Maliko 15

ɄYɨɨsʉ ihɨlɨkwa kwa Pilato

(Mataayo 27:1-2, 11-14; Luuka 23:1-5; Yohana 18:28-38)

1 Wʉ kʉkie pavʉsiku, avavaha va kɨvʉmbʉkʉ kyoni kya Vaislahɨli vakatsovana itsa kʉmbombela ʉYɨɨsʉ. Ava vaale wʉ vavaha va vateeketsi, avanzagɨla va Vayahudi, na vamanyisi va ndagɨlo. Vakɨɨdɨngʼana, vakankʉnga ʉYɨɨsʉ, vakantoola, vakatsikʉmmɨlɨka kwa Pilato.

2 ɄPilato akambʉʉtsa ʉYɨɨsʉ akata, “Ndeeti, ʉve veeve Nkʉlʉdeeva va Vayahudi?” ɄYɨɨsʉ akamwanda akata, “Ʉve veeve ʉtsovile.” 3 Baaho avavaha va vateeketsi valɨkwoleletsa ʉvʉviivi ʉvʉlɨ pongosu ʉwʉ vaateetsaga ʉYɨɨsʉ avombile. 4 Pwʉ ʉPilato akambʉʉtsa ikange akata, “Ndeeti, nʉlɨ nalyo ɨlimenyu lya kwanda? Lola, ʉmwʉ tsiveelye nyongosu inongwa itsʉ vikʉkʉhɨga!” 5 ɄYɨɨsʉ akatsiga kɨnuunu. Ɨlyo lɨkampelela ʉPilato ʉkʉdega siitso.

ɄYɨɨsʉ ihɨgwa ʉkʉta abudwe

(Mataayo 27:15-26; Luuka 23:13-25; Yohana 18:39–19:16)

6 ɄPilato aale nʉ lwiho lwa kʉmbopola ʉnkʉngwa mpamato wʉ gʉsiike ʉnsɨkɨ gwa kyaka kya Pasaka. Ʉmuunu ʉvɨ aavopolwagwa aale vɨ ʉlya ʉvɨ avaanu vaadoovaga avopolwe. 7 Ʉnsɨkɨ ʉgwa aalepwo ʉmuunu mpamato ʉvɨ aatambʉlwagwa Balaba. Ʉjʉ aakʉngilwe paninie na vanine ʉlwakʉva vaabudile avaanu. Itsi tsyavombiike ʉnsɨkɨ gʉlya ʉgwʉ ʉmwene na vange vajɨhambʉkye ɨsilikali. 8 Avaanu vongosu vakalʉta kwa Pilato, vakatengʉla ʉkʉnʼdoova ʉkʉta, avombe ndʉwʉ lwale lwiho lwa mwene. 9 ɄPilato akavavʉʉtsa akata, “Ndeeti, munogwa ndɨvavopolele ʉNkʉlʉdeeva va Vayahudi?” 10 Aatsovile ewo pakʉva aalʉmanyile ʉkʉta avavaha va vateeketsi vaale nɨ kɨvini nʉ Yɨɨsʉ, kyʉ mene vaammɨliike kʉ mwene ahɨgwe. 11 Napeene apo, avavaha va vateeketsi valɨkʉvasonga avaanu ʉkʉta, vanʼdoove ʉPilato ambopole ʉBalaba.

12 Avaanu wʉ vadoovile ɨlyo, ʉPilato akavavʉʉtsa ikange akata, “Lɨno, ʉmuunu ʉjʉ ʉvɨ mwita vɨ Nkʉlʉdeeva va Vayahudi, munogwa ndɨgahe nave ndeeti?” 13 Avaanu vooni vakooveela vakata, “Intovelele pa kɨdamingʼanie!” 14 Ʉmwene ʉPilato akavavʉʉtsa akata, “Ʉmuunu ʉjʉ, avombile vʉnangi vʉki?” Aveene vakoongeletsa ʉkwoveela vakata, “Intovelele pa kɨdamingʼanie!”

15 ɄPilato aanogilwe ʉkʉkɨhovosa ɨkɨpʉga kya vaanu, pwʉ akambopola ʉBalaba mu kɨkʉngwa. Akalagɨla ʉkʉta ʉYɨɨsʉ atowe ni sikoti. Wʉ atovilwe, akammʉmya, akavapa avasikali va mwene vakantovelele pa kɨdamingʼanie.

Avasikali vikʉnkinila ʉYɨɨsʉ

(Mataayo 27:27-31; Yohana 19:2-3)

16 Pwʉ avasikali vakanʼgega ʉYɨɨsʉ ʉkʉtsisika kʉ nyumba jya lʉdeeva. Vakalʉndamana ɨkɨpʉga kyoni ɨkya vasikali. 17 Vakanswalɨtsa ʉnsabwa ʉnʼduungʼu ʉgwa vʉtwa, vakahona ʉlʉdingʼulilo lwa mitwinyo nʉ kʉvɨɨka pa ntwe. 18 Valɨkʉnsaamusa kʉnʉ vikʉnsoga valɨkʉta, “Mapembelo, vɨ Nkʉlʉdeeva va Vayahudi!” 19 Valɨkʉntova nɨ lilanzi pa ntwe, valɨkʉmʼbehela na mati, valɨkʉsugama pa mwene nʉ kʉmwinamila ʉngata nkʉlʉdeeva. 20 Wʉ vamalile ʉkʉnkinila, vakansuula ʉnsabwa gʉlya ʉnʼduungʼu, vakanswalɨtsa ɨmisabwa gya mwene, vakammʉmya kʉnzi, nʉ kʉlʉta kukʉntovelela pa kɨdamingʼanie.

ɄYɨɨsʉ itovelelwa pa kɨdamingʼanie

(Mataayo 27:32-44; Luuka 23:26-43; Yohana 19:17-27)

21 Wʉ valɨ mu nzɨla vibɨha kukʉntovelela, vakaagana nʉ muunu ahʉmile kʉ kɨlɨmɨla ikwitsa kʉ Yelusalemu. Ʉmuunu ʉjʉ aatambʉlwagwa Simoni ʉmmolwa va kʉ vʉtsenge wa kʉ Kilene, ʉdadajyavo va Alekisanda nʉ Lufasi. Avasikali vakamwʉmɨɨlɨtsa ʉkʉta apɨmbe ɨkɨdamingʼanie kya Yɨɨsʉ. 22 Vakammɨlɨka ʉYɨɨsʉ apoonu apaatambʉlwagwa Goligota. Ɨlitaawa ɨlɨ kwʉ kʉta apoonu pa Liheela lya Ntwe. 23 Wʉ vasiike, pwʉ vakampa ɨdivai ɨjɨhangile nʉ ntuguva ʉgwa kʉhetsa ʉlʉvavo, ʉgutambʉlwa manemane. Ʉmwene akabeela ʉkʉnywa. 24 Pwʉ vakantovelela pa kɨdamingʼanie. Vakagava ɨmisabwa gya mwene kʉ nzɨla jya kʉlagʉlɨla pakʉta veeni atoole ʉnsabwa gʉlɨku.

25 Ʉnsɨkɨ ʉgwʉ vaantovelye ʉYɨɨsʉ gwale gwa pavʉsiku pa kavalɨlo ka daatu. 26 Ʉvʉvɨge ʉwa kʉvonia ɨnongwa ɨjyahɨgwagwa, waavɨgilwe pa kɨbavo ɨkyavɨɨkilwe pakyanya pa kɨdamingʼanie kya mwene. Ʉvʉvɨge ʉwa waavɨgilwe ndee, ʉnkʉlʉdeeva va vayahudi. 27 Paninie nʉ Yɨɨsʉ vaatoveliilwe pa sidamingʼanie avanyambuda vavɨlɨ, ʉjyʉnge ʉlʉvasu lwa kʉndyo, ʉjyʉnge kʉngʼɨgɨ. 28 Itso tsyavombiike ndʉwʉ ɨlimenyu lya Ngʉlʉve lyavɨgilwe ɨliita, “Vaambombye itso paninie na vatulanongwa.” 29 Avaanu ʉwʉ vaalʉtɨngʼaniaga apo, valɨkʉtiga ɨmitwe gya veene nʉ kʉnʼdʉka ʉYɨɨsʉ. Vakannyongʼonyola vakata, “Ndeeti, naveeve vɨ waatye ʉlamamula ʉVʉtaamo ʉVʉvalatse wa Ngʉlʉve nʉ kʉtsenga ikange mu sigono sidatu? 30 Ika lɨno pa kɨdamingʼanie, wɨpoke vɨ mwene!”

31 Vʉvʉle vʉle, avavaha va vateeketsi na vamanyisi va ndagɨlo vakanʼjʉlʉʉlɨsa. Vakatsova vakata, “Akaale nyango ʉkʉvapoka avange, lɨno ilemwa ʉkwɨpoka jyʉmwene! 32 Ɨngave lweli vɨ Kɨlɨsiti ʉnkʉlʉdeeva va Vaisilahɨli, iike pa kɨdamingʼanie, pwʉ nʉʉwe tʉlole nʉ kʉmwɨdɨka.” Naveene avalyasi avaatoveliilwe paninie nʉ Yɨɨsʉ valɨkʉnʼdʉka.

Ʉvʉswe wa Yɨɨsʉ pa kɨdamingʼanie

(Mataayo 27:45-56; Luuka 23:44-49; Yohana 19:28-30)

33 Ʉkʉtengʉla akavalɨlo ka ntanato (6) ʉkʉsikila akavalɨlo ka budikakʉpamato (9) ɨngʼiisi jɨkagwa ɨkɨlʉnga kyoni. 34 Na pa kavalɨlo ka budikakʉpamato ʉYɨɨsʉ akalɨla kʉ limenyu ɨlivaha akata, “Eloi, Eloi, lama sabakitani?” Ʉvʉganulu wa mamenyu aga kwʉ kʉta, “Ngʉlʉve vango, Ngʉlʉve vango, kɨki ʉndekile?”

35 Wʉ avaanu vatʉnga ʉwʉ vɨɨmile apo, vaampʉliike ʉYɨɨsʉ, vakata, “Pʉlɨhɨtsi, ikʉmwɨlanga ʉnyamalago ʉEliya ʉkʉhʉma kʉkyanya.”

36 Ʉmuunu mpamato akanyila ngʼaningʼaani akatoola ɨpamba, akatsaba mu divai ɨngʼali, akavɨɨka mu lilanzi, akahʉʉsa akampa amiime. Pwʉ akata, “Indeki, leki tʉlole ndikwitsa ʉEliya kukʉmwisa pa kɨdamingʼanie.”

37 Ʉmwene ʉYɨɨsʉ akalɨla kʉ limenyu ɨlivaha, akaswa. 38 Ɨlipasiya ɨlyale mu Vʉtaamo ʉVʉvalatse wa Ngʉlʉve lɨkalendʉka pagati, lɨkɨgava pavɨlɨ ʉkʉhʉma kʉkyanya ʉkʉsika paasi. 39 Ʉnsikali ʉmbaha va Kɨlooma ɨɨmile pavʉlongolo pa Yɨɨsʉ. Wʉ alolile ʉmwʉ aswɨlye ʉYɨɨsʉ, akata, “Tsa jɨlweli, ʉmuunu ʉjʉ akaale Mwana va Ngʉlʉve!”

40 Kange vaalepwo avadala vaninie avɨɨmile pavʉtale valɨkʉlola itsyavombekaga. Ava vaale ʉMaliyamu Magadalena, ʉSalome nʉ Maliyamu ʉvanyina va Yose nʉ Yakobo ʉnʼdebe. 41 Avo wʉ vaakongaga nʉ kʉmbombela ʉYɨɨsʉ wʉ alɨ kʉ Galilaya. Vaalepwo na vadala avange vongosu ʉwʉ naveene viitsile kʉ Yelusalemu paninie nʉ mwene.

Ʉkʉsɨɨlwa kwa Yɨɨsʉ

(Mataayo 27:57-61; Luuka 23:50-56; Yohana 19:38-42)

42 Itsi tsyoni tsyavombiike kʉmihe, mu kɨgono kya kwɨsaavʉla kʉ Sabato. 43 Pwʉ ʉYusufu ʉva kʉ Alimataya akɨkangatsa, akalʉta kwa Pilato, akanʼdoova atoole ʉnsimba gwa Yɨɨsʉ. Ʉmuunu ʉjʉ aale mpamato va vahɨgi va nongwa ʉvɨ ɨɨmɨkiwaagwa na vaanu. Ikange namwene aapʉlɨkɨlaga ʉkwitsa kwa Lʉdeeva lwa Ngʉlʉve. 44 ɄPilato wʉ ipʉlɨka ʉkʉta ʉYɨɨsʉ amalile ʉkʉswa, akadega. Pwʉ akamwɨlanga ʉnsikali ʉmbaha ʉlya, atsove nda lweli ʉYɨɨsʉ asue. 45 ɄPilato wʉ avʉʉlilwe nʉ nsikali ʉkʉta ʉYɨɨsʉ asue, akantavʉla ʉYusufu agʉtoole ʉnsimba gwa Yɨɨsʉ.

46 Ʉmwene ʉYusufu akagʉla ɨsanda jya kʉnsɨɨlɨla, akiisa ʉnsimba gwa Yɨɨsʉ ʉgwale pa kɨdamingʼanie, akamʼbina. Pwʉ akanʼgonia mu vʉguli ʉwaajavilwe mu lʉvasu lwa lʉnalaawe, akabɨɨlʉsa ɨliganga, akadɨnda pa ndyango gwa vʉguli. 47 ɄMaliyamu Magadalena nʉ Maliyamu ʉvanyina va Yose, vaapaweene apoonu ʉpwʉ aagoniitswe ʉYɨɨsʉ.