Ɨnumbula jya kʉvatanga avange
8
1 Lɨno vɨɨdɨkivajiitu,
tunogwa tʉvavʉʉle ʉmwʉ ʉNgʉlʉve avahʉngʉkye avampelela va kʉ Makedoniya inumbula tsa kwɨhʉmya pa kʉvatanga avange.
2 Paninie nʉ kʉta avɨɨdɨki avo vagatsu siitso nʉ kʉva mu vʉkʉvɨlwa ʉvʉlɨ pongosu,
valɨ nʉ lʉhekelo ʉlʉlʉti ʉlwʉ lʉvapelye vave viipa siitso pa kʉhʉmya isiinu sya veene.
3 Ndikʉvavʉʉla ʉkʉta vahʉmiitse isiinu syongosu,
ʉkʉlʉtɨɨlɨla ʉmwʉ vaveelye.
Ikange vahʉmiitse kʉ vʉnogwe wa veene kɨtsila kwʉmɨɨlɨtswa.
4 Vakatʉsiimile siitso ʉkʉta naveene vatavʉlwe vave mu mbombo jya kʉvatanga avɨɨdɨki va Yɨɨsʉ va kʉ Yelusalemu.
5 Vaavombile ewo ʉkʉlʉtɨɨlɨla ʉmwʉ twahʉʉvɨlaga.
Vɨɨhʉmiitse taasi kʉ Ntwa,
pwʉ vakɨhʉmya na kwawe.
Vaavombile ewo ndʉwʉ inogwa ʉNgʉlʉve.
6 Lɨno tukʉnʼdoova ʉTito ʉkʉta iitse avatange ʉkʉmala ɨmbombo jya kʉsangɨla,
ʉlwakʉva vɨ mwene ʉvɨ aajɨtengwe ɨmbombo ɨjyo kwanyie.
7 Ndʉwʉ isiinu siinyo syoni siheleleka:
ʉlwɨdɨko,
isikʉngɨlwa sya kʉlʉmbɨlɨla,
ʉvʉmanyi,
ʉkwɨkupila mu gooni amanonu,
paninie nʉ lʉgano lwinyo kwawe,
a lɨno muve nɨ nyango mu mbombo ɨjɨ ɨjya kʉvatanga avange.
8 Wʉ nditsova aga nakwʉ kʉta ndikʉvalagɨla,
apeene ndinogwa ʉkʉlola ʉlʉgano lwinyo nda lwa jɨlweli kʉ nzɨla jya kʉlɨngʼaania nʉ mwʉ vikɨkupilila avaanu avange.
9 Lola,
mulʉmanyile ʉmwʉ ʉNtwa viitu ʉYɨɨsʉ Kɨlɨsiti avahʉngʉkye ʉnyie.
Nʉpwʉ jɨngave aale vɨ mwenenasyo isiinu syoni,
akɨvɨɨka nʼgatsub pa kulongwi tsyanyie,
pakʉta mu vʉgatsu wa mwene,
ʉnyie muve vamosu pamiiho ga Ngʉlʉve.
10 Lɨno,
pa kulongwi ɨjɨ,
ndikʉvavʉʉla ɨlyʉ lɨnogelanie kwanyie.
Pavanogye ʉkʉmala galya ʉgwʉ mukatengwe mu mwaka ʉgʉlʉtɨngʼiinie.
Mu mwaka ʉgwa,
ʉnyie mukaale nyienye vatatsi pa kʉvonia ɨnumbula jya kwɨhʉmya isiinu sya kʉvatanga avange nʉ kʉtengʉla ʉkʉvomba ɨlyo.
11 Lɨno,
ndʉwʉ ʉkʉhʉma pa vʉtengʉlɨlo mukanogwagwa siitso ʉkʉvomba ɨlyo,
pwʉ lɨno mumale ɨmbombo ɨjyo,
mwɨhʉmye ʉkʉkongana ni syʉ mulɨ nasyo.
12 Ɨngave ʉmuunu ikɨpʉlɨka ʉkʉhʉmya isyʉ alɨ nasyo kɨtsila kwʉmɨɨlɨtswa,
ʉNgʉlʉve ikwʉpɨlɨla,
ʉlwakʉva ʉNgʉlʉve ikwʉpɨlɨla ʉkʉkongana ni syʉ ʉmuunu alɨ nasyo,
nakwʉ kʉta isyʉ nalɨ nasyo.
13 Ʉvʉsumbe wiitu,
nakwʉ kʉta ʉnyie mugagɨlwe nʉ ntsigo gwa kʉvatanga avange,
pakʉta aveene vave pa vʉlegeesu,
baako,
apeene ndinogwa muhwanane.
14 Ʉnsɨkɨ ʉgʉ wʉ mulɨ nɨ mote muvatangage valya ʉwʉ valɨ mu lʉkoje,
pakʉta naveene ʉpwʉ valaava viiva nɨ mote viitse vavatangage ʉnyie.
Mwɨlyo mwiva muhwaniine,
15 ndʉwʉ jɨvɨgilwe ʉkʉta,
“Ʉvɨ aalʉndamiinie syongosu,
naave na masigalɨlo,
namwene ʉvɨ aalʉndamiinie sidebe nasyakeepe.”c
ɄTito na vanine visuungʼwa kʉ Kolinto
16 Ndikʉnsaana ʉNgʉlʉve ʉvɨ ampye ʉTito ɨnumbula ɨjɨlɨ ndɨ jyane,
ɨjinogwa ʉkʉvatanga ʉnyie.
17 Manya wʉ tukʉnʼdoova ʉkʉta iitse kwanyie,
akɨɨdiike.
Ikange ʉmwene jyʉmwene akahowiike siitso ʉkwitsa kukʉvatanga.
18 ɄTito ʉjʉ,
tukʉnsuungʼa paninie nʉ mwɨdɨkinʼjiitu ʉjyʉnge,
ʉvɨ ɨmipelela gyoni gya vɨɨdɨki gikʉnʼginia mu mbombo jya kʉlʉmbɨlɨla ɨLivangɨli.
19 Ikange ɨmipelela gya vɨɨdɨki gɨmwomwe ʉmwɨdɨkinʼjiitu ʉjʉ pakʉta ave paninie nʉʉwe wʉ twilʉta kuhɨlɨka kʉ vaanu isiinu isyʉ muhʉmiitse sikavatange.
Ɨmbombo ɨjyo,
jikʉvavɨɨka avaanu vanʼginiage ʉNtwa,
ikange jivonia ʉmwʉ twɨhʉmɨhiitse pa kʉvatanga avange.
20 Tugenda paninie pakʉta twɨmɨɨlɨle vʉnonu isiinu isyʉ avaanu vasangile kʉ kɨsa kya veene.
Tuvomba ewo pakʉta ʉmuunu ʉvaveetsaga aleke ʉkʉtʉtsova sivi pa wɨɨmɨɨlɨtsi ʉvʉ.
21 Ʉvʉsumbe wiitu,
tunogwa ʉkʉvomba vʉnonu pamiiho ga Ntwa na pamiiho ga vaanu.
22 Tukʉnsuungʼa najyʉ mwɨdɨkinʼjiitu ʉjyʉnge ave paninie nʉ Tito nʉ nnine.
Ʉmwɨdɨkinʼjiitu ʉjwa kakongosu tʉmbwene ʉkʉta alɨ nyango mu mbombo nyongosu.
Ʉlʉ lɨno alɨ nyango siitso,
alʉtɨɨlye ʉmwʉ akaveelye pa vʉtengʉlɨlo,
ʉlwakʉva ihʉʉvɨla siitso ʉkʉta ʉnyie jʉmuhʉmya ʉlʉtangɨlo ndʉwʉ vivomba avɨɨdɨki va mipelela ɨgɨnge.
23 Lɨno ɨngave ʉmuunu inogwa ʉkʉlʉmanya ikulongwi tsa Tito,
mumbʉʉlage ʉkʉta ʉjʉ imbombinʼjyango ʉvɨ tʉlɨ paninie pa mbombo jya kʉvatanga ʉnyie.
Ikange ɨngave ʉmuunu inogwa ʉkʉlʉmanya ikulongwi tsa vange avo vavɨlɨ,
mumbʉʉle ʉkʉta avo vɨɨdɨkivajiitu,
vasuungʼilwe nɨ mipelela,
naveene vikʉmwɨmɨka ʉKɨlɨsiti.
24 Pwʉ lɨno,
muvavoniage avaanu avo ʉlʉgano lwinyo,
pakʉta ɨmipelela gya vɨɨdɨki gɨlʉmanye ʉkʉta ʉgwʉ tukɨginihitsa pa kulongwi tsyanyie,
ga jɨlweli.