ɄYɨɨsʉ ikwʉpɨlɨlwa mu Yelusalemu ndʉ nkʉlʉdeeva
21
1 ɄYɨɨsʉ na vakongi va mwene wʉ vihegelela kʉ Yelusalemu,
vakasika pawiipi na kʉ Betifage,
pa kɨdugala ɨkya Mizeituni.
Pwʉ ʉYɨɨsʉ akavasuungʼa avakongi va mwene vavɨlɨ,
2 akata,
“Mulʉtage mu litsumbe ɨlyʉ lɨlɨ kʉvʉlongolo kwanyie.
Wʉ mukwingila mulya,
mukʉjɨvona ɨpunda nɨ mwana jya jyene ɨjipikʉla tsikʉngilwe.
Pwʉ muhʉdʉle,
mwitse natso kwane.
3 Angave ʉmuunu jiikʉvavʉʉtsa ɨkɨveetsaga,
jʉmumbʉʉle muteetsage,
‘ɄNtwa viitu alɨ nʉ vʉsumbe natso.’
Pwʉ ʉnsɨkɨ gʉʉgwa ʉmwene jiikʉvatavʉla mwitse natso.”
4 Ɨlɨ lyahʉmye ewo pakʉta lɨve lɨvombiike ɨlimenyu ɨlyatsovilwe nʉ nyamalago,
ʉpwʉ aatye,
5 “Muvavʉʉle avaanu va vʉtsenge wa Sayunia ʉkʉta,
‘Lola,
ʉNkʉlʉdeeva viinyo ikwitsa kwanyie,
inʼdeke,
ikwitsa,
atogile ɨpunda,
b
ɨpunda ɨjipikʉla.’ ”c
6 Avakongi avo vakalʉta nʉ kʉvomba ndʉwʉ ʉYɨɨsʉ aavalagye.
7 Pwʉ vakammɨlɨkɨla ʉYɨɨsʉ ɨpunda ɨjyo,
paninie nɨ mwana va jyene,
vakatandɨka ɨmisabwa gya veene pa punda itso,
pwʉ ʉYɨɨsʉ akatoga akataama pakyanya pa punda ɨjipikʉla.
8 Avaanu vongosu mu kɨpʉga ɨkyo vakatandɨka ɨmisabwa gya veene mu nzɨla kʉvʉlongolo kʉ mwene,
avange valɨkʉdeenya amasaasi ga mibɨkɨ nʉ kwala mu nzɨla ʉkʉvonia ʉlwɨmɨko kʉ mwene.
9 Avaanu avaalongwe kʉvʉlongolo na valya avaakongaga kʉnsana kwa Yɨɨsʉ,
valɨkwoveela paninie valɨkʉta,
“Aginiwaagwe ʉMwana va Davʉdi!
d
Inʼgatalʉsu ʉvɨ ikwitsa mu litaawa lya Ntwa ʉNgʉlʉve!e
Aginiwaagwe ʉNgʉlʉve ʉNdʉti va syoni!”
10 ɄYɨɨsʉ wʉ ikwingila mu vʉtsenge wa Yelusalemu,
avaanu vooni va vʉtsenge ʉwa vakakenyemuka siitso.
Vakatengʉla ʉkʉvʉʉtsania valɨkʉta,
“Vɨ veeni ʉjʉ?”
11 Avaanu avaale mu lipʉga ɨlyo vakaanda vakata,
“Ʉjʉ vɨ Yɨɨsʉ,
ʉnyamalago ʉlya ʉvihʉma kʉ vʉtsenge wa Nazaleti,
mu kɨlʉnga kya Galilaya.”
ɄYɨɨsʉ iswɨma avaanu avaagʉtsaaga mu lʉvɨgo lwa tembile
12 ɄYɨɨsʉ akiingila mu lʉvɨgo lwa tembile,
akatengʉla ʉkʉswɨma avaanu avaagʉtsaaga na vaagʉlaga isiinu ʉmwa.
Akagalamula imeesa tsa vaanu avaananiaga indalama paninie ni sitaamilo sya vaanu avaagʉtsaaga ingʉndya.
13 ɄYɨɨsʉ akavavʉʉla akata,
“Jɨvɨgilwe mu Vʉvɨge ʉVʉvalatse ʉkʉta,
‘Ɨnyumba jyango jiveetsaga nyumba jya kwɨsajɨla.’
f Lɨno ʉnyie muhambwe jɨve manga jya vanyambuda.”g
14 ɄYɨɨsʉ wʉ alɨ mu lʉvɨgo lwa tembile,
avaanu avaale vabosu na valema vakiitsa kʉ mwene,
pwʉ ʉmwene akavaponia.
15 Avavaha va vateeketsi na vamanyisi va ndagɨlo wʉ vasiweene isidego isyʉ ʉYɨɨsʉ aavombaga,
ikange wʉ vapʉliike avaana vikwoveela mu lʉvɨgo lwa tembile viita,
“ɄNgʉlʉve aginiwaagwe pa kulongwi jya Mwana va nkʉlʉdeeva ʉDavʉdi,”
vakaviipa siitso.
16 Vakambʉʉtsa ʉYɨɨsʉ vakata,
“Ndeeti,
vupʉlɨka itsʉ avaana ava vitsova?”
ɄYɨɨsʉ akavaanda akata,
“Ndipʉlɨka.
Ndeeti namwɨmbili amamenyu agaavɨgilwe mu Vʉvɨge ʉVʉvalatse agiita,
‘Mu mamenyu ga vaana avadebe na vikwongʼa,
mwʉ wɨvɨɨkye ʉlʉginio?’ ”h
17 ɄYɨɨsʉ akavaleka avaanu avo,
akahʉma mu vʉtsenge,
akalʉta kwigona kʉ Betaniya.
Ɨkɨdego kya mʼbɨkɨ ʉnkʉjʉ
18 Pavʉsiku,
ʉYɨɨsʉ wʉ ikilivuka kʉ Yelusalemu,
jɨkambava ɨnzala.
19 Pwʉ akagʉvona ʉmʼbɨkɨ mpamato ʉnkʉjʉ kʉ lʉkanzimbale mu nzɨla,
akahegelela pawiipi,
akavona gʉtsila seke,
apeene gʉlɨ na maani geene.
Pwʉ akagʉvʉʉla ʉmʼbɨkɨ ʉgwa akata,
“Ʉkʉhʉma ɨleelo ni sigono syoni,
ʉleke ʉkʉhʉʉpa iseke!”
Baaho,
ʉmʼbɨkɨ ʉgwa gʉkʉʉma gwoni.
20 Wʉ avakongi va Yɨɨsʉ vagaweene ago,
vakadega siitso,
vakambʉʉtsa vakata,
“Kɨki ɨlikʉjʉ ɨlɨ lyʉmile ngʼaningʼaani?”
21 ɄYɨɨsʉ akavaanda akata,
“Tsa jɨlweli ndikʉvavʉʉla ʉkʉta,
ɨngave mulɨ nʉ lwɨdɨko ʉlʉtsila kʉganaania,
najyʉnyie muweesa ʉkʉvomba ndɨɨlyo ɨlyʉ lɨvombiike kʉ likʉjʉ ɨlɨ.
Ikange namukavombe ndɨɨlyo lyene,
apeene mungave mukʉkɨvʉʉla ɨkɨdugala ɨkɨ mwita,
‘Hega,
ʉkɨlahɨɨle mu nyanza,’
ɨlyo jʉlivombeka.
22 Ɨngave mulɨ nʉ lwɨdɨko,
ɨkɨveetsaga ɨkyʉ mudoova kwa Ngʉlʉve mu nyɨsajo,
jiikʉvavombela.”
Ʉlʉvʉʉtso pa kulongwi tsa vʉtavʉlɨlwa wa Yɨɨsʉ
23 ɄYɨɨsʉ akiingila ikange mu lʉvɨgo lwa tembile.
Pwʉ wʉ imanyiisa,
avavaha va vateeketsi,
na vanzagɨla va Vayahudi vakalʉta kukʉmbʉʉtsa vakata,
“Aga ʉgwʉ vuvomba,
vuvomba kʉ vʉtavʉlɨlwa waani?
i Veeni ʉvɨ akʉpye ʉvʉtavʉlɨlwa ʉwa?”
24 ɄYɨɨsʉ akavaanda akata,
“Leki najyʉne ndɨvavʉʉtse ɨkɨɨnu kɨpamato.
Pwʉ ɨngave mukʉnnyanda ɨlyo,
najyʉne jʉndikʉvavʉʉla ʉvʉtavʉlɨlwa ʉwʉ ndivombela aga.
25 Ndeeti ʉvʉtavʉlɨlwa wa Yohana wa kwotsa avaanu waahʉmile ndaku?
Waahʉmile kʉkyanya evo kʉ vaanu?”
Vakatengʉla ʉkwɨtsosanza vaveene vakata,
“Ɨngave tukʉmwanda twita waahʉmile kʉkyanya,
jiikʉtʉvʉʉtsa iita,
‘Pwʉ kɨki namwamwɨdɨke?’
26 Ikange,
ɨngave tukʉmwanda twita waahʉmile kʉ vaanu,
tudwada ɨlipʉga lya vaanu ɨlɨ,
manya vooni valʉmanyile ʉkʉta ʉYohana ʉMwotsi aale nyamalago.”
27 Pwʉ vakamwanda ʉYɨɨsʉ vakata “Natʉlʉmanyili.”
Namwene ʉYɨɨsʉ akavavʉʉla akata,
“Najyʉne,
nandikʉvavʉʉli ʉvɨ amye ʉvʉtavʉlɨlwa wa kʉvomba aga.”
Ɨkɨhwananitso kya mwana ʉnsiiti nʉ mwɨdɨhɨtsi
28 ɄYɨɨsʉ akatsova ikange akata,
“Ʉnyie mwivona ndeeti pa kulongwi tsa kɨhwananitso ɨkɨ?
Aalekwo ʉmuunu mpamato ʉvɨ aale na vaswambe vavɨlɨ.
Akabɨha kʉ nswambe ʉmbaha,
akambʉʉla akata,
‘Gwe mwana vango,
ɨleelo ʉbɨhe kuvomba ɨmbombo mu kɨlɨmɨla kya mizabibu.’
29 Ʉnswambe ʉjwa akamwanda akata,
‘Nandilʉti.’
Napeene,
kʉmbele akɨhɨga,
akalʉta kuvomba.
30 Ikange ʉdadajyavo ʉjwa,
akalʉta kʉ nswambe ʉnʼdebe nʉ kʉmbʉʉla ndʉwʉ akambʉʉlile ʉmbaha.
Akamwanda akata,
‘Wɨɨjʉ,
ndilʉta daada.’
Lɨno pange alʉte.
31 Ndeeti,
mu vaswambe avo vavɨlɨ,
vyalɨku ʉvɨ aavombile ndʉwʉ ʉdadaaje aanogilwe?”
Vakamwanda vakata,
“Vɨ ʉlya ʉmbaha.”
Pwʉ ʉYɨɨsʉ akavavʉʉla akata,
“Tsa jɨlweli ndikʉvavʉʉla ʉkʉta,
avasangʉtsi va songo na valigu valalongola kwanyie ʉkwingila mu Lʉdeeva lwa Ngʉlʉve,
32 manya ʉYohana iitsile kwanyie pakʉta avavonie ɨnzɨla jya vʉgolosu,
ʉnyie namwamwɨdɨke.
Apeene avasangʉtsi va songo na valigu vaamwɨdiike.
Paninie nɨɨlyo,
ʉnyie wʉ mugaweene gooni ago,
namwandʉke amasaago giinyo nʉ kʉmwɨdɨka.
Ɨkɨhwananitso kya valɨmi avavejangi
33 “Pʉlɨhɨtsi ɨkɨhwananitso ɨkɨnge.
Aalepwo ʉmuunu mpamato ʉvɨ aalɨmile ɨkɨlɨmɨla kya mwene nʉ kʉvyala ɨmizabibu.
Akavɨga ʉlʉvɨgo,
akajava pagati ɨliguli lya kʉhʉʉtsɨla ʉlʉhʉʉtsi lwa zabibu,
ikange akatsenga ʉnnaala apakwɨma avaloleeli va kɨlɨmɨla.
Kʉ vʉmalɨlo,
akagongoletsa ɨkɨlɨmɨla ɨkyo kʉ valɨmi,
akaheganitsa.j
34 “Ʉnsɨkɨ gwa kʉtʉngʉla izabibu wʉ gʉsiike,
akavasuungʼa avavombi va mwene kʉ valɨmi avo pakʉta valʉte vantoolele iseke tsa kɨtʉmba kya mwene.
35 Lɨno avalɨmi avo vakaviibata avavombi avo,
impamato vakantova,
ʉjyʉnge vakamʼbuda pwʉ ʉjyʉnge vakantika na maganga.
36 Ʉmuunu ʉlya akavasuungʼa ikange avavombi avange vongosu ʉkʉlʉtɨɨlɨla valya ʉwʉ aavasuungʼile pa vʉtengʉlɨlo.
Avalɨmi avo vakavavombela sivi avavombi avo ndʉwʉ vaavavombye avatatsi.
37 Kʉ vʉmalɨlo,
akansuungʼa ʉnswambe va mwene,
akata,
‘Ndisaaga,
vikamwɨmɨke ʉnswambango.’
38 Napeene,
avalɨmi avo wʉ vambwene ʉnswambe ʉjwa,
vakɨtsosanza vakata,
‘Ʉlya,
vɨ mwenevʉhaale wa siinu sya dadaaje.
Leki tʉmʼbude pakʉta ʉwe tʉve venevʉhaale wa mwene.’
39 Pwʉ vakankwegela kʉnzi kʉ kɨlɨmɨla,
vakabuda.
40 Lɨno ɨngave ʉmwenekɨlɨmɨla ʉjwa ikilivuka ʉkʉhʉma ʉkwʉ akalʉtile,
jiivomba kɨki kʉ valɨmi avo?”
41 Aveene avavaha va vateeketsi na vanzagɨla va Vayahudi vakamwanda vakata,
“Nakavakolele ɨkɨsa,
apeene jiikʉvabuda avavejangi avo,
pwʉ ɨkɨlɨmɨla kya mwene ɨkyo jiigongoletsa kʉ valɨmi avange ʉwʉ jʉvikʉmpeetsaga iseke itsa kɨtʉmba kya mwene pa nsɨkɨ ʉgʉnogelanie.”
42 Pwʉ ʉYɨɨsʉ akavavʉʉla ikange akata,
“Ndeeti,
namwɨmbili ʉgwʉ gaavɨgilwe mu Vʉvɨge ʉVʉvalatse?
Gaavɨgilwe ndee,
‘Ɨliganga ɨlyʉ avatsenganyumba vaalɨbeelile,
k
ɨlɨ lyʉ lɨvye liganga ɨlivaha lya kwibata ɨnyumba
pa nguto jya waalo wa jyene.
ɄNtwa vɨ avombile ɨlɨ,
pwʉ ɨlyene lɨvye lya kʉdega kwawe.’l
43 “Pa kulongwi ɨjɨ,
ndikʉvavʉʉla ʉkʉta,
ʉNgʉlʉve jiihetsa isajo tsa mwene kwanyie nʉ kʉvapa avaanu va sivʉmbʉkʉ isinge avivomba itsa vʉnogwe wa mwene.
44 Pwʉ ʉmuunu ʉvaveetsaga angagwe pa liganga ɨlɨ,
ideenyengʼana,
ikange ʉmuunu ʉvaveetsaga ʉvɨ likʉnʼgwɨla,
likʉntikinyulania.”