Ʉvʉtalamu wa kʉlʉleka ʉlwɨdɨko
6
1 Pwʉ lɨno tʉleke ʉkʉtsiga ni manyiiso tsa Kɨlɨsiti itsʉ twɨɨmanyiisiitse pa vʉtengʉlɨlo,
apeene tʉgendelelage ʉkwɨmanyiisa ʉkʉtsisika ʉpwʉ twiva vadʉlʉsu va lwɨdɨko.
Ikange tʉleke ʉkʉtsiga twitsova ikulongwi tsa kʉlaata imbombo imbiivi itsipela ʉvʉswe pange ʉkʉva nʉ lwɨdɨko kwa Ngʉlʉve.
2 Ikange tʉleke ʉkʉtsiga tumanyiisa ikulongwi tsa lwotso evo ikulongwi tsa kʉvɨɨkɨlwa isivokoa evo ikulongwi tsa kʉtsʉʉka avaswe ni tsa vʉhɨgi wa sikutsooni.
3 Apeene ʉNgʉlʉve angɨgane jʉtugendelela ʉkʉmanyiisa ikulongwi tsa kʉdʉlʉka mu lwɨdɨko.
4 Lola,
avaanu avange ʉwʉ vaadɨndʉliiwe,
vakavʉmanya ʉwiipa wa Ngʉlʉve,
vakata ʉkʉhanga ɨkɨkʉngɨlwa kya Mepo ʉMbalatse,
5 vakata ʉkʉvonza ʉvʉnonu wa limenyu lya Ngʉlʉve nʉ kʉlʉmanya amaka ga vʉtavala wa Ngʉlʉve mu kɨlʉnga ɨkikwitsa,
6 vakakʉleka ʉkʉmwɨdɨka ʉNgʉlʉve.
Avo vavyʉta vikʉmʼbuda ʉMwana va Ngʉlʉve kʉ nzɨla jya kʉntovelela ɨmisumali pa kɨdamingʼanie ʉlwa vɨɨlɨ,
nʉ kʉnkotsa isoni pa vaanu.
Pwʉ lɨno avaanu avo najiweesekana ʉkʉvavɨɨka vapelage ikange.
7 Lola,
isilɨmɨla isitimilwa nɨ sula nʉ kʉmetsa vʉnonu imbeju kʉ lʉvʉmbʉlɨlo lwa valɨmi avikʉsilɨma,
ʉNgʉlʉve ikʉsisaja.
8 Lɨno isilɨmɨla isimetsa ɨmitwinyo na maanu,
siiva sitsila lʉvʉmbʉlɨlo.
Isyo siveetsaga silotsa kukootolwa,
pwʉ kʉ vʉsililo siliitsa sinyianywa.
9 Vagane vango,
nʉpwʉ jɨngave twitsova ndavʉle,
ʉwe tukwɨdɨka ʉkʉta kwanyie kwʉsile isiinu isinonu isyʉ muvomba,
isyʉ sikwɨdɨngʼana nʉ vʉpoki.
10 Lola,
ʉNgʉlʉve inʼgolosu,
ivɨɨkɨla ʉntɨma ʉkwɨkupila kwanyie pa mbombo jya mwene,
na pa kʉvonia ʉlʉgano lwinyo kʉ mwene kʉ nzɨla jya kʉvatanga avɨɨdɨkivajiinyo ʉkʉhʉma pa vʉtengʉlɨlo ʉkʉsika lɨno.
11 Ndɨlɨ nʉ vʉnogwe vʉvaha siitso wa kʉmbʉʉla mpamato mpamato mwanyie agendelelage ʉkʉgimba ʉkʉvomba ɨmbombo jya Ngʉlʉve nʉ kʉvagana avange ʉkʉtsisika kʉ vʉsililo,
pakʉta ago ʉgwʉ muhʉʉvɨla giitse gavombeke.
12 Muleke ʉkʉva voolo,
apeene mwɨgage kʉ valya ʉwʉ kʉ nzɨla jya kwɨdɨka nʉ kʉsipa,
vikwʉpɨlɨla galya ʉgwʉ ʉNgʉlʉve aavahʉʉviitse ʉkʉvapa aveene.
Ʉlʉhʉʉvɨtso lwa Ngʉlʉve lwa jɨlweli
13 Katale,
ʉNgʉlʉve ʉpwʉ aammʉʉviitse ʉAbulahamu,
ɨɨjyɨgile kʉ litaawa lya mwene jyʉmwene ʉlwakʉva naavepwo ʉmbaha ʉkʉndʉtɨɨlɨla ʉmwene.
14 Apo ʉNgʉlʉve aatye,
“Jɨlweli jʉndikʉkʉsaja nʉ kʉvoolosa avaanu va lʉjungu lwako vave vongosu.”b
15 Pwʉ ʉAbulahamu akapʉlɨkɨla kʉ lʉsipililo ʉlʉhʉʉvɨtso ʉlwa ʉkʉsikila ʉpwʉ tsivombeka itso kʉ mwene.
16 Avaanu wʉ vikɨjyɨga,
vitambʉla ɨlitaawa lya muunu ʉmbaha ʉkʉlʉtɨɨlɨla aveene,
nʉ kwɨjyɨga ʉkwa kuvonia ʉkʉta galya agatsovilwe ga jɨlweli.
Ʉkʉvomba ndavʉle kuhetsa ʉkʉkaningʼana.
17 Namwene ʉNgʉlʉve ɨɨjyɨgile pakʉta avavonie avaanu avalʉʉpɨlɨla ʉlʉsajo ʉlwʉ aammʉʉviitse ʉAbulahamu ʉkʉta nalʉweesi ʉkwandʉka.
18 ɄNgʉlʉve angammʉʉvɨtse ʉmuunu nʉ kwɨjyɨga,
nigalambʉka,
manya nitsova ʉvʉnuasi.
Ʉmwene aavombile isiinu isi sivɨlɨ,
ʉlʉhʉʉvɨtso nʉ lwɨjyɨgo,
pakʉta ʉwe twɨ tukʉnkonga,
tʉkave amaka ga kʉgendelela ʉkʉmmʉʉvɨla ʉYɨɨsʉ ʉvɨ ʉNgʉlʉve atʉhʉʉviitse.
19 Mu wʉʉmi wiitu tukʉmmʉʉvɨla ʉYɨɨsʉ ʉvɨ avyʉta kyɨmɨhɨtso kya meeli.
ɄYɨɨsʉ ʉjwa ʉvɨ lʉhʉʉvɨlo lwitu,
vɨ ikʉtʉpa amaka nʉ lʉnotsehetso.
Ikange vɨ ipela inumbula tsiitu tsive ngʼangasu,
ikʉtʉlongolela ʉkwingila Pavʉvalatse pa Ngʉlʉve apalɨ kʉnsana kʉ lipasiya.
20 ɄYɨɨsʉ amalile ʉkʉlongola ʉkʉ kʉ vʉsumbe wa kʉtʉtanga ʉwe,
ikange vɨ nteeketsi ʉmbaha va sikutsooni mu lʉkɨndɨ lwa Melekizedeki.