Mataayo 26

Amasaago ga kʉmʼbuda ʉYɨɨsʉ

(Maliko 14:1-2; Luuka 22:1-2; Yohana 11:45-53)

1 Wʉ ʉYɨɨsʉ amalile ʉkʉtsova amamenyu ago gooni, aavavʉʉlile avakongi va mwene akata, 2 “Ndʉwʉ mulʉmanyile, sisigye isigono sivɨlɨ, jʉtwiva nɨ kyaka kya Pasaka. Ʉne ndɨ Mwana va Muunu, jʉndisupulilwa mu sivoko sya valʉgʉ pakʉta ndɨbudwe pa kɨdamingʼanie.”

3 Mu nsɨkɨ ʉgwa, avavaha va vateeketsi na vanzagɨla va Vayahudi, vaalʉndamiine mu nyumba ɨmbaha jya nteeketsi ʉmbaha, ʉvɨ ɨlitaawa lya mwene aale vɨ Kayafa. 4 Vɨɨtsosanzaaga ʉmwakʉmwibatɨla ʉYɨɨsʉ kʉvʉtiitu, pakʉta vamʼbude. 5 Vakɨɨdɨngʼana vakata, “Tʉleke ʉkʉmwibata mu nsɨkɨ gwa kyaka kya Pasaka, manya avaanu vagela vipela ɨmbatsa.”

Ʉnʼdala mpamato ikʉnʼduudila ʉYɨɨsʉ amafuta

(Maliko 14:3-9; Yohana 12:1-8)

6 Ʉnsɨkɨ ʉgwa, ʉYɨɨsʉ aale mu vʉtsenge wa kʉ Betaniya, aataamaga mu nyumba jya Simoni, ʉvɨ pa vʉtengʉlɨlo aale nʉ vʉtamu wa bʉʉba. 7 Wʉ ʉYɨɨsʉ ataamile iilya, ʉnʼdala mpamato akiitsa kʉ mwene nɨ kɨtsupa kya mafuta aginuungʼilila, ʉgwʉ gaale ga ndalama nyongosu. Akanʼduudila ʉYɨɨsʉ kʉ ntwe pa kʉvonia ʉwɨɨmɨkiwa wa Yɨɨsʉ. Ɨkɨtsupa ʉmwʉ gaale amafuta ago kyanotsiiwe ʉkʉhʉma ɨliganga lya alabasita. 8 Wʉ avakongi va mwene vagaweene ago, vakaviipa siitso mu numbula tsa veene vakata, “Kɨki ʉnʼdala ʉjʉ inanga ewo amafuta ga ndalama nyongosu? 9 Amafuta aga gakaale gigʉtswa kʉ ndalama nyongosu, nʉ kʉvapa avagatsu indalama itso.” 10 ɄYɨɨsʉ akagamanya ʉgwʉ vaasaagaga. Akavavʉʉla akata, “Kɨki mukʉnnyanyamika ʉnʼdala ʉjʉ? Ʉmwene ambombye ʉne ɨlɨnogelanie siitso. 11 Lola, avagatsu mulɨ navo isigono syoni, apeene ʉnyie namukaave nʉʉne isigono syoni. 12 Ʉnʼdala ʉjʉ agʉduudilye ʉmmana gwango amafuta aga, pakʉta agʉtetengʼanie kʉ kɨgono kya kʉnsɨɨla ʉne. 13 Tsa jɨlweli ndikʉvavʉʉla ʉkʉta, apaveetsaga ʉpwʉ ɨLivangɨli lɨlalʉmbɨlɨlwagwa, mu kɨlʉnga kyoni, baaho apo nalyene ɨlyʉ ambombye ʉnʼdala ʉjʉ lɨlatsowaagwa, pakʉta avaanu vankʉmbʉkage.”

ɄYuuda Isikalioti ikʉmmendama ʉYɨɨsʉ

(Maliko 14:10-11; Luuka 22:3-6)

14 Pwʉ ʉYuuda Isikalioti, ʉvɨ aale mpamato va vakongi va Yɨɨsʉ kɨtsigo na vavɨlɨ (12), akalʉta kʉ vavaha va vateeketsi, 15 akavavʉʉtsa akata, “Mukʉnnyomba kɨki ndɨngave ndikwitsa nave ʉYɨɨsʉ kwanyie?” Pwʉ vakampa indalama, ihelahela isitsigo sidatu (30). 16 Ʉkʉhʉma mu nsɨkɨ ʉgwa, wʉ ʉpɨlye indalama, ʉYuuda akatengʉla ʉkʉlonda ʉnsɨkɨ ʉgʉnogelanie ʉkʉmmendama ʉYɨɨsʉ kʉ veene.

ɄYɨɨsʉ iilya ɨkyakʉlya kya Pasaka na vakongi va mwene

(Maliko 14:12-26; Luuka 22:7-23; Yohana 13:21-30; 1 Vakolinto 11:23-25)

17 Mu kɨgono ɨkɨtatsi ɨkya kyaka kya Mikate Ɨgɨtsila Kɨlʉve, avakongi va Yɨɨsʉ viitsile kʉ mwene, vakambʉʉtsa vakata, “Vunogwa tʉkakʉnotsehetse ndaku ɨkyakʉlya kya kyaka kya Pasaka?” 18 ɄYɨɨsʉ akavaanda akata, “Bɨhagi mu vʉtsenge wa Yelusalemu, mukiingile kʉ muunu mpamato nʉ kʉmbʉʉla ʉkʉta, ‘ɄMmanyisi atʉsuungʼile, iita, “Ʉnsɨkɨ gwango gʉhegelye. Ʉne na vakongi vango, jʉtwilya ɨkyakʉlya kya Pasaka mu nyumba jyako.” ’ ” 19 Avakongi valya vakalʉta nʉ kʉvomba tsyoni ndʉwʉ ʉYɨɨsʉ aavalagye, vakanotsa ɨkyakʉlya kya Pasaka.

20 Wʉ vʉhue, ʉYɨɨsʉ na vakongi va mwene kɨtsigo na vavɨlɨ (12) vakataama pakʉta valye ɨkyakʉlya. 21 Wʉ valɨ pa kʉlya, ʉYɨɨsʉ akavavʉʉla akata, “Tsa jɨlweli ndikʉvavʉʉla ʉkʉta, mpamato pagati paanyie jiikʉnsupulila kʉ valʉgʉ.” 22 Avakongi va mwene vakasʉsʉvala siitso, vakatengʉla ʉkʉmbʉʉtsa ʉYɨɨsʉ mpamato mpamato, nʉ jyʉnge akata, “Gwe Ntwa, ndeeti nda neene?” 23 ɄYɨɨsʉ akaanda akata, “Ʉlya ʉvɨ tʉsaasinie paninie mu kɨkongʼolo kɨpamato, vɨ mwene jiikʉnsupulila ʉne kʉ valʉgʉ. 24 ɄMwana va Muunu jiibudwa ndʉwʉ jɨvɨgilwe mu Vʉvɨge ʉVʉvalatse. Napeene, ɨlolelage ʉmuunu ʉvapya ikʉnsupulila kʉ valʉgʉ ʉMwana va Muunu! Lwale lwiva lʉnonu ʉmuunu ʉjʉ aale aleke ʉkʉholwa!” 25 ɄYuuda ʉmmendami va Yɨɨsʉ, namwene akambʉʉtsa ʉYɨɨsʉ akata, “Gwe Mmanyisi, ndeeti nda neene?” ɄYɨɨsʉ akamwanda akata, “Ʉve veeve ʉtsovile.”

26 Wʉ vigendelela ʉkʉlya, ʉYɨɨsʉ akatoola ʉnkate, akasaana kwa Ngʉlʉve, akamenyula, akavapa avakongi va mwene, akata, “Tooli, litsagi, ʉgʉ, gwʉ mmana gwango.” 27 Ikange akatoola ɨkɨkombe, ɨkyale nɨ divai. Akasaana kwa Ngʉlʉve, akavapa, akata, “Tooli, nywetsagi nyɨ vooni. 28 Lola, ʉgʉ gwʉ nkisa gwango gwa lwɨdɨngʼano, ʉguduudika kʉ nongwa jya vaanu vongosu, pakʉta ʉNgʉlʉve avasyɨkɨle imbiivi tsa veene. 29 Ndikʉvavʉʉla ʉkʉta nandɨlaanywe ikange ɨdivai, ʉkʉtsisika pa kɨgono, ʉpwʉ ndɨlaanywa ɨdivai ɨɨmya, paninie nʉʉnyie, mu Lʉdeeva lwa Daada.”

30 Pwʉ vakɨɨmba ʉlwɨmbo lwa kʉnʼginia ʉNgʉlʉve. Vakahega palya, vakalʉta kʉ kɨdugala kya Mizeituni.

ɄYɨɨsʉ iganula ʉkʉta ʉPetulo jiikʉmʼbeela

(Maliko 14:27-31; Luuka 22:31-34; Yohana 13:36-38)

31 Pwʉ ʉYɨɨsʉ akavavʉʉla avakongi va mwene akata, “Ɨkɨlo ɨjyɨleelo, ʉnyie nyɨ vooni, jʉmwinyila nʉ kʉndeka ndɨ mwene. Lola, jɨvɨgilwe mu Vʉvɨge ʉVʉvalatse ʉkʉta, ‘Ndɨlantova ʉnʼdɨɨmi va ngʼolo, pwʉ ingʼolo tsilahamba.’ 32 Lɨno, ʉnsɨkɨ wʉ ndɨtsʉʉkile, jʉndikʉvatalɨla ʉkʉbɨha kʉ Galilaya.” 33 ɄPetulo akambʉʉla ʉYɨɨsʉ akata, “Nʉpwʉ jɨngave vooni jʉvikʉkʉleka, ʉne nandɨkakʉleke!” 34 ɄYɨɨsʉ akamwanda akata, “Jɨlweli ndikʉkʉvʉʉla ʉkʉta, wʉ ɨngʼongove najɨvɨkili ɨkɨlo ɨjɨ, ʉve jʉwiiva ʉmbeelile kadatu, ʉkʉta nʉmmanyili.” 35 ɄPetulo akamwanda akata, “Ndakʉve kʉswa paninie nʉʉve, ʉne nandɨkakʉbeele!” Avakongi vooni vakatsova ndavʉle.

ɄYɨɨsʉ ikɨsaja mu Getisemani

(Maliko 14:32-42; Luuka 22:39-46)

36 Pwʉ ʉYɨɨsʉ akalʉta na vakongi va mwene kʉ kɨlɨmɨla kya mibɨkɨ ɨkyatambʉlwagwa Getisemani. Wʉ asiike ʉkʉ, akavavʉʉla avakongi akata, “Taami apa, ʉne ndilʉta ʉkʉ kukɨsaja.” 37 Akantoola ʉPetulo paninie na vaswambe vavɨlɨ va Zebedayo, akahega navo. Wʉ vilʉta, ʉYɨɨsʉ akatengʉla ʉkʉsʉsʉvala nʉ kʉtʉngʉtsiima siitso mu numbula jya mwene. 38 Pwʉ akavavʉʉla akata, “Ɨnumbula jyango jɨsʉsʉvye siitso, ɨsikye pa kɨgelelo kya kʉswa. Mutaame baaha muhweletsaage paninie nʉʉne.”

39 Akalʉta pavʉlongolo padebe, akagwa kɨvʉgudamo. Akɨsaja kwa Ngʉlʉve, akata, “Gwe Daada, ɨngave jikwɨdɨngʼana, ndikʉkʉdoova ʉleke ʉkʉkɨtavʉla ɨkɨnywelo kya vʉkʉvɨlwa ʉvʉlʉti ʉvʉ kɨnnyitsile ʉne! Napeene, ʉleke ʉkʉvomba ndʉwʉ ndinogwa ʉne, apeene ʉvombe ndʉwʉ vunogwa ʉve.” 40 Akakilivuka ʉpwʉ akavalekile avakongi va mwene, akavona vagoneelye itʉlʉ. Akambʉʉtsa ʉPetulo akata, “Ndeeti, mulemilwe ʉkʉhweletsa paninie nʉʉne naka kavalɨlo ka kasɨkɨ kapamato? 41 Muhweletsaage nʉ kwɨsaja ʉkʉta gʉpya gukwitsa ʉnsɨkɨ gwa kʉgelwa, ingelo tsileke ʉkʉvalema. Ɨnumbula jinogwa ʉkʉvomba inonu, lɨno ʉmmana gwʉ gulemwa.”

42 ɄYɨɨsʉ akavaleka, akabɨha ikange kukɨsaja. Akɨsaja akata, “Gwe Daada, ɨngave jisitingʼana ʉkʉsiga kwane ɨkɨnywelo kya vʉkʉvɨlwa ʉvʉlʉti ʉvʉ, pwʉ vomba ndʉwʉ vunogwa.” 43 Akakilivuka ikange, akavona vagoneelye, manya vaale ni tʉlʉ nyongosu. 44 ɄYɨɨsʉ akavaleka ikange, akabɨha kukɨsaja ʉlwa daatu. Akakilivukila ʉkʉtsova amamenyu gaagalya. 45 Wʉ akiliwiike ikange, ʉpwʉ vaale avakongi, akavavʉʉla akata, “Mupitsiige mugoneelela itʉlʉ nʉ kʉgatalʉka? Lola! Ʉnsɨkɨ gʉsiike, ʉne ndɨ Mwana va Muunu, ndisupulilwa kʉ vatulanongwa. 46 Sisimuki lɨno, tʉhege! Lola! Ʉmuunu ʉlya ʉvɨ ikʉnnyendama kʉ valʉgʉ ahegelye, alɨ piipi!”

ɄYɨɨsʉ ikwibatwa

(Maliko 14:43-50; Luuka 22:47-53; Yohana 18:3-12)

47 ɄYɨɨsʉ wʉ apitsiige itsova, ʉYuuda, impamato mu vakongi va mwene kɨtsigo na vavɨlɨ (12), akasika nɨ kɨpʉga ɨkɨvaha kya vaanu avagegile ipanga ni sonzo. Avaanu avo vaasuungʼilwe na vavaha va vateeketsi na vanzagɨla va Vayahudi. 48 ɄYuuda ʉmmendami, aatalile ʉkʉvavʉʉla avaanu valya ɨkɨmanyilo. Aavavʉʉlile akata, “Ʉmuunu ʉvɨ jʉndikʉntsiba wʉ ndikʉnsaamusa, vɨ mwene vɨ jʉmumwibatage.” 49 Baaho wʉ vasiike, ʉYuuda akalʉta kwa Yɨɨsʉ, akansaamusa, akata, “Gwe Mmanyisi, muhweliitse!” Akansaamusa pa kɨpambaga. 50 ɄYɨɨsʉ akamwanda akata, “Gwe mmanyaani, vombaga ɨlyʉ ʉsumbilwe.” Pwʉ avaanu avo vakamwibata ʉYɨɨsʉ nʉ kʉnkʉnga. 51 Pwʉ mpamato mu valya avaale paninie nʉ Yɨɨsʉ, akaswekʉla ɨpanga jya mwene, akagɨda kʉ mbanda va nteeketsi ʉmbaha, akadumula ɨmbʉlʉkʉtʉ. 52 ɄYɨɨsʉ akamʼbeetsa, akata, “Kilivula ɨpanga jyako mu kɨpako kya jyene, ʉlwakʉva avaanu vooni avikwibata ipanga pakʉta vabude avange, naveene valabudwa ni panga! 53 Ndeeti, namulʉmanyili ʉkʉta ndiweesa ʉkʉdoova ʉlʉtangɨlo kwa Daada, nʉ mwene iweesa ʉkʉnsuungʼila avasuungʼwa va mwene, ʉkʉlʉtɨɨlɨla isipʉga isivaha kɨtsigo na sivɨlɨ? 54 Ndɨngave ndivomba ewo, lɨno ndeeti giweesa ʉkʉvombeka ʉgwʉ gaavɨgilwe mu Vʉvɨge ʉVʉvalatse ʉkʉta, wʉ jɨnogye ʉkʉvombeka ewo?”

55 Pwʉ ʉYɨɨsʉ akavavʉʉtsa avaanu avo akata, “Kɨki munnyitsye ni panga ni sonzo, ʉngata mwitsile kukʉmwibata ʉnyambuda? Isigono syoni ndɨvye nʉʉnyie, ndɨlɨkʉmanyiisa mu lʉvɨgo lwa tembile, namukannyibatage! 56 Lɨno gooni aga gahʉmye, pakʉta gavombeke ʉgwʉ avanyamalago vaavɨgile mu Vʉvɨge ʉVʉvalatse.” Avakongi va mwene vooni, wʉ vivona ʉYɨɨsʉ itsova ewo, vakandeka ʉYɨɨsʉ, vakanyila.

ɄYɨɨsʉ ihɨlɨkwa pavʉlongolo pa vanzagɨla va Vayahudi

(Maliko 14:53-65; Luuka 22:54-55, 63-71; Yohana 18:13-14, 19-24)

57 Pwʉ avaanu avo vakamwibata ʉYɨɨsʉ nʉ kʉbɨha nave kwa Kayafa, ʉnteeketsi ʉmbaha. Ʉkʉ vaalʉndamiine, avamanyisi va ndagɨlo na vanzagɨla va Vayahudi. 58 Ʉnsɨkɨ gʉʉgwa, namwene ʉPetulo ʉvɨ aankongaga ʉYɨɨsʉ pavʉtale, akiingila mu nʼgati mu libooma ɨlya nteeketsi ʉmbaha. Akataama paninie na valoleeli, pakʉta alole ʉmwʉ ɨnongwa jya Yɨɨsʉ jisilila.

59 Avavaha va vateeketsi valya na vavaha va kɨvʉmbʉkʉ kyoni kya Vaisilahɨli, valɨkʉgela ʉkʉlonda amamenyu ga kwɨmɨlamwo pa kʉmmɨga ʉYɨɨsʉ ʉkʉta vamʼbude. 60 Lɨno, navaavʉvone ʉwooleletsi ʉvʉveetsaga wa vʉnuasi paninie nʉ kʉta viitsile avooleletsi va vʉnuasi vongosu. Kʉ vʉmalɨlo, avaanu vavɨlɨ vakiitsa vakata, 61 “Ʉmuunu ʉjʉ aatye, ‘Ndiweesa ʉkʉmamula ʉVʉtaamo ʉVʉvalatse wa Ngʉlʉve nʉ kʉtsenga ikange mu sigono sidatu.’ ”

62 Pwʉ ʉnteeketsi ʉmbaha akɨɨma, akambʉʉtsa ʉYɨɨsʉ akata, “Ndeeti, navukwanda limenyu ɨlɨveetsaga ʉkʉkongana nʉ gwʉ avaanu ava vikʉkʉhɨga ʉve?” 63 ɄYɨɨsʉ naamwande kɨɨnu. Pwʉ ʉnteeketsi ʉmbaha ʉlya, akambʉʉla ikange akata, “Ɨjyɨge mu litaawa lya Ngʉlʉve ʉvɨ mwʉmi, tʉvʉʉle wʉ vukɨjyɨga, ɨngave lweli ʉve veeve Kɨlɨsiti, Mwana va Ngʉlʉve.” 64 ɄYɨɨsʉ akamwanda akata, “Ʉve veeve ʉtsovile. Lɨno ndikʉvavʉʉla nyɨ vooni ʉkʉta, ʉkʉtengʉla lɨno, mulambona ʉMwana va Muunu ataamile ʉlʉvasu lwa kʉndyo lwa Ngʉlʉve ʉNyamaka Gooni. Ikange, mulambona wʉ ikwitsa mu mavɨngo ga kʉkyanya.” 65 Wʉ ʉnteeketsi ʉmbaha apʉliike amamenyu ago, akalendʉla ɨkanzo jya mwene kʉ lʉviipo. Akatsova akata, “Mupʉliike nyɨ vooni wʉ idʉkɨla kwa Ngʉlʉve! Lɨno, tʉlondage avooleletsi avange vɨɨki? Mwɨpʉlɨkye jyʉnyie amadʉsi ga mwene! 66 Lɨno, ʉnyie mwita ndeeti?” Vakamwanda vakata, “Ave va kʉbudwa kwene!”

67 Pwʉ vakatengʉla ʉkʉmʼbehela amati kʉmiiho, vakantova ni mbuli. Avange vakantova na mapi. 68 Vakannyongʼonyola vakata, “Gwe Kɨlɨsiti, lagʉlɨla, veeni ʉvɨ akʉtovile?”

ɄPetulo ikʉmʼbeela ʉYɨɨsʉ

(Maliko 14:66-72; Luuka 22:56-62; Yohana 18:15-18, 25-27)

69 Lɨno mu nsɨkɨ gʉʉgʉlya gʉlya, ʉPetulo aataamile mu lʉvɨgo lwa nyumba jya nteeketsi ʉmbaha. Ʉmbombi mpamato ʉmmɨnza, akahegelela pa Petulo, akambʉʉla akata, “Gwe, najyʉve ʉve ʉkaale paninie nʉ Yɨɨsʉ va kʉ Galilaya.” 70 ɄPetulo akabeela pavʉlongolo pa valya vooni akata, “Nandɨgamanyili ago ʉgwʉ witsova!”

71 ɄPetulo akahega palya, akalʉta kʉ ndyango gwa kʉhʉmɨla mu lʉvɨgo. Ʉmbombi ʉjyʉnge ʉmmɨnza, akambona ʉPetulo. Namwene akavavʉʉla avaanu ʉwʉ vaalepwo palya akata, “Ʉmuunu ʉjʉ akaveetsaga paninie nʉ Yɨɨsʉ va kʉ Nazaleti.” 72 ɄPetulo akabeela ikange nʉ kwɨjyɨga akata, “Nandɨmmanyili ʉmuunu ʉjwa!”

73 Wʉ kalʉtɨngʼiinie akasɨkɨ kadebe, avaanu valya ʉwʉ vɨɨmile palya, vakahegelela kwa Petulo. Vakambʉʉla vakata, “Jɨlweli, ʉve ʉlɨ mpamato mu vaanu avo, ʉlwakʉva najɨ nzovele jyako jivonia pavʉvalasu ʉkʉta ʉhʉmile kʉ Galilaya!” 74 ɄPetulo akabeela kʉnʉ ikɨjyɨga akata, “Ɨngave ndɨtsovile ʉvʉnuasi, ndɨkootolwe! Nandɨmmanyili ʉmuunu ʉjwa!” Baaho ɨngʼongove jɨkavɨka.

75 Pwʉ ʉPetulo akakʉmbʉhɨtsa amamenyu galya ʉgwʉ ʉYɨɨsʉ akambʉʉlile agiita, “Ɨngʼongove wʉ najɨvɨkili, jʉvukʉmbeela kadatu.” Akahʉma kʉnzi, akalɨla siitso.