2
1 Pwʉ ndyalamwe mu numbula jyango ʉkʉta nandɨkavuje ndɨve nʉ lʉgendo ʉlʉnge kwanyie ʉlukʉvalematsa inumbula.
2 Manya ʉne ndɨngavapelele ʉnyie ʉkʉva nʉ lʉsʉsʉvalo,
kwʉ kʉta nakʉli ʉvɨ ikʉmbɨɨka ʉne ndɨve nʉ lʉhekelo,
apeene ʉnyie jyʉnyie nyɨ ndikʉvalematsa mu numbula tsiinyo!
3 Ɨkɨ kyʉ mene ndyavavɨgye mu kalata jɨlya ʉkʉta ndɨngiitse kwanyie ndɨleke ʉkwitsa kulematsiwa mu numbula jyango na vaanu ʉwʉ vanogye ʉkʉnnyovosa.
Jɨlweli,
ndihʉʉvɨla ʉkʉta,
ʉnyie mungave nʉ lʉhekelo,
pwʉ najyʉne ndiiva nʉ lʉhekelo.
4 Ndyavavɨgye ɨkalata ɨjyo kʉ lʉsʉsʉvalo ʉlʉvaha nʉ vʉkʉvɨlwa ikange kʉnʉ ndilɨla.
Ʉvʉsumbe wango nakwʉ kʉta ndyanogilwe ʉkʉvalematsa mu numbula tsiinyo,
apeene ndyanogilwe mulʉmanye ʉmwʉ ndɨvaganie ʉnyie.
Ʉvʉsyɨkɨlo kʉ ntulanongwa
5 Lɨno ʉmuunu ʉvɨ andemiitse ʉne mu numbula,
a nandemiitsi ʉne ndɨ mwene,
apeene kʉ lʉvasu ʉlʉnge avalemiitse najyʉnyie.
Lɨno nandinogwa ɨlyo lɨmmelele ndɨve nkali siitso.
6 Ʉlʉbɨkɨ ʉlwatovilweb ʉmuunu ʉjwa ʉkʉhʉma kʉ nyɨ vampelela,
lʉnkwɨlye.
7 Lɨno munogye ʉkʉnsyɨkɨla nʉ kʉntseesa ʉmuunu ʉjwa,
aleke ʉkwɨnyianya.c
8 Ndikʉvadoova mugendelelage ʉkʉvonia ʉlʉgano lwinyo kʉ mwene.
9 Ʉvʉsumbe wango ʉvʉnge wa kʉvavɨgɨla ɨkalata jɨlya,
waale wa kʉvagela ʉnyie ɨngave mukʉmmʉlɨka ʉne mu gooni.
10 Ʉnsɨkɨ ʉnyie mukʉnsyɨkɨla ʉmuunu ʉjwa,
pwʉ najyʉne ndiiva ndɨnsyɨkye.
Manya ɨngave pwʉlɨle ɨlyʉ ndɨnogye ʉkʉnsyɨkɨla,
ʉne ndɨnsyɨkye nʉ Kɨlɨsiti alʉmanyile.
11 Ndivomba ɨlyo kʉ lʉvʉmbʉlɨlo lwanyie,
pakʉta ʉSetano aleke ʉkʉjɨvona ɨnzɨla jya kʉtʉlesa,
manya tʉlʉmanyile ʉvʉsyovi wa mwene.
ɄPaulo ilʉmbɨlɨla kʉ Tuloa
12 Lɨno,
wʉ ndɨsiike mu vʉtsenge wa Tuloa kulʉmbɨlɨla ɨLivangɨli lya Kɨlɨsiti,
ʉNtwa akandɨndʉlɨla ʉndyango gwa kʉvomba ɨmbombo jya mwene ʉkʉ.
13 Napeene nandyale nʉ lʉnotsehetso mu numbula jyango,
ʉlwakʉva nandyambone ʉkʉ ʉmwɨdɨkinʼjiitu ʉTito.
Pwʉ ndɨkɨlaga,
ndɨkahega,
ndɨkabɨha kukʉndonda kʉ mpandʉlʉ gwa kʉ Makedoniya.
Ʉkʉlesa kʉ maka ga Kɨlɨsiti
14 Napeene tukʉnsaana ʉNgʉlʉve ʉlwakʉva ʉkʉgendela mwa Kɨlɨsiti,
ikʉtʉlongolela ʉnsɨkɨ gwoni ʉkʉlesa avalʉgʉ.
Ikange ikʉtʉpa amaka ʉwe ga kwolosa ikulongwi tsa Kɨlɨsiti imbasu tsyoni,
ʉngata lʉnuusi ʉlʉnonu ʉmwʉ luhambɨla imbasu tsyoni.
15 Manya kwa Ngʉlʉve ʉwe tʉvyʉta lʉnuusi ʉlʉnonu lwa Kɨlɨsiti ʉlwʉ lukʉvasikila avaanu vooni,
ʉwʉ vipokwa nʉ wʉ vijaga.
16 Kʉ valya avipokwa,
ʉlʉnuusi ʉlwa lʉnonu,
lukʉvapa ʉwʉʉmi wa sikutsooni.
Napeene kʉ valya avijaga,
ʉlʉnuusi ʉlwa sumu,
lukʉvapelela ʉlwongometso.
Lɨno veeni ʉvɨ anogye ʉkʉvomba ɨmbombo ɨjyo?
17 Ʉwe natʉlɨ nda vaanu avange vongosu ʉwʉ vapelile ɨlimenyu lya Ngʉlʉve kɨɨnu kya kwɨdenga.
Apeene mu maka ga Kɨlɨsiti,
tupʉlɨsa ɨlimenyu ɨlyo mu vʉgolosu wooni,
nʉ Ngʉlʉve alʉmanyile manya vɨ atʉsuungʼile.