Yohana 11

Ʉvʉswe wa Lazalo

1 Aalekwo ʉmuunu mpamato ʉvɨ ɨlitaawa lya mwene aale vɨ Lazalo. Ʉjwa aale ntamu. Aataamaga kʉ vʉtsenge wa Betaniya paninie na vahaatsave, ʉMaliyamu nʉ Malita. 2 ɄMaliyamu ʉjwa vɨ aamʼbakile ʉNtwa ʉYɨɨsʉ amafuta aginuungʼilila nʉ kʉmpulusa isilʉnde kʉ nzɨla jya nzwɨlɨ tsa mwene. 3 Pwʉ ʉMaliyamu nʉ Malita vakasuungʼa ɨkulongwi kwa Yɨɨsʉ vakata, “Gwe Ntwa, tukʉkʉvʉʉla ʉkʉta ʉnʼgane vaako ʉLazalo ntamu.” 4 ɄYɨɨsʉ wʉ apʉliike ɨkulongwi ɨjyo akata, “Ʉvʉtamu ʉwa navʉkamʼbude, apeene wa kʉvonia ʉwɨɨmɨkiwa wa Ngʉlʉve, nʉ kʉta avaanu vannyɨmɨkage ndɨ Mwana va mwene kʉ nzɨla jya vʉtamu ʉwa.”

5 ɄYɨɨsʉ aavaganile siitso ʉMalita na valʉkololwe, ʉMaliyamu nʉ Lazalo. 6 Wʉ apʉliike ʉkʉta ʉLazalo ntamu, akagendelela ʉkʉtaama apoonu apo kʉ sigono isinge sivɨlɨ. 7 Wʉ silʉtɨngʼiinie isigono isyo sivɨlɨ, ʉYɨɨsʉ akavavʉʉla avakongi va mwene akata, “Tʉvʉʉki ikange kʉ Yuuda.” 8 Avakongi va mwene vakamwanda vakata, “Gwe Mmanyisi, ʉnsɨkɨ nsupi ʉgʉlʉtile aVayahudi avange vakanogilwe ʉkʉkʉtika na maganga pakʉta vakʉbude. Pwʉ kɨki vunogwa ʉkʉbɨha ikange ʉkʉ?”

9 ɄYɨɨsʉ akaanda akata, “Ndeeti, ɨmuunyi najɨlɨ nʉ tʉvalɨlo kɨtsigo na tʉvɨlɨ (12)? Ɨngave ʉmuunu igenda pamuunyi, nakaweese ʉkʉkʉvala ɨkɨlʉnde kya mwene ʉlwakʉva ʉlʉmuli lumulika syoni. 10 Lɨno ʉvɨ igenda pakɨlo, ikʉvala ʉlwakʉva ʉlʉmuli lwa kʉntanga nalʉpali.”

11 ɄYɨɨsʉ wʉ atsovile ago, akagendelela ʉkʉvavʉʉla avakongi va mwene akata, “Ʉmmanyaani viitu ʉLazalo agoneelye itʉlʉ, lɨno ndilʉta ndɨkansisimule.” 12 Pwʉ avakongi va mwene vakamwanda vakata, “Gwe Ntwa, ɨngave agoneelye itʉlʉ, apisisimuka nʉ kʉpona.” 13 ɄYɨɨsʉ apa aavavʉʉlaga ʉkʉta ʉLazalo asue, lɨno avakongi va mwene vaamanyile itsova ʉkʉta agoneelye itʉlʉ.

14 Pwʉ ʉYɨɨsʉ akatsova pavʉvalasu akata, “ɄLazalo asue, 15 ʉlwakʉva ʉne nandɨviili ʉkʉ. Lɨno ʉne ndihekela ʉlwakʉva ʉvʉswe wa mwene vʉlɨ nʉ lʉvʉmbʉlɨlo kwanyie, manya jʉvukʉvapelela ʉnyie mwongeletse ʉkʉnnyɨdɨka ʉne. Pwʉ mwitsage tʉbɨhe kʉ mwene.” 16 Pwʉ ʉnkongi mpamato ʉTomasi ʉvɨ aatambʉlwagwa vɨ Vʉngʉngʉ, akavavʉʉla avakongivanine akata, “Najyʉwe tʉbɨhage pakʉta tʉkaswe paninie nave.”

ɄYɨɨsʉ alɨ na maka ga kʉtsʉʉsa avaswe

17 ɄYɨɨsʉ wʉ asiike mu kɨlʉnga kya Yuuda, mu vʉtsenge wa Betaniya, akavona ʉLazalo amalile isigono sinni ʉkʉva mu vʉguli. 18 Ʉvʉtsenge wa Betaniya waale ikilomita idatu ʉkʉhʉma kʉ Yelusalemu. 19 Pwʉ avaanu vongosu mu Vayahudi vakiitsa kʉ nyumba jya Malita nʉ Maliyamu, kukʉviitsiga kʉ nongwa jya vʉswe wa mmaatsa vaavo ʉLazalo.

20 Lola, ʉMalita wʉ apʉliike ʉkʉta ʉYɨɨsʉ ikwitsa alɨ mu nzɨla, akahʉma kʉnzi nʉ kʉbɨha kukʉmwʉpɨlɨla, lɨno ʉMaliyamu akasigala mu nʼgati mu nyumba. 21 ɄMalita akambʉʉla ʉYɨɨsʉ akata, “Gwe Ntwa, ʉkaale ʉve pwʉle apa ʉmmaatsa vango ndalɨno naswili. 22 Nalɨ lɨno ndɨlʉmanyile ʉkʉta ɨkɨveetsaga ɨkyʉ vukʉnʼdoova ʉNgʉlʉve, ʉmwene ikʉkʉpa.”

23 Pwʉ ʉYɨɨsʉ akamwanda akata, “Ʉmmaatsavo itsʉʉka nʉ kʉva mwʉmi ikange.” 24 ɄMalita akata, “Gwe Ntwa, ndɨlʉmanyile ʉkʉta ʉNgʉlʉve ʉpwʉ alaava ikʉvatsʉʉsa avaanu pa kɨgono kya vʉhɨgi, namwene ʉmmaatsa vango alatsʉʉka nʉ kʉva mwʉmi ikange.” 25 ɄYɨɨsʉ akamwanda akata, “Ʉne neene vʉtsʉʉka ikange neene wʉʉmi. Ʉmuunu ʉvaveetsaga ʉvɨ ikʉnnyɨdɨka ʉne, nʉpwʉ jɨngave iiswa alatsʉʉsiwa nʉ kʉva nʉ wʉʉmi wa sikutsooni. 26 Nʉʉlya ʉvɨ alɨ nʉ wʉʉmi wa sikutsooni ʉvuhʉmana nʉ kʉnnyɨdɨka ʉne, nalaaswe lʉsiku. Ndeeti, vukwɨdɨka ago?” 27 ɄMalita akamwanda akata, “Eena Ntwa, ndikwɨdɨka ʉkʉta ʉve veeve Mesiya, Mwana va Ngʉlʉve, veeve ʉvɨ twahʉʉvɨtsiiwe ʉkʉta aliitsa mu kɨlʉnga ʉmʉ.”

ɄYɨɨsʉ ilɨla

28 ɄMalita wʉ atsovile ago, akalʉta kukʉmwɨlanga ʉmamaaje ʉMaliyamu. Pwʉ akambʉʉla kʉvʉtiitu akata, “ɄMmanyisi ikʉkwɨlanga.” 29 ɄMaliyamu wʉ apʉliike ago, akahega ngʼaningʼaani akalʉta kwa Yɨɨsʉ. 30 ɄYɨɨsʉ aale akaanale ʉkwingila mu litsumbe ɨlyo, manya aale apoonu ʉpwʉ ʉMalita aalʉtile kukʉmwʉpɨlɨla. 31 AVayahudi valya avaale mu nyumba paninie nʉ Maliyamu, wʉ vikʉmbona ihega ngʼaningʼaani nʉ kʉhʉma kʉnzi, pwʉ vakankonga, manya vakata ipange ilʉta kʉ vʉguli kwʉ akalɨlage.

32 ɄMaliyamu wʉ asiike ʉpwʉ aale ʉYɨɨsʉ, akasugama pavʉlongolo pa mwene, akambʉʉla akata, “Gwe Ntwa, ʉkaale ʉvepwo apa, ʉmmaatsa vango ndalɨno naswili.” 33 ɄYɨɨsʉ wʉ ikʉmbona ilɨla, nava Vayahudi ʉwʉ itsile navo naveene vilɨla, akaviipa siitso, ɨnumbula jɨkambava siitso. 34 Pwʉ akavavʉʉtsa akata, “Mumbɨɨkile ndaku?” Vakamwanda vakata, “Gwe Ntwa, tʉvʉʉke tʉkakʉvonie ʉpwʉ tʉmbɨɨkile.” 35 ɄYɨɨsʉ akalɨla. 36 Pwʉ aVayahudi ʉwʉ vaaviitsigaga pa kɨlɨlo vakata, “Lolagi ʉmwʉ akanʼganie!” 37 Napeene avange vakata, “Ʉmuunu ʉjʉ vɨ mwene ʉvɨ aamponiitse ʉmʼbosu, pwʉ kɨki nakavombe ɨkɨveetsaga nakʉ kwa Lazalo pakʉta aleke ʉkʉswa?”

ɄYɨɨsʉ ikʉntsʉʉsa ʉLazalo

38 ɄYɨɨsʉ wʉ apitsiige aviipile mu numbula, akasika pa vʉguli. Ʉvʉguli ʉwa waale manga ɨjyʉ vaadɨndile nɨ liganga ɨlivaha pa ndyango. 39 ɄYɨɨsʉ akavavʉʉla avaanu ʉwʉ vaalepwo palya akata, “Hetsi ɨliganga ɨlyo pa ndyango!” Pwʉ ʉMalita ʉmmaatsa va mwalihemu, akamwanda akata, “Gwe Ntwa, lɨno iiva atengwe ʉkʉnuungʼa ʉlwakʉva silʉtɨngʼiinie isigono sinni ʉkʉhʉma asɨɨlwagwe.” 40 Pwʉ ʉYɨɨsʉ akambʉʉla akata, “Ndeeti, nandɨkakʉvʉʉle ʉkʉta ɨngave vukwɨdɨka, jʉvukʉvʉvona ʉwɨɨmɨkiwa ʉvʉlʉti wa Ngʉlʉve ʉmwʉ vʉveelye?”

41 Pwʉ vakahetsa ɨliganga lɨlya. ɄYɨɨsʉ akalola kʉkyanya, akɨsaja kwa Ngʉlʉve akata, “Gwe Daada, ndikʉkʉsaana ʉlwakʉva ʉpʉliike inyɨsajo tsyango. 42 Ndɨlʉmanyile ʉkʉta vukʉmmʉlɨka ʉnsɨkɨ gwoni, lɨno nditsova aga kʉ nongwa jya kɨpʉga kya vaanu ava, pakʉta vɨɨdɨke ʉkʉta ʉve veeve ʉnsuungʼile ʉne.”

43 ɄYɨɨsʉ wʉ atsovile ago, akatotsa ɨlimenyu akɨɨlanga akata, “Lazalo, hʉma kʉnzi!” 44 Pwʉ ʉLazalo ʉvɨ aasue akahʉma kʉnzi. Isilʉnde ni sivoko sya mwene sikʉngilwe nɨ sanda ɨjyʉ vaansɨɨlye. Ikange aale nɨ kɨtambala ɨkyʉ vaankʉngile kʉmiiho. ɄYɨɨsʉ akavavʉʉla avaanu avo akata, “Mummʉdʉle ɨsanda ɨjyo, mundeke alʉtage.”

Avalongotsi va Vayahudi vilonda ɨnzɨla jya kʉmʼbudila ʉYɨɨsʉ

(Mataayo 26:1-5; Maliko 14:1-2; Luuka 22:1-2)

45 AVayahudi vongosu aviitsile kʉ vʉguli paninie nʉ Maliyamu, wʉ vagaweene ʉgwʉ ʉYɨɨsʉ avombile palya, vakamwɨdɨka. 46 Napeene aVayahudi avange vakalʉta kʉ Vafalisayo nʉ kʉvavʉʉla ʉgwʉ ʉYɨɨsʉ avombile. 47 Pwʉ avavaha va vateeketsi na Vafalisayo, vakɨɨlanga ʉlʉlʉndamano lwa vavaha va kɨvʉmbʉkʉ kyoni kya Vaisilahɨli, vakavʉʉtsania vakata, “Galya ʉgwʉ tuvomba gitangɨla kɨki? Lola, ʉmuunu ʉjʉ ivomba isimanyilo syongosu. 48 Ɨngave tukʉndeka agendelelage ʉkʉvomba isimanyilo isyo, avaanu vooni jʉvikʉmwɨdɨka. Pwʉ aValooma jʉvikwitsa nʉ kʉtʉhetsehetsa ɨtembile jiitu nakɨ kɨvʉmbʉkʉ kiitu.”

49 Pwʉ mpamato mu vavaha valya ɨlitaawa lya mwene aale vɨ Kayafa, ʉvɨ aale vɨ nteeketsi ʉmbaha mu mwaka ʉgwa, akavavʉʉla akata, “Ʉnyie namukɨmanyili ɨkɨveetsaga! 50 Ndeeti, namulʉmanyili ʉkʉta lwiva lʉnonu kwanyie ʉmuunu mpamato aswe kʉ lʉvʉmbʉlɨlo lwa vaanu vooni, pa kʉsiga kɨleke ʉkwongometswa ɨkɨvʉmbʉkʉ kyoni kya Vayahudi?” 51 ɄKayafa naatsovage ago kʉ vʉnogwe wa mwene jyʉmwene, apeene ʉlwakʉva aale vɨ nteeketsi ʉmbaha mu mwaka ʉgwa. Ʉmwene aatsovile amalago ago ʉkʉta ʉYɨɨsʉ jiiswa kʉ lʉvʉmbʉlɨlo lwa kɨvʉmbʉkʉ ɨkyo. 52 Ikange aateetsaga ʉYɨɨsʉ nakaaswe kʉ nongwa jya kɨvʉmbʉkʉ ɨkyo kyene, apeene jiiswa kʉ vʉsumbe wa kʉvalʉndamania avaana va Ngʉlʉve avahambile, vave paninie.

53 Ɨkɨgono ɨkyo, avalongotsi va Vayahudi vakalamula ʉkʉta jʉvamʼbude ʉYɨɨsʉ, vakatengʉla ʉkʉlonda ʉmwakwɨmɨlamwo pakʉta vamʼbude. 54 Ʉkʉkongana nɨɨlyo, ʉYɨɨsʉ akakʉleka ʉkʉgenda pavʉvalasu pagati pa Vayahudi. Apeene akahega ʉkwa, akabɨha kʉ wiipi na kʉ lʉkɨnga, kʉ vʉtsenge wa Efulahimu, akataama ʉkʉ paninie na vakongi va mwene.

55 Ɨkyaka kya Vayahudi kya Pasaka kyahegelye. Avaanu vongosu vakahega ʉkʉhʉma mu vʉtsenge wa veene, ʉkʉbɨha kʉ Yelusalemu pakʉta vakɨɨvalatse. 56 Avaanu avo vaandondaga ʉYɨɨsʉ. Pwʉ vakɨtsosanza wʉ valʉndamiine mu tembile, vakata, “Ʉnyie musaaga mwita kɨki? Ndeeti, mwivona ʉmuunu ʉjwa nakiitse kʉ kyaka ɨkɨ?” 57 Vaatsovaga ewo, ʉlwakʉva avavaha va vateeketsi na Vafalisayo vaamalile ʉkʉlagɨla ʉkʉta, ʉmuunu ʉvaveetsaga ʉvɨ alʉmanyile ʉkwʉ alɨkwo ʉYɨɨsʉ, akavavʉʉle pakʉta vamwibate.