Maliko 12

Ɨkɨhwananitso kya kɨlɨmɨla kya mizabibu na vavombi avaviivi

(Mataayo 21:33-46; Luuka 20:9-19)

1 Pwʉ ʉYɨɨsʉ akatengʉla ʉkʉtsova na valongotsi valya kʉ sihwananitso akata, “Aalepwo ʉmuunu mpamato ʉvɨ aalɨmile ɨkɨlɨmɨla kya mwene nʉ kʉvyala ɨmizabibu. Akavɨga ʉlʉvɨgo, akajava pagati ɨliguli lya kʉhʉʉtsɨla ʉlʉhʉʉtsi lwa zabibu, ikange akatsenga ʉnnaala pa kwɨma avaloleeli va kɨlɨmɨla. Pwʉ akavalekela avaalɨmaga ɨkɨlɨmɨla ɨkyo ʉkʉta vakyɨmɨɨlɨle. Ʉmwene akahega akalʉta kʉ kɨlʉnga ɨkɨnge. 2 Ʉnsɨkɨ gwa kʉtʉngʉla izabibu wʉ gʉsiike, akansuungʼa ʉmbombi va mwene kʉ vaanu avaalɨmaga valya, akatoole izabibu tsa kɨtʉmba itsʉ igavɨlwa ʉmwenekɨlɨmɨla. 3 Ʉmbombi ʉlya wʉ asiike, avaanu avaalɨmaga ɨkɨlɨmɨla kɨlya vakamwibata, vakantova, vakanswɨma, akakilivuka isivoko syene. 4 Ʉmwenekɨlɨmɨla akansuungʼa akange ʉmbombi ʉjyʉnge. Ʉjʉ namwene vakantova, vakandematsa kʉ ntwe, ikange vakankinila. 5 Ʉmwenekɨlɨmɨla akansuungʼa akange ʉmbombi ʉjyʉnge, ʉjwa vakamʼbuda. Na vange vongosu ʉwʉ ongeliitse ʉkʉvasuungʼa kʉmbele valɨkʉtowa, avange valɨkʉbudwa.

6 “Lola, ʉmwenekɨlɨmɨla aasigye nʉ nswambe ʉnʼgane siitso. Kʉ vʉmalɨlo akansuungʼa ʉjwa akata, ‘Ndisaaga, vikamwɨmɨke ʉnswambango.’ 7 Aveene avalɨmi avo vakɨtsosanza vakata, ‘Ʉnswambe va mwenekɨlɨmɨla ʉjʉ vɨ mwenevʉhaale, tʉmʼbude, pakʉta ʉvʉhaale wa mwene vʉve wiitu.’ 8 Pwʉ vakamwibata, vakamʼbuda nʉ kʉntaaga kʉnzi kʉ kɨlɨmɨla kya mizabibu.

9 “Lɨno ʉmwenekɨlɨmɨla ʉlya jiikʉvagaha ndeeti avalɨmi valya? Jiikwitsa nʉ kʉbuda avalɨmi valya, nɨ kɨlɨmɨla ɨkyo jiikʉvapa avalɨmi avange. 10 Ndeeti, namugelili mwɨmbe mu Vʉvɨge ʉVʉvalatse ikulongwi itsi? Tsivɨgilwe ndee,

‘Ɨliganga ɨlyʉ avatsenganyumba vaalɨbeelile,

ɨlyo lyʉ lɨvye liganga ɨlivaha lya kwibata ɨnyumba

pa nguto jya waalo wa jyene.

11 ɄNtwa vɨ avombile ɨlɨ, pwʉ ɨlyene lɨvye lya kʉdega kwawe.’”

12 Avavaha va vateeketsi, avamanyisi va ndagɨlo na vanzagɨla vakalʉmanya ʉkʉta ɨkɨhwananitso ɨkyo kikʉvatsova aveene, vakanogwa ʉkʉmwibata ʉYɨɨsʉ. Napeene, vakalemwa pakʉva vaadwadaga ɨlipʉga lya vaanu avaale palya. Pwʉ vakandeka nʉ kʉhega.

Ɨkulongwi jya kʉsonga ɨsongo kwa Kaisali

(Mataayo 22:15-22; Luuka 20:20-26)

13 Kʉmbele, avalongotsi valya, vakavasuungʼa aVafalisayo vaninie na vaanu ʉkʉhʉma mu kɨpʉga kya Helode, ʉkʉta viitse vantegeeletse ʉYɨɨsʉ mu mamenyu ga mwene. 14 Valya avaasuungʼilwe kʉ mwene vakiitsa, vakata, “IMmanyisi, tʉlʉmanyile ʉkʉta ʉve ʉlɨ nʼgolosu, witsova itsa jɨlweli tsyene, navukʉnʼdwada ʉmuunu ʉvaveetsaga. Ikange ʉwɨɨmɨkiwa wa muunu nakɨɨnu kya kʉvɨɨkɨla ʉntɨma kwave, apeene vumanyiisa ʉwajɨlweli wa nzɨla jya Ngʉlʉve. Ndeeti, nda vʉtavʉlɨlwa ʉkʉsonga ɨsongo kwa Kaisali evo baako? 15 Tʉsongage evo twɨlekelwe?” Ʉmwene ʉYɨɨsʉ aavʉmanyile ʉvʉnuasi wa veene akavavʉʉla akata, “Kɨki mukʉngela? Muume ɨdinali, ndɨjɨlole.” 16 Wʉ vampye ɨdinali, akavavʉʉtsa akata, “Ɨkɨhwani ɨkɨ nʉ vʉvɨge ʉvʉlɨ pakyanya pa hela ɨjɨ waani?” Vakamwanda vakata, “Sya Kaisali.”

17 Pwʉ ʉYɨɨsʉ akavavʉʉla akata, “Mumpeetsage ʉKaisali isya mwene, namwene ʉNgʉlʉve mumpeetsage isya mwene.” Wʉ vagapʉliike ago, vakanʼdega siitso.

Ɨkulongwi jya kʉtsʉʉka avaswe

(Mataayo 22:23-33; Luuka 20:27-40)

18 Pwʉ aVasadukayo vakalʉta kwa Yɨɨsʉ. AVasadukayo vaanu ʉwʉ vaamanyiisaaga ʉkʉta ʉNgʉlʉve nalatsʉʉse avaanu ʉkʉhʉma kʉ vʉswe. Avo vakambʉʉtsa ʉYɨɨsʉ vakata, 19 “Gwe Mmanyisi, ʉMoose aatʉvɨgye ʉlʉlagɨlo ʉlwita, ‘Angave ʉmuunu iiswa nʉ kʉndeka ʉnʼdala va mwene kɨtsila mwana, apo ʉlʉkololwe ahaale ʉnswɨle ʉjwa pakʉta oolose ʉlʉjungu lwa lʉkololwe ʉvaasue.’ 20 Lɨno, ʉnsɨkɨ mpamato, vaalepwo avanamuunu lekelakʉpamato (7). Ʉntatsi akategʉla ʉnʼdala, akaswa kɨtsila kʉhola ʉmwana. 21 Ʉlʉkololwe ʉvɨ aankongile, akahaala ʉnʼdala ʉnswɨle ʉlya. Namwene ʉjʉ akaswa kɨtsila kʉhola ʉmwana. Tsyavombiike vʉle vʉle nakʉ va daatu. 22 Tsikahʉmɨla ewo kʉ vooni lekelakʉpamato. Kʉ vʉmalɨlo namwene ʉnʼdala ʉlya akaswa. 23 Pwʉ ʉtʉvʉʉle, pa kɨgono kɨlya ɨkyʉ avaswe vooni valatsʉʉka, ʉnʼdala ʉnswɨle ʉjwa alaava nʼdala vaani? Tuvʉʉtsa ewo ʉlwakʉva aatoolilwe na vagoosi vooni lekelakʉpamato!”

24 ɄYɨɨsʉ akavaanda akata, “Ʉnyie mujagile lwoni pakʉva namugamanyili agaavɨgilwe mu Vʉvɨge ʉVʉvalatse. Ikange namugamanyili amaka ga Ngʉlʉve ʉmwʉ gaveelye. 25 Lola, ʉnsɨkɨ ʉgwʉ avaswe valatsʉʉka, navalategʉlage pange kʉtegʉlwa, apeene valaava nda vasuungʼwa va Ngʉlʉve ʉwʉ valɨ kʉkyanya, manya navitegʉla nʉ kʉtegʉlwa. 26 Kʉ nongwa jya kʉtsʉʉka avaswe, namwɨmbili mu kɨtabu kya Moose apoonu apitsova ɨkulongwi ɨjya kɨtsaga ɨkyaviikaga ʉmwoto? ɄNgʉlʉve aambʉʉlile ʉMoose akata, ‘Ʉne neene Ngʉlʉve va Abulahamu, va Isaka nʉ Yakobo.’ 27 Mu mamenyu aga ʉNgʉlʉve ivonia ʉkʉta avaswe vapitsiige vʉʉmi kʉ mwene. Ʉnyie mujagile lwoni ʉpwʉ mwita nakwʉkʉle ʉkʉtsʉʉka kwa vaswe!”

Ʉlʉlagɨlo ʉlʉlʉti kʉ tsyoni

(Mataayo 22:34-40; Luuka 10:25-28)

28 Ʉmmanyisi mpamato va ndagɨlo akiitsa, akapʉlɨhɨtsa wʉ vikaningʼana nʉ Yɨɨsʉ. Wʉ aweene ʉYɨɨsʉ avaandile vʉnonu, akambʉʉtsa akata, “Mu ndagɨlo tsa Ngʉlʉve, lwʉ lʉlɨku ʉlʉlagɨlo ʉlʉlʉti?”

29 ɄYɨɨsʉ akaanda akata, “Ʉlʉlagɨlo ʉlʉlʉti lwʉ ʉlʉ, ‘Pʉlɨhɨtsaaga ʉve Isilahɨli, ʉNtwa ʉNgʉlʉve viitu vɨ Nkʉlʉdeeva jyʉjwa mwene. 30 Nʉʉve ʉnʼganage ʉNtwa ʉNgʉlʉve vaako nɨ numbula jyako jyoni, nʉ lʉhala lwako lwoni, na maka gaako gooni.’ 31 Ʉlʉlagɨlo ʉlwa vɨɨlɨ lwʉ ʉlʉ, ‘Ʉnʼganage ʉnnino ndʉwʉ wɨganile jyʉve.’ Nalʉkʉli ʉlʉlagɨlo ʉlʉnge ʉkʉlʉtɨɨlɨla itsi.”

32 Pwʉ ʉmmanyisi va ndagɨlo ʉlya akɨɨdɨka akata, “Tsa jɨlweli iMmanyisi, ʉtsovile lweli ʉkʉta, ʉNgʉlʉve alɨ mpamato jyʉjwa mwene. Nakʉli ʉNgʉlʉve ʉjyʉnge, alɨ jyʉjwa mwene. 33 Lweli panogye ʉkʉnʼgana ʉNgʉlʉve nɨ numbula jyako jyoni, nʉ lʉhala lwako lwoni na maka gaako gooni, nʉ kʉnʼgana ʉnnino ndʉwʉ wɨganile jyʉve. Ʉkʉtsikonga indagɨlo itsi ivɨlɨ, kʉlʉtɨɨlye ʉvʉnonu kʉ syavʉpe na kʉ siinu silya isya kʉteekela.”

34 ɄYɨɨsʉ wʉ aweene andile vʉnonu nʉ lʉhala, akambʉʉla akata, “Ʉve ʉlɨ piipi ʉkʉva inninie va vaanu avikʉmwɨdɨka ʉNgʉlʉve.” Ʉkʉhʉma ʉnsɨkɨ ʉgwa naavepwo ʉmuunu ʉvɨ aagetsiitse ʉkʉmbʉʉtsa ʉYɨɨsʉ ɨlimenyu ɨlɨveetsaga.

ɄYɨɨsʉ Kɨlɨsiti imbaha ʉkʉlʉtɨɨlɨla ʉnkʉlʉdeeva ʉDavʉdi

(Mataayo 22:41-46; Luuka 20:41-44)

35 Kʉmbele, ʉYɨɨsʉ wʉ imanyiisa mu tembile, akavʉʉtsa akata, “Jɨvye ndeeti kʉ vamanyisi va ndagɨlo ʉkʉta ʉKɨlɨsiti Mwana va nkʉlʉdeeva ʉDavʉdi? 36 Lola, ʉDavʉdi jyʉmwene wʉ alongotsiiwe nʉ Mepo ʉMbalatse aatye,

‘ɄNtwa ʉNgʉlʉve aambʉʉlile ʉNtwa vango akata,

“Ʉtaame kʉ kɨvoko kyango ɨkya kʉndyo,

ʉkʉsikila ʉnsɨkɨ ʉpwʉ ndikʉvalesa avalʉgʉ vaako,

nʉ kʉvalongotsa lwoni.” ’”

37 ɄYɨɨsʉ akoongeletsa ʉkʉtsova akata, “Ɨngave ʉDavʉdi jyʉmwene ikʉmwɨlanga ʉKɨlɨsiti ʉkʉta Ntwa, jiiva ndeeti akilivuke ikange ave mwana va Davʉdi?” Ɨkɨpʉga ɨkɨvaha kya vaanu kyahekye wʉ kikʉmpʉlɨhɨtsa ʉYɨɨsʉ.

ɄYɨɨsʉ ikʉvapavɨla avaanu ʉvʉviivi wa vamanyisi va ndagɨlo

(Mataayo 23:1-36; Luuka 20:45-47)

38 ɄYɨɨsʉ wʉ imanyiisa, akavavʉʉla akata, “Muveetsage miiho na vamanyisi va ndagɨlo, avinogwa ʉkʉgenda mu vʉtsenge vaswalile ikanzo, pakʉta avaanu vavasaamusaage kʉ wɨɨmɨkiwa. 39 Ikange, wʉ valɨ mu lisinagogi, vinogwa ʉkʉtaama pa sitaamilo sya kʉvʉlongolo. Ikange wʉ avaanu valʉndamiine pa lʉhekelo, vinogwa ʉkʉtaama mu sitaamilo sya vɨɨmɨkiwa. 40 Avaanu ava vipoka isiinu sya vadala avaswɨle! Na pa kwɨvɨɨka vɨɨdɨki va Ngʉlʉve, vikɨsaja inyɨsajo inale, pakʉta avaanu vateetsage vagolosu. Avaanu ava pa kɨgono kya vʉhɨgi valavʉngwa siitso.”

Isyavʉpe sya nʼdala ʉnswɨle

(Luuka 21:1-4)

41 ɄYɨɨsʉ aataamile pawiipi nɨ kɨkongʼolo kya kʉlahɨla isyavʉpe, alɨkʉvalola avaanu avaalahaga isyavʉpe ʉmwa. Avamosu vongosu vakalaha indalama tsi nyongosu. 42 Baaho akiitsa ʉnʼdala ʉnswɨle ikange ʉnʼgatsu, akalaha ʉtʉhela tʉvɨlɨ.

43 Pwʉ ʉYɨɨsʉ akavɨɨlanga avakongi va mwene akavavʉʉla akata, “Tsa jɨlweli ndikʉvavʉʉla ʉkʉta, ʉnʼdala ʉjʉ ʉnswɨle ikange ʉnʼgatsu, alahile syongosu mu kɨkongʼolo, avalʉtɨɨlye avange vooni, 44 manya avange vooni valahile isiinu isyʉ nyongeletsa pa vʉmosu wa veene. Lɨno, ʉnʼdala ʉjʉ pa vʉgatsu wa mwene, alahile syoni isyʉ sikaale sya kʉntanga mu wʉʉmi wa mwene.”