Avavombi va lwɨdɨngʼano ʉlʉpya
3
1 Mugela musaaga mwita tʉtengwe ikange ʉkwɨginia,
baako!
Ʉwe natʉlɨ nda vaanu avange ʉwʉ vikʉvasuungʼila ʉnyie ikalata tsa kwɨtsova kwanyie,
evo ʉkʉdoova ikalata kwanyie itsilʉvʉla kʉ vaanu avange ʉkʉta aveene wʉ vaani.
2 Ʉnyie nyienye mulɨ kalata ɨjivonia ʉwe tʉlɨ vaki,
ɨjɨvɨgilwe mu numbula tsiitu.
Avaanu vooni vanogye ʉkwɨmba nʉ kʉlʉmanya ɨmbombo jya Ngʉlʉve ɨjyʉ tʉvombile kwanyie.
3 Tsilɨ pavʉvalasu ʉkʉta ʉvʉtaamo wiinyo wa Vʉkɨlɨsiti jyʉ kalata jya Kɨlɨsiti,
ɨjyʉ jivonia ɨmbombo ɨjyʉ tʉvombile kwanyie.
Ɨkalata ɨjyo najɨlɨ ndɨ kalata ɨjyʉ jɨvɨgilwe nɨ kɨvɨgɨlo,
apeene jɨvɨgilwe nʉ Mepo va Ngʉlʉve ʉvɨ mwʉmi.
Ikange ʉnyie namulɨ ndɨ kalata ɨjyʉ jɨvɨgilwe mu liganga,
apeene ɨjɨvɨgilwe mu numbula tsa vaanu.
4 Tuweesa ʉkʉtsova ago ʉlwakʉva tʉlɨ nɨ nyʉʉve kwa Ngʉlʉve ikange ʉlwakʉva tutangwa nʉ Kɨlɨsiti.
5 Nakwʉ kʉta tusaaga ʉkʉta tuweesa ʉkʉvomba ɨkɨveetsaga kʉ maka giitu,
baako,
apeene amaka giitu gihʉma kwa Ngʉlʉve.
6 Ʉmwene vɨ atʉpye amaka ga kʉva vavombi va lwɨdɨngʼano ʉlʉpyaa ʉlwihʉma kʉ Mepo ʉMbalatse.
Ʉlwɨdɨngʼano ʉlwa nalʉviili ndi ndagɨlo itsʉ tsivɨgilwe,
ʉlwakʉva indagɨlo itsʉ tsivɨgilwe tsileeta ʉvʉswe,
apeene ʉMepo ʉMbalatse ileeta ʉwʉʉmi wa sikutsooni.
Ʉwɨɨmɨkiwa wa lwɨdɨngʼano ʉlʉpya
7 Indagɨlo itsyavɨgilwe mu maganga nʉ kʉvapelela avaanu vahɨgwagwe vave va kʉtaagwa kʉ vʉswe wa sikutsooni,
tsiitsile mu wɨɨmɨkiwa ʉvungʼaala,
ʉkʉsikila ʉpwʉ aVaisilahɨli vakalemwa ʉkʉndola ʉMoose kʉmiiho,
nʉpwʉ jɨngave ʉwɨɨmɨkiwa ʉwa waangʼaalile ʉnsɨkɨ nsupi vʉvʉle.
b Ɨngave ʉvʉvombeli wa ndagɨlo itsʉ tsipela ʉvʉswe tsiitsile mu wɨɨmɨkiwa ndʉʉwa,
8 lɨno ɨmbombo jya Mepo ʉMbalatse najɨkaave nʉ wɨɨmɨkiwa ʉkʉlʉtɨɨlɨla?
9 Ɨngave ɨmbombo ɨjyʉ jivɨɨka avaanu ʉkʉhɨgwa jɨlɨ nʉ wɨɨmɨkiwa,
lɨno ɨmbombo ɨjyʉ jivɨɨka avaanu ʉkʉva vagolosu pamiiho ga Ngʉlʉve najɨkaave nʉ wɨɨmɨkiwa ʉkʉlʉtɨɨlɨla?
10 Lɨno ʉwɨɨmɨkiwa wa lwɨdɨngʼano ʉlʉlaala navulɨngʼaana nʉ wɨɨmɨkiwa wa lwɨdɨngʼano ʉlʉpya,
ʉlwakʉva ʉwɨɨmɨkiwa wa lwɨdɨngʼano ʉlʉpya vʉvaha siitso.
11 Ɨngave ɨkyʉ kyale kya nsɨkɨ nsupi vʉvʉle kyale nʉ wɨɨmɨkiwa,
pwʉ ɨkya nsɨkɨ gwoni kɨlaava nʉ wɨɨmɨkiwa ʉkʉlʉtɨɨlɨla.
12 Lɨno tuvomba ɨmbombo kɨtsila lʉdwado,
ʉlwakʉva ɨjyo jyʉ nyʉʉve jiitu.
13 Ikange,
ʉwe natuvomba ndʉ Moose ʉvɨ ɨɨgubiike kʉmiiho ɨkɨtambala,
pakʉta aVaisilahɨli valeke ʉkʉvʉvona ʉvʉsililo wa kʉngʼaala.
14 Napeene aVaisilahɨli vaakiliitye inumbula.
Ʉkʉsikila lɨno wʉ vikwɨmba isitabu sya Lwɨdɨngʼano ʉLʉlaala,
vilemwa ʉkʉlʉmanya ʉwajɨlweli,
viiva ʉta vagubiikwe nɨ kɨtambala ɨkyo.
Ʉwajɨlweli ʉwa vumanyikika kʉ nzɨla jya kʉmwɨdɨka ʉKɨlɨsiti,
jiiva ʉta kʉbungulwa ɨkɨtambala ɨkyo.
15 Tsa jɨlweli,
ʉkʉsikila ɨleelo,
wʉ vikwɨmba isitabu sya ndagɨlo tsa Moose,
inumbula tsa veene tsibungilwe,
vilemwa ʉkʉlʉmanya.
16 Napeene ʉmuunu ʉvaveetsaga ʉvɨ ikʉmwɨdɨka ʉNtwa,
ʉNtwa ikʉmʼbungulila ɨkɨtambala ɨkyo.
17 Lola,
ʉNtwa vɨ Mepo,
ʉpwʉ pwale ʉMepo va Ntwa palɨ vʉvopolwa.
18 Lɨno ʉwe twɨ vooni twɨ natʉgubiikwi kʉmiiho nɨ kɨtambala,
tuvonia ʉwɨɨmɨkiwa wa Ntwa ndʉwʉ ɨkɨlolelo kivonia ɨkɨhwani.
ɄNtwa ʉvɨ vɨ Mepo,
vɨ ikʉtwandʉla tʉhwanane nʉ mwene.
Ikʉtwandʉlaga ʉkʉhʉma ʉwɨɨmɨkiwa ʉkʉsika ʉwɨɨmɨkiwa ʉvʉvaha siitso.