Ʉlʉtangɨlo kʉ vɨɨdɨki va kʉ Yelusalemu
9
1 Lɨno ndivona nakɨkʉli ɨkya kʉmbɨɨka ndɨvavɨgɨle ʉnyie ikulongwi tsa kʉhʉmya ʉlʉtangɨlo lwinyo kʉ vɨɨdɨki va kʉ Yelusalemu.
2 Nditsova ewo ʉlwakʉva ndɨjɨmanyile ɨnumbula jiinyo jya kwɨhʉmya pa kʉvatanga avange.
Ʉne ndikɨginia kʉ vaanu va kʉ Makedoniya pa kulongwi tsyanyie ndiita,
“Ʉmpelela gwa mu mpandʉlʉ gwa Akaya,
ʉkʉtengʉlɨla mu mwaka ʉgʉkalʉtɨngʼiinie,
vɨtetengʼiinie ʉkʉhʉmya.”
Ɨnumbula jiinyo ɨjyo jɨvapelye avaanu vongosu mu veene vave naveene nɨ numbula jya kʉhʉmya.
3 Lɨno ndɨvasuungʼile kwanyie avɨɨdɨkivajiitu avo pakʉta,
muvombe ndʉwʉ ndɨkavaginiitse kʉ vaanu va kʉ Makedoniya.
Muvombe ndavʉle pakʉta galya ʉgwʉ tʉkavavʉʉlile aveene pa kulongwi tsyanyie galeke ʉkʉvoneka ʉkʉta tʉkavaginiaga ʉnyie pavʉvʉle.
4 Lola,
ɨngave jʉndikwitsa ʉkwa paninie na Vamakedoniya nʉ kʉvona namwɨtetengʼiini,
apo jʉmwiva mungʼotsiitse isoni pa kulongwi tsa nyʉʉve jiitu kwanyie.
Ikange najyʉnyie jʉmwiva ni soni itsʉ natsitsoveka.
5 Pwʉ lɨno,
ndɨweene lwiva lʉnonu ndɨvadoove avɨɨdɨkivajiitu ava valongole ʉkwa,
vasitetengʼanie isiinu sya wiipa wiinyo isyʉ mukatʉhʉʉviitse ʉkʉta jʉmuhʉmya.
Isiinu isyo sivoniage ʉkʉta jɨlweli mwɨhʉmiitse kʉ wiipa,
nakwʉ kʉta kʉlɨ muunu inninie iiva avʉʉmɨɨliitse.
Ʉkʉhʉmya isyavʉpe kʉ numbula ɨmbalasu
6 Mukʉmbʉke ʉkʉta,
“Ʉmuunu ʉvɨ ivyala sidebe,
ibena sidebe.
Apeene ʉvɨ ivyala syongosu,
vɨ ibena syongosu.”
7 Ʉmuunu ʉvaveetsaga ahʉmyage ndʉwʉ alamwe mu numbula jya mwene.
Aleke ʉkʉhʉmya kʉ lʉsʉsʉvalo pange kʉ nzɨla jya kwʉmɨɨlɨtswa,
manya ʉNgʉlʉve anʼganile ʉmuunu ʉvɨ ihʉmya kʉ lʉhekelo.
8 Pwʉ ʉNgʉlʉve ikʉvasajaga mu mongosu,
pakʉta ʉnsɨkɨ gwoni muveetsage ni siinu syoni isyʉ munogye ʉkʉva nasyo.
Ikange kʉ nzɨla ɨjyo muveetsaga vaanu va kʉvomba inonu nyongosu itsa kʉvatanga avange.
9 Ndʉwʉ jɨvɨgilwe mu Vʉvɨge ʉVʉvalatse ʉkʉta,
“Vahʉmiitse kʉ numbula jyoni,
vavapye avagatsu.
Ɨkɨsa kya veene kikʉmbʉkwagwa sikutsooni.”a
10 ɄNgʉlʉve vɨ mwene ikʉmpa ʉmuunu ɨmbeju jya kʉvyala nʉ nkate gwa kʉlya.
Vʉvʉle vʉle jiikʉvapa ʉnyie isiinu nʉ kwongeletsa sive syongosu,
pakʉta muveetsage nasyo isya kʉvatanga kʉ wiipa avaanu ʉwʉ navalɨ nasyo.
11 Ʉmwene jiikʉvapa ʉnyie ʉvʉmosu mu gooni,
pakʉta muve viipa sikutsooni.
Kʉ nzɨla ɨjyo avaanu vongosu jʉvikʉnsaanaga ʉNgʉlʉve wʉ ʉwe tukʉvapa isiinu isyo isihʉmile kwanyie.
12 Lola,
ɨmbombo ɨjɨ ɨjyʉ muvomba,
nakwʉ kʉta jitangɨla peene avɨɨdɨki ʉwʉ navalɨ nasyo isiinu,
apeene jikʉvapelela avaanu vongosu vansaanage siitso ʉNgʉlʉve.
13 Ɨmbombo ɨjyo jivonia ʉkʉta ʉnyie mulɨ vavombi vanonu va Ngʉlʉve.
Avaanu vikʉnʼginia ʉNgʉlʉve pa kulongwi jya wɨɨdɨhɨtsi wiinyo wa kʉtsova pavʉvalasu ʉkʉta mukwɨdɨka ɨLivangɨli lya Kɨlɨsiti.
Ikange vikʉnʼginia wʉ vikʉvʉvona ʉwiipa wiinyo kʉ veene nakʉ kʉ vaanu avange vooni.
14 Kʉ numbula jya lʉgano,
mu nyɨsajo tsa veene,
vikʉvadoovela ʉnyie kwa Ngʉlʉve kʉnʉ vitsingahɨtsa ɨkulongwi jya lʉhʉngʉ ʉlwʉ avapye ʉnyie.
15 Tʉnsaanage ʉNgʉlʉve pa kulongwi jya wiipa wa mwene ʉvʉtsila kɨgelelo.