Vaebulaniya 10

ɄYɨɨsʉ vɨ neekelo jya sikutsooni

1 Indagɨlo tsa Moose tsivye ʉngata mwɨtsɨɨtsɨ, kɨhwananitso kya galya amanonu agalahʉmɨla pa nsɨkɨ ʉgʉliitsa. Napeene nakwʉ kʉta indagɨlo itso tsivonia ʉvʉkwɨlanilo ʉmwʉ galaveela galya agaliitsa. Ʉkʉkongana nɨɨlyo, indagɨlo itso ni neekelo itso itsʉ vitsigilwa ʉkʉta vahʉmyage ʉmwaka nʉ mwaka, natsikʉvapelela vave vakwɨlanie pa kʉnkonga ʉNgʉlʉve. 2 Indagɨlo tsyale tsive tsiweesa ʉkʉvapoka avaanu, ndalɨno ineekelo itso tsidugile ʉkʉhʉmɨtsiwa, ʉlwakʉva avaanu avikɨsaja kwa Ngʉlʉve kʉ nzɨla ɨjyo, vaale viiva vavalatsiiwe kapamato vʉvʉle nʉ kʉkwɨlanila. Ikange inumbula tsa veene natsyale tsive tsikɨpʉlɨka ʉkʉhɨgwa pa mbiivi tsa veene. 3 Lɨno ineekelo itso tsilɨkʉvakʉmbʉsa imbiivi tsa veene ʉmwaka nʉ mwaka, 4 manya ʉnkisa gwa sidɨɨmo ndi senga ni mene naguweesa ʉkʉhetsa imbiivi.

5 Ʉkʉkongana nɨɨlyo, ʉKɨlɨsiti wʉ alɨ pa kɨlʉnga apa, aatsovile nʉ Ngʉlʉve akata,

“Navunogwa ineekelo tsa sidɨɨmo pange isyavʉpe,

apeene vunogwa ʉmmana ʉgwʉ waannotsehiitse ʉne.

6 Navukʉtsihovokela ineekelo tsyoni itsa kʉnyianywa wʉ ngʉge,

pange ineekelo itsa kʉvahetsehetsa avaanu imbiivi.

7 Pwʉ ndɨkata, ‘Lola, ʉne pwʉndɨle apa,

nditsile pakʉta ndɨvombe itsa vʉnogwe waako, ʉve vɨ Ngʉlʉve vango,

ndʉwʉ jɨvɨgilwe mu Vʉvɨge ʉVʉvalatse pa kulongwi tsyane.’ ”

8 Ɨlitatsi apo ʉYɨɨsʉ ʉjwa aatye, “Ʉve navunogwa ineekelo tsa sidɨɨmo pange isyavʉpe.” Ikange akata, “Navukʉtsihovokela ineekelo tsyoni itsa kʉnyianywa pange itsa kʉvahetsehetsa avaanu imbiivi.” Ʉjwa aatsovile ndavʉle, nʉpwʉ jɨngave ineekelo itso tsyahʉmɨtsiwaagwa ʉkʉkongana ni ndagɨlo tsa Moose. 9 Ikange aatsovile akata, “Lola, ʉne pwʉndɨle apa, nditsile pakʉta ndɨvombe itsa vʉnogwe waako, ʉve vɨ Ngʉlʉve vango.” Apo kwʉ kʉta, ʉNgʉlʉve aahetsiitse ineekelo itso inatsi, akapyanitsa ɨneekelo jya Yɨɨsʉ. 10 Lola kʉ vʉnogwe wa Ngʉlʉve, ʉwe tʉvalatsiiwe kʉ nzɨla jya neekelo ɨjyo ɨjya mmana gwa Yɨɨsʉ Kɨlɨsiti ʉgwʉ ɨɨhʉmiitse kapamato gʉve neekelo ɨjɨkwɨlanie.

11 Ʉkʉkongana nʉ lwɨdɨngʼano ʉlʉlaala, ʉnteeketsi ʉvaveetsaga, ɨkɨgono nɨ kɨgono, ɨɨmaga pa kʉvomba ɨmbombo jya kʉhʉmya ineekelo tsitsininie itsʉ natsiweesi lwoni ʉkʉhetsa imbiivi. 12 Lɨno, ʉmwene ʉKɨlɨsiti ɨɨhʉmiitse kapamato ave neekelo jya kʉhetsa imbiivi. Ɨneekelo ɨjyo jɨlɨ nʉ lʉvʉmbʉlɨlo lwa sikutsooni. Ʉkʉhʉma apo, akalʉta kutaama kʉ kɨvoko kya kʉndyo kya Ngʉlʉve, apoonu pa wɨɨmɨkiwa ʉvʉlʉti siitso. 13 Ʉkʉhʉma ʉnsɨkɨ ʉgwa ʉkʉsika lɨno, ipʉlɨkɨla ʉNgʉlʉve avalese avalʉgʉ vooni va mwene nʉ kʉvalongotsa lwoni. 14 Lola, kʉ nzɨla jya neekelo jya mwene ɨjyo mamato, ʉYɨɨsʉ ikʉvapelela avaanu avivalatsiwa vave nʉ vʉkwɨlanilo wa sikutsooni.

15 ɄMepo ʉMbalatse namwene ikwoleletsa ikulongwi itsi kwawe, ʉpwʉ iita,

16 “ɄNtwa ʉNgʉlʉve akata,

‘Ʉlʉ lwʉ lwɨdɨngʼano ʉlʉpya,

ʉlwʉ ndɨlavomba na Vaisilahɨli isigono isyo wʉ sisiike.

Ndɨlavɨɨka indagɨlo tsyango mu numbula tsa veene

nʉ kʉvɨga mu lʉhala lwa veene.’ ”

17 Ikange itsova iita, “Nandɨlakʉmbʉke ikange imbiivi tsa veene, pange imbombo tsa veene tsa vʉjagi.”

18 Pwʉ lɨno, imbiivi wʉ tsisyɨkɨliiwe, napilondiwa ikange ʉkʉhʉmya ineekelo tsa vʉsyɨkɨlo wa mbiivi.

Ʉlʉsipililo lʉlɨ nʉ lʉsajo

19 Vɨɨdɨkivajyango, ndikʉvavʉʉla ndiita, kʉ nzɨla jya nkisa gwa Yɨɨsʉ, ʉwe tuweesa ʉkwingila pa Vʉtaamo ʉVʉvalatse wa Ngʉlʉve kɨtsila lʉdwado. 20 Kʉ nzɨla jya vʉswe wa mwene, ʉYɨɨsʉ aadɨndwe ɨnzɨla ɨɨmya ikange ɨjikʉtʉpa ʉwʉʉmi ɨjigendela pa lipasiya ʉkwingila Pavʉvalatse Siitso. 21 Pwʉ lɨno, ʉwe tʉlɨ nave ʉnteeketsi ʉmbaha siitso ʉvɨ ilongotsa avaanu va Ngʉlʉve. 22 Lɨno tʉhegelele kwa Ngʉlʉve kʉ numbula ingolosu nʉ lwɨdɨko ʉlʉkwɨlanie, manya inumbula tsiitu tsimiitsiilwe ʉnkisa gwa Yɨɨsʉ pakʉta tsileke ʉkwɨpʉlɨka sivi, ikange nagyene ɨmihana giitu gɨvalatsiiwe na magasi amavadʉsu. 23 Tʉnywilile siitso mu lʉhʉʉvɨlo lwa lwɨdɨko lwitu ʉlwʉ tukɨpaala, manya ʉNgʉlʉve ʉvɨ aatʉpye ɨnyʉʉve ɨjyo immʉʉgʉ. 24 Nʉ jyʉnge ankangatsaage ʉnnine ʉkʉta oongeletse ʉkʉva nʉ lʉgano nʉ kʉvomba imbombo inonu. 25 Kwʉ baako ʉkʉlʉleka ʉlwiho lwa kʉlʉndamana paninie ndʉwʉ valʉlekile avaanu avange. Mu nsɨkɨ ʉgʉ, patʉnogye ʉwe nʉ jyʉnge ankangatsaage ʉnnine manya ɨkɨgono kya kʉkilivuka ʉNtwa ʉYɨɨsʉ kɨhegelye.

26 Lɨno ɨngave tugendelela ʉkʉvomba imbiivi kɨvʉgelele wʉ tʉvʉmanyile ʉwajɨlweli wa kulongwi tsa Yɨɨsʉ, apo tʉlʉmanye ʉkʉta najɨkʉli ɨneekelo ɨjyɨnge ɨjiweesa ʉkʉhetsa imbiivi. 27 Apeene tupʉlɨkɨla kʉ lʉdwado ʉvʉhɨgi wa Ngʉlʉve nʉ mwoto ʉnkali ʉgʉlongometsa avalʉgʉ va mwene. 28 Ʉmuunu ʉvaveetsaga ʉvaadeenyaga indagɨlo tsa Moose, naakolelwagwe ɨkɨsa, apeene aabudwagwa wʉ avaanu vavɨlɨ evo vadatu vahʉmiitse ʉwooleletsi wa veene ʉkʉta avombile ɨlyo. 29 Pwʉ lɨno musaage ʉkʉta lʉlaava ndeeti ʉlʉvʉngʉ kʉ muunu ʉvɨ ikʉmʼbeda ʉMwana va Ngʉlʉve, iita ʉkʉbenapʉla ʉnkisa gwa Yɨɨsʉ gwa lwɨdɨngʼano, ʉnkisa ʉgwambaliitse, ikange ikʉnʼdʉka ʉMepo ʉMbalatse ʉvɨ ileeta ʉlʉhʉngʉ lwa Ngʉlʉve kʉ vaanu va mwene! Tsa jɨlweli ʉlʉvʉngʉ lwa muunu ʉjwa lʉlaava lʉvaha ikange lʉkali ʉkʉlʉtɨɨlɨla. 30 Lola, tʉmmanyile ʉNgʉlʉve ʉvɨ aatye, “Ʉkʉlʉmbɨla mbombo jyango ʉne, ʉne neene ndɨlalʉmbɨla.” Ikange aatye, “ɄNtwa ʉNgʉlʉve alahɨga avaanu va mwene.” 31 Jɨlweli pidwatsa siitso ʉmuunu ʉntulanongwa ʉkʉvʉngwa nʉ Ngʉlʉve ʉmwʉmi.

32 Mukʉmbʉke isigono silya isya pa vʉtengʉlɨlo ʉpwʉ mwammanyile ʉYɨɨsʉ nʉ kwotsiwa. Nʉpwʉ jɨngave ʉvʉkʉvɨlwa ʉvʉlʉti waavaweene, ʉnyie mwasipilye mu vʉkʉvɨlwa ʉwa. 33 Ʉnsɨkɨ ʉgʉnge mwadʉkwagwa nʉ kʉkʉvɨlwa pavʉlongolo pa vaanu vongosu, napeene mwavasaagɨlɨlaga nʉ kʉvatanga avajiinyo avaavombelwagwa imbombo imbiivi ndʉʉnyie. 34 Mwavakolelaga ɨkɨsa avajiinyo avaakʉngilwe mu kɨkʉngwa, ikange mulɨkwɨdɨkɨla kʉ lʉhekelo ʉkʉpokwa ɨkyʉma kiinyo. Mwɨdɨkɨlaga ʉkʉvombelwa itso manya mwalʉmanyile ʉkʉta mulɨ ni siinu isinonu isilʉtɨɨlye siitso, ikange syʉ silaavekwo sikutsooni.

35 Pwʉ mugimbage ʉkʉmwɨdɨka ʉYɨɨsʉ kɨtsila kʉnyongʼonyoka amaka, manya mulapeewa ʉlwokelo ʉlʉlʉti. 36 Pavanogye muveetsage vaanu vanya lwɨjʉmɨɨlɨtso, pakʉta muweese ʉkʉvomba itsa vʉnogwe wa Ngʉlʉve nʉ kwʉpɨlɨla kɨlya ɨkyʉ ʉmwene avahʉʉviitse ʉnyie. 37 Lola, pa kulongwi tsa Mesiya ʉVʉvɨge ʉVʉvalatse wiita,

“Kasigye akavalɨlo kadebe siitso, ʉmwene ʉjwa ʉvɨ ikwitsa, jiisika, nakakeeletse.

38 Ikange ʉmuunu vango ʉvɨ ʉlwɨdɨko lʉmpelye ʉvʉgolosu, iiva nʉ wʉʉmi.

Lɨno, angave jiikilivukila kʉnsana, ʉne nandɨkammovokele ʉjwa.”

39 Lola, ʉwe natʉlɨ nda vaanu valya avikilivukila kʉnsana nʉ kwongometswa, apeene tʉlɨ paninie na valya avikʉmwɨdɨka ʉNgʉlʉve nʉ kʉpeewa ʉvʉpoki.