Vagalatiya 3

Ʉkʉmwɨdɨka ʉKɨlɨsiti evo ʉkʉtsikonga indagɨlo tsa Moose

1 Ʉnyie Vagalatiya, mulɨ vatsimu jɨlweli! Veeni ʉmuunu ʉvɨ avasyovile ʉnyie? Ʉne ndyavalʉmbɨlye ʉnyie pavʉvalasu, nʉʉnyie mukatsimanya vʉnonu ikulongwi tsa Yɨɨsʉ Kɨlɨsiti itsʉ aakwɨtsiitse ʉpwʉ aabudilwe pa kɨdamingʼanie. 2 Ʉgwʉ ndinogwa ʉkʉlʉmanya ʉkʉhʉma kwanyie gwʉ aga: Ndeeti, ʉMepo ʉMbalatse aaviitsye kʉ nzɨla jya kʉkonga indagɨlo evo kʉ nzɨla jya kʉpʉlɨhɨtsa ɨLivangɨli lya Kɨlɨsiti nʉ kʉlyɨdɨka? 3 Ndeeti, ʉnyie mulɨ vatsimu ndavʉle? Lola, mwatengwe syoni kʉ maka ga Mepo ʉMbalatse ʉvɨ aavalongotsaaga, lɨno kʉ vʉmalɨlo munogwa ʉkʉmala kʉ maka giinyo ga kɨvʉmuunu. 4 Ndeeti, ʉvʉkʉvɨlwa vʉlya wooni ʉwʉ mwapatile ʉwaahʉmiine nʉ kʉmwɨdɨka ʉYɨɨsʉ, waale wa vʉvʉle? Ʉne nandikwɨdɨka ʉkʉta waale wa vʉvʉle! 5 Ndeeti, ʉNgʉlʉve ikʉvapa ʉMepo ʉMbalatse nʉ kʉvomba isidego pagati paanyie ʉlwakʉva mukonga indagɨlo, evo ʉlwakʉva mupʉlɨhɨtsa ɨLivangɨli lya Yɨɨsʉ nʉ kʉlyɨdɨka?

6 Musaage ikulongwi tsa Abulahamu. ɄVʉvɨge ʉVʉvalatse wiita, “ɄAbulahamu aamwɨdiike ʉNgʉlʉve, pwʉ ʉNgʉlʉve akambalɨla ʉvʉgolosu.” 7 Apo pwʉ mulʉmanye ʉkʉta avaanu avikʉmwɨdɨka ʉNgʉlʉve wʉ vaana va Abulahamu va jɨlweli! 8 Ikange, ʉVʉvɨge ʉVʉvalatse waavoniitse ʉkʉhʉma katale ʉkʉta avaanu avatava Vayahudi valavalɨlwa ʉvʉgolosu kʉ nzɨla jya lwɨdɨko lwa veene. ɄNgʉlʉve vɨ mwene aambʉʉlile ʉAbulahamu ɨkulongwi ɨnonu ɨjɨ, ʉpwʉ aatye, “Ʉkʉgendela mwave, avaanu va sivʉmbʉkʉ syoni valasajiwa.” 9 Pwʉ ʉkʉkongana nɨɨlyo, valya avikʉmwɨdɨka ʉNgʉlʉve visajiwa ndʉwʉ ʉAbulahamu aasajilwe ʉlwakʉva aamwɨdiike.

Avɨɨdɨki vapokilwe ʉkʉhʉma mu lʉkooto lwa ndagɨlo tsa Moose

10 Lɨno, valya vooni avihʉʉvɨla ʉkʉkava ʉvʉgolosu kʉ nzɨla jya kʉvomba tsilya itsilagɨliilwe mu ndagɨlo, valɨ mu lʉkooto. Manya ʉVʉvɨge ʉVʉvalatse wiita, “Ʉvaveetsaga ʉvɨ nikwibata nʉ kʉvomba gooni ʉgwʉ gaavɨgilwe mu kɨtabu kya ndagɨlo, akootoliiwe.” 11 Jɨlweli nakʉli ʉmuunu ʉvɨ iweesa ʉkʉvalɨlwa ʉvʉgolosu nʉ Ngʉlʉve kʉ nzɨla jya kʉtsikonga indagɨlo, manya ʉVʉvɨge ʉVʉvalatse wiita, “Ʉmuunu ʉvɨ ʉlwɨdɨko lʉmpelye ʉvʉgolosu, iiva nʉ wʉʉmi.” 12 Jɨlweli indagɨlo tsa Moose natsihʉʉvɨla ʉlwɨdɨko, apeene imbombo, ndʉwʉ ʉVʉvɨge ʉVʉvalatse wiita, “Ʉmuunu ʉvɨ ikwibataga tsyoni itsilagɨliilwe mu ndagɨlo, itaamaga kʉ nzɨla jya kʉkonga indagɨlo itso.”

13 ɄKɨlɨsiti aatʉgombwe ʉkʉhʉma mu lʉkooto ʉlʉvɨɨkilwe ni ndagɨlo. Aavombile ɨlyo kʉ nzɨla jya kʉtoola ʉlʉkooto ʉlwa jyʉmwene, manya ʉVʉvɨge ʉVʉvalatse wiita, “Ʉvaveetsaga ʉvɨ atoveliilwe pa kɨdamingʼanie alɨ nʉ lʉkooto.” 14 ɄKɨlɨsiti aatʉgombwe ʉwe pakʉta ʉlʉsajo ʉlwʉ aapeevilwe ʉAbulahamu, lʉviitsile nava vaanu va sivʉmbʉkʉ isitava sya Vayahudi, kʉ nzɨla jya Mesiya ʉYɨɨsʉ. Lola, kʉ nzɨla jya lwɨdɨko kwa Mesiya ʉYɨɨsʉ tuweesa ʉkʉmwʉpɨlɨla ʉMepo ʉMbalatse ʉvɨ ʉNgʉlʉve aatʉhʉʉviitse ʉkʉtʉpa.

Indagɨlo nʉ lwɨdɨngʼano

15 Vɨɨdɨkivajiitu, leki ndɨtsove mu kɨhwananitso ɨkihʉma mu vʉtaamo wiitu. Musaage ikulongwi tsa lwɨdɨngʼano lwa vaanu vavɨlɨ. Ɨngave ʉlwɨdɨngʼano lʉvombiike pamiiho pa vaanu, nakʉli ʉva kʉbeela evo ʉkwongeletsa ikulongwi itsinge pa lwɨdɨngʼano ʉlwa. 16 Lɨno ʉNgʉlʉve aavɨɨkile ʉlwɨdɨngʼano nʉ Abulahamu ʉkʉkʉjiitu paninie nʉ muunu va lʉjungu lwa mwene. ɄVʉvɨge ʉVʉvalatse nawiita, “avaanu va lʉjungu lwa mwene,” kwʉ kʉta isikolo syongosu. Apeene wiita, “nʉ muunu va lʉjungu lwa mwene,” kwʉ kʉta alɨ mpamato, ʉjwa vɨ Kɨlɨsiti. 17 Ʉgwʉ ndinogwa ʉkʉtsova gwʉ aga: ɄNgʉlʉve aavɨɨkile ʉlwɨdɨngʼano lwa mwene nʉ Abulahamu ɨmyaka ɨmileevʉlʉ gɨnni ni sitsigo sidatu (430) wʉ tsikaanale ʉkʉvekwo indagɨlo tsa Moose. Pwʉ indagɨlo itso natsikaweese ʉkʉvʉlɨsa ʉlwɨdɨngʼano ʉlwa, evo ʉkʉlwandʉla. 18 Manya ɨngave ʉNgʉlʉve ikʉtʉpa ʉvʉhaale wa mwene kʉ nzɨla jya kʉkonga indagɨlo, pwʉ ʉvʉhaale ʉwa navuweesi ʉkʉhʉmana nʉ lʉhʉʉvɨtso lwa Ngʉlʉve. Lɨno, ʉNgʉlʉve kʉ lʉhʉngʉ lwa mwene aampye ʉAbulahamu ʉvʉhaale ʉkʉkongana nʉ lʉhʉʉvɨtso ʉlwa. 19 Pwʉ indagɨlo tsilɨ nɨ mbombo nyiki? Itso tsyoongeliitswe mu lwɨdɨngʼano wʉ gʉlʉtɨngʼiinie ʉnsɨkɨ ntale, pa vʉsumbe wa kʉvonia ʉkʉta avaanu valɨ mu mbiivi, ʉkʉsikila ʉpwʉ ikwitsa ʉlya ʉvɨ vɨ lʉjungu lwa Abulahamu, ʉlwʉ ʉNgʉlʉve aatʉhʉʉviitse. ɄNgʉlʉve aampye indagɨlo ʉMoose kʉ nzɨla jya vasuungʼwa. Ʉmwene ʉMoose akava ndʉ ntuuni, alɨkʉvasajania avaanu nʉ Ngʉlʉve. 20 Ʉnsɨkɨ gwa kʉvɨɨka ʉlwɨdɨngʼano, lʉngave pwʉlʉle ʉlʉvasu lʉpamato vʉvʉle, pwʉ ʉntuuni nilondiwa. Lola, ʉNgʉlʉve alɨ mpamato.

Ʉvʉsumbe wa ndagɨlo

21 Ndeeti, indagɨlo tsipyanie pa galya ʉgwʉ aatʉhʉʉviitse ʉNgʉlʉve? Baako! Manya tsikaale tsiivepwo indagɨlo itsʉ tsiweesa ʉkʉvapa avaanu ʉwʉʉmi wa sikutsooni, pwʉ twale tuweesa ʉkʉvalɨlwa ʉvʉgolosu kʉ nzɨla jya ndagɨlo. 22 Lɨno najɨlɨ ndavʉle. ɄVʉvɨge ʉVʉvalatse wiita, avaanu vooni vilongotsiwa na maka ga mbiivi. Avɨɨdɨki veene wʉ vivombelwa galya ʉgwʉ aavahʉʉviitse ʉNgʉlʉve ʉlwakʉva vikʉmwɨdɨka ʉYɨɨsʉ Kɨlɨsiti.

23 Ʉlwɨdɨko wʉ lʉkaanale ʉkwitsa, indagɨlo tsyatʉvɨɨkile tʉve vavanda va kʉtsivombela ʉkʉsika ʉpwʉ ʉlwɨdɨko luvoneka. 24 Pwʉ indagɨlo itso tsyatʉlongotsaaga ndʉ muunu ʉvikʉtʉlela, ʉkʉsikila ʉpwʉ ʉKɨlɨsiti iitsile, pakʉta kʉ nzɨla jya kʉmwɨdɨka ʉKɨlɨsiti, tʉvopolwe mu mbiivi. 25 Lɨno ʉlwakʉva ʉlwɨdɨko ʉlwa lʉsiike, ʉwe natulongotsiwa ikange ni ndagɨlo tsa Moose.

26 Kʉ nzɨla jya lwɨdɨko, ʉnyie nyɨ vooni mulɨ vaana va Ngʉlʉve, manya muhanziitswe nʉ Mesiya ʉYɨɨsʉ. 27 Ʉnyie nyɨ vooni nyɨ mwotsiiwe, muhanziitswe nʉ Kɨlɨsiti, munswalile ʉKɨlɨsiti ndʉ kʉswala ʉnsabwa ʉmpya. 28 Pwʉ nakʉkʉli ʉkʉlekengʼana ʉNʼyahudi nʉ vɨ atava Nʼyahudi, ʉmbanda nʉ mbopolwa, evo ʉnʼgoosi nʉ nʼdala. Twɨ vooni tʉlɨ kɨɨnu kɨpamato, manya tʉhanziitswe nʉ Mesiya ʉYɨɨsʉ. 29 Ɨngave ʉnyie mulɨ va Kɨlɨsiti, pwʉ mulɨ va lʉjungu lwa Abulahamu, mulɨ venevʉhaale wa syoni isyʉ aavahʉʉviitse ʉNgʉlʉve.