Ɨkɨkʉngɨlwa kya kʉpʉlɨsa ikulongwi nɨ kya kʉtsova inzovele iimya
14
1 Ʉkʉganana kyʉ kɨve kɨɨnu kiinyo ɨkɨlʉti.
Ikange mwɨtangage ʉkʉlonda isikʉngɨlwa sya Mepo ʉMbalatse,
sitsosiitso ɨkɨkʉngɨlwa kya kʉpʉlɨsa ɨlimenyu lya Ngʉlʉve.
2 Ʉmuunu ʉvɨ itsova ɨnzovele ɨɨmya,
nitsova na vaanu,
apeene itsova nʉ Ngʉlʉve,
ʉlwakʉva ʉgwʉ itsova nakʉli ʉvɨ ikʉgamanya.
Ʉmwene iiva itsova itsa kʉvʉtiitu kʉ maka ga Mepo va Ngʉlʉve.a
3 Lɨno,
ʉvɨ ipʉlɨsa ɨlimenyu lya Ngʉlʉve,
itsova na vaanu amamenyu ga kʉvadʉlʉsa mu lwɨdɨko,
ga kʉvatseesa nʉ kʉvapa amaka.
4 Lɨno,
ʉvɨ itsova ɨnzovele ɨɨmya,
ikava ʉvʉdʉlʉsu mu lwɨdɨko lwa mwene,
wʉ ʉvɨ ipʉlɨsa ɨlimenyu lya Ngʉlʉve idʉlʉsa ʉmpelela.
5 Ʉne ndinogwa ʉnyie nyɨ vooni mutsovage inzovele iimya.
Sitsosiitso ndinogwa mupʉlɨsaage ɨlimenyu lya Ngʉlʉve,
manya ɨmbombo jya kʉpʉlɨsa ɨlimenyu lya Ngʉlʉve jyʉ mbaha ʉkʉlʉtɨɨlɨla pa kʉtsova inzovele iimya.
Apeene,
ʉmuunu ʉvɨ itsova ɨnzovele ɨɨmya aandʉlage pakʉta atangɨlage ʉmpelela mu lwɨdɨko.
6 Lɨno,
vɨɨdɨkivajyango,
ndɨngiitse kwanyie nʉ kʉtsova ɨnzovele ɨɨmya,
ndeeti jʉmuvʉmbʉlɨla kɨki?
Namukavʉmbʉlɨle kɨɨnu,
apeene ndɨngavavʉʉle ʉgwʉ ʉNgʉlʉve andɨndʉlye,
evo ndɨngatsove amamenyu ga vʉmanyi,
evo ndɨngapʉlɨse ɨlimenyu lya Ngʉlʉve evo ndɨngamanyiise,
apo jʉmuvʉmbʉlɨla.
7 Wʉ jɨlɨwo,
nasyene isiinu isitsila wʉʉmi,
wʉ sikuuta,
jɨve siwɨɨwɨ,
jɨve magombu,
ɨngave sikuuta kɨtsila lʉteeveko,
ʉmuunu iweesa ʉkʉlʉmanya ndeeti ʉlwɨmbo?
8 Ikange,
ɨngave ɨngalape jikuuta,
b nʉ kʉkuuta kwa jyene kʉngaleke ʉkʉmanyikika kʉ vaanu,
veeni ʉvɨ jiikɨsaavʉla kwilwa ɨligoha?
9 Wʉ jɨlɨwo na kwanyie,
ɨngave mwitsova amamenyu ʉgwʉ nagimanyikika,
veeni ʉvɨ iweesa ʉkʉkɨmanya ɨkyʉ mwitsova?
Apo ʉgwʉ mwitsova giiva gilʉta nɨ mepo.
10 Mu kɨlʉnga mwʉtsile inzovele nyongosu,
na mu nzovele itso nɨkʉli nɨmamato ɨjɨtava jɨlɨ nɨ mbombo.
11 Pwʉ ɨngave nandiweesa ʉkʉjɨmanya ɨnzovele ɨjyʉ itsova ʉmuunu ʉntʉnga,
ndiiva ʉngata mpooma kʉ mwene ʉvitsova.
Namwene ʉvitsova,
iiva ʉngata mpooma kwane.
12 Nakʉ kwanyie wʉ jɨlɨwo.
Lɨno,
ʉlwakʉva munogwa siitso ʉkʉva ni sikʉngɨlwa sya Mepo ʉMbalatse,
mwɨtangage siitso ʉkʉlonda isikʉngɨlwa isikʉtsa ʉmpelela.
13 Pwʉ lɨno,
ʉmuunu ʉvitsova ɨnzovele ɨɨmya,
anʼdoove ʉNgʉlʉve pakʉta antange ʉkwandʉla,
14 manya ndɨngɨsaje kʉ nzovele ɨɨmya,
ɨnumbula jyango jyʉ jyene jiiva jikɨsaja,
napeene ʉlʉhala lwango nalukʉvavʉmbʉlɨla kɨɨnu avange.
15 Lɨno,
pannogye ndɨvombage lɨlɨku?
Ndikɨsajaga kʉ lʉpwato mu nzovele ɨɨmya kɨtsila kʉsaaga,
napeene ikange ndikɨsajaga kʉ lʉhala.
Ndikwɨmbaga inyɨmbo kʉ nzovele ɨɨmya,
napeene ikange ndikwɨmbaga inyɨmbo kʉ lʉhala.
16 Ʉngave vukʉnsaana ʉNgʉlʉve kʉ lʉpwato mu nzovele ɨɨmya,
wʉ ʉmalile ʉkʉnsaana,
pwʉ ʉmuunu ʉjyʉnge ʉvɨ nalɨ nɨ kɨkʉngɨlwa kya nzovele iimya ikwɨdɨkɨlaga ndeeti ʉkʉta,
“Ameni,”
ʉpwʉ nikʉgamanyingʼania ʉgwʉ witsova?
17 Kwave wiiva vukʉnsaana ʉNgʉlʉve jɨlweli,
lɨno ʉjyʉnge ʉlya nidʉlʉswa mu lwɨdɨko.
18 Ndikʉnsaana ʉNgʉlʉve pakʉva nditsova inzovele iimya ndɨvalʉtɨɨlye ʉnyie nyɨ vooni,
19 napeene mu mpelela,
ndinogwa siitso ʉkʉtsova amamenyu gahaano ʉgwʉ gimanyikika kʉ lʉhala,
pakʉta ndɨvamanyiise avange.
Ɨlyo lyʉ linonu ʉkʉlʉtɨɨlɨla pa kʉtsova amamenyu avaelufu kɨtsigo (10,000) mu nzovele ɨɨmya.
20 Vɨɨdɨkivajyango,
mulekage ʉkʉsaaga ʉngata mulɨ vaana,
apeene musaagage nda vaanu avavaha.
Peene kʉ nongwa jya vʉviivi,
apo muveetsage ʉngata vaana avanyehe.
21 Mu Vʉvɨge ʉVʉvalatse jɨvɨgilwe,
“ɄNtwa iita,
‘Nditsova na vaanu ava kʉ nzɨla jya vahenza va kʉvʉtale,
ʉwʉ vitsova inzovele inyenza,
ndajɨve ewo navakammʉlɨhɨtsaage.’ ”c
22 Ʉkʉkongana na mamenyu ago,
ʉkʉtsova kʉ nzovele iimya nakiiva kɨmanyilo kʉ vɨɨdɨki,
apeene kiiva kɨmanyilo kʉ vatava vɨɨdɨki.
Lɨno,
ʉkʉpʉlɨsa ɨlimenyu lya Ngʉlʉve kuvombwa kʉ vʉsumbe wa vɨɨdɨki,
najiiva kʉ vʉsumbe wa valya ʉwʉ vatava vɨɨdɨki.
23 Lɨno,
ɨngave nyɨ vampelela mulʉndamiine pa kwɨsaja,
pwʉ nyɨ vooni mungatengʉle ʉkʉtsova inzovele iimya,
pwʉ viingile avaanu ʉwʉ navikʉtsimanya,
evo ʉwʉ vatava vɨɨdɨki,
ndeeti navakaate mulɨ nʉ lʉkwale?
24 Apeene ɨngave mpamato mpamato ipʉlɨsa ɨlimenyu lya Ngʉlʉve,
pwʉ iitse ʉmuunu ʉvɨ nalʉmanyili,
evo ʉvɨ namwɨdɨki,
galya ʉgwʉ ipʉlɨka kʉ vooni gikʉmpelela ʉkʉtsimanya imbiivi tsa mwene.
Ikange gikʉmpelela alʉmanye ʉkʉta pannogye ʉkʉpela imbiivi.
25 Ʉgwʉ galɨ mu numbula jya mwene,
giiva pavʉvalasu kʉ mwene na kwa Ngʉlʉve.
Pwʉ ʉmuunu ʉjwa isugama nʉ kwɨsaja kwa Ngʉlʉve kʉnʉ iita,
“Jɨlweli ʉNgʉlʉve alɨ paninie nʉʉnyie!”
Ʉlʉvaatɨko pa lʉlʉndamano lwa lwɨsajo
26 Pwʉ lɨno vɨɨdɨkivajyango,
tʉte ndeeti?
Ʉpwʉ mulʉndamiine pa kwɨsaja,
ʉjyʉnge alɨ nʉ lwɨmbo,
ʉjyʉnge alɨ ni manyiiso,
ʉjyʉnge itsova galya ʉgwʉ ʉNgʉlʉve inogwa ʉkʉvonia,
ʉjyʉnge alɨ nɨ nzovele ɨɨmya,
nʉ jyʉnge ikwandʉla.
Ndiita aga gooni gavombekage pa vʉsumbe wa kʉvadʉlʉsa avɨɨdɨki.
27 Ɨngave pwʉvale ʉwʉ vitsova inzovele iimya,
vatsove vavɨlɨ evo vadatu,
valeke ʉkʉlʉtɨɨlɨla apo,
vatsovage kʉ nzɨla jya kʉpʉlɨkɨlanila,
ikange aveetsage epwo ʉmuunu va kwandʉla.
28 Ɨngave napali ʉnya kwandʉla,
ʉmuunu ʉvɨ itsova ɨnzovele ɨɨmya ɨlekelwe ʉkʉtsova mu lʉlʉndamano lwa lwɨsajo,
apeene atsovage nʉ Ngʉlʉve mu numbula jya mwene.
29 Naveene avanyamalago,
vatsovage amalago vavɨlɨ evo vadatu,
pwʉ avange vagelaniage amamenyu ago.
30 Ɨngave mpamato mu valya ʉwʉ vipʉlɨhɨtsa,
lɨmwitsye ɨlimenyu lya kʉvavʉʉla ɨlyʉ ʉNgʉlʉve anʼdɨndʉlye,
pwʉ ʉvɨ akagendelelaga ʉkʉtsova anuunale.
31 Nʉ jyʉnge aveetsage nʉ nsɨkɨ gwa kʉpʉlɨsa ɨlimenyu lya Ngʉlʉve,
apo avaanu vooni pwʉ vimanyiisiwa nʉ kʉtseesiwa,
32 manya ɨkɨkʉngɨlwa ɨkyo,
kilongotsiwa nʉ nyamalago.
33 ɄNgʉlʉve viitu naNgʉlʉve va lʉtsagɨlɨngʼanio,
apeene Ngʉlʉve va lʉnotsehetso.
Ndʉwʉ jɨlɨwo mu mipelela gyoni gya vavalatse va Ngʉlʉve,
34 wʉ valʉndamiine,
avadala vaveetsage kɨnuunu,
manya navatavʉliilwi ʉkʉtsova,
d apeene vaveetsage vaanu va kʉleva ndʉwʉ lwita ʉlʉlagɨlo lwa Moose.e
35 Ɨngave vinogwa ʉkʉlʉmanya ikulongwi ninie,
vavavʉʉtsaage avagoosi va veene kʉ nyumba,
manya tsa soni ʉnʼdala ʉkʉtsova mu lʉlʉndamano lwa lwɨsajo.
36 Ɨlimenyu lya Ngʉlʉve nalyatengʉlɨle kwanyie,
ikange naliitse kwanyie nyɨ veene!
37 Ɨngave ʉmuunu ikɨvona ʉkʉta nyamalago,
evo alɨ nɨ kɨkʉngɨlwa kɨninie ʉkʉhʉma kʉ Mepo ʉMbalatse,
alʉmanye ʉkʉta,
aga ʉgwʉ ndikʉvavɨgɨla lʉlagɨlo ʉkʉhʉma kʉ Ntwa ʉYɨɨsʉ.
38 Ʉmuunu ʉvɨ ibeda aga,
namwene abedwagwe.