Yohana 19

ɄYɨɨsʉ ihɨgwa abudwe kʉ nzɨla jya kʉtovelelwa pa kɨdamingʼanie

(Mataayo 27:15-31; Maliko 15:6-20; Luuka 23:13-25)

1 Pwʉ ʉPilato akavalagɨla avasikali va mwene ʉkʉta vantove ʉYɨɨsʉ ni sikoti. 2 Wʉ vantovile, avasikali avo vakanienga ʉlʉdingʼulilo lwa mitwinyo nʉ kʉnswɨka pa ntwe, vakanswalɨtsa ɨkanzo jya kɨkʉlʉdeeva jya langi jya vʉvengi. 3 Kʉmbele valɨkʉhegelela kavɨlɨ kavɨlɨ kʉ mwene nʉ kʉpembetsa valɨkʉta, “Mapembelo, gwe Nkʉlʉdeeva va Vayahudi!” Vakata nʉ kʉntova na mapi.

4 ɄPilato akahʉma kʉnzi ikange, akavavʉʉla avalongotsi va Vayahudi avo akata, “Pʉlɨhɨtsi, ndinogwa ʉkʉmmʉmya iitse kʉnzi kwanyie ʉmuunu ʉjʉ, pakʉta mulʉmanye ʉkʉta nandɨvʉweeni ʉvʉnangi ʉvʉveetsaga kʉ mwene.” 5 Pwʉ akammʉmya ʉYɨɨsʉ kʉnzi wʉ atsiige aswalile ʉlʉdingʼulilo lwa mitwinyo nɨ kanzo jya langi jya vʉvengi. ɄPilato akatsova pavʉvalasu akata, “Mulolage ʉmuunu viinyo ʉjʉ apa!” 6 Avavaha va vateeketsi na valoleeli va tembile wʉ vambwene ʉYɨɨsʉ, vakooveela siitso vakata, “Intovelele pa kɨdamingʼanie, intovelele pa kɨdamingʼanie!” Pwʉ ʉPilato akavavʉʉla akata, “Intooli jyʉnyie mukantovelele pa kɨdamingʼanie, manya ʉne nandɨvʉweeni ʉvʉnangi ʉvʉveetsaga kʉ mwene.” 7 AVayahudi vakaanda vakata, “Ʉkʉkongana nʉ lʉlagɨlo lwitu, jilondiwa abudwe, manya akɨtsovile akata ʉmwene Mwana va Ngʉlʉve.”

8 ɄPilato wʉ apʉliike amamenyu ago, akoongeletsa ʉkʉdwada siitso. 9 Pwʉ akantoola ʉYɨɨsʉ, akiingila nave ikange mu nyumba jya mwene. Akavʉʉtsa kwa Yɨɨsʉ akata, “Gwe vɨ muunu ʉve ʉhʉmile ndaku?” ɄYɨɨsʉ akatsiga kɨnuunu. 10 Pwʉ ʉPilato akambʉʉtsa ikange akata, “Kɨki navukʉnnyanda? Ndeeti, nʉlʉmanyili ʉkʉta ndɨlɨ nʉ vʉtavʉlɨlwa wa kʉkʉvopola evo ʉwa kʉkʉtovelela pa kɨdamingʼanie?” 11 ɄYɨɨsʉ akamwanda ʉPilato akata, “ɄNgʉlʉve aale aleke ʉkʉkʉpa ʉne ʉnnyɨge, ndalɨno nʉviili nawo ʉvʉtavʉlɨlwa ʉvʉveetsaga paane. Lɨno ʉmuunu ʉlya ʉvɨ ambɨɨkile mu sivoko syako, vɨ alɨ nɨ nongwa ɨmbaha ɨjɨlʉtɨɨlye pa jyave.” 12 Pwʉ ʉPilato wʉ apʉliike ago, akagela ʉkʉlonda ɨnzɨla jya kʉmbopola ʉYɨɨsʉ, lɨno aVayahudi vakagimba ʉkwoveela siitso vakata, “Ɨngave vukʉmbopola ʉmuunu ʉjwa, pwʉ wiiva nʉlɨ mmanyaani va Kaisali ʉnkʉlʉdeeva va Valooma. Lola, ʉmuunu ʉvaveetsaga ʉvɨ ikɨvɨɨka vɨ nkʉlʉdeeva, iiva ikʉmʼbeela ʉKaisali.” 13 ɄPilato wʉ apʉliike amamenyu ago, akahʉma nave ʉYɨɨsʉ kʉnzi, akalʉta, akataama pa kɨtaamilo kya kʉhɨgɨla inongwa. Apoonu apo paatambʉlwagwa Waalo wa Maganga. Ɨlitaawa ɨlɨ mu nzovele jya Kɨebulaniya viita Gabata.

14 Ɨkɨgono ɨkyo kyale kya kwɨsaavʉla pa kulongwi jya kyaka kya Pasaka. Wʉ gʉsiike ʉnsɨkɨ gwa pamuunyi, akavalɨlo ka ntanato (6), ʉPilato akakɨvʉʉla ɨkɨpʉga kya Vayahudi avo akata, “Ʉjʉ apa ʉNkʉlʉdeeva viinyo!” 15 Aveene vakooveela siitso vakata, “Ʉmʼbude, ʉmʼbude! Intovelele pa kɨdamingʼanie!” ɄPilato akavavʉʉtsa akata, “Ndeeti, munogwa ndɨntovelele pa kɨdamingʼanie ʉNkʉlʉdeeva viinyo?” Avavaha va vateeketsi vakaanda vakata, “Ʉwe natʉlɨ nave ʉnkʉlʉdeeva ʉjyʉnge, apeene tʉlɨ nave ʉKaisali ʉnkʉlʉdeeva va Valooma mwene!” 16 Pwʉ kʉ vʉmalɨlo ʉPilato akanʼgotola ʉYɨɨsʉ kʉ veene pakʉta atovelelwe pa kɨdamingʼanie.

ɄYɨɨsʉ itovelelwa pa kɨdamingʼanie

(Mataayo 27:32-44; Maliko 15:21-32; Luuka 23:26-43)

Pwʉ avasikali vakantoola ʉYɨɨsʉ nʉ kʉhega nave. 17 Wʉ vihega, ʉYɨɨsʉ akapɨmba ɨkɨdamingʼanie kya kʉntovelela, akahʉma mu vʉtsenge, akalʉta apoonu apaatambʉlwagwa Liheela lya Ntwe, ɨlitaawa ɨlɨ mu nzovele jya Kɨebulaniya viita Goligota. 18 Wʉ vasiike palya, vakantovelela ʉYɨɨsʉ pa kɨdamingʼanie. Apoonu baaho apo vaalepwo avaanu avange vavɨlɨ ʉwʉ naveene vaatoveliilwe pa sidamingʼanie, mpamato ʉlʉvasu lwa kʉndyo, ʉjyʉnge ʉlʉvasu lwa kʉngʼɨgɨ.

19 ɄPilato akalagɨla ʉkʉta gavɨgwe amamenyu nʉ kʉvɨɨkwa pakyanya pa kɨdamingʼanie kya Yɨɨsʉ, agiita, “ʉyɨɨsʉ va kʉ nazaleti, ʉnkʉlʉdeeva va vayahudi.” 20 Ʉvʉvɨge ʉwa waavɨgilwe mu nzovele jya Kɨebulaniya, nɨ jya Kɨlooma, nɨ jya Kɨyunaani. AVayahudi vongosu valɨkwɨmba ʉvʉvɨge ʉwa, manya apoonu apo ʉpwʉ vaantovelye ʉYɨɨsʉ, paale piipi nʉ vʉtsenge wa Yelusalemu. 21 Pwʉ avavaha va vateeketsi vakambʉʉla ʉPilato vakata, “Ʉleke ʉkʉvɨga, ‘nkʉlʉdeeva va vayahudi,’ apeene ʉvɨge ʉteetsage, ‘Ʉmuunu ʉjʉ aatye, ʉne neene nkʉlʉdeeva va vayahudi.’ ” 22 ɄPilato akavaanda akata, “Baako, ʉgwʉ ndɨvɨgile, ndɨvɨgile.”

23 Avasikali wʉ vantovelye ʉYɨɨsʉ pa kɨdamingʼanie, vakatoola ɨmisabwa gya mwene, vakagava amagavo ganni. Nʉ jyʉnge mu vasikali avo akatoola ɨligavo lya mwene. Ikange, vakatoola ɨkanzo jya mwene. Ɨkanzo ɨjyo jyale nzɨla lʉhono, manya jyanotsiiwe ngʉge ʉkʉhʉma kʉnanena ʉkʉsika kʉ silʉnde. 24 Pwʉ vakɨtsosanza vakata, “Tʉleke ʉkʉdwemula ɨkanzo ɨjɨ, apeene tʉlagʉlɨle jɨve jyani.” Itsi tsyahʉmye ndavʉle pakʉta gavombeke amamenyu galya ʉgwʉ gaavɨgilwe mu Vʉvɨge ʉVʉvalatse agiita, “Vaagaviine ɨmisabwa gyango, nʉ kʉvomba isilagʉlɨlo pa kulongwi jya kanzo jyango.” Itso tsyavombilwe na vasikali.

25 Lola, pawiipi nɨ kɨdamingʼanie kya Yɨɨsʉ vaalepwo avadala vanni, avɨɨmile apo. Mu vadala avo aalepwo ʉvanyina va Yɨɨsʉ, ʉvanyina ʉnʼdebe va Yɨɨsʉ, ʉMaliyamu ʉnʼdala va Kileopa, nʉ Maliyamu Magadalena. 26 ɄYɨɨsʉ wʉ ambwene ʉvanyina, ikange najyʉ nkongi ʉvɨ aanʼganile siitso ɨmile pawiipi nʉ vanyina, akata, “Gwe jyʉva, ndolage ʉjʉ. Ʉmbɨɨke ave mwana vaako.” 27 Ikange akambʉʉla ʉnkongi ʉjwa akata, “Ndolage ʉjʉ. Ʉmbɨɨke ʉkʉva vɨ jyʉva vaako.” Pwʉ ʉkʉhʉma ʉnsɨkɨ ʉgwa ʉnkongi ʉjwa akambɨɨka vanyina, alɨkʉtaama nave mu vʉtsenge wa mwene.

Ʉkʉswa kwa Yɨɨsʉ

(Mataayo 27:45-56; Maliko 15:33-41; Luuka 23:44-49)

28 ɄYɨɨsʉ wʉ alʉmanyile ʉkʉta amalile ʉkʉjɨvomba ɨmbombo jya mwene, pwʉ akatsova akata, “Ndɨlɨ nɨ kyʉmɨlwa.” Aatsovile ewo pa kʉkwɨtsa tsilya itsyavɨgilwe mu Vʉvɨge ʉVʉvalatse. 29 Apoonu apo kyalepwo ɨkɨkongʼolo ɨkyʉ vaadɨtsiitse ɨdivai ɨngʼali. Pwʉ vakatoola ɨpamba vakatsaba mu divai ɨjyo, vakavɨɨka mu lʉsamba lwa libɨkɨ ɨlɨhisopo, vakahʉʉsa vakampa ʉYɨɨsʉ mu ndomo. 30 ɄYɨɨsʉ wʉ anotsanziitse ɨdivai ɨjyo, akatsova akata, “Ɨmbombo jyango jɨsilile!” Pwʉ akiinama ʉntwe, akaswa.

Avasikali vikʉmmoma ʉYɨɨsʉ nʉ nʼgoha

31 Ɨkɨgono ɨkyo kyale kya kwɨsaavʉla kʉ Sabato. Avalongotsi va Vayahudi navaanogwe ɨmisimba gya vaanu avo gɨtsige pakyanya pa sidamingʼanie mu kɨgono kya Sabato. Ikange ɨSabato ɨjyo jyale mbaha siitso. Pwʉ ʉkʉkongana nɨɨlyo, avalongotsi avo vakalʉta kwa Pilato, vakanʼdoova ʉkʉta avasikali valʉte vakadeenye isilʉnde sya vaanu avaatoveliilwe pa sidamingʼanie nʉ kʉhetsa ɨmisimba ɨgyo pa sidamingʼanie. 32 Pwʉ avasikali vakalʉta, vakadeenya isilʉnde sya vaanu avo vavɨlɨ avaatoveliilwe lʉninie nʉ Yɨɨsʉ. 33 Lɨno, wʉ valʉtile pa Yɨɨsʉ, vakavona amalile ʉkʉswa, pwʉ vakandeka kɨtsila kʉdeenya isilʉnde sya mwene. 34 Napeene, ʉnsikali mpamato akammoma ʉYɨɨsʉ nʉ nʼgoha pa lʉvasu. Pwʉ baaho ʉnkisa na magasi sikahʉma. 35 Ʉmuunu ʉvɨ aatsiweene tsyoni itsi wʉ tsivombeka vɨ mwene ikwoleletsa. Itsʉ ikwoleletsa tsa jɨlweli, ikange alʉmanyile ʉkʉta itsova itsa jɨlweli. Oleliitse itso pa vʉsumbe wa kʉta najyʉnyie mwɨdɨkage. 36 Itsi tsyahʉmye ndavʉle pakʉta gakwɨlanile amamenyu galya ʉgwʉ gaavɨgilwe mu Vʉvɨge ʉVʉvalatse ʉkʉta, “Nalɨkʉli ɨlitsege lya mwene ɨlyʉ valadeenya.” 37 Ikange ʉVʉvɨge ʉVʉvalatse wiita, “Valambona ʉvɨ vaammomile nʉ nʼgoha.”

Ʉkʉsɨɨlwa kwa Yɨɨsʉ

(Mataayo 27:57-61; Maliko 15:42-47; Luuka 23:50-56)

38 Aalekwo ʉmuunu mpamato ʉvɨ ɨlitaawa lya mwene aale vɨ Yusufu, aahʉmaga kʉ vʉtsenge wa Alimataya. Ʉmuunu ʉjʉ aale nkongi va Yɨɨsʉ ʉvɨ aasihaga ʉvʉkongi wa mwene, ʉlwakʉva aavadwadaga avalongotsi va Vayahudi.

Ago gooni wʉ galʉtɨngʼiinie, pwʉ ʉmuunu ʉjwa akalʉta kwa Pilato, akanʼdoova ʉkʉta atoole ʉnsimba gwa Yɨɨsʉ akasɨɨle. ɄPilato akantavʉla. Pwʉ ʉYusufu akalʉta, akiisa ʉnsimba gwa Yɨɨsʉ pa kɨdamingʼanie.

39 ɄNikodemu, ʉvɨ ɨkɨlo mamato aalʉtile kwa Yɨɨsʉ, namwene akongeletsiinie nʉ Yusufu, akava agegile amafuta aginuungʼilila vʉnonu, agaale ga kilo isitsigo sidatu (30). 40 Pwʉ avaanu vavɨlɨ avo vakatoola ʉnsimba gwa Yɨɨsʉ, vakagʉbina mu sanda kʉnʉ vikʉgʉbaka amafuta ago aginuungʼilila vʉnonu ʉkʉkongana nʉ lwiho lwa Vayahudi lwa kʉsɨɨla avaswe. 41 Ʉkwonu ʉkwa ʉkwʉ vaantovelye ʉYɨɨsʉ, kyalekwo ɨkɨlɨmɨla kya mibɨkɨ ɨkyale nʉ vʉguli ʉvʉpya ʉmwʉ navagele ʉkʉnsɨɨla ʉmuunu ʉvaveetsaga. 42 Pwʉ vakansɨɨla ʉYɨɨsʉ mu vʉguli ʉwa, manya ɨkɨgono ɨkyo kʉ Vayahudi kyale kya kwɨsaavʉla kʉ Sabato, ikange ʉvʉguli ʉwa wʉ waale pawiipi.