Vagalatiya 4

1 Pwʉ nditsova ndiita, ʉkʉkonga inyiiho, ʉmwenevʉhaale wʉ mwana, alɨngʼiine nʉ mbanda nʉpwʉ jɨngave ɨkyʉma kyoni kya mwene. 2 Ʉnsɨkɨ ʉgwa gwoni alɨ paasi pa vɨɨmɨɨlɨtsi ʉkʉsikila ʉnsɨkɨ ʉgwʉ gʉvɨɨkilwe nʉ dadaaje. 3 Najyʉwe wʉ jɨlɨwo, ʉnsɨkɨ gʉlya wʉ nitsili ʉKɨlɨsiti, twale vavanda va nyiiho itsilongotsa avaanu mu kɨlʉnga. 4 Lɨno wʉ gʉsiike ʉnsɨkɨ ʉgwʉ ʉNgʉlʉve aavɨɨkile, akansuungʼa ʉMwana va mwene mu kɨlʉnga. Akaholwa nʉ nʼdala, ikange akava paasi pa ndagɨlo. 5 Aasuungʼilwe avagombole avaale vavanda va ndagɨlo tsa Moose, pakʉta atʉpele ʉkʉva vaana va Ngʉlʉve.

6 Lɨno, ʉlwakʉva tʉlɨ vaana va mwene, ʉNgʉlʉve ansuungʼile ʉMepo va Mwana va mwene mu numbula tsiitu, ʉMepo ʉvɨ ikʉtʉdoovela kwa Ngʉlʉve iita, “Aba” kwʉ kʉta “Daada.” 7 Pwʉ ʉve nʉlɨ mbanda ikange, apeene ʉlɨ mwana va mwene. Lola, ʉve ʉlʉʉpɨlɨla syoni isya vʉhaale isyʉ ʉNgʉlʉve avavɨɨkye avaana va mwene.

Ʉvʉnogwe wa Paulo kʉ Vagalatiya

8 Katale wʉ nammanyili ʉNgʉlʉve, mwale vavanda va siinu isitava vɨ Ngʉlʉve. 9 Lɨno ʉnsɨkɨ ʉgʉ, mummanyile ʉNgʉlʉve evo ndɨte ʉNgʉlʉve lɨno avamanyile ʉnyie. Pwʉ jɨvye ndeeti ʉkʉkilivukila inyiiho tsa katale itsʉ natsiweesi ʉkʉtʉpoka? Ndeeti, munogwa ikange ʉkʉva vavanda va nyiiho itso? 10 Lola, mupitsiige mugʉngʉla isigono sininie, ɨmyetsi mininie nɨ myaka mininie ʉkʉva syaka sya kʉmwɨmɨka ʉNgʉlʉve. 11 Ʉkʉkongana naago, ʉne ndikɨdwatsa ʉkʉta, ɨmbombo ɨjyʉ ndɨvahangajɨkye ʉnyie jɨgela jiiva kɨtsila lʉvʉmbʉlɨlo!

12 Vɨɨdɨkivajiitu, ndikʉvadoova muve ndʉʉne, manya najyʉne ndyale ndʉʉnyie, nandilongotsiwa ni ndagɨlo tsa Kɨyahudi. Katale najyʉne ndyalongotsiwaagwa ni ndagɨlo ndʉwʉ mulɨwo ʉnyie. Apo namwambombele ʉne ʉvʉviivi ʉvʉveetsaga ʉpwʉ ndyalʉmbɨlye kwanyie. 13 Mulʉmanyile ʉkʉta ʉvʉdekedeke wa mmana ʉwaambwene kyʉ kɨɨnu ɨkyambɨɨkile ndiitse ʉkwa kutengʉla ɨmbombo jya kʉlʉmbɨlɨla ɨLivangɨli kwanyie. 14 Paninie nɨɨlyo, ʉnsɨkɨ gʉlya namwabede evo ʉkʉmbeela ʉkʉkongana nʉ vʉdekedeke wango, nʉpwʉ jɨngave lwale lʉgelo kwanyie. Mwannyʉpɨlye ʉngata kʉmwʉpɨlɨla ʉnsuungʼwa va Ngʉlʉve, evo ʉkʉmwʉpɨlɨla ʉMesiya ʉYɨɨsʉ jyʉmwene. 15 Lʉlɨ ndaku lɨno ʉlʉhekelo ʉlwʉ mwale nalwo ʉnsɨkɨ gʉlya? Nditsova jɨlweli, ʉnsɨkɨ gʉlya ɨngave pɨɨdɨkaga, ndalɨ mwakolovonyue amiiho giinyo nʉ kʉʉma ʉne. 16 Ndeeti, ɨleelo ndɨhambwike ndɨvye ndʉgʉ viinyo ʉlwakʉva ndikʉvavʉʉla ʉwajɨlweli?

17 Avaanu avange avo vitiiga pakʉta vavakwege ʉnyie, napeene ʉgwʉ vilonda namanonu. Vinogwa ʉkʉvakwega ʉnyie ʉkʉhʉma kwane, pakʉta muvapʉlɨkage aveene. 18 Ndikʉvavʉʉla ndiita, sikutsooni, lʉnonu ʉkwɨjʉmɨɨlɨtsa ʉkʉvomba inonu, ɨleke ʉkʉva peene wʉ ndɨlɨ paninie nʉʉnyie. 19 Vaana vango, ndʉmwʉ ʉnʼdala ʉnya vʉtsito ikʉvɨlwa wʉ gʉsiike ʉnsɨkɨ gwa kʉhola ʉmwana, vʉvʉle vʉle wʉ najyʉne ndikʉvɨlwa siitso pa kulongwi jyanyie. Ʉvʉkʉvɨlwa ʉvʉ nditsiga nawo ʉkʉsika ʉpwʉ ʉlʉgendo lwa Kɨlɨsiti luvoneka mu lʉgendo lwanyie. 20 Ndɨlɨ nʉ vʉsʉʉkwa wa kʉva paninie nʉʉnyie ʉnsɨkɨ ʉgʉ, pakʉta ndɨvanywilitse kʉ mamenyu ga vʉdeke! Lɨno ndilemwa ʉmwa kʉvatangɨla manya ndɨlɨ kʉtale nʉʉnyie!

Ɨkɨhwananitso kya Hagali nʉ Sala

21 Imbʉʉli ʉne, ʉnyie nyɨ munogwa ʉkʉlongotsiwa ni ndagɨlo tsa Moose, ndeeti, mupʉlɨka ʉmwʉ tsitsovela indagɨlo? 22 Jɨvɨgilwe mu Vʉvɨge ʉVʉvalatse ʉkʉta ʉAbulahamu aale na vaswambe vavɨlɨ, mpamato kʉ nʼdala ʉvaale mbanda, nʉ va vɨɨlɨ kʉ nʼdala ʉvaale nambanda. 23 Ʉmwana va nʼdala ʉmbanda ʉlya, aaholilwe kʉ vʉnogwe wa vaanu wʉ ʉmwana va nʼdala ʉvɨ naale mbanda aaholilwe ʉkʉkongana nʉ lwɨdɨngʼano lwa Ngʉlʉve kwa Abulahamu. 24 Ikulongwi itso tsivye sihwananitso. Avadala vavɨlɨ avo vahwaniine ni nyɨdɨngʼano ivɨlɨ. Mu nyɨdɨngʼano itso, lʉpamato lwʉ lʉlya ʉlwavombiike kʉ kɨdugala ɨkya Sinai. Ʉlwa lʉhwaniine nʉ Hagali, avaana va mwene vaaholeliilwe mu vʉvanda. 25 ɄHagali ahwaniine nɨ kɨdugala ɨkya Sinai ɨkya kʉ Alabiya, ikange ahwaniine nʉ vʉtsenge wa Yelusalemu ʉmwʉ vʉveelye mu kɨlʉnga, ʉlwakʉva avaana va mwene valɨ mu vʉvanda wa ndagɨlo itsʉ vaapeevilwe kʉ kɨdugala ɨkya Sinai. 26 Lɨno ʉSala ihwananitswa nʉ vʉtsenge wa Yelusalemu wa kʉkyanya, ʉvʉtsenge wa vʉvopolwa, ʉwa vɨ jyʉva viitu. 27 Lola tsivɨgilwe mu Vʉvɨge ʉVʉvalatse ʉkʉta,

“Ʉhovokage ʉve vɨ nʼgʉmba vɨ nʉholili,

totsa ɨlimenyu wɨɨmbe kʉ lʉhekelo,

ʉve vɨ nʉgelili ʉkʉva nʉ lʉvavo lwa kʉhola ʉmwana,

ʉlwakʉva avaana va nʼdala ʉlya, ʉvɨ alekilwe nʉ nʼgoosi,

vongosu

ʉkʉlʉtɨɨlɨla avaana vʉʉlya ʉnya nʼgoosi.”

28 Pwʉ lɨno vɨɨdɨkivajiitu, ʉnyie mulɨ ndʉ Isaka, mulɨ vaana va Ngʉlʉve ʉkʉkongana nʉ lʉhʉʉvɨtso lwa mwene. 29 Napeene mu sigono silya, ʉmwana ʉvɨ aaholilwe kʉ vʉnogwe wa mmana, aampelye ʉvʉkʉvɨlwa ʉmwana ʉvɨ aaholilwe kʉ maka ga Mepo ʉMbalatse. Ʉvʉkʉvɨlwa vʉʉvʉlya vʉlya wʉ vʉlɨpwo namu mu sigono isi. 30 Napeene ʉVʉvɨge ʉVʉvalatse wiita kɨki? Wiita, “Munswɨme ʉnʼdala ʉmbanda paninie nʉ mwana va mwene, ʉlwakʉva ʉmwana va nʼdala ʉmbanda, nakahange ʉvʉhaale paninie nʉ mwana va nʼdala ʉvɨ nambanda.” 31 Pwʉ lɨno vɨɨdɨkivajiitu, ʉwe natʉlɨ vaana va nʼdala ʉmbanda apeene vaana va nʼdala ʉvɨ nambanda.