Luuka 13

Avaanu valaatage ɨmbiivi pakʉta valeke ʉkwongometswa

1 Ʉnsɨkɨ ʉgwa, avaanu avange ʉwʉ vaampʉlɨhɨtsaaga ʉYɨɨsʉ, vakambʉʉla ʉkʉta, ʉPilato aabudile aVagalilaya vaninie wʉ vihʉmya ineekelo tsa veene kwa Ngʉlʉve. 2 ɄYɨɨsʉ akavaanda akata, “Ndeeti, wʉ musaaga ʉnyie, mwita ipange aVagalilaya avo vaavombiilwe itso ʉlwakʉva vaale vatulanongwa ʉkʉvalʉtɨɨlɨla aVagalilaya avange vooni? 3 Ndikʉvavʉʉla nawʉ jɨlɨwo! Mungaleke ʉkʉlaata imbiivi tsiinyo, najyʉnyie muloongometswa nyɨ vooni! 4 Ikange mulʉmanyile ʉkʉta avaanu valya kɨtsigo na nnaana (18) ʉkʉ kʉ Silohamu, ʉlʉmato ʉlʉtale lwavɨlɨkye, vakaswa. Ndeeti, mwita ipange aveene vaale vatulanongwa ʉkʉvalʉtɨɨlɨla avaanu avange vooni ʉwʉ vaataamaga mu Yelusalemu? 5 Ndikʉvavʉʉla nawʉ jɨlɨwo! Mungaleke ʉkʉlaata imbiivi tsiinyo, najyʉnyie muloongometswa nyɨ vooni!”

Ɨlivʉngʉ pa kulongwi jya kʉhʉʉpa iseke

6 Pwʉ ʉYɨɨsʉ akavavʉʉla avaanu avo ɨkɨhwananitso ɨkɨnge akata, “Aalepwo ʉmuunu mpamato ʉvɨ aale nʉ mʼbɨkɨ gwa makʉjʉ mu kɨlɨmɨla kya mwene kya zabibu. Aalʉtaga kutʉngʉla amakʉjʉ, nalɨkʉlɨvona nɨ lipamato. 7 Pwʉ akambʉʉla ʉmbombi va mwene va kɨlɨmɨla akata, ‘Lola! Mu myaka gɨdatu nditsiige kutʉngʉla iseke mu mʼbɨkɨ ʉgʉ, nandɨkɨvoniigi kɨɨnu! Lɨno dumula, ʉlwakʉva gunanga ɨkɨlɨmɨla vʉvʉle!’

8 “Ʉmwene ʉmbombi ʉlya akamwanda akata, ‘Gwe mbaha vango, gʉleke namu mu mwaka ʉgʉ, ndɨgʉlɨmɨɨlɨle nʉ kʉvɨɨka ʉlʉbʉʉle. 9 Gʉngahʉʉpe iseke kʉ mwaka, lwiva lʉnonu. Lɨno gʉngaleke ʉkʉhʉʉpa, pwʉ jʉdumule.’ ”

ɄYɨɨsʉ ikʉmponia ʉnʼdala pa kɨgono kya Sabato

10 Ɨkɨgono kɨpamato kya Sabato, ʉYɨɨsʉ aamanyiisaaga avaanu mu lisinagogi lipamato. 11 Mu lisinagogi ʉmwa, aalemwo ʉnʼdala mpamato ʉvɨ aale nɨ mepo ɨmbiivi ɨjyagʉvɨɨkile ʉmmana gʉve nʼdekedeke ɨmyaka kɨtsigo na nnaana (18). Ʉnʼdala ʉjwa aale nɨ kɨdʉdʉmbe, ikange aalemwagwa ʉkwɨma agoloke.

12 ɄYɨɨsʉ wʉ ambwene, akamwɨlanga iitse pa mwene. Pwʉ akambʉʉla akata, “Jyʉva, ʉponile ʉvʉtamu waako, lɨno ʉlɨ mbopolwa!” 13 ɄYɨɨsʉ akavɨɨka isivoko sya mwene pa nʼdala ʉlya. Baaho ʉnʼdala ʉlya akɨɨma agolwike ʉnsana gwa mwene, akatengʉla ʉkʉnʼginia ʉNgʉlʉve.

14 Pwʉ ʉmbaha va lisinagogi akaviipa, ʉlwakʉva ʉYɨɨsʉ aamponiitse ʉmuunu pa kɨgono kya Sabato. Ʉmbaha ʉlya akavavʉʉla avaanu akata, “Ʉmulʉngʉ gwoni gʉlɨ ni sigono ntanato (6) isyʉ mutavʉliilwe ʉkʉvomba imbombo. Wɨgane wa Ngʉlʉve ʉkʉta mwitsage nʉ kʉponetsiwa pa sigono isyo, kwʉ baako pa kɨgono kya Sabato!”

15 ɄNtwa ʉYɨɨsʉ akamwanda akata, “Ʉnyie nyɨ vanuasi! Ndeeti, namudɨndʉlɨla mu lipaalo isenga natsi punda tsiinyo, nʉ kʉtsihɨlɨka kwinywa amagasi namu mu kɨgono kya Sabato? 16 Ʉnʼdala ʉjʉ va kɨvʉmbʉkʉ kya Abulahamu. Ʉmwene ataamile mu vʉkʉvɨlwa wa Setano ndʉ nkʉngwa va mwene kʉ nsɨkɨ ntale, ɨmyaka kɨtsigo na nnaana. Lɨno ʉjʉ, jɨlweli wɨgane wa Ngʉlʉve ʉkʉta ndɨmbopole ndajɨve kɨgono kya Sabato.”

17 ɄYɨɨsʉ wʉ atsovile ago, avalʉgʉ va mwene vooni vakajejevʉka. Napeene, avange vooni, vaahowiike siitso kʉ nongwa jya mbombo inonu itsa kʉdega itsʉ ʉYɨɨsʉ aavombaga.

Ɨkɨhwananitso kya mbeju ɨndebe siitso, nɨ kɨhwananitso kya kɨlʉve

(Mataayo 13:31-33; Maliko 4:30-32)

18 Pwʉ ʉYɨɨsʉ akavʉʉtsa akata, “ɄLʉdeeva lwa Ngʉlʉve lʉhwaniine nɨ kɨki? Ndɨhwananie nɨ kɨki? 19 Lʉhwaniine nɨ mbeju jya libɨkɨ ɨlilongoti, ɨmbeju ɨndebe kʉ mbeju tsyoni, ɨjyʉ ʉmuunu aavyalile mu nʼgʉnda gwa mwene. Ɨmbeju jɨkamela jɨkava mʼbɨkɨ mbaha. Sikiitsa isidege sikatsenga ʉwaaswa mu magɨka tsa gwene.”

20 ɄYɨɨsʉ akavʉʉtsa ikange akata, “ɄLʉdeeva lwa Ngʉlʉve, ndɨhwananie na kɨki? 21 Lʉhwaniine nɨ kɨlʉve ɨkyʉ ʉnʼdala mpamato aatoolile, akasyogela mu nkate gwa madebwe gadatu ga vʉhevete. Wʉ asyogye, ɨkɨlʉve kɨlya kɨkatotsa ʉnkate gwoni.”

Avatulanongwa navikwʉpɨlɨlwa mu Lʉdeeva lwa Ngʉlʉve

(Mataayo 7:13-14, 21-23)

22 ɄYɨɨsʉ aalʉtaga kʉ Yelusalemu. Pwʉ mu vʉtsenge ʉvʉvaha nʉ vʉdebe ʉmwʉ aalʉtɨngʼaniaga, aamanyiisaaga avaanu. 23 Ɨkɨgono kɨpamato, ʉmuunu mpamato akambʉʉtsa akata, “Gwe Ntwa, avaanu ʉwʉ ʉNgʉlʉve alavapoka valaava vadebe?”

ɄYɨɨsʉ akavavʉʉla akata, 24 “Mwɨkupilage ʉkwingilila ʉndyango ʉnsinye, manya ndikʉvavʉʉla ʉkʉta avaanu vongosu valagela ʉkwingila, lɨno valalemwa! 25 Ʉnsɨkɨ gʉliitsa, ʉpwʉ ʉmwenenyumba aladɨnda ʉndyango. Pwʉ mulɨɨma kʉnzi, muladɨndʉtsaaga nʉ kʉnʼdoova mulateetsaga, ‘Gwe Ntwa, tʉdɨndʉlɨle!’ Apeene ʉmwene alavaanda alaata, ‘Nandɨvamanyili ʉnyie ikange nandɨkʉmanyili nakwene ʉkwʉ muhʉmile!’

26 “Pwʉ ʉnyie mulaata, ‘Ʉwe weewe twɨ twalitsaga nʉ kʉnywa paninie nʉʉve! Ikange ʉve waamanyiisaaga mu matsumbe giitu!’ 27 Ʉmwene alaata, ‘Ndɨvavʉʉlile ʉkʉta, nandɨvamanyili ʉnyie ikange nandɨkʉmanyili nakwene ʉkwʉ muhʉmile! Hegi paane, ʉnyie nyɨ vatulanongwa!’

28 “Mulambona ʉAbulahamu, ʉIsaka, ʉYakobo na vanyamalago vooni valɨ mu Lʉdeeva lwa Ngʉlʉve. Ʉnyie mulaava mutaagilwe kʉnzi ʉkwʉ mulalɨlaga nʉ kʉgadʉtsa amiino! 29 Ikange avaanu ʉkʉhʉma imbasu tsyoni tsa kɨlʉnga valiitsa nʉ kʉtaama mu lʉhekelo mu Lʉdeeva lwa Ngʉlʉve.

30 “Napeene, avaanu vongosu ʉwʉ valɨ mbʉlongolo lɨno, valaava va kʉnsana, naveene ʉwʉ valɨ kʉnsana valaava va mbʉlongolo.”

ɄYɨɨsʉ isʉsʉvala kʉ nongwa tsa vaanu va kʉ Yelusalemu

(Mataayo 23:37-39)

31 Ʉnsɨkɨ gʉʉgwa, aVafalisayo avange vakalʉta kwa Yɨɨsʉ vakambʉʉla vakata, “Hega apa, bɨhaga kʉ vʉtsenge ʉvʉnge, ʉlwakʉva ʉHelode inogwa ʉkʉkʉbuda.” 32 ɄYɨɨsʉ akavaanda akata, “Lʉtagi mukajɨvʉʉle ɨngʼeve jɨlya ʉkʉta, ‘Lola! Ɨleelo, kɨlaavo na ntondo, ndiswɨma imepo imbiivi nʉ kʉponia avatamu, ʉkʉsika ʉpwʉ ndimala ʉvʉsumbe wango. 33 Wɨgane wa Ngʉlʉve ʉkʉta ʉne ndɨlʉte kʉ Yelusalemu. Jʉndiiva mu lʉgendo ɨleelo, kɨlaavo na ntondo, ʉkʉsikila ʉpwʉ ndɨtsisika, manya napanogiili ʉnyamalago ʉkʉswɨla ʉkwonu ʉkʉnge, apeene mu Yelusalemu!’ ”

34 Pwʉ ʉYɨɨsʉ akata, “Nyɨ vaanu va kʉ Yelusalemu, nyɨ vaanu va kʉ Yelusalemu! Mwibuda avanyamalago nʉ kʉvatika na maganga avavombi ʉwʉ ʉNgʉlʉve ikʉvasuungʼa kwanyie. Ʉnsɨkɨ mwongosu, ndɨnogilwe ʉkʉvalʉndamania ʉnyie ndʉwʉ ɨngʼʉkʉ jilʉndamania isyana sya jyene mu mapapatɨlo ga jyene. Lɨno namunogwa! 35 Lola! ɄNgʉlʉve ikʉvaleka ʉnyie nɨ nyumba jiinyo ʉkʉta, muvʉngwe! Lɨno, ndikʉvavʉʉla ʉkʉta, tsa jɨlweli, namukambone ʉne ikange, ʉkʉsikila ʉnsɨkɨ ʉgwʉ mulaata, ‘Inʼgatalʉsu ʉvɨ ikwitsa mu litaawa lya Ntwa ʉNgʉlʉve.’”