6
1 Lɨno,
ʉwe twɨ tuvomba ɨmbombo paninie nʉ Ngʉlʉve,
tukʉvadoova mulekage ʉkʉlʉleka lʉjage vʉvʉle ʉlʉhʉngʉ lwa Ngʉlʉve ʉlwʉ mwʉpɨlye.
2 Manya ʉNgʉlʉve iita,
“Ʉnsɨkɨ ʉgwanogelanie,
ndyakʉpʉliike;
mu kɨgono kya kʉpokwa,
ndyakʉtangile.”
a
Lɨno pʉlɨhɨtsa,
ʉnsɨkɨ ʉgʉnogelanie gwʉ ʉgʉ, ɨkɨgono kya vʉpoki kyʉ ɨkɨ!
Ʉlwɨjʉmɨɨlɨtso mu mbombo jya Ntwa
3 Lɨno natuvomba ɨkɨveetsaga ɨkyʉ kipɨnza avange,
pakʉta ʉvʉvombeli wiitu vʉleke ʉkʉtsowa sivi.
4 Apeene mu gooni tuvonia ʉkʉta tʉlɨ vavombi va Ngʉlʉve kʉ nzɨla jya kʉsipa mu vʉkʉvɨlwa na mu vʉpala wongosu ʉvukʉtʉvona.
5 Ʉnsɨkɨ ʉgʉnge tutowa,
tukʉngwa mu sikʉngwa,
tukwʉvʉkɨlwa ni sipʉga sya vaanu avanya lʉviipo,
tuvomba imbombo imala,
twigona miiho,
tulɨnda kɨtsila kʉlya nʉ kʉgonela.
6 Ikange tuvonia ʉkʉta tʉlɨ vavombi va Ngʉlʉve mu vʉgolosu,
mu vʉmanyi,
mu lwɨjʉmɨɨlɨtso,
mu wiipa,
mu kʉlongolelwa nʉ Mepo ʉMbalatse,
mu lʉgano ʉlwihʉma mu numbula ɨmbalasu.
7 Ikange tuvonia ʉkʉta tʉlɨ vavombi va Ngʉlʉve kʉ nzɨla jya kʉlʉmbɨlɨla ikulongwi tsa lweli.
Tuvomba ago gooni kʉ maka ga Ngʉlʉve.
Ʉvʉgolosu,
kyʉ kɨlwɨlo kiitu,
ʉlʉvasu lwa kʉndyo nʉ lwa kʉngʼɨgɨ.b
8 Ʉwe twɨhʉmiitse ʉkʉvomba ɨmbombo jya Ngʉlʉve,
jɨve avaanu vatwɨmɨke evo vatʉbede;
jɨve vatʉginie evo vatʉtsove sivi.
Tuvoneka tʉlɨ vanuasi,
wʉ hʉmbe twitsova itsa jɨlweli;
9 tuvoneka natʉmanyikiiki,
wʉ hʉmbe tʉmanyikiike siitso,
tuvoneka tʉsue,
wʉ hʉmbe tʉlɨ vʉʉmi;
tutowa siitso,
lɨno natwiswa.
10 Ikange tuvoneka ʉta tʉsʉsʉvye,
wʉ hʉmbe ʉnsɨkɨ gwoni tʉlɨ nʉ lʉhekelo,
tuvoneka tʉlɨ vagatsu,
wʉ hʉmbe vongosu tʉvapye ʉvʉmosu,
tuvoneka tʉlɨ sivoko syene,
wʉ hʉmbe tʉlɨ ni siinu syoni.c
11 Ʉnyie Vakolinto,
tʉtsovile nʉʉnyie kɨtsila kʉsiha ɨkɨveetsaga,
ikange tʉtsovile kʉ lʉgano lwitu lwoni.
12 Ʉwe natʉkʉlekili ʉkʉvagana ʉnyie,
apeene ʉnyie,
nyienye mukʉlekile ʉkʉtʉgana ʉwe.
13 Lɨno nditsova nʉʉnyie ʉta nditsova na vaana vango,
mutʉgane lwoni,
ndʉwʉ ʉwe tʉvaganile ʉnyie.
Ʉkʉva nʉ vʉhange na vaanu avatava vɨɨdɨki
14 Mulekage ʉkʉva nʉ vʉhange na vaanu avatsila lwɨdɨko.
Ndeeti,
ʉvʉgolosu nʉ vʉtulanongwa silɨ vʉhange?
Evo ʉlʉmuli nɨ ngʼiisi siweesa ʉkʉva paninie?
15 Ikange,
ʉKɨlɨsiti nʉ Setano viweesa ʉkwɨdɨngʼana?
Evo ʉmwɨdɨki nʉ nyapanzi,
viweesa ʉkʉva nʉ vʉhange?
16 Ndeeti,
ʉVʉtaamo ʉVʉvalatse wa Ngʉlʉve vuweesa ʉkʉva nʉ vʉhange ni sihwani sya mingʉlʉve?
Ʉwe tʉlɨ Vʉtaamo ʉVʉvalatse wa Ngʉlʉve ʉvɨ mwʉmi!
Ndʉwʉ ʉNgʉlʉve jyʉmwene iita,
“Nditaamaga mu veene nʉ kʉgenda paninie na veene.
Jʉndiiva Ngʉlʉve va veene,
naveene jʉviiva vaanu vango.”d
17 Namwene ʉNtwa iita,
“Muhege pagati pa veene,
mwɨgave na veene.
Muleke ʉkwibata ɨkɨɨnu ɨkɨnyala,
nʉʉne pwʉ ndɨlavʉʉpɨlɨla.e
18 Ndɨlaava Dadajiinyo,
nʉʉnyie mulaava vaana vango,
avadɨɨmi na vahɨnza,
itsova ʉNtwa ʉNgʉlʉve,
ʉNyamaka Gooni.”f