5
1 Ʉnteeketsi ʉmbaha ʉvaveetsaga ʉvɨ ikwomolwa ʉkʉhʉma mu vaanu ambombelage ʉNgʉlʉve,
ikʉvɨɨmɨla avaanu avo.
Ikange ʉmwene ihʉmya ineekelo ni syavʉpe sya kʉhetsa ʉvʉtulanongwa ʉwʉ ʉmwene na vaanu valɨ nawo.
2 Iweesa ʉkʉvavonela ɨkɨsa avanine ʉwʉ vivomba ʉvʉtulanongwa kɨtsila kʉlʉmanya,
ʉlwakʉva namwene jyʉmwene inʼdekedeke nda veene.
3 Ɨkɨ kyʉ kɨɨnu jilondiwa ahʉmye ineekelo pa kʉvalatsa imbiivi tsa mwene jyʉmwene ni mbiivi tsa vanine.
4 Ikange,
nakʉli ʉmuunu ʉvɨ iweesa ʉkwɨjɨpa jyʉmwene ʉwɨɨmɨkiwa wa kʉva nteeketsi mbaha,
peene oomolwe nʉ Ngʉlʉve ndʉwʉ aamwomwe ʉAloni.a
5 Vʉvʉle vʉle najyʉ Kɨlɨsiti nɨɨjɨpe jyʉmwene ʉwɨɨmɨkiwa wa kʉva nteeketsi mbaha,
apeene aahalilwe nʉ Ngʉlʉve ʉpwʉ aambʉʉlile akata,
“Ʉve veeve Mwana vango,
ɨleelo ndyɨpelile Dadaajo.”b
6 Ikange apoonu apange ʉNgʉlʉve aatye,
“Ʉve ʉlɨ nteeketsi va sikutsooni,
mu lʉkɨndɨ lwa Melekizedeki.”cd
7 ɄYɨɨsʉ wʉ alɨ pa kɨlʉnga apa,
ɨɨsajile kwa Ngʉlʉve,
akansiima siitso nʉ kʉndɨlɨla kʉ limenyu ɨlivaha ʉlwakʉva ʉNgʉlʉve aale na maka ga kʉmpoka nʉ vʉswe.
e ɄNgʉlʉve ʉʉpɨlye inyɨsajo tsa mwene ʉlwakʉva aale mwɨdɨhɨtsi kʉ mwene.
8 Nʉpwʉ jɨngave aale Mwana va Ngʉlʉve,
ɨɨmanyiisiitse ʉkʉmwɨdɨkɨla ʉNgʉlʉve mu vʉkʉvɨlwa ʉwaambwene ʉmwene ʉYɨɨsʉ.
9-10 Ʉkʉhʉmana naago,
ʉNgʉlʉve aambɨɨkile ʉYɨɨsʉ ave vʉkwɨlanilo,
akampa ʉwɨɨmɨkiwa wa nteeketsi ʉmbaha ndʉ Melekizedeki.
Apo ʉYɨɨsʉ akava vɨ vʉtengʉlɨlo wa vʉpoki wa sikutsooni kʉ vaanu vooni avikʉmpʉlɨka ʉmwene.
Avaanu pavanogye vadʉlʉkage mu lwɨdɨko
11 Tʉlɨ nago mongosu ga kʉtsova ʉkʉkongana nɨ kulongwi ɨjɨ jya Yɨɨsʉ ʉkʉva vɨ nteeketsi ʉmbaha,
lɨno kʉvye kʉpala ʉmwakʉvavʉʉlɨla ʉnyie,
ʉlwakʉva mulɨndɨla ʉkʉmanyila.
12 Lɨno jɨkaale jɨleke ʉkʉva ewo,
ʉnsɨkɨ ʉgʉ mukaale mwiva mulɨ vamanyisi,
lɨno ʉnyie ʉkʉhʉma palya ʉkʉsika ɨleelo mupitsiige mulonda ʉkʉmanyiisiwa imanyiiso inatsi tsa limenyu lya Ngʉlʉve.
Ʉnyie mulɨ nda vaana avanyehe ʉwʉ vapitsiige vikwongʼa,
naviilya ɨkyakʉlya ɨkɨkangasu.
13 Manya ʉvaveetsaga ʉvɨ ihʉʉvɨla ʉkwongʼa kwene avyʉta mwana ʉnnyehe,
nakɨmanyili ɨkɨveetsaga mu manyiiso tsa vʉgolosu.
14 Lɨno avaanu avadʉlwike viilya ɨkyakʉlya ɨkɨkangasu,
manya vɨɨtsoveliitse ʉkʉtsagaalʉla inonu ni mbiivi.