7
1 Lɨno vagane vango,
ʉlwakʉva ʉNgʉlʉve atʉhʉʉviitse ʉkʉtʉpa ago gooni,
pwʉ twɨvalatse mu gooni agikʉtʉvɨɨka tʉve valami ɨmihana ni numbula tsiitu.
Tʉveetsage vavalatse,
ikange mu wʉʉmi wiitu tʉnʼdwadage ʉNgʉlʉve.
Ʉlʉhekelo lwa Paulo
2 Tudoova mudɨndʉle inumbula tsiinyo mutwʉpɨlɨle,
ʉlwakʉva nakʉli ʉmuunu ʉvɨ tʉnnangye,
nakʉli ʉvɨ tʉndemiitse mu kɨɨnu kɨninie,
evo ʉvɨ tʉnsyovile.
3 Nanditsova amamenyu aga pa kʉvahɨga.
Lola,
ndʉwʉ ndɨkatsovile pa vʉtengʉlɨlo,
ʉnyie tʉvaganile siitso nda kɨhʉmɨle ɨkɨveetsaga,
jɨve kʉtsiga vʉʉmi evo kʉswa.
4 Wʉ nditsova nʉʉnyie nandidwada kɨɨnu,
ikange ndikɨginia siitso pa kulongwi tsyanyie.
Ʉnyie munnywiliitse siitso ʉne.
Nʉpwʉ jɨngave lɨno tʉlɨ mu vʉkʉvɨlwa wongosu,
ʉnyie mumbɨɨkile ndɨve nʉ lʉhekelo ʉlʉlʉti.
5 Lola,
napeene ʉpwʉ tʉkasiike kʉ Makedoniya tʉkalemilwe ʉkʉgatalʉka,
ʉlwakʉva tʉkaale nʉ vʉkʉvɨlwa imbasu tsyoni;
kʉnzi tʉkaale nɨ mbatsa na valʉgʉ viitu,
mu nʼgati mu mihana giitu mukaale nʉ lʉdwado.
6 Lɨno,
ʉNgʉlʉve ʉvɨ ikʉvanywilitsa avaanu avalɨ mu vʉpala mu numbula tsa veene,
akatʉnywiliitse kʉ nzɨla jya kwitsa ʉTito.
7 Nakwʉ kʉta tʉkanywilitsiiwe kʉ nzɨla jya kwitsa ʉTito kwene,
apeene na kʉ nzɨla ɨjyʉ mukannywiliitse namwene.
Akatʉpangye ʉmwʉ muveelye nʉ vʉsʉʉkwa wa kʉmbona ʉne,
nʉ mwʉ muveelye nʉ lʉsʉsʉvalo ʉlwakʉva ndɨkavatanie pa mbiivi tsiinyo,
ikange nʉ mwʉ muveelye nʉ lwɨkupilo pa kʉnnanga ʉne.
Ago gambɨɨkile ndɨve nʉ lʉhekelo siitso.
8 Paninie nʉ kʉta ɨkalata ɨjyʉ ndɨkavavɨgye jɨkavapye ʉlʉsʉsʉvalo,
lɨno nandikɨhɨga mu numbula.
Ndɨkɨhɨgile padebe pa vʉtengʉlɨlo wʉ ndikʉlʉmanya ʉkʉta ɨkalata ɨjyo jɨkavapye ʉnyie ʉlʉsʉsʉvalo,
nʉpwʉ jɨngave lʉkaale lwa nsɨkɨ nsupi vʉvʉle.
9 Lɨno ndɨlɨ nʉ lʉhekelo,
nakwʉ kʉta ndihekela ʉlwakʉva mukasʉsʉvye,
baako!
Apeene ndihekela ʉlwakʉva ʉlʉsʉsʉvalo lwinyo lʉkavapelye mulaate imbiivi tsiinyo.
Ʉlʉsʉsʉvalo lwinyo lʉkaale mu vʉnogwe wa Ngʉlʉve,
manya natʉkavapelele mwambʉtse kɨninie kʉ galya ʉgwʉ tʉkavavɨgye.
10 Ʉlʉsʉsʉvalo ʉlukwitsa pa vʉsumbe wa vʉnogwe wa Ngʉlʉve lukʉmpelela ʉmuunu alaate imbiivi.
Ʉkʉlaata imbiivi ʉkwa,
kwʉ kwene kukʉmpelela ʉmuunu akave ʉvʉpoki.
Ʉlʉsʉsʉvalo ndʉʉlwa nalwa kwɨhɨga.
Lɨno ʉlʉsʉsʉvalo ʉlukwitsa kʉ nongwa jya mbombo tsa mu kɨlʉnga,
ʉlwa luleeta ʉvʉswe.
11 Lola,
ʉlʉsʉsʉvalo ʉlwʉ mulɨ nalwo kʉ vʉnogwe wa Ngʉlʉve,
lwʉ lwene lʉvapye ʉnyie ʉlʉvʉmbʉlɨlo ʉlʉlʉti;
lʉvapelye gʉnogage siitso ʉkʉvomba itsinogelanie,
lʉvapelye mugɨɨmɨlage galya ʉgwʉ muvomba ʉkʉta ga jɨlweli,
lʉvapelye ʉkʉvʉsʉʉla ʉvʉviivi,
ʉkʉmwɨmɨka ʉNgʉlʉve,
ʉkʉva nʉ vʉsʉʉkwa wa kʉmbona ʉne,
na pa kʉmpa ʉlʉvʉngʉ ʉlʉnogelanie ʉmuunu ʉnnangi.
Mwago gooni muvoniitse ʉkʉta mutsila vʉnangi mu kulongwi ɨjɨ.
12 Lɨno,
ʉvʉsumbe wango wa kʉvɨga ɨkalata jɨlya navʉkaave wa kʉvonia ikulongwi tsa muunu ʉvɨ ambombye ʉmuunu ʉjyʉnge imbiivi,
evo ʉvɨ avombiilwe imbiivi.
Apeene ndɨkanogwagwa mulʉmanye ʉmwʉ kʉveelye,
pamiiho ga Ngʉlʉve,
ʉkwɨhʉmya kwinyo pa kʉtʉpʉlɨka ʉwe.
13 Mwɨlyo mutʉnywiliitse.
Pa nyongeletsa jya kʉnywilitsiwa,
tʉvye nʉ lʉhekelo ʉlʉvaha wʉ ʉTito ikʉtʉvʉʉla ʉmwʉ mukantseesehiitse mu numbula.
14 Manya wʉ ʉTito nitsili kwanyie,
ʉne ndɨkavaginiitse siitso ʉnyie kʉ mwene.
Jɨlweli najyʉnyie namungʼotsiitsi isoni.
Gooni ʉgwʉ tʉkavavʉʉlaga gakaale ga jɨlweli.
Wʉ jɨlɨwo,
nageene galya ʉgwʉ tʉkavaginiitse ʉnyie kwa Tito,
gavoniike ʉkʉta ga lweli.
15 Ʉlʉgano lwa Tito kwanyie lugimba ʉkwongelela wʉ ikʉmbʉka ʉwɨɨdɨhɨtsi wiinyo nyɨ vooni nʉ mwʉ mukamwʉpɨlye kʉ lʉdwado nʉ lwɨmɨko ʉlʉlʉti.
16 Ndɨhowiike siitso ʉlwakʉva lɨno ndiweesa ʉkʉvahʉʉvɨla ʉnyie pa kʉvomba tsyoni itsa vʉnogwe wa Ngʉlʉve.