Avɨɨdɨki pavanogye vatanganage
6
1 Vɨɨdɨkivajyango,
ɨngave ʉmuunu ague mu mbiivi,
ʉnyie nyɨ mulongotsiwa nʉ Mepo munkilivulage,
napeene muvombage ewo kʉ vʉdeke ʉwihʉma kwa Mepo ʉMbalatse.
Ikange mwɨlolelage,
pakʉta ʉnyie muleke ʉkʉkolaniwa muve va kʉkonga ʉlʉgendo lwa mwene ʉlwa ʉlʉviivi.
2 Mutoolelanilage mu vʉpala wiinyo,
manya ʉkwa kwʉ kʉkwɨtsa ʉlʉlagɨlo lwa Kɨlɨsiti.a
3 Pwʉ ʉmuunu ʉvaveetsaga ʉvɨ ikɨvona ʉkʉta mwɨmɨkiwa,
wʉ hʉmbe nalɨ ndavʉle,
ʉjwa ikɨsyova.
4 Lɨno nʉ jyʉnge ɨlolage ʉlʉgendo lwa mwene.
Ɨngave ivomba inonu,
pwʉ iweesa ʉkwɨginia mu galya ʉgwʉ avombile,
kɨtsila kʉlɨngʼaania nʉ gwʉ avombile ʉjyʉnge,
5 manya ʉmuunu nʉ muunu ilondiwa avombage itsindʉngamye ʉmwene.
6 Ʉmuunu ʉvɨ imanyiisiwa ɨlimenyu lya Ngʉlʉve,
anʼgavɨlage ʉmmanyisi va mwene isiinu isinonu isyʉ ikava.
7 Muleke ʉkwɨtekeletsa,
ʉNgʉlʉve nisyowa.
Ʉmuunu alabena isyʉ avyalile.
8 Avaanu vibena isyʉ vavyalile.
Pwʉ lɨno ʉvɨ ikonga ʉvʉnogwe ʉvʉviivi wa mmana,
vɨ alabena ʉvʉswe wa sikutsooni,
nʉ vɨ ivomba itsikʉmmovosa ʉMepo ʉMbalatse,
vɨ alabena ʉwʉʉmi wa sikutsooni.
9 Pwʉ tʉleke ʉkʉgatala ʉkʉvomba inonu,
ʉlwakʉva ɨngave twisipa,
tʉlabena inonu wʉ gʉsiike ʉnsɨkɨ gwa peene.
10 Pwʉ lɨno,
tʉve nyango ʉkʉvomba inonu kʉ vaanu vooni,
sitsosiitso kʉ vɨɨdɨkivajiitu.
Amamenyu ga lʉleko nʉ kwɨlaga
11 Mulole ʉvʉvɨge wango ʉmwʉ vʉveelye vʉvaha,
manya ndɨvɨgile kʉ kɨvoko kyango jyʉne.
12 Ndinogwa ʉkʉvavʉʉla ʉkʉta avaanu avikʉvʉʉmɨɨlɨtsa ʉnyie ʉkʉtahili,
vivomba ndavʉle ʉlwakʉva vilonda vɨɨmɨkiwaagwe na Vayahudi,
kʉ galya ʉgwʉ muvombile ʉnyie mu mihana giinyo.
Vivomba ndavʉle pakʉta ʉvʉkʉvɨlwa vʉleke ʉkʉviitsila.
Ʉvʉkʉvɨlwa ʉwa vukʉviitsila vangave vilʉmbɨlɨla ʉwajɨlweli wa kɨdamingʼanie kya Kɨlɨsiti.
13 Ikange valya avinogwa ʉkʉta avɨɨdɨki vooni vatahiliwe,
avo vaveene navikonga indagɨlo tsyoni.
Vinogwa ʉnyie mutahiliwe pakʉta vɨginiage ʉkʉta aveene wʉ vavaandwe ʉnyie nʉ kʉta ʉnyie mulɨ vakongi va veene.
14 Lɨno ʉne ndɨleke ʉkwɨginihitsa ɨkɨveetsaga,
peene ndyɨginihitsaage ɨkɨdamingʼanie kya Yɨɨsʉ Kɨlɨsiti,
ʉNtwa viitu.
Manya kʉ nzɨla jya kɨdamingʼanie ɨkyo,
imbombo itsʉ vihʉʉvɨla avaanu mu kɨlʉnga tsitsila lʉvʉmbʉlɨlo ʉlʉveetsaga kwane,
ʉlwakʉva kʉ nzɨla jya kɨdamingʼanie ɨkyo,
ʉne ndivalɨla ʉkʉta ɨkɨlʉnga kɨmalile ʉkʉswa,
nʉʉne pamiiho pa kɨlʉnga,
ndikɨvalɨla ndɨsue.b
15 Ʉkʉtahiliwa evo ʉkʉleka ʉkʉtahiliwa,
kʉtsila lʉvʉmbʉlɨlo ʉlʉveetsaga,
ɨkɨɨnu ɨkɨvaha kwʉ kʉvangwa vʉpya nʉ Ngʉlʉve.
16 Valya avikwɨdɨka ʉwajɨlweli ʉvʉ,
ʉNgʉlʉve avapeetsage ʉlʉnotsehetso nɨ kɨsa kya mwene.
Ava wʉ vaanu avavangilwe vʉpya nʉ Ngʉlʉve.c