Ʉkʉtsʉʉka kwa Yɨɨsʉ
20
1 Pavʉsiku wʉ kutandaalʉka,
pa kɨgono kya Pamulʉngʉ,
ʉMaliyamu Magadalena akalʉta kʉ vʉguli wa Yɨɨsʉ.
Akavona ɨliganga lɨlya lɨbɨɨlwike ʉkʉhʉma pa ndyango gwa vʉguli.
2 Pwʉ akahega palya inyila,
akalʉta kwa Simoni Petulo na kʉ nkongi ʉlya,
ʉvɨ ʉYɨɨsʉ aanʼganile siitso.
Akavavʉʉla akata,
“Avaanu avatʉnga vahetsiitse ʉnsimba gwa Ntwa viitu mu vʉguli,
ikange natʉlʉmanyili ʉkwʉ vavɨɨkile!”
3 ɄPetulo nʉ nkonginnine ʉjwa,
vakahega,
vakalʉta kʉ vʉguli.
4 Wʉ vilʉta,
vooni wʉ vavɨlɨ valɨkʉnyila,
napeene ʉnkonginnine ʉjwa akanyila akandʉtɨɨlɨla ʉPetulo,
nʉ kʉlongola ʉkʉsika pa vʉguli.
5 Wʉ asiike,
akiinama,
akameeha mu vʉguli,
akatsivona isanda itsʉ vaansɨɨlye ʉYɨɨsʉ,
lɨno niingile mu nʼgati.
6 Pwʉ ʉSimoni Petulo akakonga,
akasika apo,
akiingila mu vʉguli nʉ kʉtsivona isanda itsʉ vaansɨɨlye ʉYɨɨsʉ.
7 Ikange akakɨvona nɨ kɨtambala ɨkyʉ vaanʼgubiike ʉYɨɨsʉ kʉ ntwe.
Nakyale paninie nɨ misabwa ɨgɨnge,
apeene kyasujilingʼiine pavʉnge,
kʉ lʉkanzi.
8 Pwʉ ʉnkongi ʉjyʉnge ʉjwa,
ʉvɨ aatalile ʉkʉsika apo,
namwene akiingila mu vʉguli.
Akalola,
akɨɨdɨka ʉkʉta ʉYɨɨsʉ atsʉʉkile.
9 Paninie nɨɨlyo ikulongwi tsa kʉtsʉʉka ʉkwa navaatsimanye ʉmwʉ tsikongelanila nʉ Vʉvɨge ʉVʉvalatse ʉwiita,
wɨgane wa Ngʉlʉve ʉkʉta ʉYɨɨsʉ atsʉʉke ʉkʉhʉma kʉ vaswe.
10 Pwʉ avakongi avo vakakilivuka ʉkwʉ vaataamaga.
ɄYɨɨsʉ ikʉmbonekela ʉMaliyamu Magadalena
11 Lɨno ʉMaliyamu Magadalena akatsiga baaho ɨmile kʉnzi kʉ vʉguli,
akava ilɨla.
Wʉ ilɨla,
akiinama nʉ kʉmeeha mu vʉguli.
12 Akavavona avasuungʼwa vavɨlɨ ʉwʉ vaaswalile ɨmisabwa ɨmivalasu.
Vaataamile apoonu ʉpwʉ pa vʉtengʉlɨlo gwale ʉnsimba gwa Yɨɨsʉ.
Ʉnsuungʼwa mpamato aataamile ʉlʉvasu lwa kʉ ntwe,
ʉjyʉnge ʉlʉvasu lwa kʉ silʉnde.
13 Avasuungʼwa avo vakambʉʉtsa vakata,
“Gwe jyʉva,
kɨki wilɨla?”
Ʉmwene akavaanda akata,
“Avaanu avatʉnga vahetsiitse ʉnsimba gwa Ntwa vango ʉpwʉ gʉkaale,
nandɨlʉmanyili ʉkwʉ vavɨɨkile!”
14 ɄMaliyamu wʉ atsovile amamenyu ago,
akalola kʉnsana,
akambona ʉmuunu mpamato ɨmile baaho.
Hʉmbe ʉmuunu ʉjwa aale vɨ Yɨɨsʉ,
lɨno ʉMaliyamu aanʼjagilwe.
15 ɄYɨɨsʉ akambʉʉtsa akata,
“Gwe jyʉva,
kɨki wilɨla?
Ndeeti,
vukʉndonda veeni?”
ɄMaliyamu,
kʉnʉ isaaga ʉkʉta ipange ʉmuunu ʉjwa imbombi va kɨlɨmɨla kya mibɨkɨ ɨkyo,
akamwanda akata,
“Gwe daada,
ɨngave ʉve veeve ʉhetsiitse ʉnsimba gwa mwene ʉpwʉ gʉkaale,
ndidoova,
ʉmbʉʉle ʉkwʉ ʉgʉvɨɨkile,
pakʉta ndɨkagʉtoole.”
16 ɄYɨɨsʉ akamwɨlanga,
akatambʉla ɨlitaawa lya mwene akata,
“Maliyamu!”
Pwʉ ʉMaliyamu akagalamuka,
akavona hʉmbe vɨ Yɨɨsʉ,
pwʉ akatsova mu nzovele jya mwene jya Kɨebulaniya akata,
“Laboni!”
Ɨlimenyu ɨlɨ kwʉ kʉta Mmanyisi.
17 ɄYɨɨsʉ akambʉʉla akata,
“Kwʉ baako ʉkʉnnyibata,
manya ndɨkaanale ʉkʉtoga kʉkyanya kwa Daada.
Lɨno ʉbɨhage ʉkavavʉʉle avalʉkololwango,
a ʉkʉta ndilʉta kʉkyanya kwa Daada,
ʉvɨ vɨ Dadajiinyo najyʉnyie,
kwa Ngʉlʉve vango ʉvɨ najyʉnyie vɨ Ngʉlʉve viinyo.”
18 Pwʉ ʉMaliyamu Magadalena akalʉta kʉ vakongi va Yɨɨsʉ,
akavavʉʉla ikulongwi itsi,
akata,
“Lola,
ʉne ndɨmbwene ʉNtwa!”
Pwʉ akavavʉʉla gooni ʉgwʉ ʉYɨɨsʉ aandagye.
ɄYɨɨsʉ ikʉvahʉmɨla avakongi va mwene
19 Kʉmihe ɨkɨgono kɨɨkyo,
avakongi va Yɨɨsʉ vaalʉndamiine mu nyumba mamato.
Wʉ valɨ ʉmwa vakava vapatile ɨmilyango ʉlwakʉva vaavadwadaga avalongotsi va Vayahudi.
Nʉpwʉ jɨngave ɨmilyango ɨgyo gyapatilwe,
ʉYɨɨsʉ akahʉmɨla,
akɨɨma pagati pa veene,
akavavʉʉla akata,
“Ʉlʉnotsehetso lʉveetsage nʉʉnyie!”
20 ɄYɨɨsʉ wʉ amalile ʉkʉvavʉʉla amamenyu ago,
akavavonia isivoko nʉ lʉvasu lwa mwene.
Avakongi wʉ vaweene ʉkʉta vɨ mwene ʉNtwa,
vakahovoka siitso.
21 ɄYɨɨsʉ akatsova ikange akata,
“Ʉlʉnotsehetso lʉveetsage nʉʉnyie.
Ndʉwʉ ʉNgʉlʉve aansuungʼile ʉne,
vʉvʉle vʉle najyʉne ndikʉvasuungʼa ʉnyie mu kɨlʉnga.”
22 Pwʉ akavapuulila ʉmwʉja,
akavavʉʉla akata,
“Ʉpɨlɨli ʉMepo ʉMbalatse.
23 Ɨngave mukʉvasyɨkɨla avaanu imbiivi tsa veene,
ʉNgʉlʉve namwene iiva avasyɨkye imbiivi avaanu avo.
Ɨngave namukavasyɨkɨle,
ʉNgʉlʉve nakavasyɨkɨle avaanu avo.”
ɄYɨɨsʉ ikʉmbonekela ʉTomasi
24 Ʉnsɨkɨ ʉpwʉ ʉYɨɨsʉ aaviitsye avakongi va mwene,
ʉnkongi ʉTomasi ʉvɨ ɨlitaawa ɨlɨnge aale vɨ Vʉngʉngʉ,
naalepwo paninie na vakongi avo.
25 Pwʉ avakongi avange avo vakambʉʉla vakata,
“Ʉwe tʉmbwene ʉNtwa.”
Lɨno ʉmwene akavaanda akata,
“Ʉne nandiweesi ʉkwɨdɨka ago ɨngave nandɨgaweeni amavamba ga misumali mu sivoko sya mwene,
ndɨte ʉkwabaasa nɨ kɨvoko kyango ɨlivamba pa lʉvasu lwa mwene.”
26 Ʉndʉngʉ mpamato wʉ gʉlʉtɨngʼiinie,
avakongi va Yɨɨsʉ vakalʉndamana ikange mu nʼgati mu nyumba.
Ɨkɨgono ɨkyo namwene ʉTomasi aale paninie navo.
Ɨmilyango gyale mipate.
Baaho,
ʉYɨɨsʉ akahʉmɨla,
akɨɨma pagati pa veene,
akavasaamusa akata,
“Ʉlʉnotsehetso lʉveetsage nʉʉnyie!”
27 Pwʉ akambʉʉla ʉTomasi akata,
“Gwe Tomasi,
itsaga ʉnnyabaase nɨ kɨvoko kyako mu sivoko syango.
Ikange ʉnnyabaase nɨ kɨvoko kyako pa lʉvasu lwango.
Ʉleke ʉkʉva muunu ʉvɨ nikwɨdɨka,
apeene wɨɨdɨkage.”
28 ɄTomasi akamwanda akata,
“Ndyɨdiike,
ʉve jɨlweli veeve Ntwa vango ikange ʉlɨ Ngʉlʉve vango!”
29 ɄYɨɨsʉ akamwanda akata,
“Wɨdiike ʉlwakʉva ʉmbwene.
Vagatalʉsu avaanu ʉwʉ vikʉnnyɨdɨka nʉpwʉ jɨngave navambweni ʉne.”
Ʉvʉsumbe wa kɨtabu ɨkɨ
30 ɄYɨɨsʉ aavombile isidego isinge syongosu,
isyʉ avakongi va mwene vaasiweene,
isyʉ lɨno nasivɨgilwi mu kɨtabu ɨkɨ.
31 Lɨno,
isidego isi isivɨgilwe mu kɨtabu ɨkɨ,
sivɨgilwe pakʉta mwɨdɨkage ʉkʉta ʉYɨɨsʉ vɨ Mesiya,
Mwana va Ngʉlʉve,
nʉ kʉta kʉ nzɨla jya kʉmwɨdɨka,
mwikava ʉwʉʉmi wa sikutsooni mu litaawa lya mwene.