Avɨɨdɨki pavanogye valoleelage ʉvʉvopolwa wa veene
5
1 ɄKɨlɨsiti atʉvopwe pakʉta tʉve vavopolwa.
Pwʉ mwɨme na maka,
muleke ʉkwɨdɨka ikange ʉkʉva vavanda va ndagɨlo.
2 Pʉlɨhɨtsi,
ʉne neene Paulo ndɨ ndikʉvavʉʉla aga!
Ɨngave mukwɨdɨka ʉkʉtahiliwa,
ʉkʉkongana ni ndagɨlo tsa Moose,
pwʉ ʉKɨlɨsiti nakavavʉmbʉlɨle kɨɨnu.
3 Jɨlweli ndikʉvavʉʉla ikange pavʉvalasu ʉkʉta,
ʉmuunu ʉvaveetsaga ʉvɨ ikwɨdɨka ʉkʉtahiliwa,
anogye ʉkwibata indagɨlo tsyoni tsa Moose.
4 Ɨngave muhʉʉvɨla ʉkʉvalɨlwa ʉvʉgolosu kʉ nzɨla jya kʉtsikonga indagɨlo,
pwʉ mwɨvɨɨkile kʉtale nʉ Kɨlɨsiti.
Ʉnyie mwiva mubeelile ʉlʉhʉngʉ lwa Ngʉlʉve.
5 Lɨno ʉwe,
kʉ nzɨla jya lwɨdɨko na maka ga Mepo ʉMbalatse,
tupʉlɨkɨla ʉkʉvalɨlwa ʉvʉgolosu ndʉwʉ aatʉhʉʉviitse.
6 Pwʉ ɨngave twɨhanziitse nʉ Mesiya ʉYɨɨsʉ,
ʉkʉtahiliwa evo ʉkʉleka ʉkʉtahiliwa,
kʉtsila lʉvʉmbʉlɨlo ʉlʉveetsaga,
ɨkɨvaha lwʉ lwɨdɨko ʉlwʉ luvomba ɨmbombo kʉ lʉgano.
7 Pa vʉtengʉlɨlo ʉnyie mwagendelelaga vʉnonu ʉkʉnkonga ʉYɨɨsʉ Kɨlɨsiti!
Pwʉ lɨno,
vɨ veeni ʉvɨ avahambwe muleke ʉkʉgendelela ʉkʉkonga ʉwajɨlweli?
8 Ʉvɨ avasongile ʉkʉvomba ago navɨ Ngʉlʉve ʉvɨ avɨɨlangile ʉnyie!
9 Ɨlisongo ɨlyo lɨhwaniine nɨ kɨlʉve kɨdebea vʉvʉle ɨkilʉtsa ɨkɨkando kyoni kya vʉhevete.
10 Ʉnyie mulɨ vaanu va Ntwa ʉYɨɨsʉ.
Nditsova kɨtsila kʉsinaana ʉkʉta ʉnyie namukakonge amamenyu ga vaanu avange,
apeene mukongaga amamenyu gaane.
Ikange ʉmuunu ʉvaveetsaga ʉvɨ ikʉvajatsɨlɨngʼania ʉnyie,
jɨlweli alahɨgwa,
ndavɨ ave veeni.
11 Vɨɨdɨkivajyango,
avange viita ʉne ndɨpitsiige ndilʉmbɨlɨla ʉkʉta vooni pavanogye ʉkʉtahiliwa.
Ndɨkaale ndɨve wʉ ndilʉmbɨlɨla ewo,
kɨki vikʉmmelela ʉvʉkʉvɨlwa?
Ikange ndɨkaale ndɨve ndilʉmbɨlɨla ewo,
ʉkʉlʉmbɨlɨla kwane ikulongwi tsa kɨdamingʼanie kya Yɨɨsʉ,
tsikaale natsikʉvaviipitsi?
12 Gwinoga ʉkʉta avaanu avo avikʉvajatsɨlɨngʼania ʉnyie pa kulongwi tsa kʉtahiliwa,
vagendelelage ʉkʉvomba ɨlyo ʉkʉsikila ʉpwʉ vikɨsula vaveene!
13 Vɨɨdɨkivajyango,
ʉNgʉlʉve avɨɨlangile pakʉta muve vavopolwa.
Lɨno muleke ʉkʉvʉvombela ʉvʉvopolwa wiinyo ʉvʉnogwe ʉvʉviivi wa mmana,
apeene mutanganage nʉ kʉganana.
14 Indagɨlo tsyoni tsa Moose tsyɨtotiike mu lʉlagɨlo ʉlʉlʉti ʉlwita,
“Ʉnʼganage ʉnnino ndʉwʉ wɨganile jyʉve.”b
15 Lɨno ɨngave muhovelanila nʉ kʉlwa ndʉwʉ sivomba isikanu,
mwɨlolelage mugela mubudana.
Avɨɨdɨki mu wʉʉmi wa veene vammʉʉvɨlage ʉMepo ʉMbalatse
16 Pwʉ ndikʉvavʉʉla ndiita,
ʉlʉgendo lwinyo lʉlongotsiwaagwe nʉ Mepo ʉMbalatse,
apo pwʉ namukakonge ikange ʉvʉnogwe ʉvʉviivi wa mmana.
17 Lola,
isiinu syoni isyʉ gunogwa ʉmmana,
nasyʉ syene isyʉ inogwa ʉMepo ʉMbalatse.
Ikange isiinu isyʉ inogwa ʉMepo ʉMbalatse,
nasyʉ syene isyʉ gunogwa ʉmmana.
Kwʉ kʉta,
ʉMepo ʉMbalatse nʉ mmana silwana.
Pwʉ ʉkʉkongana nɨɨlyo,
ʉnyie namukaweese ʉkʉvomba inonu itsʉ munogwa.
18 Apeene ɨngave mulongotsiwa nʉ Mepo,
namuviili vavanda va ndagɨlo.
19 Pwʉ imbombo tsa mmana itsimanyikiike tsʉ itsi:
ʉvʉligu,
ʉvʉmalaja,
ʉvʉpʉmu,
20 ʉkwɨsaja kʉ mingʉlʉve,
ʉvʉhavi,
ʉvʉlʉgʉ,
imbatsa,
ɨkɨvini,
ingoso,
ʉmwojo,
ingʼaani,
ʉkʉsambʉkɨlanila,
21 ɨgiila,
ʉvʉgaatsi,
ʉkʉsyota,
na gange ʉgwʉ galɨngʼiine ndaaga.
Ndikʉvavʉʉla ikange ndʉwʉ ndyavavʉʉlile pa vʉtengʉlɨloc ʉkʉta,
avaanu ʉwʉ vivomba itsi,
navalakave isya vʉhaale isyʉ ʉNgʉlʉve aavahʉʉviitse avaanu va mwene.
22 Lɨno tʉngave tulongotsiwa nʉ Mepo ʉMbalatse,
tuveetsaga nʉ lʉgano,
ʉlʉhekelo,
ʉlʉnotsehetso,
ʉlʉsipililo,
ʉvʉtemesu,
ʉwiipa,
ʉvʉhʉʉgʉ,
23 ʉvʉposu nʉ kwɨlolela.
Nalʉkʉli ʉlʉlagɨlo ʉlwʉ lubeetsa itsi.
24 Avaanu avɨhanziitse nʉ Mesiya ʉYɨɨsʉ,
vagɨtovelye pa kɨdamingʼanie ɨmihana gya veene paninie nʉ vʉnogwe ʉvʉviivi wa gyene na masaago amaviivi ga gyene.
25 ɄMepo atʉpye ʉwʉʉmi ʉvʉpya,
pwʉ tʉkongage ʉvʉlongotsi wa mwene.
26 Tʉleke ʉkwɨginia,
ikange tʉleke ʉkʉhovelanila evo ʉkʉvonelanila ɨkɨvini.