Ʉkʉsangɨla isiinu sya kʉvatanga avɨɨdɨki aVayahudi
16
1 Lɨno,
pa kulongwi jya kʉsangɨla isiinu sya kʉhɨlɨka kukʉvatanga avɨɨdɨki va Ngʉlʉve,
muvombage ndʉwʉ ndyavavʉʉlile avaanu va mipelela gya kʉ Galatiya.
2 Ɨkɨgono ɨkɨtatsi mu ndʉngʉ,
a nʉ jyʉnge pagati paanyie,
agavage isiinu sya sango nʉ kʉvɨɨka,
ʉkʉkongana nʉ mwʉ ʉNgʉlʉve avasajye ʉnyie,
pakʉta,
ndɨpya ndikwitsa kwanyie,
muveetsage mulʉndamiinie isango itso.
3 Ndɨpya ndikwitsa,
jʉndikʉvasuungʼa nɨ kalata,
avaanu ʉwʉ jʉmukʉvoomola pakʉta,
vahɨlɨke kʉ Yelusalemu isiinu isyo isyʉ musangile.
4 Jɨngavoneke ʉkʉta najyʉne pannogye ʉkʉlʉta ʉkʉ,
apo pwʉ jʉndilʉta paninie na vaanu avo.
Amasaago ga Paulo ʉkʉbɨha kʉ Kolinto
5 Wʉ ndɨgendye ʉmpandʉlʉ gwa Makedoniya,
pwʉ jʉndikwitsa kwanyie kʉ Kolinto,
ʉlwakʉva ndinogwa taasi ʉkʉgendela ʉkʉ kʉ Makedoniya.
6 Lɨno ndɨngiitse,
ndisaaga ʉkʉta,
jʉnditaama nʉʉnyie ʉnsɨkɨ gwoni gwa ngʼaala pakʉta,
jʉmunnange ndɨlʉte ʉkʉveetsaga ʉkwʉ jʉndilʉta.
7 Lola,
nandinogwa ʉkʉta ndɨvagendele mu sigono isi nʉ kʉtaama nʉʉnyie kʉ nsɨkɨ nsupi ʉngata ndɨlɨ ndʉtanzɨla.
Ɨngave ʉNtwa jiikɨgana,
ndihʉʉvɨla ʉkʉtaama kwanyie kʉ nsɨkɨ ntale.
8 Ʉlʉ lɨno,
ndɨpitsiige ndɨlɨ mu Efeso ʉkʉsikila ɨkɨgono kya Pentekositi.
9 Ndivomba ewo,
ʉlwakʉva ʉNgʉlʉve amye ʉnsɨkɨ ʉnnonu gwa kʉvomba ɨmbombo ɨmbaha mu vʉtsenge ʉvʉ,
lɨno pwʉvale avaanu vongosu ʉwʉ vikʉnsiga ʉne.b
10 ɄTimoti angiitse kwanyie,
c ndidoova mumwʉpɨlɨle nʉ kʉndoleela,
pakʉta ataame vʉnonu kɨtsila kʉdwada,
manya namwene ivomba ɨmbombo jya Ntwa ndʉwʉ ndivomba ʉne.
11 Lɨno,
ʉmuunu ʉvaveetsaga aleke ʉkʉmʼbeda.
Apeene,
muntangage ahege ʉkwa mu lʉnotsehetso,
pakʉta iitse kwane,
manya ndikʉmpʉlɨkɨla paninie na vɨɨdɨkivajiitu.
12 Pa kulongwi tsa mwɨdɨkinʼjiitu ʉApoolo,
ndɨnsiimile ʉkʉta iitse kwanyie paninie na vɨɨdɨki avange.
Napeene,
ʉmwene ninogwa ʉkwitsa lɨno,
apeene jiikwitsa ʉnsɨkɨ ʉpwʉ jiiva nʉ vʉlegeesu.
Amamenyu ga kʉ vʉmalɨlo paninie nʉ lʉlagɨlo
13 Muveetsage miiho,
mwɨmage mu lwɨdɨko lʉlya ʉlwʉ mwamanyiisiiwe,
ɨmagi kɨgoosi,
ikange mwɨkangatsaage.
14 Imbombo tsiinyo tsyoni muvombage mu lʉgano.
15 Mulʉmanyile ʉkʉta ʉSitefanad paninie na vaanu va mu nyumba jya mwene,
wʉ vaanu avaale vatatsi ʉkʉmwɨdɨka ʉYɨɨsʉ Kɨlɨsiti mu mpandʉlʉ gwa Akaya.
Aveene vɨhʉmiitse ʉkʉvatanga avɨɨdɨki va Ngʉlʉve!
Ndikʉvasiima,
vɨɨdɨkivajyango,
16 najyʉnyie muveetsage vɨɨdɨhɨtsi kʉ vaanu ndaavo,
na kʉ vange vooni,
ʉwʉ vikɨhanza nʉ kʉtangana pa kʉvomba ɨmbombo ɨjɨ.
17 Ndɨhowiike siitso ʉkʉvona ʉSitefana,
ʉFotunato nʉ Akaiko viitsile apa,
manya ʉlʉtangɨlo ʉlwʉ mukaale mukʉmmeetsaga ʉnyie,
vikʉʉma aveene.
18 Vatseesiitse ɨnumbula jyango,
ikange vatsitseesiitse inumbula tsiinyo.
Lɨno,
muvamanye vʉnonu avaanu avalɨ ndaava.
19 Avaanu avalɨ mu mipelela gya mu mpandʉlʉ gwa kʉ Asiya,
vikʉvasaamusa.
ɄAkila nʉ Pulisila,
e paninie na vampelela avilʉndamana mu nyumba jya veene,
vikʉvasaamusa kʉ numbula jyoni mu litaawa lya Ntwa.
20 Avɨɨdɨkivajiitu vooni ʉwʉ valɨ apa,
vikʉvasaamusa.
Najyʉnyie mwɨsaamusaniage pa kɨpambaga.f
21 Ʉne ndɨ Paulo,
ndivɨga kʉ kɨvoko kyango jyʉne pa kʉvasaamusa.
22 Ʉmuunu ʉvaveetsaga ʉvɨ nanʼganili ʉNtwa ʉYɨɨsʉ,
akootoliiwe.
Vɨ Ntwa viitu vɨ Yɨɨsʉ,
wiitsage!