Mataayo 23

ɄYɨɨsʉ itsova ʉvʉviivi wa vamanyisi va ndagɨlo na Vafalisayo

(Maliko 12:38, 39; Luuka 11:43, 46; 20:45, 46)

1 Pwʉ ʉYɨɨsʉ akavavʉʉla avaanu va sipʉga silya na vakongi va mwene akata, 2 “Avamanyisi va ndagɨlo tsa Moose na Vafalisayo valɨ nʉ vʉtavʉlɨlwa wa kwandʉla indagɨlo tsa Moose. 3 Ʉnyie mwibatage nʉ kʉgavombela imbombo gooni ʉgwʉ vikʉvamanyiisa. Kwʉ baako ʉkʉkonga imbombo tsa veene itsʉ vivomba, ʉlwakʉva aveene navivomba ndʉwʉ vimanyiisa. 4 Aveene vikʉvʉʉmɨɨlɨtsa avaanu vakongage indagɨlo inalamu itsivyʉta mitsigo mitsito. Paninie nɨɨlyo, navikʉvatanga avaanu avo ʉmwakʉkongela indagɨlo itso. 5 Aveene avo vivomba itso tsyoni pakʉta vavoneke kʉ vaanu. Lola, viiva viswala kʉmiiho na mu sivoko isisandʉka sya ngwembe, ikange vikwongeletsa ʉvʉsivilo wa misabwa gya veene gya kwɨsajɨla. 6 Mu sigono sya lʉhekelo, viiva vinogwa ʉkʉtaama mu sitaamilo sya vahenza avanya wɨɨmɨkiwa na mu masinagogi ga veene viiva vinogwa ʉkʉtaama mu sitaamilo sya kʉvʉlongolo. 7 Ikange, wʉ valɨ mu masoko, vinogwa siitso ʉkʉta avaanu vavasaamusaage kʉ wɨɨmɨkiwa nʉ kʉta vavɨɨlangage vateetsage, ‘Gwe Mmanyisi.’

8 “Lɨno ʉnyie mulekage ʉkwɨdɨka ɨngave vikʉvɨɨlanga viita, ‘Gwe Mmanyisi,’ ʉlwakʉva ʉne ndɨ mwene neene mmanyisi, nʉʉnyie nyɨ vooni mulɨ lʉkɨndɨ lʉpamato lwa vɨɨdɨki vango. 9 Ikange, mulekage ʉkʉmwɨlanga ʉmuunu ʉvaveetsaga muteetsage, ‘Gwe mwɨmɨkiwa daada,’ ʉmuunu va mu kɨlʉnga ʉmʉ, ʉlwakʉva mulɨ nʉ Mwɨmɨkiwa ʉDadajiinyo mpamato mwene ʉvɨ alɨ kʉkyanya. 10 Ikange, mulekage ʉkwɨdɨka ɨngave avaanu vikʉvɨɨlanga ʉnyie viita, ‘Gwe ndongotsi,’ manya mulɨ nʉ Ndongotsi mpamato mwene, vɨ Kɨlɨsiti. 11 Ʉmuunu ʉvaveetsaga ʉvɨ inogwa ʉkʉva mbaha pagati paanyie, vɨ ɨjisaage nʉ kʉvavombela avange, 12 manya ʉmuunu ʉvaveetsaga ʉvɨ ikɨjɨmɨka jyʉmwene, ʉNgʉlʉve alamwisa, nʉ muunu ʉvaveetsaga ʉvɨ ikɨjisa, ʉNgʉlʉve alamwɨmɨka.

13 “Muswe vʉvʉle ʉnyie nyɨ vamanyisi va ndagɨlo na nyɨ Vafalisayo, nyɨ vagelʉngʼania ʉnyie! Mukʉvasiga avaanu ʉkwingila mu Lʉdeeva lwa Ngʉlʉve kʉ nzɨla jya manyiiso tsiinyo, wʉ ʉnyie jyʉnyie namukwingila ʉmwa, pange kʉvatavʉla avaanu avange ʉwʉ vinogwa ʉkwingila.

14 “Muswe vʉvʉle ʉnyie nyɨ vamanyisi va ndagɨlo na nyɨ Vafalisayo, nyɨ vagelʉngʼania ʉnyie! Mukɨsaja inyɨsajo inale siitso pakʉta mwɨvonie kʉ vaanu, wʉ kʉnʉ mwipoka isiinu sya vadala avaswɨle isyʉ valɨ nasyo mu nyumba tsa veene. Pa kɨgono kya vʉhɨgi, ʉNgʉlʉve alavavʉnga siitso.

15 “Muswe vʉvʉle ʉnyie nyɨ vamanyisi va ndagɨlo na nyɨ Vafalisayo, nyɨ vagelʉngʼania ʉnyie! Mutsʉngʉʉla mwoni mwoni pakʉta mumwandʉle ʉmuunu ʉvɨ naNʼyahudi iingile mu mpelela gwa Kɨyahudi. Lɨno, wʉ andwike, mukʉmpelela ʉkʉva mwana va kʉ mwoto gwa sikutsooni ndʉwʉ mulɨwo ʉnyie.

16 “Muswe vʉvʉle ʉnyie nyɨ valongotsi nyɨ vabosu, manya mukʉvamanyiisa avaanu mwita, ‘Ɨngave ʉmuunu ikɨjyɨgɨla kʉ Vʉtaamo ʉVʉvalatse wa Ngʉlʉve, nakɨɨnu. Lɨno ɨngave ikɨjyɨgɨla mu sahabu ɨjɨlɨ mu Vʉtaamo ʉVʉvalatse wa Ngʉlʉve, ʉmuunu ʉjwa anogye ʉkʉvomba ndʉwʉ ɨjyɨgile.’ 17 Nyɨ vabosu, nyɨ vapelwa ʉnyie! Kɨlɨku kɨlʉti ʉkʉlʉtɨɨlɨla ɨkɨnge? Ndeeti, jyʉ sahabu ɨjyo ɨjɨlɨ mu Vʉtaamo ʉVʉvalatse wa Ngʉlʉve, evo ʉVʉtaamo ʉVʉvalatse wa Ngʉlʉve ʉwipela ɨsahabu jɨve mbalatse? 18 Ikange mukʉvamanyiisa avaanu mwita, ‘Ɨngave ʉmuunu ikɨjyɨgɨla kʉ kɨteekelelo kya mu tembile, ago gatsila vʉviivi. Lɨno ɨngave ikɨjyɨgɨla mu syavʉpe isya kʉnyianywa isilɨ pakyanya pa kɨteekelelo, ʉmuunu ʉjwa anogye avombe ndʉwʉ ɨjyɨgile.’ 19 Ʉnyie nyɨ vabosu, kɨlɨku ɨkɨlʉti ʉkʉlʉtɨɨlɨla ɨkɨnge? Ndeeti, syʉ syavʉpe isyo, evo ɨkɨteekelelo kɨlya ɨkipela isyavʉpe sya kʉnyianywa sive sivalatse? 20 Lɨno, ɨngave ʉmuunu ikɨjyɨgɨla mu kɨteekelelo kya mu tembile, ikɨjyɨgɨla na mu siinu syoni isilɨ pakyanya pa kyene. 21 Ʉmuunu ʉvaveetsaga ʉvɨ ikɨjyɨgɨla kʉ Vʉtaamo ʉVʉvalatse wa Ngʉlʉve, ikɨjyɨgɨla kʉ Vʉtaamo ʉVʉvalatse wa Ngʉlʉve ʉwa na kwa Ngʉlʉve ʉvɨ itaama ʉmwa. 22 Namwene ʉmuunu ʉvikɨjyɨgɨla kʉkyanya, ikɨjyɨgɨla mu kɨtaamilo kya Ngʉlʉve na kwa Ngʉlʉve ʉvitaama mu kɨtaamilo ɨkyo.

23 “Muswe vʉvʉle ʉnyie nyɨ vamanyisi va ndagɨlo na nyɨ Vafalisayo, nyɨ vagelʉngʼania ʉnyie! Lola, mwilaha isyavʉpe kwa Ngʉlʉve nasi siinu isidebedebe ndi nyungu, ɨbinzali nʉ vʉnunia wʉ kʉnʉ mubeela ikulongwi itsilondiwa ʉkʉlʉtɨɨlɨla pa ndagɨlo ndʉ kʉvavombela avange inonu, ʉkʉva nɨ kɨsa, nʉ kʉva nʉ lwɨdɨko. Lɨno wɨgane wa Ngʉlʉve ʉkʉta muvombage tsyoni imbaha ni ndebe paninie. 24 Nyɨ valongotsi nyɨ vabosu ʉnyie! Mukwengʉla amahuuna mu siinu siinyo isya kʉnywa, wʉ kʉnʉ mwimila ingamila!

25 “Muswe vʉvʉle ʉnyie nyɨ vamanyisi va ndagɨlo na nyɨ Vafalisayo, nyɨ vagelʉngʼania ʉnyie! Lola, mukɨvɨɨka ʉkʉta mulɨ vavalatse pavʉlongolo pa vaanu ndʉ kʉsuka ɨkɨkombe nɨ sahani kʉnzi kwene. Ʉnyie mwinywa nʉ kʉlya pavʉnonu isiinu isyʉ mupokile kʉ mwojo ʉkʉhʉma kʉ vaanu. 26 Nyɨ Vafalisayo, ʉnyie nyɨ vabosu! Galamuki taasi mu mbiivi itsʉ tsilɨ mu nʼgati mwanyie ndʉ kʉsuka ʉvʉlami ʉvʉlɨ mu nʼgati mu kɨkombe na mu sahani. Vʉvʉle vʉle, imbombo tsiinyo tsiiva nonu ndʉwʉ ɨkɨkombe nɨ sahani siiva sivalye ɨngave ʉsukile mu nʼgati.

27 “Muswe vʉvʉle ʉnyie nyɨ vamanyisi va ndagɨlo na nyɨ Vafalisayo, nyɨ vagelʉngʼania ʉnyie! Lola, muhwaniine nʉ vʉguli ʉwʉ vimata nʉ mmanga ʉmbalasu, ʉvuvoneka vʉnonu kʉnzi, wʉ mu nʼgati vʉdɨgile amatsege ga vaanu avaswe nʉ vʉlami ʉvʉlɨ pongosu. 28 Vʉvʉle vʉle, najyʉnyie kʉnzi muvoneka kʉ vaanu muvomba itsa vʉgolosu pavʉlongolo pa Ngʉlʉve, wʉ ɨlweli jwɨjɨ, mu nʼgati mu numbula tsiinyo, mudɨgile ʉvʉsyovi nʉ kʉleka ʉkʉkonga indagɨlo.

29 “Muswe vʉvʉle ʉnyie nyɨ vamanyisi va ndagɨlo na nyɨ Vafalisayo, nyɨ vagelʉngʼania ʉnyie! Lola, mutsenga ʉvʉguli wa vanyamalago va Ngʉlʉve nʉ kʉdingʼula vʉnonu ʉvʉguli wa vaanu avange ʉwʉ vaavombaga ʉgwʉ ganogelanie pavʉlongolo pa Ngʉlʉve. 30 Pwʉ mwitsova mwita, ‘Jyale jɨve ʉwe pwʉtʉle pa nsɨkɨ ʉpwʉ avakʉkʉjiitu vaale vʉʉmi, ndalɨno natwatangane na veene ʉkʉvabuda avanyamalago va Ngʉlʉve.’ 31 Pa kʉvomba ewo, muvonia ʉkʉta ʉnyie mulɨ vaana va vaanu valya avaabudile avanyamalago va Ngʉlʉve! 32 Pwʉ lɨno malɨhɨtsi ʉvʉviivi vʉlya ʉwʉ avakʉkʉjiinyo vaavʉtengwe!

33 “Mwe nyɨ nzoka, ʉnyie nyɨ vaana va nzoka! Mulapona ndeeti ʉvʉhɨgi wa Ngʉlʉve ɨngave ikʉvalahɨɨla mu mwoto gwa sikutsooni? 34 Pa kulongwi ɨjyo ndɨlavasuungʼa kwanyie avanyamalago va Ngʉlʉve, avaanu avanya lʉhala na vamanyisi va limenyu lya Ngʉlʉve pakʉta ʉnyie mwandʉke ʉkʉhʉma kʉ mbiivi tsiinyo. Lɨno vaninie mu vaanu avo, mulavabuda nʉ kʉvatovelela pa sidamingʼanie, avange mulavatova ni sikoti mu masinagogi giinyo na vange mulavaswɨma ʉkʉhʉma ʉvʉtsenge nʉ vʉtsenge nʉ kʉvapelela ʉvʉkʉvɨlwa. 35 Pa kulongwi ɨjɨ ʉNgʉlʉve alavahɨga ʉnyie kʉ nongwa jya kʉvabuda avaanu vooni avagolosu, ʉkʉhʉma ʉpwʉ ʉKaini aamʼbudile ʉAbeli ʉvɨ naale nʉ vʉgalo ʉvʉveetsaga, ʉkʉsika ʉkʉbudwa kwa Zakaliya ʉvɨ aale mwana va Balakiya. Avakʉkʉjiinyo vaabudile ʉZakaliya pagatinagati pa Vʉtaamo ʉVʉvalatse wa Ngʉlʉve nɨ kɨteekelelo. 36 Tsa jɨlweli ndikʉvavʉʉla ʉkʉta, ʉNgʉlʉve alavahɨga avaanu va nsɨkɨ ʉgʉ kʉ mbiivi tsyoni itsʉ vavombile.”

ɄYɨɨsʉ isʉsʉvala kʉ nongwa jya vaanu va mu Yelusalemu

(Luuka 13:34-35)

37 Pwʉ ʉYɨɨsʉ akata, “Nyɨ vaanu va mu Yelusalemu, nyɨ vaanu va mu Yelusalemu! Mwibuda avanyamalago nʉ kʉvatika na maganga avavombi ʉwʉ ʉNgʉlʉve ikʉvasuungʼa kwanyie. Ʉnsɨkɨ mwongosu, ndɨnogilwe ʉkʉvalʉndamania ʉnyie ndʉwʉ ɨngʼʉkʉ jilʉndamania isyana sya jyene mu mapapatɨlo ga jyene. Lɨno namukwɨdɨka! 38 Lola, ʉNgʉlʉve ajɨlekile ɨnyumba jiinyo jɨve lihaame. 39 Lɨno ndikʉvavʉʉla ʉkʉta namulambone ʉne ikange ʉkʉsika ʉpwʉ mulaata, ‘Inʼgatalʉsu ʉvɨ ikwitsa mu litaawa lya Ntwa ʉNgʉlʉve!’ ”