1 Vakolinto 15

Ʉkʉtsʉʉka kwa Kɨlɨsiti

1 Lɨno, vɨɨdɨkivajyango, ndikʉvakʉmbʉsa ɨLivangɨli ɨlyʉ ndyalʉmbɨlye kwanyie, nʉʉnyie mukalyʉpɨlɨla. Ɨlyo lyʉ lyene likʉvapelela muveetsage nʉ lwɨdɨko ʉlwʉ mulɨ nalwo. 2 Ɨngave mukwibata ɨLivangɨli ɨlyo, apo mwikava ʉvʉpoki. Lɨno, ɨngave namukwibata, ʉlwɨdɨko lwinyo luveetsaga lʉtsila lʉvʉmbʉlɨlo.

3 Ʉne ndyavamanyiisiitse imanyiiso indʉti itsʉ ndyʉʉpɨlye ʉkʉta: ɄKɨlɨsiti aasue kʉ nongwa jya mbiivi tsiitu, ndʉwʉ jɨvɨgilwe mu Vʉvɨge ʉVʉvalatse. 4 Nʉ kʉta, akasɨɨlwa, ɨkɨgono kya daatu akatsʉʉka ndʉwʉ jɨvɨgilwe mu Vʉvɨge ʉVʉvalatse. 5 Nʉ kʉta, akambonekela ʉKefa, nʉ kʉta akavavonekela avapositili va mwene kɨtsigo na vavɨlɨ (12). 6 Kʉmbele akavavonekela avɨɨdɨki ɨmileevʉlʉ gɨhaano (500) ʉwʉ vaale paninie. Mu vaanu avo, vongosu nalɨ lɨno vapitsiige vʉʉmi, vaninie vasue. 7 Kʉmbele akambonekela ʉYakobo, kʉmbele akavavonekela avapositili vooni. 8 Pwʉ kʉ vʉmalɨlo wʉ ɨvoniitse kʉ vooni, akɨvonia kwane, ʉne ndɨ ndɨlɨ ndʉ muunu ʉvɨ aholilwe ʉnsɨkɨ ʉgʉtava gwʉ gwene. 9 Ʉne neene ndɨlɨ nʼdebe mu vapositili, nandɨnogiili nakʉ kʉtambʉlwa mpositili, ʉlwakʉva pa vʉtengʉlɨlo ndyagʉpelelaga ʉvʉkʉvɨlwa ʉmpelela gwa Ngʉlʉve. 10 Lɨno, ʉNgʉlʉve annyʉngʉkye ʉne, kyʉ mene ndɨvye ndavʉle. Ʉlʉhʉngʉ lwa mwene kwane lwʉ lʉvʉmbʉlɨlo ʉlʉvaha, ʉlwakʉva mu lwene ʉlwa ndɨvombile ɨmbombo ʉkʉlʉtɨɨlɨla avapositili avange vooni. Nandɨvombili ago kʉ maka gango, apeene ʉNgʉlʉve kʉ lʉhʉngʉ lwa mwene vɨ mwene ivomba ɨmbombo paninie nʉʉne. 11 Pwʉ ndɨngave ʉne ndilʉmbɨlɨla, evo vangave wʉ vapositili avange valya, tulʉmbɨlɨla ɨLivangɨli lɨɨlɨlya, ikange lyʉ lyene mulyɨdiike.

Ʉkʉtsʉʉka kwa vaswe

12 Lɨno, ɨngave ʉKɨlɨsiti ilʉmbɨlɨlwa ʉkʉta aatsʉʉkile ʉkʉhʉma kʉ vaswe, jɨvye ndeeti avange pagati paanyie viita nakwʉkʉle ʉkʉtsʉʉka avaswe? 13 Ɨngave nakwʉkʉle ʉkʉtsʉʉka avaswe, kwʉ kʉta namwene ʉKɨlɨsiti naatsʉʉke. 14 Pwʉ ɨngave ʉKɨlɨsiti naatsʉʉke, apo ʉkʉlʉmbɨlɨla kwitu kwiva kʉtsila lʉvʉmbʉlɨlo, nalwene ʉlwɨdɨko lwinyo lwiva lʉtsila lʉvʉmbʉlɨlo. 15 Ikange ʉwe tuvoneka ʉkʉta tʉlɨ vooleletsi va vʉnuasi pa kulongwi jya Ngʉlʉve, manya tukwoleletsa ʉkʉta ʉNgʉlʉve aantsʉʉsiitse ʉKɨlɨsiti ʉkʉhʉma kʉ vaswe, hʉmbe naantsʉʉse, ɨngave avaswe navitsʉʉsiwa. 16 Lola, ɨngave avaswe navitsʉʉsiwa, kwʉ kʉta namwene ʉKɨlɨsiti naatsʉʉke. 17 Ikange ɨngave ʉKɨlɨsiti naatsʉʉke, apo mwiva namuvʉmbʉliili kɨɨnu pa kʉmwɨdɨka ʉKɨlɨsiti, apeene mwiva mupitsiige mulɨ mu mbiivi tsiinyo. 18 Naveene ʉwʉ vasue vikʉmwɨdɨka ʉKɨlɨsiti, vajagile lwoni. 19 Ɨngave ɨnyʉʉve jiitu kwa Kɨlɨsiti jiduga palya peene wʉ twiswa, apo pwʉ twiva va kʉhʉngʉsa ʉkʉlʉtɨɨlɨla avaanu vooni.

20 Lɨno, ʉwajɨlweli wʉ ʉvʉ, ʉKɨlɨsiti atsʉʉkile ʉkʉhʉma kʉ vaswe, ʉjʉ vɨ ntatsi ʉkʉtsʉʉka kʉ vooni avalatsʉʉka ʉkʉhʉma kʉ vaswe. 21 Lola, ndʉwʉ ʉvʉswe wiitsile ʉkʉhʉmana nʉ muunu mpamato, vʉvʉle vʉle naweene ʉvʉtsʉʉka wa vaswe witsile ʉkʉhʉmana nʉ muunu mpamato, 22 manya ndʉwʉ avaanu vooni viiswa ʉkʉhʉmana nʉ vʉgalo wa Adamu, vʉvʉle vʉle avaanu vooni valatsʉʉka ʉkʉhʉmana nʉ vʉgolosu wa Kɨlɨsiti. 23 Napeene, ʉmuunu nʉ muunu alatsʉʉsiwa pa nsɨkɨ gwa mwene ʉgwʉ ʉNgʉlʉve avɨɨkile. ɄKɨlɨsiti vɨ aatalile ʉkʉtsʉʉka, kʉmbele valatsʉʉsiwa avaanu va mwene alaava ikwitsa. 24 Apo pwʉ vʉliitsa ʉvʉsililo wa syoni, ʉpwʉ ʉKɨlɨsiti alanʼgotolela ʉNgʉlʉve ʉDaada ʉLʉdeeva lwa mwene, wʉ apetsiitse ʉvʉlongotsi wooni, nʉ vʉtavʉlɨlwa wooni, na vanya maka vooni. 25 Wɨgane wa Ngʉlʉve ʉkʉta, ʉKɨlɨsiti ave ndongotsi ʉkʉsikila ʉpwʉ ikʉvalema nʉ kʉvavɨɨka avalʉgʉ va mwene paasi pa vʉtavʉlɨlwa wa mwene, 26 ʉndʉgʉ va kʉ vʉmalɨlo ʉkʉvejangwa wʉ vʉswe. 27 Ʉpwʉ ʉVʉvɨge ʉVʉvalatse wiita, “Alasivɨɨka isiinu syoni paasi pa vʉtavʉlɨlwa wa mwene,” nakwʉ kʉta namwene ʉNgʉlʉve alaava paasi pa vʉtavʉlɨlwa ʉwa, manya ʉmwene vɨ avɨɨkile isyo syoni paasi pa vʉtavʉlɨlwa wa Yɨɨsʉ. 28 Ikange isiinu syoni silaava sivɨɨkilwe paasi pa vʉtavʉlɨlwa wa Mwana va mwene, pwʉ namwene ʉMwana alɨvɨɨka paasi pa vʉtavʉlɨlwa wa Dadaaje ʉNgʉlʉve ʉvɨ avɨɨkile isiinu syoni paasi pa vʉtavʉlɨlwa wa Mwana va mwene, pakʉta ʉNgʉlʉve ave ndongotsi va syoni.

29 Lɨno, avaanu valya ʉwʉ vikwotsiwa pa kʉvɨɨmɨla avaswe, vihʉʉvɨla ɨkɨɨnu kɨki? Ɨngave avaswe navitsʉʉka lʉsiku, kɨki avaanu avo vikwotsiwa pa kʉvɨɨmɨla avaswe avo? 30 Najyʉwe, kɨki isigono syoni tuhegelela ʉkwambʉtsa ʉwʉʉmi? 31 Ndikʉvavʉʉla vɨɨdɨkivajyango ʉkʉta, jɨlweli isigono syoni ʉne ndihegelela ʉkwambʉtsa ʉwʉʉmi wango. Ɨlɨ lya jɨlweli mu kwɨginia kwane pa kulongwi jyanyie, pa tsilya itsʉ ʉMesiya ʉYɨɨsʉ, ʉNtwa viitu, avavombye ʉnyie. 32 Ɨngave ʉvʉtsʉʉka navʉkʉli, pwʉ ʉvʉsumbe wango wa kʉlwa na valʉgʉ va kʉ Efeso, avavyʉta sikanu isikali, vʉkaale vukʉmbʉmbʉlɨla kɨki? Ɨngave itso wʉ tsilɨwo,

“Pwʉ ʉwe tʉlitsage, tʉnywitsage,

ʉlwakʉva kɨlaavo jʉtwiswa.”

33 Muleke ʉkʉsyowa na vaanu ʉwʉ vitsova ewo! Lola, “Avamanyaani avaviivi, vivejanga ʉlʉgendo ʉlʉnonu.” 34 Muveetsage nʉ lʉhala, musaagage vʉnonu, muleke ʉkʉvomba imbiivi, manya avange pagati paanyie navammanyili ʉNgʉlʉve. Nditsova ago pakʉta muvone soni.

Ʉmmana ʉmwʉ gʉlaveela ɨkɨgono kya vʉtsʉʉka

35 Lɨno, ʉmuunu iweesa ʉkʉvʉʉtsa ʉkʉta, “Avaswe valatsʉʉsiwa ndeeti? Valaava nʉ mmana ʉgʉlɨ ndeeti?” 36 Ago gwʉ masaago ga muunu ʉjwa ʉntsimu! Lola, ʉve ʉngavyale ɨmbeju, najiweesa ʉkʉmela kɨtsila kʉtala ʉkʉswa. 37 Ɨmbeju ɨjyʉ vuvyala, jɨve jya ngano evo jya mbeju itsinge, mbeju vʉvʉle, najɨhwanana napadebe nʉ ntundya gwa jyene. 38 Apeene, ʉNgʉlʉve ikʉjɨpa ɨmbeju ɨjyo ʉntundya ʉgʉnge ʉgwʉ inogwa jyʉmwene, ikange ɨmbeju ɨjɨ nɨɨjɨ ikʉjɨpa ʉntundya gwa jyene.

39 Isipeliwa syoni silɨ nɨ mivʉmbɨle, nɨ mivʉmbɨle gya syene nagihwanana. Ɨmivʉmbɨle gya vaanu gɨlɨ vʉnge, ɨgya sikanu gɨlɨ vʉnge, ɨgya sidege gɨlɨ vʉnge, nagɨ gya somba gɨlɨ vʉnge. 40 Ikange, kwʉgɨle ɨmivʉmbɨle gya sipeliwa sya kʉkyanya, nɨ mivʉmbɨle gya sipeliwa sya mu kɨlʉnga. Ʉvʉnonu wa mivʉmbɨle gya sipeliwa sya kʉkyanya vʉlɨ vʉnge, nʉ vʉnonu wa mivʉmbɨle gya sipeliwa sya mu kɨlʉnga vʉlɨ vʉnge. 41 Ʉvʉnonu wa litsʉva vʉlɨ vʉnge, ʉvʉnonu wa mwetsi vʉlɨ vʉnge, nʉ vʉnonu wa nondwe vʉlɨ vʉnge. Natsyene inondwe nʉ lʉnge lʉlɨ nʉ vʉnonu wa lwene ʉvʉlɨ vʉnge ni nine.

42 Wʉ jɨlɨwo avaswe valaava vitsʉʉka. Gusɨɨlwa ʉmmana ʉgwivola, pwʉ gutsʉʉsiwa ʉmmana gwa wʉʉmi wa sikutsooni; 43 gusɨɨlwa gʉtsila wɨɨmɨkiwa, pwʉ gutsʉʉsiwa gʉnya wɨɨmɨkiwa. Gusɨɨlwa gʉtoviike, pwʉ gutsʉʉsiwa gʉnya maka. 44 Ʉmmana ʉgwʉ tʉlɨ nagwo wʉ tʉkaanale ʉkʉswa, immana gwa mu kɨlʉnga, lɨno wʉ tutsʉʉsiwa, gwiva mmana impya ʉgwʉ tupeewa nʉ Mepo ʉMbalatse. Ɨngave pwʉgʉle ʉmmana gwa mu kɨlʉnga, pwʉ nagʉ mmana ʉmpya pwʉgʉle ʉgwʉ ʉMepo ʉMbalatse ikʉtʉpa. 45 Lola, mu Vʉvɨge ʉVʉvalatse jɨvɨgilwe, “Ʉmuunu ʉntatsi ʉAdamu, aavʉmbilwe akava muunu mwʉmi.” Lɨno, ʉAdamu va kʉ vʉmalɨlo ʉKɨlɨsiti, vɨ Mepo ʉvɨ ikʉvapelela avaanu vave nʉ wʉʉmi wa sikutsooni. 46 Lɨno, ʉmmana ʉgwitala immana gwa mu kɨlʉnga, kʉmbele gukwitsa ʉmmana ʉmpya ʉgwʉ tupeewa nʉ Mepo ʉMbalatse. 47 Ʉmuunu ʉntatsi aahʉmile mu kɨlʉnga, aavʉmbilwe ʉkʉhʉma mu mmanga. Ʉmuunu va vɨɨlɨ aahʉmile kʉkyanya. 48 Pwʉ, avaanu va mu kɨlʉnga ɨkɨ valɨ nɨ mihana ɨgihʉmana nʉ mmanga ndʉ mmana gwa Adamu. Ɨmihana gya kʉkyanya gɨlaava ndʉ mmana gwa Kɨlɨsiti. 49 Ndʉwʉ tʉhwaniine nʉ vɨ aavʉmbilwe ʉkʉhʉma mu mmanga, wʉ jɨlaava tʉlahwanana nʉ muunu va kʉkyanya.

50 Pwʉ lɨno vɨɨdɨkivajyango, nditsova ndiita, ʉmmana gwa mu kɨlʉnga nʉ nkisa, naguweesi ʉkwingila mu Lʉdeeva lwa Ngʉlʉve, ʉmmana ʉgwivola nagʉkaweese ʉkʉva nʉ wʉʉmi wa sikutsooni. 51 Pʉlɨhɨtsi, ndikʉvavʉʉla ʉgwʉ gasihiime pamiiho gaanyie. Ʉwe natʉkaswe twɨ vooni, apeene twɨ vooni, tʉlaandʉlwa kʉ kasɨkɨ kapamato, 52 ndʉ nsɨkɨ gwa kʉdɨnda nʉ kʉdɨndʉla amiiho. Ɨlyo lɨlahʉmɨla jɨlaava jikuuta ɨngalape jya kʉ vʉsililo. Ʉnsɨkɨ ʉgwa avaswe valatsʉʉsiwa nʉ kʉva nɨ mihana ɨgyʉ nagɨlanangɨke lʉsiku. Ikange najyʉwe tʉlaandʉka, 53 manya ʉmmana ʉgʉ ʉgunangɨka, wɨgane wa Ngʉlʉve, gwandʉke gʉveetsage mmana gwa wʉʉmi wa sikutsooni, ʉmmana gʉʉgʉ ʉgwiswa gwandʉke gʉveetsage ʉgwʉ nagwiswa. 54 Pwʉ lɨno ʉmmana ʉgʉ ʉgunangɨka, gʉngaandʉke gʉve mmana gwa wʉʉmi wa sikutsooni, ʉmmana gʉʉgʉ ʉgwiswa, gwandʉke gʉve mmana ʉgwʉ nagwiswa, apo pwʉ lɨlaava lɨvombiike ɨlimenyu ɨlyavɨgilwe mu Vʉvɨge ʉVʉvalatse ɨlyʉ liita,

“ɄNgʉlʉve alesiitse ʉvʉswe, vʉlemilwe lwoni!”

55 “Ʉve vɨ vʉswe, ʉlemilwe kɨki ʉkʉlesa?

Galɨ ndaku amaka gaako ga kʉtʉpelela ʉlʉvavo?”

56 Lola, ʉvʉtulanongwa wʉ wigega ʉlʉvavo lwa vʉswe, ikange amaka ga vʉtulanongwa tsʉ ndagɨlo. 57 Lɨno, tukʉndɨmya ʉNgʉlʉve ʉvɨ ikʉtʉpa ʉkʉlesa ʉvʉtulanongwa nʉ vʉswe kʉ nzɨla jya Ntwa viitu ʉYɨɨsʉ Kɨlɨsiti.

58 Pwʉ vɨɨdɨkivajyango vagane, munywililage, mulekage ʉkʉdegandega mu lwɨdɨko. Isigono syoni mwɨkupilage ʉkʉvomba ɨmbombo jya Ntwa, manya mulʉmanyile ʉkʉta, ɨmbombo ɨjyʉ muvomba kʉ Ntwa, namugatala pavʉvʉle.