Inyɨsajo tsa mu liheema lya mu kɨlʉnga
9
1 Ʉlwɨdɨngʼano ʉlʉtatsi lwa Ngʉlʉve na Vaisilahɨli lwale na poonu apavalatse pa kwɨsajɨla kʉ mwene ʉNgʉlʉve mu kɨlʉnga ʉmʉ.
Ikange lwale ni ndagɨlo tsa kʉlʉngɨkɨla ʉmwa kʉvombela inyɨsajo itso.
2 Apo lyanotsiiwe ɨliheema lya kwɨsajɨla kwa Ngʉlʉve ɨlyale ni sijumba sivɨlɨ.
Mu kɨjumba ɨkɨtatsi kyalepwo ɨkɨdʉlɨkɨlo kya nyaale nɨ meesa ɨjyʉ vaavɨɨkaga ɨmikate gya syavʉpe kwa Ngʉlʉve.
Ɨkɨjumba ɨkɨ kyatambʉlwagwa Pavʉvalatse.
3 Ikange lyalepwo ɨlipasiya ɨlyagavile ɨkɨjumba ɨkɨtatsi nɨ kya vɨɨlɨ.
Ɨkɨjumba ɨkya vɨɨlɨ kyatambʉlwagwa Pavʉvalatse Siitso.
4 Mu nʼgati mu kɨjumba ɨkyo ɨkya vɨɨlɨ mwale nɨ kɨteekelelo kya mbavo ɨkyabakilwe ɨsahabu.
Apo paale pa kʉvombela ʉlʉtuungʼilitso.
Ikange mu kɨjumba ɨkyo lyalemwo ɨLisandʉka lya Lwɨdɨngʼano ɨlyʉ nalyene lyale lya mbavo,
nalyene lyabakilwe ɨsahabu imbasu tsyoni.
Mu nʼgati mu lisandʉka ɨlyo,
mwale nɨ kɨvya kya sahabu ɨkyale nɨ mana.
a Ikange mu lisandʉka ɨlyo mwale nʉ nsaga gwa Aloni ʉgwale na maani agaalembile,
ikange mwale na maganga amapalabaate gavɨlɨ ʉmwʉ tsyavɨgilwe indagɨlo kɨtsigo (10) tsa Ngʉlʉve.
5 Pakyanya pa lisandʉka ɨlyo,
syalepwo isihwani sivɨlɨ sya makelubi.
Amakelubi sipeliwa sya kʉkyanya.
Isyo syavɨɨkilwe sivoniage ʉwɨɨmɨkiwa wa Ngʉlʉve.
Syale na mapapatɨlo ʉgwʉ gatandaatsiiwe mukyanya pa kɨtaamilo kya lʉhʉngʉb lwa Ngʉlʉve.
Napeene lɨno nansɨkɨ gwa kʉlʉvʉla ikulongwi tsa siinu isyo kɨpamato pamato,
kɨnʼgati.
6 Lola,
isiinu isyo syoni wʉ sinotsiiwe nʉ kʉvɨɨkwa vʉnonu,
nɨ kɨnge apoonu pa kyene,
pwʉ avateeketsi valɨkwingila mu kɨjumba ɨkɨtatsi mu kʉvomba ɨmbombo jya veene jya kwɨsaja kwa Ngʉlʉve.
Valɨkʉvomba ɨmbombo ɨjyo ɨkɨgono nɨ kɨgono.
7 Napeene,
ʉnteeketsi ʉmbaha mwene vɨ aatavʉlɨlwagwa ʉkwingila mu kɨjumba kya vɨɨlɨ,
kapamato kʉ mwaka.
Namwene natavʉlɨlwe ʉkwingila ʉmwa kɨtsila nkisa gwa neekelo kwa Ngʉlʉve.
Ɨneekelo ɨjyo jyale jya kwɨvalatsa imbiivi tsa mwene jyʉmwene ni tsa vaanu avange vooni itsʉ vavombile kɨtsila kʉlʉmanya.
8 Pwʉ kʉ nzɨla jya lʉvaatɨko ʉlwa,
ʉMepo ʉMbalatse ikʉtʉvonia pavʉvalasu ʉkʉta ɨnzɨla jya kwingilila Pavʉvalatse Siitso jyale jɨkaanale ʉkʉdɨndʉlwa ʉnsɨkɨ gʉlya gwoni wʉ ɨliheema ɨlitatsi livombelwa ɨmbombo.
9 Ɨkɨhwananitso ɨkyo kivonia ikulongwi tsa nsɨkɨ gwa lɨno,
manya isyavʉpe ni neekelo isihʉmɨtsiwa kwa Ngʉlʉve,
nasiweesi ʉkʉpela ʉkwɨpʉlɨka sivi kwa vaanu kʉve kʉnonu.
10 Lola indagɨlo itso tsilotsa kwene kʉ syakʉlya,
kʉ syakʉnywa,
na kʉ nyiiho itsilɨ pongosu tsa kwɨvalatsa kɨmmana kwene.
Itso tsyalagɨliilwe tsikongwagwe ʉkʉsikila pa nsɨkɨ ʉgwʉ ʉNgʉlʉve alaandʉla isiinu syoni sive sipya.
ɄYɨɨsʉ vɨ neekelo ɨjɨtsila vʉlema ʉvʉveetsaga
11 Lola ʉKɨlɨsiti iitsile pakʉta ave vɨ nteeketsi ʉmbaha va mbombo tsyoni inonu itsikwitsa.
c Ʉmwene iingye mu liheema ɨlivaha ikange ɨlɨvʉla vʉviivi ʉvʉveetsaga ɨlya kʉkyanya.
Ɨlyene ɨlyo nalyanotsiwe na vaanu,
ikange nalya mu kɨlʉnga ɨkɨ.
12 Ʉjwa niingile Pavʉvalatse Siitso kʉnʉ agegile ʉnkisa gwa mene nʉ gwa senga.
Apeene iingye ʉmwa kapamato vʉvʉle kuhɨlɨka ʉnkisa gwa mwene jyʉmwene.
Ʉmwene vɨ aatʉhombye ʉvʉpoki wiitu wa sikutsooni kʉ nzɨla jya neekelo jya mwene.
13 Ʉkʉkongana nʉ lwɨdɨngʼano ʉlʉlaala,
ʉnkisa gwa mene nʉ gwa senga nɨ lyela lya neekelo tsa sigwada,
vaamiitsilwagwa avaanu avɨkoleliinie pakʉta ɨmihana gya veene gɨvalatsiwe.
14 Ɨngave wʉ jɨlɨwo,
pwʉ ʉnkisa gwa Kɨlɨsiti gʉlɨ na maka amalʉti siitso!
Ʉgwa gwʉ guvalatsa inumbula tsiitu ʉkʉhʉma mu mbombo tsa vʉtulanongwa pakʉta tʉmbombelage ʉNgʉlʉve ʉMwʉmi.
ɄYɨɨsʉ,
kʉ maka ga Mepo va mwene ʉvɨ alɨkwo sikutsooni,
ɨɨhʉmiitse kwa Ngʉlʉve ave neekelo ɨjɨtsila vʉviivi ʉvʉveetsaga.
15 Ʉkʉkongana nɨɨlyo,
ʉYɨɨsʉ vɨ ikʉvasajania avaanu nʉ Ngʉlʉve mu lwɨdɨngʼano ʉlʉpya.
Ivomba ɨlyo pakʉta valya avaahalilwe nʉ Ngʉlʉve vʉʉpɨlɨle ʉwʉʉmi wa sikutsooni ʉwʉ aavahʉʉviitse ʉkʉvapa.
Lola ʉYɨɨsʉ aasue pakʉta avagombole avaanu ʉkʉhʉma mu mbiivi tsa veene itsʉ vaavombile wʉ valɨ paasi pa vʉlongotsi wa lwɨdɨngʼano ʉlʉlaala.
16 Lola,
ʉmuunu angavɨɨke ʉlʉleko lwa vʉhaale,
pwʉ ʉkʉhaala kʉvombeka kʉmbele wʉ jɨmanyikiike ʉkʉta jɨlweli ʉndekalʉleko ʉjwa amalile ʉkʉswa.
17 Nalwene ʉlʉleko lwiva na maka peene palya wʉ ʉmuunu ʉvɨ aatsovile ʉlʉleko,
asue.
Nalwiva na maka ɨngave ʉndekalʉleko ʉjwa apitsiige mwʉmi.
18 Ɨkɨ kyʉ mene nalwene ʉlwɨdɨngʼano ʉlʉtatsi lwavɨɨkilwe wʉ ʉnkisa gwa sidɨɨmo gʉduudilwe.
19 Ʉnsɨkɨ gʉlya ʉMoose wʉ amalile ʉkʉvɨmbɨla aVaisilahɨli indagɨlo tsyoni tsa Ngʉlʉve,
aatoolile ʉnkisa gwa senga nʉ gwa mene akahanza na magasi.
Akatsaba ʉmwa ʉlwage ʉlʉduungʼu ʉlwʉ akʉngɨliitse mu lʉsamba lwa libɨkɨ ɨlɨhisopo,
akamiitsila pa kɨtabu kya ndagɨlo tsa Ngʉlʉve.
Akagendelela ʉkʉvamiitsila ʉnkisa ʉgwa avaanu vooni.
20 Pwʉ akatsova akata,
“Ʉgʉ gwʉ nkisa ʉguvonia ʉlwɨdɨngʼano lwa Ngʉlʉve ʉlwʉ alagye mulʉkongage.”d
21 Vʉvʉle vʉle,
ʉMoose akamiitsila ʉnkisa ɨliheema lya Ngʉlʉve ni siinu syoni isyavombelwagwa ɨmbombo pa nsɨkɨ gwa kwɨsaja kwa Ngʉlʉve.
22 Lola ʉkʉkongana ni ndagɨlo tsa Moose,
isiinu syoni syavalatsiwaagwa nʉ nkisa,
ikange natsyene imbiivi natsiweesi ʉkʉsyɨkɨlwa kɨtsila kʉduudika ʉnkisa.
ɄYɨɨsʉ ɨɨhʉmiitse kapamato vʉvʉle akahetsa imbiivi tsa vaanu
23 Ɨliheema nasi sikongʼolo isyʉ vaavombelaga ɨmbombo jya kʉhʉmɨhɨtsa isyavʉpe ʉmwa syale kɨhwananitso kya siinu silya isya kʉkyanya,
syavalatsiwaagwa nʉ nkisa gwa sidɨɨmo.
Lɨno,
isyene isiinu sya kʉkyanya panogye sivalatsiwe nɨ neekelo ɨnonu siitso ʉkʉlʉtɨɨlɨla ʉnkisa gwa sidɨɨmo.
24 Lola ʉKɨlɨsiti niingile Pavʉvalatse apanotsiiwe na vaanu,
ʉpwʉ pavye kɨhwananitso vʉvʉle kya poonu apalɨ kʉkyanya ʉkʉ.
Apeene ʉmwene iingye kʉkyanya kʉkwene,
ʉkwʉ nalɨ lɨno alɨ pamiiho pa Ngʉlʉve pa kulongwi tsiitu.
25 Ikange ʉYɨɨsʉ niingile kʉkyanya pakʉta ɨhʉmyage kakongosu aveetsage neekelo.
Naave ndʉwʉ alɨwo ʉnteeketsi ʉmbaha ʉvɨ ikilivukila ʉkwingila Pavʉvalatse Siitso,
ʉmwaka nʉ mwaka,
kuhɨlɨka ʉnkisa ʉgʉtava gwa mwene.
26 Jyale jɨve ewo,
ndalɨno ʉYɨɨsʉ avye va kʉkilivukila akʉvɨlwe kakongosu ʉkʉhʉma ʉpwʉ kyapelilwe ɨkɨlʉnga.
Lɨno nawʉ jɨlɨwo!
Ʉmwene itsile kapamato vʉvʉle,
mu sigono isi isya kʉ vʉmalɨlo,
pakʉta ahetse imbiivi tsiitu kʉ nzɨla jya kwɨhʉmya jyʉmwene ave neekelo.
27 Ikange ndʉwʉ avaanu vooni vavɨɨkɨliilwe ʉkʉswa kapamato vʉvʉle pwʉ kʉkongage ʉkʉhɨgwa,
28 vʉvʉle vʉle ʉKɨlɨsiti aahʉmɨtsiiwe ave neekelo kapamato pakʉta ahetse imbiivi tsa vaanu vongosu.
Ʉmwene aliitsa ʉlwa vɨɨlɨ,
apo naliitse kʉ vʉsumbe wa kʉhetsa imbiivi ikange,
apeene aliitsa kukʉvapa ʉvʉpoki valya avikʉmpʉlɨkɨla kʉ vʉsʉʉkwa.