ɄYɨɨsʉ vɨ nteeketsi ʉmbaha
8
1 Ɨkɨɨnu ɨkɨvaha mwitso itsʉ twitsova,
kyʉ ɨkɨ ɨkya kʉta tʉlɨ nave ʉnteeketsi ʉmbaha ʉvɨ anogye,
ataamile kʉ kɨvoko kya kʉndyo kya Ngʉlʉve ʉNdʉti,
apoonu pa wɨɨmɨkiwa ʉvʉlʉti ʉkʉ kʉkyanya.
2 Ikange ivomba ɨmbombo jya vʉteeketsi Pavʉvalatse apalɨ mu liheema lya lweli ɨlɨnotsiiwe nʉ Ntwa ʉNgʉlʉve jyʉmwene,
nalɨnotsiiwi na vaanu.
3 Ʉnteeketsi ʉmbaha ʉvaveetsaga ihalwa ave va kʉhʉmya isyavʉpe ni neekelo.
Wʉ vʉvʉle vʉle,
najyʉ nteeketsi viitu ʉmbaha ʉYɨɨsʉ panogiwaagwa ave nɨ kɨɨnu kya kʉhʉmya.
4 Ɨkaale jɨve ʉYɨɨsʉ atsiige itaama mu kɨlʉnga ʉmʉ,
nakale ave nteeketsi napadebe,
ʉlwakʉva kʉlɨ vateeketsi avange ʉwʉ ʉkʉkongana ni ndagɨlo tsa Moose,
wʉ vivomba ɨmbombo jya vʉteeketsi.
5 Avateeketsi avo vikʉmbombela ʉNgʉlʉve Pavʉvalatse ʉwʉ kɨhwananitso ikange mwɨtsɨɨtsɨ gwa Pavʉvalatse wa kʉkyanya.
Ɨkɨ kyʉ kɨɨnu ʉMoose wʉ ikɨtetengʼania ʉkʉnotsa ɨheema jya kwɨsajɨla kwa Ngʉlʉve,
ʉNgʉlʉve aandagye akata,
“Ʉnotse ɨheema ʉkʉkongana ndʉwʉ ndɨkakʉvoniitse ɨkɨhwani kya jyene ʉkʉ kʉ kɨdugala ɨkya Sinai.”a
6 Napeene apo,
ʉKɨlɨsiti aapeevilwe ɨmbombo ɨnonu ʉkʉlʉtɨɨlɨla ɨjya vateeketsi avange avo,
ndʉwʉ ʉlwɨdɨngʼano ʉlʉpya ʉlwʉ ʉYɨɨsʉ intuuni va lwene,
lʉlʉti kʉ lʉlya ʉlwa katale.
Ʉlʉ lʉlɨ nɨ nyʉʉve ɨnonu siitso ʉkʉlʉtɨɨlɨla ɨnyʉʉve jya lwɨdɨngʼano lwa katale.
7 Jyale jɨve ʉlwɨdɨngʼano ʉlʉtatsi lʉkwɨlanie pa vʉgolosu,
nakʉkaale kʉlondiwaagwe ʉkʉva nʉ lwɨdɨngʼano lwa vɨɨlɨ.b
8 Lɨno ʉNtwa ʉNgʉlʉve jyʉmwene aavaweene avakʉkʉjiitu valya vatulanongwa.
Pwʉ akavavʉʉla akata,
“ ɄNtwa ʉNgʉlʉve iita,
‘Pʉlɨhɨtsi,
ʉnsɨkɨ gukwitsa,
ʉpwʉ ndɨlavomba ʉlwɨdɨngʼano ʉlʉpya na Vaisilahɨli na Vayuuda.c
9 Ʉlwɨdɨngʼano ʉlʉpya ʉlʉ nalʉlaave nda lʉlya ʉlwa katale ʉlwʉ ndyavɨɨkile na vakʉkʉjyavo,
ʉpwʉ ndyavalongwitse vʉnonu wʉ vihʉma kʉ Misili.
Ndɨlavomba ʉlwɨdɨngʼano ʉlʉpya na veene,
ʉlwakʉva navaale vahʉʉgʉ ʉkʉkonga ʉlwɨdɨngʼano lwango lwa katale.
Ɨkɨ kyʉ kɨɨnu ɨkyambɨɨkile ndɨleke ʉkʉvasaagɨlɨla ikange.
10 Ʉlʉ lwʉ lwɨdɨngʼano ʉlʉpya ʉlwʉ ndɨlavomba na Vaisilahɨli,
isigono isyo wʉ sisiike.
Ndɨlavɨɨka indagɨlo tsyango mu numbula tsa veene nʉ kʉvɨga mu lʉhala lwa veene.
Nʉʉne ndɨlaava Ngʉlʉve va veene,
naveene valaava vaanu vango.
11 Napalalondiwaagwe ikange ʉmuunu va kʉmmanyiisa ʉnnine,
evo ʉmuunu va kʉmbʉʉla ʉlʉkololwe ateetsage,
“Immanye ʉNtwa ʉNgʉlʉve.”
Lola vooni,
ʉkʉhʉma ʉnʼdebe ʉkʉsikila ʉmbaha,
valaava vammanyile ʉne.
12 Manya ndɨlavasyɨkɨla ʉvʉtulanongwa wa veene,
nandɨlakʉmbʉke ikange imbiivi tsa veene.’ ”d
13 ɄNgʉlʉve ʉpwʉ iita ʉlʉ lwɨdɨngʼano “lʉpya,”
jivoneka ʉkʉta lʉlya ʉlʉtatsi lwɨpelile lʉlaala.
Ɨkɨɨnu ɨkyʉ kɨlaala nɨ kyʉ kɨnyakaswike,
kɨlɨ piipi ʉkʉjaganika.