ɄYɨɨsʉ itsova amalago ga kʉmamulwa ɨtembile
13
1 ɄYɨɨsʉ wʉ ihʉma mu tembile,
ʉnkongi va mwene mpamato akambʉʉla akata,
“IMmanyisi,
ʉlole ʉvʉnonu wa nyumba itsi nʉ vʉvaha wa maganga ʉgwʉ vatsengye mu lʉmato!”
2 ɄYɨɨsʉ akaanda akata,
“Vukʉtsivona inyumba itsi ʉmwʉ tsiveelye ʉvʉvaha?
Nalɨlaavepwo ɨliganga ɨlyʉ lɨlasigala pakyanya pa lɨnge,
gooni galamamulwa.”
Ikulongwi tsa vʉkʉvɨlwa ʉvʉliitsa
3 Kʉmbele,
ʉYɨɨsʉ aataamile pa kɨdugala ɨkya Mizeituni,
aalotsiitse amiiho kʉ tembile.
Wʉ vɨjyekye ʉPetulo,
ʉYakobo,
ʉYohana nʉ Andeleya,
vakambʉʉtsa ʉYɨɨsʉ vakata,
4 “Tudoova ʉtʉvʉʉle,
galahʉmɨla ndali gooni ago ʉgwʉ ʉkatsovaga?
Ikange,
kɨɨnu kɨki ɨkɨlatʉvonia ʉkʉta ʉkwitsa kwave nʉ vʉsililo wa kɨlʉnga vʉhegelye?”
5 ɄYɨɨsʉ akatengʉla ʉkʉvavʉʉla akata,
“Mutaamage miiho,
aleke ʉmuunu ʉvaveetsaga ʉkʉvasyova.
6 Lola,
valiitsaga avaanu vongosu nʉ kwɨvɨɨka neene,
valateetsaga,
‘Ʉne neene Kɨlɨsiti!’
Naveene valavatekeletsaaga avaanu vongosu.
7 Ɨkɨɨnu ɨkɨnge,
mulapʉlɨkaga ikulongwi tsa magoha ni vuguuvugu tsa magoha.
Mwitse mwɨlekelwe ʉkʉdwada ʉlwakʉva ago wɨgane wa Ngʉlʉve giitse gahʉmɨle taasi,
wʉ ʉvʉsililo wa kɨlʉnga vʉpitsiige vʉkaanale ʉkwitsa.
8 Ikange,
avaanu va kɨlʉnga kɨpamato valalwitsaga na vaanu va kɨlʉnga ɨkɨnge,
nʉ lʉdeeva lʉlalwitsaga nʉ lʉdeeva ʉlʉnge.
Kɨlahʉmɨlaga ɨkɨlindima kʉnʉ na kʉnʉ,
nɨ nzala jɨlagwitsaga.
Ago galaava ndʉ vʉtengʉlʉ wa lʉvavo lwa kʉholwa ʉmwana.
9 “Mwɨlolelage,
avaanu valavahɨlɨkaga pa vʉhɨgi nʉ kʉvatova mu masinagogi.
Ikange valavahɨlɨkaga ʉnyie pavʉlongolo pa vatwa na pa vakʉlʉdeeva mukahɨgwagwe pakʉva mukʉngʼonga ʉne.
Ʉgwa gʉlaveetsaga insɨkɨ inonu gwanyie gwa kʉvavʉʉla ikulongwi tsyango.
10 Napeene,
wʉ vʉkaanale ʉkwitsa ʉvʉsililo wa kɨlʉnga,
wɨgane wa Ngʉlʉve ʉkʉta ɨLivangɨli lɨlʉmbɨlɨlwe kʉ vaanu va sivʉmbʉkʉ syoni.
11 “Vangave vikʉvakʉnga nʉ kʉvagega pa vʉhɨgi,
mwitse mulekage ʉkʉsaaga itsa kʉtsova.
Mwitse mutsovage baaho itsilaava tsikʉviitsila mu numbula tsiinyo ʉlwakʉva ʉvaalatsovaga vɨ Mepo ʉMbalatse.
12 Avanamuunu valahendamanaga ʉkʉta ʉjyʉnge abudwagwe,
ʉdadaaje alammendamaga ʉmwana va mwene,
naveene avaana valavasambʉkɨlaga avahotsi nʉ kʉvapelela vabudwagwe.
13 Avaanu vooni valavasʉʉla ʉnyie kʉ nongwa jyane.
Ʉmuunu ʉvaveetsaga ʉvalaava ikɨjʉmɨɨlɨtsa ʉkʉsika kʉ vʉmalɨlo,
vɨ ʉNgʉlʉve alampoka.
14 “Lʉngave lʉsiku mukʉmbona ʉntavangwa ʉvileeta ʉvʉvejangi,
b ɨmile pa Vʉtaamo ʉVʉvalatse wa Ngʉlʉvea ʉpwʉ nanogiili ʉkwɨma (ʉmuunu ʉvaveetsaga ʉvɨ ikwɨmba amamenyu aga,
alʉmanye ʉmwʉ gitsovela).
Lɨno avaanu vooni ʉwʉ vitaama mu kɨlʉnga ɨkya Yuuda,
viitse vakɨmbɨlɨlage kʉ sidugala.
15 Ʉlya ʉvɨ alaava kʉkyanya kʉ nyumba,
aleke ʉkwika paasi nʉ kwingila mu nyumba pakʉta atoole ɨkɨɨnu ɨkɨveetsaga kya mwene ɨkɨlɨ mu nʼgati.
16 Ikange,
ʉmuunu ʉvɨ alaava pa kɨlɨmɨla,
aleke ʉkʉkilivuka kʉ nyumba kutoola ndalɨve likoti.
17 Vasue vʉvʉle avadala ʉwʉ valaava nʉ vʉtsito nʉ wʉ valoosaagac mu sigono isyo!
18 Mudoovage kwa Ngʉlʉve pakʉta giitse galeke ʉkʉhʉmɨla mu nsɨkɨ ʉmbiivi gwa ngʼaala ɨngʼali.
19 Lola,
mu sigono isyo,
avaanu valaava mu vʉkʉvɨlwa ʉwʉ navʉgelili ʉkʉvoneka lʉsiku ʉkʉhʉma ʉNgʉlʉve apelage ɨkɨlʉnga ʉkʉsika ɨleelo.
Ikange ʉvʉkʉvɨlwa ʉwa navʉliitse vʉvoneke lʉsiku.
20 ɄNtwa ʉNgʉlʉve aale aleke ʉkʉlamula ʉkʉta isigono isyo isya vʉkʉvɨlwa sive sidebe,
jyale jiiva nakʉli ʉmuunu ʉvɨ aale ipona.
Lɨno kʉ nongwa jya vahalwa va mwene,
ʉNgʉlʉve alavɨɨka isigono isyo sive sidebe.
21 “Lɨno mu nsɨkɨ ʉgwa,
ɨngave ʉmuunu ikʉvavʉʉla iita,
‘Lola,
ʉKɨlɨsiti alɨ apa,’
evo ‘Alɨ ʉkʉ!’
mulagelaga ʉkʉmwɨdɨka.
22 Lola,
valiitsa avaanu avanuasi ʉwʉ nʉ jyʉnge alɨtsovaga ʉkʉta vɨ Kɨlɨsiti evo vɨ nyamalago.
Valavombaga isidego pakʉta pangave poonu vavasyove nava vahalwa va Ngʉlʉve.
23 Mutaamage miiho ʉlwakʉva ndɨvapavye itso tsyoni wʉ tsikaanale ʉkʉhʉmɨla.”
Ʉkwitsa kwa Yɨɨsʉ ʉlwa vɨɨlɨ mu kɨlʉnga
24 “Lɨno,
ʉnsɨkɨ gʉʉgwa wʉ silʉtɨngʼiinie isigono isyo sya vʉkʉvɨlwa,
‘ɄNgʉlʉve alahambʉla ɨlitsʉva lɨve ngʼiisi,
ʉmwetsi nagʉlamulikage ikange.
25 Natsyene inondwe tsilagwitsaga paasi.’
d
ɄNgʉlʉve alajʉtsaania amaka ga kʉkyanya.
26 “Pwʉ avaanu vooni valambona ʉMwana va Muunu ikwitsa mu mavɨngo na maka amalʉti nʉ wɨɨmɨkiwa.
27 Pa nsɨkɨ ʉgwa,
alavasuungʼa avasuungʼwa va mwene,
valʉte vavalʉndamanie avahalwa va Ngʉlʉve,
ʉkʉhʉma mu mbasu tsyoni inni tsa kɨlʉnga,
ʉkʉhʉma kʉ vʉsililo vʉpamato wa vʉtandaatse ʉkʉsika kʉ vʉsililo ʉvʉnge.
Ʉlʉsimiilitso lwa Yɨɨsʉ ʉlwa kʉtaama miiho pa kwitsa kwa mwene ʉlwa vɨɨlɨ
28 “Lɨno mumanyile ɨkɨhwananitso kya libɨkɨ ɨlikʉjʉ.
Ʉnsɨkɨ ʉgwʉ isamba tsitengʉla ʉkʉlemba nʉ kʉvɨɨka amaani amapya,
mukʉlʉmanya ʉkʉta ɨkɨsuku kɨhegelye.
29 Najyʉnyie vʉvʉle vʉle,
mulaava mukʉtsivona itso tsivombeka,
mwitse mulʉmanyilage ngʼaani ʉkʉta ʉkwitsa kwa Mwana va Muunu kʉhegelye.
30 Tsa jɨlweli ndikʉvavʉʉla ndiita,
ɨkɨvʉmbʉkʉ ɨkɨ nakɨkalʉtɨngʼanie wʉ aga gooni nagavombiiki.
31 Ʉvʉtandaatse nɨ kɨlʉnga silajaga,
apeene amamenyu gango nagalajage lʉsiku.
32 “Lɨno ikulongwi tsa kɨgono nʉ nsɨkɨ ʉpwʉ ʉMwana va Muunu aliitsa,
nakʉli ʉmuunu ʉvɨ alʉmanyile,
vave wʉ vasuungʼwa va kʉkyanya,
pange vɨ Mwana,
apeene mwene ʉDaada vɨ alʉmanyile.
33 Mwɨlolelage!
Mutaamage miiho ʉnsɨkɨ gwoni,
manya namugʉmanyili ʉnsɨkɨ ʉgwa gukwitsa ndali.
34 “Ikulongwi itsi tsihwaniine nɨ kɨhwananitso kya muunu ʉvɨ aahegile pa nyumba jya mwene,
akalʉta ʉkwonu ʉkʉnge.
Akavalekela avavombi va mwene ʉwɨɨmɨɨlɨtsi wa mbombo,
akavagavɨla imbombo tsa kʉvomba nʉ jyʉnge ɨjya mwene,
pwʉ akandagɨla ʉndoleeli va pa ndyango ʉkʉta aveetsage miiho.
35 “Mutaamage miiho ʉlwakʉva ʉnyie namulʉmanyili ʉpwʉ ʉmwenenyumba jiikilivuka.
Ipange jʉjiiva kʉmihe,
pakɨlo pagati,
wʉ kwikya evo pavʉsiku.
36 Mutaamage miiho,
pakʉta angiitse ʉnsɨkɨ ʉgwʉ namuhʉʉvɨla aleke ʉkʉvona mugoneelye.
37 Itsi itsʉ ndikʉvavʉʉla ʉnyie,
tsʉ ndikʉvavʉʉla avaanu vooni.
Mutaamage miiho!”