʉ akata, “Nʉpwʉ jɨngave vooni jʉvikʉkʉleka, ʉne nandɨkakʉleke!” 30 ɄYɨɨsʉ akambʉʉla akata, “Jɨlweli ndikʉkʉvʉʉla ʉkʉta, ɨkɨlo ɨjɨ, wʉ ɨngʼongove najɨvɨkili kavɨlɨ ʉve jʉwiiva ʉmbeelile ʉne kadatu ʉkʉta nʉmmanyili.” 31 ɄPetulo akalʉtɨɨlɨla ʉkʉtsova akata, “Ndakʉve kʉswa paninie nʉʉve, ʉne nandɨkakʉbeele.” Nava vakongi avange vooni vakatsova vʉle vʉle.

ɄYɨɨsʉ ikɨsaja mu Getisemani

(Mataayo 26:36-46; Luuka 22:39-46)

32 ɄYɨɨsʉ akalʉta na vakongi va mwene kʉ kɨlɨmɨla kya mibɨkɨ ɨkyatambʉlwagwa Getisemani. Wʉ vasiike ʉkʉ akavavʉʉla akata, “Taami apa wʉ ndikɨsaja.” 33 Akantoola ʉPetulo, ʉYakobo nʉ Yohana akahega navo. Wʉ vilʉta, ʉYɨɨsʉ akatengʉla ʉkʉsʉsʉvala nʉ kʉtʉngʉtsiima siitso. 34 Akavavʉʉla akata, “Ɨnumbula jyango jɨsʉsʉvye siitso, ɨsikye pa kɨgelelo kya kʉswa. Mutaame baaha muhweletsaage paninie nʉʉne.” 35 Akalʉta pavʉlongolo padebe, akagwa kɨvʉgudamo, alɨkʉdoova alɨkʉta pangave poonu akavalɨlo ka vʉkʉvɨlwa wa mwene ʉpiita aale aleke ʉkʉkavona. 36 Akɨsaja akata, “Gwe Daada, ɨngave jikwɨdɨngʼana, ndikʉkʉdoova ʉleke ʉkʉkɨtavʉla ɨkɨnywelo kya vʉkʉvɨlwa ʉvʉlʉti ʉvʉ, kɨnnyitsile ʉne!”

37 Akakilivuka ʉpwʉ akavalekile avakongi va mwene, akavona vagoneelye itʉlʉ. Akambʉʉtsa ʉSimoni Petulo akata, “Gwe, ʉgoneelye itʉlʉ? Ʉlemilwe ʉkʉhweletsa paninie nʉʉne naka kavalɨlo kapamato vʉvʉle? 38 Muhweletsaage nʉ kwɨsaja ʉkʉta gʉpya gukwitsa ʉnsɨkɨ gwa kʉgelwa, ingelo tsileke ʉkʉvalema. Ɨnumbula jinogwa ʉkʉvomba inonu, lɨno ʉmmana gwʉ gulemwa.”

39 Akabɨha ikange kukɨsaja, akatsikilivukila amamenyu gamaninie. 40 Akakilivuka ikange, akavona vagoneelye, manya vaale ni tʉlʉ nyongosu. Wʉ vasisimwike, navaalʉmanye ɨlya kʉtsova.

41 Wʉ avakilivukye ʉlwa daatu, akatsova navo akata, “Mupitsiige mugoneelela itʉlʉ nʉ kʉgatalʉka? Pakwɨlye lɨno, ʉnsɨkɨ gʉsiike! Lola, ʉne ndɨ Mwana va Muunu ndɨlɨ pa kʉsupulilwa kʉ vatulanongwa. 42 Sisimuki lɨno, tʉhege! Lola! Ʉmuunu ʉlya ʉvɨ ikʉnnyendama kʉ valʉgʉ ahegelye, alɨ piipi!”

ɄYɨɨsʉ ihendamwa nʉ kwibatwa

(Mataayo 26:47-56; Luuka 22:47-53; Yohana 18:3-12)

43 ɄYɨɨsʉ wʉ apitsiige itsova, ʉYuuda, impamato mu vakongi valya kɨtsigo na vavɨlɨ (12), akasika nɨ kɨpʉga kya vaanu avagegile ipanga ni sonzo. Avaanu avo vaasuungʼilwe na vavaha va vateeketsi, avamanyisi va ndagɨlo na vanzagɨla va Vayahudi. 44 ɄYuuda ʉmmendami, aatalile ʉkʉvavʉʉla avaanu valya ɨkɨmanyilo. Aavavʉʉlile akata, “Ʉmuunu ʉvɨ jʉndikʉntsiba wʉ ndikʉnsaamusa, vɨ mwene vɨ jʉmumwibatage nʉ kʉlʉta nave kʉnʉ mukʉndoleela.”

45 Baaho wʉ vasiike, ʉYuuda akiitsa kwa Yɨɨsʉ akata, “Gwe Mmanyisi!” Akantsiba. 46 Pwʉ avaanu avo vakamwibata ʉYɨɨsʉ nʉ kʉnkʉnga. 47 Impamato va valya avɨɨmile paninie nʉ Yɨɨsʉ, akaswekʉla ɨpanga, akagɨda kʉ mbanda va nteeketsi ʉmbaha, akadumula ɨmbʉlʉkʉtʉ.

48 Pwʉ ʉYɨɨsʉ akavavʉʉtsa akata, “Kɨki munnyitsye ni panga ni sonzo, ʉngata mwitsile kukʉmwibata ʉnyambuda? 49 Isigono syoni ndɨkaale paninie nʉʉnyie mu tembile, ndɨlɨkʉmanyiisa, namukannyibatage! Lɨno tsihʉmɨla itsi ʉkʉta tsivombeke tsyoni itsyavɨgilwe mu Vʉvɨge ʉVʉvalatse.”

50 Pwʉ avakongi va mwene vooni vakanyila, vakandeka. 51 Ʉnʼdɨɨmi mpamato aalepwo, aankongaga ʉYɨɨsʉ, ɨɨsopile ʉnsabwa mpamato gwene. Namwene vakamwibata, 52 pa kwɨsumukula, akagʉleka ʉnsabwa ʉgwʉ viibiite, akanyila kɨtsila kʉswala kɨɨnu.

ɄYɨɨsʉ pa vʉhɨgi wa valongotsi va Vayahudi

(Mataayo 26:57-68; Luuka 22:54-55, 63-71; Yohana 18:13-14, 19-24)

53 Pwʉ vakantoola ʉYɨɨsʉ, vakabɨha nave kʉ nteeketsi ʉmbaha. Ʉkwa vakalʉndamana avavaha va vateeketsi, avanzagɨla va Vayahudi na vamanyisi va ndagɨlo. Ava vooni vaale kyʉ kɨpʉga kya valongotsi. 54 Ʉnsɨkɨ gʉʉgwa, namwene ʉPetulo ʉvɨ aankongaga ʉYɨɨsʉ pavʉtale, akiingila mu nʼgati mu libooma ɨlya nteeketsi ʉmbaha. Akataama paninie na vasikali, alɨkwota ʉmwoto.

55 Avavaha va vateeketsi valya na vavaha va kɨvʉmbʉkʉ kyoni kya Vaisilahɨli, valɨkʉgela ʉkʉlonda amamenyu ga kwɨmɨlamwo pa kʉmmɨga ʉYɨɨsʉ ʉkʉta vamʼbude, vakalemwa. 56 Vaalepwo avaanu vongosu avaatsovaga itsa vʉnuasi pa kʉntekela ʉYɨɨsʉ. Napeene, itsʉ vaatsovaga natsilɨkwɨdɨngʼana.

57 Kʉ vʉmalɨlo avaanu avange vakɨɨma, vakatsova itsa vʉnuasi vakata, 58 “Ʉwe tʉkampʉliike ʉjʉ witsova iita, ‘Ʉne jʉndimamula ʉVʉtaamo ʉVʉvalatse wa Ngʉlʉve ʉvʉtsengilwe ni sivoko sya vaanu, kʉ sigono sidatu jʉnditsenga ʉVʉtaamo ʉVʉvalatse wa Ngʉlʉve ʉwʉ navutsengwa ni sivoko sya vaanu.’ ” 59 Napeene, ɨlɨ nalyene wʉ vikʉlɨtsova navalɨkwɨdɨngʼana.

60 Pwʉ ʉnteeketsi ʉmbaha akɨɨma pavʉlongolo pa veene, akambʉʉtsa ʉYɨɨsʉ akata, “Ndeeti, navukwanda limenyu ɨlɨveetsaga ʉkʉkongana nʉ gwʉ avaanu ava vikʉkʉhɨga ʉve?” 61 ɄYɨɨsʉ akatsiga mye, kɨtsila kwanda kɨɨnu. Ʉnteeketsi ʉmbaha akakilivukila ʉkʉmbʉʉtsa akata, “Ʉve nda veeve Kɨlɨsiti, ʉMwana va Ngʉlʉve ʉMwɨmɨkiwa?”

62 ɄYɨɨsʉ akaanda akata, “Lweli, ʉne neene. Mulambona ʉMwana va Muunu ataamile ʉlʉvasu lwa kʉndyo lwa Ngʉlʉve ʉNyamaka Gooni, ikwitsa mu mavɨngo ga kʉkyanya.”

63 Pwʉ ʉnteeketsi ʉmbaha akalendʉla ʉnsabwa gwa mwene kʉ lʉviipo, akata, “Tʉlondage avooleletsi avange vɨɨki? 64 Mupʉliike nyɨ vooni wʉ idʉkɨla kwa Ngʉlʉve! Lɨno, mwita tʉmale ndeeti ɨnongwa jya muunu ʉjʉ?” Vooni vakata panogye ʉkʉta abudwagwe.

65 Avange vakatengʉla ʉkʉmʼbehela amati, vakanʼgubika kʉmiiho, vakantova ni mbuli, vakata, “Lagʉlɨla, veeni ʉvɨ akʉtovile!” Avasikali naveene vakantova na mapi.

ɄPetulo ikʉmʼbeela ʉYɨɨsʉ

(Mataayo 26:69-75; Luuka 22:56-62; Yohana 18:15-18, 25-27)

66 Ʉnsɨkɨ ʉgwa ʉPetulo aataamile paasi mu lʉvɨgo lwa nyumba jya nteeketsi ʉmbaha. Akiitsa ʉmbombi ʉmmɨnza, ʉvɨ aavombaga kʉ nteeketsi ʉmbaha. 67 Wʉ ambwene ʉPetulo ikwota ʉmwoto, akandola vʉnonu akata, “Najyʉve ʉkaale paninie nʉ Yɨɨsʉ va kʉ Nazaleti.”

68 ɄPetulo akabeela akata, “Baako, nandɨtsimanyili itsʉ witsova!” Pwʉ ʉPetulo akahega ʉpwʉ aale, akalʉta akatsiiva kʉ ndyango. Ʉnsɨkɨ gʉʉgwa ɨngʼongove jɨkavɨka.

69 Ʉmbombi ʉmmɨnza ʉlya akambona ikange ʉPetulo, akatengʉla ʉkʉvavʉʉla avaanu ʉwʉ vɨɨmile palya akata, “Ʉjʉ namwene inʼjyavo.” 70 Ʉmwene ʉPetulo akabeela ikange. Wʉ kalʉtɨngʼiinie akasɨkɨ kadebe, avaanu avaale baaho naveene vakatsova nave vakata, “Tsa jɨlweli, ʉve ʉlɨ nninie va vaanu valya, manya najyʉve wihʉma kʉ Galilaya.” 71 ɄPetulo akabeela kʉnʉ ikɨjyɨga akata, “Ʉne nditsova lweli, ʉmuunu ʉjwa ʉvɨ mwitsova ikulongwi tsa mwene, ʉne nandɨmmanyili!” 72 Ʉnsɨkɨ gʉʉgwa ɨngʼongove jɨkavɨka ʉlwa vɨɨlɨ. Pwʉ ʉPetulo akakʉmbʉhɨtsa amamenyu ʉgwʉ ʉYɨɨsʉ akambʉʉlile agiita, “Ɨngʼongove wʉ najɨvɨkili kavɨlɨ ʉve jʉvukʉmbeela kadatu ʉkʉta nʉmmanyili.” ɄPetulo akɨsaatsa mu numbula jya mwene, akalɨla siitso.