Amaka ga Ngʉlʉve mu sikongʼolo isivʉmbano
4
1 Lɨno,
ʉlwakʉva ʉNgʉlʉve kʉ lʉhʉngʉ lwa mwene atʉpye ɨmbombo ɨjɨ,
natukilivuka kʉnsana.
2 Tʉbeelile lwoni ʉkʉvomba itsa kʉvʉtiitu itsinya soni,
ndʉ kʉvasyova avaanu,
nʉ kʉhanza ɨlimenyu lya Ngʉlʉve nʉ vʉnuasi.
Apeene twitsova ʉwajɨlweli pavʉvalasu,
pakʉta avaanu vooni valʉmanye mu numbula tsa veene ʉkʉta tʉlɨ va jɨlweli pamiiho pa Ngʉlʉve.
3 Lɨno ɨngave ɨLivangɨli ɨlyʉ tupʉlɨsa lɨbungilwe lɨleke ʉkʉvoneka,
liiva lɨbungilwe kʉ vaanu avijaga.
4 Nalimanyikika kʉ veene avo ʉlwakʉva ʉSetano ʉvɨ vɨ nkʉlʉdeeva va kɨlʉnga ɨkɨ,
agubiike ʉlʉhala lwa vaanu ʉwʉ navikʉmwɨdɨka ʉYɨɨsʉ,
pakʉta valemwagwe ʉkʉlʉvona ʉlʉmuli lwa Livangɨli lya wɨɨmɨkiwa wa Kɨlɨsiti,
ʉvɨ vɨ kɨhwani kya Ngʉlʉve.
5 Manya ʉwe natupʉlɨsa ikulongwi tsiitu jyʉwe,
apeene tupʉlɨsa ʉkʉta ʉYɨɨsʉ Kɨlɨsiti vɨ Ntwa,
nʉʉwe tʉlɨ vavombi viinyo kʉ nzɨla jya kʉmbombela ʉYɨɨsʉ.
6 ɄNgʉlʉve ʉvɨ aatsovile akata,
“Ʉlʉmuli lʉtengʉle mu ngʼiisi,”
a vɨ mwene imulika inumbula tsiitu,
nʉ kʉtʉpela tʉvʉmanye ʉwɨɨmɨkiwa wa mwene ʉvungʼaala kʉmiiho kwa Yɨɨsʉ Kɨlɨsiti.
7 Ʉwe twɨ tʉvyʉta sikongʼolo isivʉmbano,
tʉpeevilwe ʉlʉmuli ʉlʉ,
napeene ɨmanyikiike ʉkʉta,
amaka amalʉti ʉgwʉ tuvombela ɨmbombo ɨjyo nagiitu ʉwe,
apeene maka ʉgwʉ tʉpeevilwe ʉkʉhʉma kwa Ngʉlʉve.
8 Lola,
vukʉtʉvona ʉvʉkʉvɨlwa ʉvʉlɨ pongosu,
napeene natugagɨlwa.
Tugangapalɨlwa,
napeene natukilivuka kʉnsana.
9 Avaanu vikʉtʉpelela ʉvʉkʉvɨlwa,
napeene ʉNgʉlʉve nikʉtʉleka twɨ veene.
Vikʉtʉlangʉlɨtsa paasi,
napeene natwiswa.
10 Isigono syoni ɨmihana giitu gɨlɨ mu lʉjɨgajɨga lwa kʉbudwa ndʉ Yɨɨsʉ,
pakʉta ʉwʉʉmi wa Yɨɨsʉ vʉvoneke mu mihana giitu.
11 Lola,
ʉlwakʉva ʉwe twɨ tʉlɨ vʉʉmi,
ʉnsɨkɨ gwoni tʉlɨ mu lʉjɨgajɨga lwa kʉbudwa pa kulongwi jya Yɨɨsʉ,
pakʉta ʉwʉʉmi wa mwene vʉvoneke mu mihana giitu ɨgyʉ giiswa.
12 Kwʉ kʉta,
ʉwe tʉlɨ mu lʉjɨgajɨga lwa kʉbudwa,
wʉ ʉnyie mwikava ʉwʉʉmi wa sikutsooni.
13 Mu Vʉvɨge ʉVʉvalatse gaavɨgilwe amamenyu agiita,
“Ndyamwɨdiike ʉNgʉlʉve kyʉ mene ndyatsovile.”
b Nʉʉwe tʉlɨ nʉ lwɨdɨko ʉlʉlɨ ndʉʉlwa,
kyʉ mene twitsova.
14 Twitsova ɨlyo ʉlwakʉva tʉlʉmanyile ʉkʉta ʉNgʉlʉve ʉvɨ aantsʉʉsiitse ʉNtwa ʉYɨɨsʉ,
alatʉtsʉʉsa najyʉwe.
Ʉmwene alatʉlʉndamania paninie nʉʉnyie,
pakʉta tʉtaamage paninie nʉ Yɨɨsʉ.
15 Lɨno ʉvʉpala ʉvʉ wooni vukʉtwitsila pa kulongwi jyanyie,
pakʉta ʉlʉhʉngʉ lwa Ngʉlʉve lʉviitsile avaanu vongosu,
ikange pakʉta vansaanage siitso ʉNgʉlʉve.
Ʉkʉkongana nɨɨlyo ʉNgʉlʉve igendelelaga ʉkwɨmɨkiwa.
Ʉwɨɨmɨkiwa wa sikutsooni
16 Pwʉ lɨno,
natukilivuki kʉnsana.
Nʉpwʉ jɨngave ɨmihana giitu ginyakasʉka,
napeene mu nʼgati mwawe ʉNgʉlʉve ikʉtʉpela ʉkʉva vapya isigono syoni.
17 Manya ʉvʉkʉvɨlwa wiitu webeepe,
vʉkʉvɨlwa wa nsɨkɨ nsupi vʉvʉle.
Ikange ʉvʉkʉvɨlwa ʉwa,
vukʉtʉnotsehetsa ʉwɨɨmɨkiwa wa sikutsooni.
Ʉwɨɨmɨkiwa ʉwa vʉlʉti siitso.
18 Lola isiinu isivoneka,
siinu sya nsɨkɨ nsupi vʉvʉle,
apeene isiinu isyʉ nasivoneka isyo syʉ sya nsɨkɨ gwoni,
kyʉ mene tuvɨɨkɨla ʉntɨma isiinu isyʉ nasivoneka.