Ʉvʉteeketsi wa Melekizedeki
7
1 ɄMelekizedeki ʉjwa aale nkʉlʉdeeva va vʉtsenge ʉwɨɨlangwagwa Salemu,
ikange aale nteeketsi va Ngʉlʉve ʉNdʉti va syoni.
Aalʉtile kukʉmwambɨlɨla nʉ kʉnsaja ʉAbulahamu wʉ ikilivuka ʉkʉhʉma kʉ ligoha ʉkwʉ avalesiitse avakʉlʉdeeva.
2 Pwʉ namwene ʉAbulahamu akatoola ɨligavo lipamato mu magavo kɨtsigo (10) ga siinu syoni isyagalwe kʉ ligoha akampa ʉMelekizedeki.
Ʉvʉganulu wa litaawa Melekizedeki kwʉ kʉta “ʉnkʉlʉdeeva ʉnʼgolosu.”
Ikange ʉpwʉ itambʉlwa nkʉlʉdeeva va Salemu,
kwʉ kʉta “ʉnkʉlʉdeeva ʉvipela ʉlʉnotsehetso.”a
3 Kʉvʉla kulongwi tsa dadaaje va Melekizedeki,
pange ikulongwi tsa vanyina evo ikulongwi tsa vanyienya va mwene.
Ikange kʉvʉla kulongwi tsa kʉholwa kwa mwene pange ʉkʉswa kwa mwene.
Ʉmwene alɨ ndʉ Mwana va Ngʉlʉve nʉ kʉhʉmana nɨɨlyo,
ʉmwene nteeketsi va nsɨkɨ gwoni.
4 Ndolage ʉmwʉ aaveelye mbaha ʉMelekizedeki.
Ʉkʉkongana nɨɨlyo,
ʉkʉkʉjiitu ʉAbulahamu aampye ɨligavo lipamato mu magavo kɨtsigo ga siinu isyagalwe kʉ ligoha.
5 Indagɨlo itsʉ ʉMoose ʉʉpɨlye kwa Ngʉlʉve tsiita,
avateeketsi,
ʉwʉ vooni vaahʉmaga mu lʉjungu lwa Lawi,
b vatoolage ɨligavo lya kɨtsigo lya vʉkavi wa vajyavo aVaisilahɨli.
c Vaavombaga ewo nʉpwʉ jɨngave vaale valʉkololwavo,
kwʉ kʉta avaanu va lʉjungu lwa Abulahamu.
6 Lɨno ʉMelekizedeki ʉjwa naale va lʉjungu lwa Lawi,
paninie nɨɨlyo aatoolile ɨligavo ɨlya kɨtsigo ʉkʉhʉma kwa Abulahamu.
Ikange aansajile ʉAbulahamu ʉvɨ aale mu lwɨdɨngʼano nʉ Ngʉlʉve.
7 Jɨlweli tʉlʉmanyile ʉkʉta ʉmuunu ʉvɨ alɨ na maka ga kʉsaja vɨ mbaha ʉkʉlʉtɨɨlɨla kwʉlya ʉvisajiwa.
8 Kʉ lʉvasu lwa vateeketsi va lʉjungu lwa Lawi ʉwʉ vikwʉpɨlɨla ɨligavo lya kɨtsigo,
kʉ vʉmalɨlo wa veene viiswa.
Lɨno ʉMelekizedeki avalʉtɨɨlye avo ʉlwakʉva paninie nʉ kwʉpɨlɨla ɨligavo ɨlyo,
ʉmwene itsowa ʉkʉta apitsiige mwʉmi ʉkʉsikila ɨleelo.
9 Ikange tuweesa ʉkʉta,
najyʉ Lawi ʉvɨ avaholwa va mwene vikwʉpɨlɨla ɨligavo lya kɨtsigo,
aahʉmiitse ɨligavo lya kɨtsigo kwa Melekizedeki ʉkʉgendela kwa kʉkʉʉje ʉAbulahamu.
10 Ʉnsɨkɨ ʉgwa ʉLawi aale akaanale ʉkʉholwa,
kwʉ kʉta aapitsiga alɨ mu mmana gwa Abulahamu palya ʉpwʉ ʉMelekizedeki aalʉtile kukʉmwambɨlɨla ʉAbulahamu.
ɄYɨɨsʉ ahwaniine nʉ Melekizedeki
11 Indagɨlo tsa Moose tsyahʉʉvɨlaga ʉvʉteeketsi wa vaanu va kɨvʉmbʉkʉ kya Valawi.
Lɨno,
ɨmbombo jya Valawi jyale jɨve jɨkwɨtsiitse ʉwɨgane wa Ngʉlʉve,
napaale pilondiwaagwa ʉkʉvepwo ʉnteeketsi ʉjyʉnge ʉvɨ ʉvʉteeketsi wa mwene navʉhwaniini nʉʉwa,
apeene ʉvʉteeketsi wa lʉkɨndɨ lwa Melekizedeki,
ʉlʉtava lwa Aloni.
12 Ikange ʉvʉteeketsi ʉwa vʉngaandʉke,
indagɨlo natsyene tsikwandʉka.
13 Lɨno ʉvɨ itsowa apa vɨ Ntwa viitu ʉYɨɨsʉ.
Ʉmwene muunu va kɨvʉmbʉkʉ ɨkɨnge.
Ikange nakʉli ʉmuunu va kɨvʉmbʉkʉ kya mwene ʉvɨ agelile lʉsiku ʉkʉmbombela ʉNgʉlʉve ɨmbombo jya vʉteeketsi.
14 Lola ɨmanyikiike ʉkʉta ʉNtwa viitu ʉYɨɨsʉ aahʉmile mu lʉjungu lwa Yuuda,
nʉ Moose ʉpwʉ aatsovaga ikulongwi tsa vateeketsi,
naatsove ɨkɨveetsaga pa kulongwi tsa vʉteeketsi mu lʉjungu ʉlwa.
15 Lola aga ʉgwʉ nditsova,
lɨno galɨ pavʉvalasu siitso,
manya ahʉmye ʉnteeketsi ʉjyʉnge ndʉ Melekizedeki.
16 Ʉmwene naave nteeketsi kʉ nzɨla jya kʉkwɨtsa ʉlʉlagɨlo lwa kʉva muunu va lʉjungu lwa Lawi,
apeene aale nteeketsi ʉkʉkongana na maka ga wʉʉmi wa mwene ʉwʉ navuweesi ʉkʉvejangwa.
17 Mwɨlyo,
ʉVʉvɨge ʉVʉvalatse vukwoleletsa wiita,
“Ʉve ʉlɨ nteeketsi va sikutsooni,
mu lʉkɨndɨ lwa Melekizedeki.”d
18 Kʉ lʉvasu lʉpamato,
ʉlʉlagɨlo lwa katale lʉlekilwe ʉlwakʉva lʉvʉla maka,
ikange nalutangɨla kɨɨnu.
19 Indagɨlo tsa Moose tsyalemilwe ʉkʉleeta ʉvʉkwɨlanilo wa kɨveetsaga.
Apeene lɨno tʉlɨ nʉ lʉhʉʉvɨlo ʉlʉlʉti,
ʉlwʉ lukʉtʉhegeletsa pawiipi nʉ Ngʉlʉve.
20 Ʉkʉlʉtɨɨlɨla paago,
ʉvʉteeketsi wa Yɨɨsʉ,
vʉlɨ nʉ lwɨjyɨgo lwa Ngʉlʉve.
Ʉlwa nalwavombeke ewo kʉ vange valya avaavɨɨkilwe mu vʉteeketsi.
21 Pa kulongwi ɨjyo ɨjya Ngʉlʉve ʉkʉmbɨɨka ʉYɨɨsʉ nteeketsi,
ʉVʉvɨge ʉVʉvalatse wiita,
“ɄNtwa ʉNgʉlʉve ɨjyɨgile,
ikange nalaandʉle ʉwɨgane wa mwene lʉsiku ʉwa kʉta,
‘Ʉve ʉlɨ nteeketsi va sikutsooni.’ ”e
22 Pwʉ kʉ nongwa jya lwɨjyɨgo ʉlwa,
ʉYɨɨsʉ vɨ lʉpɨngɨkɨlo lwa lwɨdɨngʼano ʉlʉpya.
Ʉlwɨdɨngʼano ʉlʉ lʉnonu siitso ʉkʉlʉtɨɨlɨla lʉlya ʉlwa katale.
23 Lola avaanu avange avaale vateeketsi vaale vongosu,
manya ʉvʉswe waavadumulilaga valeke ʉkʉgendelela mu mbombo ɨjyo jya vʉteeketsi.
24 Lɨno ʉYɨɨsʉ vɨ nteeketsi va sikutsooni ʉlwakʉva ʉmwene aasue,
akatsʉʉka,
lɨno mwʉmi sikutsooni.
25 Pwʉ lɨno alɨ na maka ga kʉvapoka lwoni avaanu vooni avikwitsa kwa Ngʉlʉve kʉ nzɨla jya mwene.
Ʉmwene mwʉmi sikutsooni,
ikʉvadoovela kwa Ngʉlʉve.
26 Lola ʉYɨɨsʉ vɨ nteeketsi ʉmbaha ʉvɨ anogye kwawe ʉlwakʉva ʉmwene imbalatse,
intsila vʉnangi,
pange vʉtulanongwa.
ɄNgʉlʉve aammetsiitse mu vatulanongwa,
akantotsa kʉkyanya.
27 ɄYɨɨsʉ nilondiwa ʉkʉhʉmya ineekelo tsa kɨgono nɨ kɨgono ndʉwʉ avavaha va vateeketsi va katale vaavombaga.
Avo vaavombaga ewo kʉ nongwa jya kwɨvalatsa vaveene,
pwʉ kʉmbele vavavalatse avaanu avange.
Lɨno ʉmwene ʉYɨɨsʉ ɨɨhʉmiitse akava neekelo kapamato kʉ mbiivi tsa vaanu vooni,
ɨjyo jɨkava jɨkwɨlye kʉ nsɨkɨ gwoni.
28 Lola ʉlʉlagɨlo lwa Moose lukʉvatavʉla avaanu ʉwʉ kɨvʉmuunu vadekedeke vave vateeketsi vavaha.
Lɨno ʉNgʉlʉve,
kʉ lwɨjyɨgo,
aamwomwe ʉMwana va mwene wʉ lʉmalile ʉkwitsa ʉlʉlagɨlo lwa Moose.
Namwene ʉMwana aavɨɨkilwe ave vɨ nteeketsi ʉmbaha ʉvakwɨlanie sikutsooni.