Ʉlwɨdɨko kyʉ kɨɨnu ɨkɨlʉti
11
1 Ʉkʉva nʉ lwɨdɨko kwʉ kʉlʉmanyilangʼaani ʉkʉta tsilavombeka tsilya itsʉ tuhʉʉvɨla,
ikange kwʉ kʉva ʉta kʉsivona pwʉsile jɨlweli isiinu isyʉ nasivoneka lɨno.
2 Lola,
ʉNgʉlʉve aavaginiaga avakʉkʉjiitu avaale nʉ lwɨdɨko kʉ mwene.
3 Ʉlwɨdɨko lʉtʉpelye ʉwe tʉlʉmanye ʉkʉta ʉNgʉlʉve aapelile ɨkɨlʉnga kʉ nzɨla jya limenyu.
Kwʉ kʉta kɨlya ɨkivoneka kyapelilwe ʉkʉhʉmana na kɨlya ɨkyʉ nakivoneka.
4 Ʉlwɨdɨko lwampelye ʉAbeli ampe ʉNgʉlʉve ɨneekelo ɨnonu ʉkʉlʉtɨɨlɨla ɨjya lʉkololwe ʉKaini.
ɄNgʉlʉve aavoniitse ʉkʉta ʉAbeli vɨ muunu ʉnʼgolosu kʉ nzɨla jya kwʉpɨlɨla ɨneekelo jya mwene.
Nʉpwʉ jɨngave aasue katale,
ʉlwɨdɨko lwa mwene lʉpitsiige kɨhwananitso kwawe ʉkʉsikila ɨleelo.a
5 Ʉlwɨdɨko lwampelye ʉEnoki ahaamitsiwe ʉkʉbɨha kʉkyanya kɨtsila kʉswa,
naavoneke ikange ʉlwakʉva ʉNgʉlʉve aantoolile.
Lola,
ʉVʉvɨge ʉVʉvalatse vukwoleletsa ʉkʉta,
wʉ ʉEnoki akaanale ʉkʉtoolwa,
ammowiise ʉNgʉlʉve.b
6 Avaanu naviweesi ʉkʉmmovosa ʉNgʉlʉve kɨtsila kʉva nʉ lwɨdɨko.
Ʉmuunu ʉvaveetsaga ʉvikwitsa kwa Ngʉlʉve pannogye ɨdɨkage ʉkʉta ʉNgʉlʉve kwale,
ikange ikʉvookela avaanu avikʉndonda.
7 Ʉlwɨdɨko lwampelye ʉNwaka ave mwɨdɨhɨtsi kwa Ngʉlʉve pa kulongwi itsʉ tsyale tsikaanale ʉkʉvoneka.
Wʉ ʉNgʉlʉve ampavye ikulongwi tsa lwongometso,
ʉNwaka akanotsa ɨngalava pakʉta avaanu va mu nyumba jya mwene vapokwe.
Pa kʉvomba ewo akavonia ʉkʉta avaanu va mu kɨlʉnga ʉmʉ ʉwʉ navaamwɨdɨkage ʉNgʉlʉve vaale va kʉhɨgwa.
Ʉmwene ʉNwaka akavalɨlwa ʉvʉgolosu ʉkʉhʉmana nʉ lwɨdɨko lwa mwene kwa Ngʉlʉve.c
ɄAbulahamu aale nʉ lwɨdɨko kwa Ngʉlʉve
8 Ʉlwɨdɨko lwampelye ʉAbulahamu ave mwɨdɨhɨtsi kwa Ngʉlʉve palya ʉpwʉ ɨɨlangilwe ahaame kʉ myave,
alʉtage kʉ kɨlʉnga ɨkɨnge ɨkyʉ ʉNgʉlʉve aammʉʉviitse ʉkʉta alampa kɨve kya vʉhaale wa mwene.
ɄAbulahamu akahaama mu kɨlʉnga kya mwene nʉpwʉ jɨngave naalʉmanye ʉkwʉ aalʉtaga.d
9 Wʉ asiike mu kɨlʉnga ɨkyo ɨkyʉ aahʉʉvɨtsiiwe nʉ Ngʉlʉve,
ʉlwɨdɨko lʉkampelela ataamage mu maheema ʉngata mmenza.
Aataamaga mu maheema ndʉwʉ kʉmbele namwene ʉIsaka najyʉ Yakobo viitsile valɨkʉtaama mu maheema.
Avo vaale wʉ venevʉhaale va lwɨdɨngʼano lʉlʉninie ʉlwʉ ʉNgʉlʉve aavombile nʉ Abulahamu.
10 ɄAbulahamu aahʉʉvɨlaga ʉkʉta gʉliitsa ʉnsɨkɨ ʉgwʉ aliingila mu kʉtaama mu vʉtsenge ʉvʉnya waalo ʉvʉkangasu,
ʉwiivekwo sikutsooni.
Ʉvʉtsenge ʉwa ʉNgʉlʉve jyʉmwene vɨ anotsiitse ʉmwa kʉvʉtsengela nʉ kʉvʉtsenga.
11 Ʉlwɨdɨko lwampelye ʉSalae namwene apeewe amaka ga kʉkava ʉvʉtsito nʉ kʉhola ʉmwana nʉpwʉ jɨngave aagogolwipe siitso,
ikange aale nʼgʉmba.
Tsyavombiike ewo ʉlwakʉva ɨɨdiike ʉkʉta ʉNgʉlʉve immʉʉgʉ,
jiivomba kɨlya ɨkyʉ ammʉʉviitse.f
12 Pwʉ,
ʉkʉhʉmana nʉ muunu ʉjwa mpamato ʉvɨ aagogolwipe nʉ kʉva kɨtsila maka ga kʉhola ʉmwana,
kʉ mwene voolwike avaanu vakava vongosu siitso ʉngata nondwe,
evo ʉngata insekelewe gwa lʉkanzimbale lwa nyanza ʉgwʉ naguvalɨka.g
13 Avaanu ava vooni vaaswɨlye mu lwɨdɨko,
ikange vaasue wʉ vakaanale ʉkwʉpɨlɨla galya ʉgwʉ vaahʉʉvɨtsiiwe.
Apeene vaagaweene ʉkʉhʉma kʉvʉtale ʉkʉta galavombeka kʉvʉlongolo,
pwʉ vakagahovokela.
Aveene vɨɨdɨkaga ʉkʉta pa kɨlʉnga apa vaale vahenza ikange valʉtanzɨla.
14 Lola,
avaanu avitsova amamenyu ago vivonia pavʉvalasu ʉkʉta vilonda vave nɨ kɨlʉnga kya veene.
15 Lɨno,
vaale vave vaasaagaga ikulongwi tsa kɨlʉnga kya veene ɨkya katale,
ʉkwonu ʉkwʉ vaahʉmile,
ndalɨno vaakiliwiike ʉkwa kʉ myavaavo.
16 Apeene avo gwanogaga vave mu kɨlʉnga ɨkɨnge ɨkɨnonu,
ɨkɨlʉti,
kwʉ kʉta kʉkyanya kwa Ngʉlʉve.
Ɨkɨ kyʉ mene ʉNgʉlʉve nivona soni wʉ avaanu avo vikʉmwɨlanga viita Ngʉlʉve va veene,
manya aavanotsehiitse ʉvʉtsenge kʉkyanya ʉkʉ.
17 Ʉlwɨdɨko lwampelye ʉAbulahamu ɨɨdɨkɨle ʉkʉmmʉmya ʉIsaka ave neekelo,
palya ʉpwʉ ʉlwɨdɨko lwa mwene lwagelilwe nʉ Ngʉlʉve.
Ʉmwene ʉjwa ʉvɨ ʉʉpɨlye ɨnyʉʉve jya Ngʉlʉve ɨɨdɨkye ʉkʉmmʉmya ʉmwana va mwene ʉlʉdɨɨga,h
18 nʉpwʉ jɨngave ʉNgʉlʉve vɨ aatye,
“Avaana va lʉjungu lwako valahʉma mwa Isaka.”i
19 ɄAbulahamu aale nʉ lwɨdɨko ʉkʉta ʉNgʉlʉve iweesa ʉkʉtsʉʉsa ʉnsimba.
Pa lisaago ɨlyo pahwaniine nʉ kʉta ʉAbulahamu aamwʉpɨlye ikange ʉIsaka ʉvɨ aasue pwʉ akakilivuka ikange ʉkʉhʉma kʉ vʉswe.
20 Ʉlwɨdɨko lwampelye ʉIsaka avape ʉlʉsajo avaana va mwene,
ʉYakobo nʉ Esau pa kulongwi tsa galya agalahʉmɨla kʉvʉlongolo.j
21 ɄYakobo wʉ ivona ʉwʉʉmi wa mwene vʉhegelye kʉ vʉmalɨlo,
ʉlwɨdɨko lwampelye avape ʉlʉsajo avaana va Yusufu wʉ vavɨlɨ,
akɨsaja kwa Ngʉlʉve kʉnʉ ɨntotiike mu nsaga gwa mwene.k
22 Namwene ʉYusufu wʉ ivona ʉwʉʉmi wa mwene vʉhegelye kʉ vʉmalɨlo,
ʉlwɨdɨko lwampelye atsove ikulongwi tsa Vaisilahɨli ʉmwʉ valahʉmɨla mu Misili.
Ikange akalagɨla ikulongwi tsa nsɨkɨ gwa kʉvʉlongolo itsa kʉvuja nago amatsege ga mwene kusɨɨla kʉ myavaavo.l
ɄMoose aamwɨdiike ʉNgʉlʉve
23 Ʉlwɨdɨko lwavapelye avahotsi va Moose vansihe ɨmyetsi gɨdatu ʉkʉhʉma ʉpwʉ aaholilwe.
Vaambwene ʉkʉta mwana nnonu,
pange vadwadage ʉkʉdeenya ʉlʉlagɨlo ʉlwavɨɨkilwe nʉ Falao.m
24 ɄMoose wʉ avye mbaha,
ʉlwɨdɨko lwampelye abeele ʉkʉtambʉlwa mwana va mwalɨve Falao.
25 Ʉmwene akɨhalɨla ʉkʉkʉvɨlwa paninie na vaanu va Ngʉlʉve ʉkʉlɨngʼaania nʉ kwɨhovosa mu mbiivi kʉ nsɨkɨ nsupi.
26 Aaweene ʉkʉkʉvɨlwa pa kulongwi tsa Mesiya kʉlɨ nʉ lʉvʉmbʉlɨlo siitso ʉkʉlɨngʼaania nʉ kʉhovoka nʉ vʉmosu wa mu Misili,
manya aapʉlɨkɨlaga ʉlwokelo lya sigono isiliitsa.
27 Ʉlwɨdɨko lwampelye ʉMoose ahege mu Misili kɨtsila kʉdwada ʉlʉviipo lwa nkʉlʉdeeva ʉmwʉ jiiviipila siitso.
Akasipa ʉngata muunu ʉvɨ ikʉmbona ʉNgʉlʉve ʉvɨ nivoneka.
28 Ʉlwɨdɨko lwampelye atengʉlɨtse ɨPasaka,
nʉ kʉbaka ʉnkisa pa syɨmo sya milyango,
pakʉta ʉnsuungʼwa ʉmbejangi aleke ʉkʉbuda isivele sya Vaisilahɨli.n
29 Ʉlwɨdɨko lwavapelye,
aVaisilahɨli vooni valovoke ɨnyanza ɨjya Shamu.
Vakagenda lwa silʉnde ndʉwʉ avaanu vigenda pa kɨlʉnga ɨkɨlagasu.
Lɨno aVamisili naveene wʉ vigela ʉkʉvomba ɨlyo,
vakakʉkwa nʉ kʉdwiviila.o
Avaanu avange avaamwɨdɨkaga ʉNgʉlʉve
30 Ʉlwɨdɨko lwavapelye aVaisilahɨli vatsʉngʉʉlage ʉlʉmato lwa vʉtsenge wa Yeliko kʉ sigono lekelakʉpamato (7).
Pwʉ kʉ vʉmalɨlo ʉlʉmato ʉlwa lʉkagwa lwoni.p
31 Ʉlwɨdɨko lwampelye ʉLahabu ʉvɨ aale nʼdala ndigu,
aleke ʉkʉbudwa wʉ vibudwa avanine ʉwʉ navaamwɨdɨkage ʉNgʉlʉve.
Nabudwe ʉlwakʉva aavambɨlye vʉnonu avatandɨɨli va Vaisilahɨli.q
32 Lɨno,
ndɨtsove kɨki ɨkya kwongeletsa?
Lola,
ʉnsɨkɨ ʉgʉ nagʉkakwɨle ʉkʉpanga ikulongwi tsa lwɨdɨko lwa Gidioni,
ʉBalaki,
ʉSamusoni,
ʉYefuta,
ʉDavʉdi,
ʉSamweli na vanyamalago.
33 Ʉlwɨdɨko lwavapelye avaanu avo valesaage amagoha ʉgwʉ vaalwitsaga ni ndeeva itsinge,
vaale valongotsi vagolosu,
vʉʉpɨlye galya ʉgwʉ aavahʉʉviitse ʉNgʉlʉve.
Ikange avange vaabungile ɨmilomo gya ngalamu,
34 vakatsimya indimbo tsa mwoto,
vakakuluka ʉkʉbudwa kʉ nzɨla jya mapanga.
Vaale vavʉla maka napeene vakapeewa amaka ʉkʉsikila pa kʉlesa ɨligoha nʉ kʉswɨma isipʉga sya vasikali avaahʉmaga kʉ silʉnga isinge.
35 Ʉlwɨdɨko lwavapelye avadala avange ʉwʉ avaanu va veene vaasue,
vatsʉʉsiwe,
vakavʉʉpɨlɨla vʉʉmi.
Ikange avaanu avange vakavona hʉba ʉkʉkʉvɨlwa nʉ kʉbudwa,
ʉkʉlɨngʼaania nʉ kʉnʼgalʉkɨla ʉNgʉlʉve pakʉta valekwe vavopolwa.
Vaavombile ewo pakʉta viitse vatsʉʉsiwe vave nʉ wʉʉmi ʉvʉnonu ʉvʉlʉti.
36 Avange tsyaviitsilaga ingelo tsa kʉkinilwa nʉ kʉtowa ni sikoti,
avange valɨkʉkʉngwa nɨ minyololo nʉ kʉtaagwa mu kɨkʉngwa.
37 Ikange avange vaatowaagwa na maganga,
avange vaavoolwagwa nɨ misumeeno,
avange vaabudwagwa na mapanga.
Avange vaale vagatsu ʉkʉsikila pa kʉswala ingʉvʉ tsa ngʼolo ni mene,
manya aveene vaale vavʉla kɨɨnu lwoni.
Vaakʉvɨlwagwa nʉ kʉvombelwa imbombo imbiivi siitso.
38 Valɨkʉjʉga kʉnʉ na kʉnʉ,
imanga ni ngumbwe tsikava tsʉ nyumba tsa kʉtaama.
Avaanu avo vaale vanonu,
ɨkɨlʉnga nakyanogelanile kɨve kya kʉtaama avaanu ndaavo.
39 Avaanu avo vooni ʉwʉ twitsova ikulongwi tsa veene,
vaaginiwaagwa pa kulongwi tsa lwɨdɨko lwa veene.
Paninie naago,
nakʉli nʉ mpamato ʉvɨ aapeevilwe itso itsʉ vaahʉʉvɨtsiiwe nʉ Ngʉlʉve.
40 Aga gaale ewo ʉlwakʉva ʉNgʉlʉve aatʉnotsehiitse ʉwe twɨ vooni ikulongwi inonu siitso.
Aavombile ewo pakʉta aveene avo valeke ʉkʉlongola ʉkʉsikitswa pa vʉkwɨlanilo veene,
apeene vapʉlɨkɨle ʉkʉsikila ʉpwʉ valasikitswa pa vʉkwɨlanilo paninie nʉʉwe.