ɄYɨɨsʉ ikʉvapugusa isilʉnde avakongi va mwene
13
1 Wʉ ɨkyaka kya Pasaka kɨhegelye,
ʉYɨɨsʉ akalʉmanya ʉkʉta gʉsiike ʉnsɨkɨ gwa mwene gwa kʉhega mu kɨlʉnga ɨkɨ ʉkʉkilivuka kwa Dadaaje.
Ʉnsɨkɨ gwoni wʉ alɨ mu kɨlʉnga ɨkɨ,
aavaganile avaanu va mwene,
ikange aavoniitse ʉkʉvagana ʉkʉsikila kʉ vʉsililo.
2 Ʉnsɨkɨ gwa kʉlya ɨkyakʉlya kya kwɨgoneka wʉ gʉsiike,
ʉSetano akava ingiitse mu numbula jya Yuuda ʉmwana va Simoni Isikalioti ɨlisaago lya kʉmmendama ʉYɨɨsʉ.
3 ɄYɨɨsʉ aalʉmanyile ʉkʉta ʉDadaaje aampye ʉvʉtavʉlɨlwa wa kʉlongotsa isiinu syoni,
ikange ʉkʉta ʉmwene ahʉmile kwa Ngʉlʉve,
nʉ kʉta alakilivuka ikange kwa Ngʉlʉve.
4 Pwʉ akakʉleka ʉkʉlya,
akɨɨma,
akasuula ɨlikoti,
akavɨɨka kʉ lʉkanzi,
akatoola ɨlitaavʉlʉ,
akɨpinya mu kɨvino.
5 Akaduudila amagasi mu libeseni.
Akatengʉla ʉkʉpugusa isilʉnde sya vakongi va mwene nʉ kʉlagalʉsa nɨ litaavʉlʉ ɨlyʉ ɨɨpinyile.
6 ɄYɨɨsʉ wʉ asiike pa Simoni Petulo,
ʉPetulo akambʉʉtsa akata,
“Gwe Ntwa,
ndeeti,
ʉve vunogwa ʉkʉpugusa isilʉnde syane?”
7 ɄYɨɨsʉ akamwanda akata,
“Ʉve nʉgamanyili ʉgwʉ ndivomba ʉnsɨkɨ ʉgʉ,
apeene jʉvʉkʉgamanya kʉmbele.”
8 ɄPetulo akamwanda akata,
“Ndajɨve ndeeti nʉkaweese ʉkʉpugusa isilʉnde syane!”
Pwʉ ʉYɨɨsʉ akamwanda akata,
“Ɨngave nandikʉkʉpʉgusi ʉve,
nʉkaave nʉ vʉhange nʉʉne.”
9 Pwʉ ʉSimoni Petulo akamwanda akata,
“Gwe Ntwa,
ɨngave wʉ jɨlɨwo,
ʉleke ʉkʉmugusa sisilʉnde syene,
apeene ʉmuguse nasi sivoko paninie nʉ ntwe gwango.”
10 ɄYɨɨsʉ akamwanda akata,
“Ʉmuunu ʉvɨ amalile ʉkwoga,
nilondiwa ʉkwoga ikange,
apeene kwene ʉkʉpuguha isilʉnde.
Ʉjwa amalile ʉkʉvalala lwoni.
Lola,
ʉnyie muvalye,
napeene nakwʉ kʉta muvalye nyɨ vooni.”
11 ɄYɨɨsʉ aammanyile ʉmmendami va mwene,
kyʉ kɨɨnu aatsovile akata,
“Nakwʉ kʉta muvalye nyɨ vooni.”
12 ɄYɨɨsʉ wʉ amalile ʉkʉvapʉgusa isilʉnde avakongi va mwene,
akatoola ɨlikoti lya mwene akaswala,
akakilivuka ʉpwʉ vaalitsaga ɨkyakʉlya,
akavavʉʉtsa akata,
“Ndeeti,
mutsimanyingʼiinie itsʉ ndɨvavombye ʉnyie?
13 Ʉnyie mukʉnnyɨlanga ʉne mwita,
‘Mmanyisi’ ikange mwita,
‘Ntwa,’
mwitsova itsa jɨlweli,
ʉlwakʉva ʉne ndɨlɨ Mmanyisi,
ikange ndɨlɨ Ntwa.
14 Ʉne ndɨ Mmanyisi viinyo,
ikange ndɨ Ntwa viinyo,
ndɨvapugwise isilʉnde ʉnyie.
Vʉvʉle vʉle najyʉnyie wʉ muvombage,
mupugusaniage isilʉnde siinyo.
15 Ndɨvavoniitse ɨkɨhwananitso ɨkɨ pakʉta najyʉnyie muvombelanilage ndʉwʉ ndɨvavombye ʉnyie.
16 Jɨlweli ndikʉvavʉʉla,
ʉmbanda niiva muunu mwɨmɨkiwa ʉkʉndʉtɨɨlɨla ʉntwa va mwene,
ikange ʉvɨ isuungʼwa niiva muunu mwɨmɨkiwa ʉkʉndʉtɨɨlɨla ʉvɨ ansuungʼile.
17 Ɨngave mutsimanyingʼiinie itso,
pwʉ mwiva vagatalʉsu ɨngave mukonga ɨkɨhwananitso ɨkɨ.
18 “Nanditsova aga kʉ nyɨ vooni.
Ndɨvamanyile ʉkʉhʉma pa vʉtengʉlɨlo avaanu ʉwʉ ndɨvoomwe ʉkʉva vakongi vango.
Lɨno ndɨtsovile aga pakʉta gavoneke ʉgwʉ gaavɨgilwe mu Vʉvɨge ʉVʉvalatse ʉkʉta,
‘Ʉmmanyaani vango ʉvɨ aalitsaga ɨkyakʉlya paninie nʉʉne,
agalamwike nʉ kʉva ndʉgʉ vango.’a
19 Ndikʉvavʉʉla gooni aga ʉnsɨkɨ ʉgʉ wʉ tsikaanale ʉkʉvoneka,
pakʉta wʉ tsivoniike,
jʉmwɨdɨkage ʉkʉta Ʉne Neene ndɨ Ndɨlɨkwo.b
20 Jɨlweli ndikʉvavʉʉla ʉkʉta,
ʉmuunu ʉvaveetsaga ʉvɨ ikʉmwʉpɨlɨla ʉvɨ ndɨnsuungʼile,
pwʉ iiva ikʉnnyʉpɨlɨla ʉne.
Ikange,
ʉvaveetsaga ʉvɨ ikʉnnyʉpɨlɨla ʉne,
iiva ikʉmwʉpɨlɨla ʉDaada ʉvɨ ansuungʼile ʉne.”
ɄYɨɨsʉ itsova ʉvɨ jiikʉmmendama
21 ɄYɨɨsʉ wʉ atsovile ago,
akasʉsʉvala siitso mu numbula jya mwene,
akatsova pavʉvalasu akata,
“Jɨlweli ndikʉvavʉʉla,
mpamato pagati paanyie jiikʉnsupulila kʉ valʉgʉ.”
22 Pwʉ avakongi va mwene vakatengʉla ʉkʉlolana,
manya vaakenyemwike ikange navaakɨmanye ɨkɨveetsaga ʉkʉta ikʉntsova veeni.
23 Aalepwo ʉnkongi mpamato ʉvɨ ʉYɨɨsʉ aanʼganile siitso.
Ʉjwa aataamile lʉkɨgɨc apoonu pa wɨɨmɨkiwa,
pawiipi nʉ Yɨɨsʉ,
wʉ alɨ pa kʉlya.
24 Pwʉ ʉSimoni Petulo akantinitsa ʉnkongi ʉlya pakʉta ambʉʉtse ʉYɨɨsʉ aantsovaga veeni pagati pa veene.
25 Pwʉ ʉnkongi ʉlya akamwegamila ʉYɨɨsʉ,
akambʉʉtsa akata,
“Gwe Ntwa,
witsova veeni?”
26 ɄYɨɨsʉ akamwanda akata,
“Vɨ ʉlya ʉvɨ ndɨpikʉmpa ɨkɨpande ɨkɨ ɨkya nkate wʉ ndɨsaasile mu kɨkongʼolo.”
Pwʉ akasaasa ɨkɨpande ɨkyo mu kɨkongʼolo,
akampa ʉYuuda,
ʉmwana va Simoni Isikalioti.
27 ɄYuuda wʉ ʉpɨlye ɨkɨpande kɨlya kya nkate,
baaho akatengʉla ʉkʉlongotsiwa nʉ Setano.
Pwʉ ʉYɨɨsʉ akambʉʉla ʉYuuda akata,
“Ʉgwʉ vunogwa ʉkʉvomba,
vomba ngʼaningʼaani!”
28 Lɨno avaanu vooni ʉwʉ vaalitsaga,
pange valʉmanye ʉkʉta kɨki ʉYɨɨsʉ itsova ndavʉle.
29 Ʉkʉkongana nʉ Yuuda ʉkʉva vɨ aaloleelaga ʉmpako gwa ndalama,
avange vaatye ipange ʉYɨɨsʉ aambʉʉlile ʉkʉta akagʉle isiinu isilondiwa vave nasyo pa kyaka,
evo avape avagatsu indalama ninie.
30 Pwʉ ʉYuuda wʉ ʉpɨlye ɨkɨpande kɨlya,
baaho akahʉma kʉnzi.
Gwale nsɨkɨ gwa pakɨlo.
ɄYɨɨsʉ ikʉvapa avakongi va mwene ʉlʉlagɨlo ʉlʉpya
31 Pwʉ ʉYuuda wʉ ahʉmile kʉnzi,
ʉYɨɨsʉ akavavʉʉla avakongi va mwene akata,
“Lɨno ʉwɨɨmɨkiwa wango ʉne ndɨ Mwana va Muunu vʉhegelye ʉkʉvoneka pavʉvalasu.
Ikange vʉpivoneka pavʉvalasu ʉwɨɨmɨkiwa wa Ngʉlʉve ʉkʉgendela mu mbombo tsyango.
32 Pwʉ ɨngave vuvonekela ʉwɨɨmɨkiwa wa mwene ʉkʉgendela mu mbombo tsyango,
pwʉ namwene ʉNgʉlʉve jiikʉvavonia avaanu ʉwɨɨmɨkiwa ʉwʉ ndɨlɨ nawo ʉne ndɨ Mwana va Muunu ʉkʉgendela mu mwene,
ikange jiivomba ndavʉle kɨtsila kʉsuvalɨla.
33 “Mwe vaana vango,
ndɨlɨ paninie nʉʉnyie kʉ nsɨkɨ nsupi vʉvʉle.
Ndɨngalʉte,
jʉmukʉndondaga.
Ndʉwʉ ndyavavʉʉlile avalongotsi va Vayahudi,
vʉvʉle vʉle ndikʉvavʉʉla najyʉnyie lɨno ʉkʉta,
mupya mukʉndonda,
namukambone,
manya namukaweese ʉkwitsa ʉkwʉ jʉndiiva.
34 Lɨno ndikʉvapa ʉlʉlagɨlo ʉlʉpya ndiita,
‘Mugananage.
Ndʉwʉ ʉne ndɨvaganile ʉnyie,
vʉvʉle vʉle najyʉnyie mugananage.’
35 Ɨngave muganana,
pwʉ avaanu vooni jʉvikʉlʉmanya ʉkʉta ʉnyie mulɨ vakongi vango.”
ɄYɨɨsʉ ivonia ʉkʉta ʉPetulo jiikʉmʼbeela
36 Pwʉ ʉSimoni Petulo akambʉʉtsa ʉYɨɨsʉ akata,
“Gwe Ntwa,
wibɨha ndaku?”
ɄYɨɨsʉ akamwanda akata,
“Ndilʉta ʉkwʉ ʉve nʉkaweese ʉkʉngʼonga ʉnsɨkɨ ʉgʉ,
apeene ʉlangʼonga kʉmbele.”
37 ɄPetulo akambʉʉtsa ikange akata,
“Gwe Ntwa,
kɨki kivɨɨka ndɨlemwe ʉkʉkʉkonga ʉnsɨkɨ ʉgʉ?
Ʉne ndyɨsaawe ʉkʉhʉmya ʉwʉʉmi wango pa kʉkʉpoka ʉve.”
38 ɄYɨɨsʉ akamwanda akata,
“Petulo,
vuweesa ʉkʉnswɨla ʉne?
Jɨlweli ndikʉkʉvʉʉla ʉkʉta,
wʉ ɨngʼongove najɨvɨkili,
ʉve jʉwiiva ʉmbeelile ʉne kadatu ʉkʉta nʉmmanyili.”